໒໘. ໂຈຣວຕ຺ຖຸກຖາ

໙໑. ທິຏ຺ຐປຸພ຺ໂພຕິ ອງ຺ຄຸລິມາໂລ ປຸພ຺ເພ ທິຏ຺ໂຐ. ອຍນ຺ຕິ ໂຈໂຣ. ໂສຕິ ອງ຺ຄຸລິມາໂລ. ອຎ຺ເຎສໍ ສນ຺ຕິກາ ວຈນໍ ສຸຓນ຺ຕີຕິ ໂຍຊນາ. ເຕຕິ ມນຸສ຺ສາ. ອຸພ຺ພິຊ຺ຊນ຺ຕິປີຕິ ກາເຍນ ອຸພ຺ພິຊ຺ຊນ຺ຕິປິ. ອຸຕ຺ຕສນ຺ຕິປີຕິ ຈິຕ຺ເຕນ ອຸຕ຺ຕສນ຺ຕິປິ. ອງ຺ຄຸລິມາໂລ ຠິກ຺ຂູຫິ ນ ປພ຺ພາຊິໂຕ, ນນຸ ຠຄວຕາ ປນ ສຍໍ ປພ຺ພາຊິໂຕ, ອຖ ກສ຺ມາ ‘‘ນ ຠິກ຺ຂເວ’’ຕິ ວຸຕ຺ຕນ຺ຕິ ອາຫ ‘‘ຠຄວາ ສຍໍ ຘມ຺ມສ຺ສາມີ’’ຕິ. ຘມ຺ມສ຺ສາມີຕິ ຈ ຘມ຺ມສ຺ສ ອິສ຺ສໂຣ, ຘມ຺ເມນ ວາ ເທວມນຸສ຺ສານໍ ອິສ຺ສໂຣ, ອຘິປຕີຕິ ອຕ຺ໂຖ. ຠິກ຺ຂູນໍ ອກຣຓຕ຺ຖາຍ ຠິກ຺ຂູນໍ ສິກ຺ຂາປທນ຺ຕິ ໂຍຊນາ. ຕຕ຺ຖາຕິ ‘‘ນ ຠິກ຺ຂເວ’’ຕິອາທິວຈເນ. ‘‘ຘຊໍ ພນ຺ຘິຕ຺ວາ’’ຕິອາທິນາ ຘຊສ຺ສ ພນ຺ຘນໍ ຘຊພນ຺ໂຘ, ຘຊພນ຺ໂຘ ວິຍາຕິ ຘຊພນ຺ໂຘ, ຘຊພນ຺ໂຘ ຫຸຕ຺ວາ ຈຣຕີຕິ ຘຊພນ຺ໂຘຕິ ວຈນຕ຺ຖໍ ທສ຺ເສຕິ. ຕສ຺ມາຕິ ຍສ຺ມາ ຘຊພນ຺ໂຘ, ຕສ຺ມາ. ໂຍຕິ ໂຈໂຣ. ປນ຺ຖທຸຫນໍ ວາຕິ ປນ຺ເຖ ທຸຫນໍ ວາ. ປຎ຺ຎາຍຕິ ຈາຕິ ເອຕ຺ຖ ຈສທ຺ໂທ ວາກ຺ຍສມ຺ປິຓ຺ຑນຕ຺ໂຖ. ນ ເກວລຎ຺ຫິ ວິຈຣຕິເຍວ, ອຖ ໂຂ ປຎ຺ຎາຍຕິ ຈາຕິ ອຕ຺ໂຖ. ອິທນ຺ຕິ ໂຈຣກມ຺ມໍ. ຣຊ຺ຊນ຺ຕິ ຣາຊຠາວໍ. ໂສຕິ ຣາຊປຸຕ຺ໂຕ. ຫີຕິ ສຈ຺ຈໍ, ຍສ຺ມາ ວາ. ຕສ຺ມິນ຺ຕິ ຣາຊປຸຕ຺ເຕ. ປຸພ຺ເພຕິ ປຸພ຺ພກາເລ. ຕນ຺ຕິ ໂຈຣໍ. ເອວນ຺ຕິ ອິມິນາກາເຣນ, ຊານນ຺ຕິ ເຈຕິ ໂຍຊນາ. ອທິສ຺ສມານາຕິ ອຕ຺ຕານໍ ອປຎ຺ຎາຍມານາ. ອິທໍ ສນ຺ຘິຈ຺ເຉທາທິໂຈເຣ ສນ຺ຘາຍ ວຸຕ຺ຕໍ, ນ ອມ຺ພລພຸຊາທິໂຈເຣ. ປຈ຺ຉາປີຕິ ເຖຍ຺ຍກຣຓໂຕ ປຈ຺ຉາປິ. ເຕປີຕິ ໂຈເຣປິ.

