໒໗. ຣາຊຠຏວຕ຺ຖຸກຖາ

໙໐. ອຸຈ຺ຈິນຖາຕິ ເອຕ຺ຖ ຈິຘາຕຸຍາ ວຑ຺ຒນຕ຺ຖໍ ທສ຺ເສນ຺ໂຕ ອາຫ ‘‘ວຑ຺ເຒຖາ’’ຕິ. ໂສຕາປນ຺ນຕ຺ຕາຕິ ພິມ຺ພິສາຣຣຎ຺ໂຎ =໐໘ ໂສຕາປນ຺ນຠາວໂຕ. ຆາເຕຖາຕິ ຊີວິຕາ ໂວໂຣເປຖ. ຫນຖາຕິ ປຫຣຖ. ຕໂຕຕິ ອຸປຊ຺ຌາຍໂຕ. ອາຈຣິໂຍ ເສຏ຺ໂຐຕິ ສມ຺ພນ຺ໂຘ. ຕໂຕຕິ ອາຈຣິຍໂຕ. ອິທນ຺ຕິ ວຈນໍ, ອາຄຕນ຺ຕິ ສມ຺ພນ຺ໂຘ. ອາຫໍສຸ ໂວຫາຣິກາ ມຫາມຕ຺ຕາ ມຸສາວາເທນາຕິ ໂຍຊນາ. ອມຈ຺ໂຈຕິ ສພ຺ພຣາຊກິຈ຺ເຈສຸ ອມາ ສຫ ຣຎ຺ຎາ ຠວຕີຕິ ອມຈ຺ໂຈ. ອມາສທ຺ໂທ ສຫຕ຺ເຖ ນິປາໂຕ. ‘‘ອມາ’’ຕິ ນິປາຕໂຕ ຠວຕ຺ເຖ ອຈ຺ຈປຈ຺ຈໂຍ (ໂມຄ຺ຄລ຺ລາເນ ໔.໒໓ ສຸຕ຺ເຕ). ມຫາມຕ຺ໂຕຕິ ມຫນ຺ໂຕ ມຕ຺ຕາ ອິສ຺ສຣິຍາ ເອຕສ຺ສາຕິ ມຫາມຕ຺ໂຕ. ມຕ຺ຕາສທ຺ໂທ ເຫຕ຺ຖ ອິສ຺ສຣິຍວາຈໂກ. ເສວໂກຕິ ຣາຊານໍ ເສວຕິ ຠຊຕີຕິ ເສວໂກ. ຠຕ຺ຕເວຕນຠໂຏຕິ ຠຕ຺ຕເວຕນານມຕ຺ຖາຍ ຠໂຏ. ຕສ຺ສາຕິ ຣາຊຠຏສ຺ສ. ປຸຕ຺ຕນຕ຺ຕຠາຕຸກາທໂຍຕິອາທິສທ຺ເທນ ຠາຄິເນຍ຺ຍາທໂຍ ສງ຺ຄຓ຺ຫາຕິ. ໂຍ ປນາຕິ ຣາຊຠໂຏ ປນ. ນິຍ຺ຍາເຕຕີຕິ ອປ຺ເປຕິ. ຕໍ ຐານນ຺ຕິ ຕໍ ຣາຊຠຏຏ຺ຐານໍ. ເຍນ ວາຕິ ກມ຺ມກາເຣນ ວາ. ຍໍກມ຺ມກາຣຓາຕິ ຍສ຺ສ ກມ຺ມສ຺ສ ກາຣຓາ. ໂຍ ວາຕິ ຣາຊຠໂຏ ວາ. ປພ຺ພຊສ຺ສູຕິ ປພ຺ພາເຊຫິ.