໙໒. ຠເຍນາຕິ ຠຍໂຕ. ເອເຕ ປນາຕິ ຠິກ຺ຂູ ປນ. ລທ຺ຘາຠຍຕ຺ຕາຕິ ຣາຊໂຕ ລທ຺ໂຘ ອຠໂຍ ອິເມຫີຕິ ລທ຺ຘາຠຍາ, ເຕສໍ ຠາໂວ ລທ຺ຘາຠຍຕ຺ຕໍ, ຕສ຺ມາ. ກາຣເຠທໂກຕິ ເອຕ຺ຖ ກາຣສທ຺ໂທ ຣຸກ຺ຂວິເສເສ =໐໙ ຈ ສກ຺ກາເຣ ຈ ພນ຺ຘນາລເຍ ຈ ປວຕ຺ຕຕິ, ອິຘ ປນ ພນ຺ຘນາລເຍຕິ ທສ຺ເສນ຺ໂຕ ອາຫ ‘‘ກາຣໍ ວຸຈ຺ຈຕິ ພນ຺ຘນາຄາຣ’’ນ຺ຕິ. ພນ຺ຘນາຄາຣຎ຺ຫິ ກໂຣນ຺ຕິ ຕໍ ປເວສິເຕ ຊເນ ຫິໍສນ຺ຕິ ເອຕ຺ຖາຕິ ‘‘ກາຣາ’’ຕິ ວຸຈ຺ຈຕິ. ອິຘາຕິ ‘‘ກາຣເຠທໂກ’’ຕິປເທ. ທີປພນ຺ຘນໍ ວາ ໂຫຕູຕິ ໂຍຊນາ. ອິເມຫິ ປເທຫິ ນ ເກວລໍ ພນ຺ຘນາຄາຣໍເຍວ ກາຣາ ນາມ ໂຫຕິ, ອຖ ໂຂ ອນ຺ທຸພນ຺ຘນາທີນິປິ ກາຣາເຍວ ນາມາຕິ ທສ຺ເສຕິ. ໂຍຕິ ໂຈໂຣ. ເອເຕສູຕິ ພນ຺ຘເນສຸ. ມຸຎ຺ຈິຕ຺ວາ ວາຕິ ຣຊ຺ຊຸພນ຺ຘນໍ ນິພ຺ເພເຐຕ຺ວາ ວາ. ອິເມຫິ ປເທຫິ ນ ເກວລໍ ກາຣາຍ ຠິນ຺ທນໂຕ ເອວ ກາຣເຠທໂກ ນາມ ໂຫຕິ, ອຖ ໂຂ ຉິນ຺ທນມຸຎ຺ຈນວິວຣເຓຫິປິ ກາຣເຠທໂກເຍວ ນາມາຕິ ທສ຺ເສຕິ. ທີປນ຺ຕຣນ຺ຕິ ພນ຺ຘນທີປໂຕ ອນ຺ຕຣໍ ອຎ຺ຎໍ ທີປນ຺ຕິ ອຕ຺ໂຖ. ຈກ຺ກວາຬພນ຺ຘນໍ ຠິນ຺ທິຕ຺ວາ ຈກ຺ກວາຬນ຺ຕຣໍ ຄໂຕ ອຏ຺ຐກຖາຍໍ ນ ວຸຕ຺ໂຕ. ໂສຕິ ນໂຈຣໂກ. ຄາມນິຄມປຏ຺ຏນາທີນີຕິ ເອຕ຺ຖ ປຏ຺ຏນນ຺ຕິ ນາວາປຏ຺ຏນໍ, ສກຏປຏ຺ຏນຎ຺ຈ. ເກຓິຍາຕິ ຣຎ຺ໂຎ ທາຕພ຺ພອາເຍນ. ຕນ຺ຕິ ເກຓິໍ. ນິຘານນ຺ຕິ ນິກ຺ຂຓິຕ຺ວາ ຐປິຕໍ ຘນໍ. ອຸປສໍຫຣິຕ຺ວາຕິ ຣາຊາທີນໍ ສນ຺ຕິກໍ ຫຣິຕ຺ວາ. ຕນ຺ຕິ ກສິກມ຺ມາທີຫິ ສມ຺ປາເທຕ຺ວາ ຊີວນ຺ຕໍ. ຕຕ຺ເຖວາຕິ ພນ຺ຘາປິຕຏ຺ຐາເນເຍວ.

໙໓. ຍຕ຺ຖາຕິ ຍສ຺ມິໍ ຐາເນ. ໂຍ ໂກຈິ ປລາໂຕຕິ ສມ຺ພນ຺ໂຘ. ນນ຺ຕິ ຍໍ ກິຎ຺ຈິ ຊນໍ, ລິຂາເປຕີຕິ ໂຍຊນາ. ປຓ຺ເຓ ວາຕິ ກຸເສ ວາ. ອສ຺ສາຕິ ຊນສ຺ສ. ທຓ຺ຑນ຺ຕິ ຘນທຓ຺ຑໍ. ລິຂິຕໂກຕິ ລິຂິຕພ຺ໂພຕິ ລິຂິໂຕ, ໂສເຍວ ລິຂິຕໂກ.

໙໔. ໂຍ ປນ ກສາຫິ ຫຎ຺ຎຕີຕິ ສມ຺ພນ຺ໂຘ. ອິມິນາ ອຎ຺ເຎຫິ ກສາຫິ ຫຎ຺ຎຕີຕິ ກສາຫໂຕຕິ ວຈນຕ຺ຖໍ ທສ຺ເສຕິ. ‘‘ອຍເມວ ເຕ ທຓ຺ໂຑ ໂຫຕູ’’ຕິ ອິມິນາ ກຕໍ ທຓ຺ຑກມ຺ມໍ ອິມສ຺ສາຕິ ກຕທຓ຺ຑກມ຺ໂມຕິ ວຈນຕ຺ຖໍ ທສ຺ເສຕິ. ອລ຺ລວໂຓຕິ ຕິນ຺ຕວໂຓ. ຆາເຕຕ຺ວາຕິ ຫນິຕ຺ວາ ປຫຣິຕ຺ວາຕິ ອຕ຺ໂຖ. ຄຓ຺ຑິຄຓ຺ຑິໂຍຕິ ໂຜຏໂຜຏາ. ສນ຺ນິສິນ຺ນາສູຕິ ຄຓ຺ຑີສຸ ປກຕິສຣີເຣນ ສມໍ ນິສິນ຺ນາສຸ.

໙໕. ກຕທຓ຺ຑກມ຺ມຠາໂວ ຕາວ ປຸຣິມນເຍເນວ ເວທິຕພ຺ໂພ ໂຫຕຸ, ກຖໍ ປນ ລກ຺ຂຓາຫຕຠາໂວ ເວທິຕພ຺ໂພຕິ ອາຫ ‘‘ຍສ຺ສ ປນາ’’ຕິອາທິ. ຕຕ຺ຖ ຕຕ຺ເຕນາຕິ ຕາເປນ. ລກ຺ຂຓນ຺ຕິ ສຎ຺ຎາຓໍ. ໂສຕິ ຊໂນ. ຠຸຊິສ຺ໂສຕິ ຠຸໂຊ ເອຕສ຺ສຕ຺ຖີຕິ ຠຸຊິສ຺ໂສ (ມ. ນິ. ຏີ. ໒.໔໒໖). ປເຣຫິ ອປາລິໂຕ ຈ ອນຊ຺ໂຌຫຣາປິໂຕ ຈ ຫຸຕ຺ວາ ສຍເມວ ອຕ຺ຕານໍ ປາລເນນ ຈ ໂຠຊນໍ ອຊ຺ໂຌຫຣເຓນ ຈ ສມນ຺ນາຄໂຕຕິ ວຸຕ຺ຕໍ ໂຫຕິ. ອສ຺ສາຕິ ລກ຺ຂຓາຫຕສ຺ສ. ວຓາຕິ ອຣູນິ. ຕານິ ຫິ ຍສ຺ມາ ວຓນ຺ຕິ ຄຕ຺ຕານິ ວິຈຸຓ຺ຓານິ ກໂຣນ຺ຕິ, ຕສ຺ມາ ວຓາຕິ ວຸຈ຺ຈນ຺ຕິ. ຣູຬ຺ຫາຕິ ຕຣຸຓມໍເສນ ຣຸຫາ. ຕິມຓ຺ຑລວຕ຺ຖສ຺ສ ລກ຺ຂຓາຫຕສ຺ສ ຊນສ຺ສາຕິ ສມ຺ພນ຺ໂຘ.