໑໐. ກຓ຺ຏກສິກ຺ຂາປທໍ

໔໒໘. ທສເມ ອຣິຏ຺ຐສ຺ສ ອຸປ຺ປນ຺ນໍ ວິຍ ເອຕສ຺ສາປິ ອຸປ຺ປນ຺ນນ຺ຕິ ໂຍຊນາ. ອຸມ຺ມຊ຺ຊນ຺ຕສ຺ສາຕິ ມນສິກໂຣນ຺ຕສ຺ສ. ສໍວາສສ຺ສ ນາສນາ ສໍວາສນາສນາ. ລິງ຺ຄສ຺ສ ນາສນາ ລິງ຺ຄນາສນາ. ທຓ຺ຑກມ຺ເມນ ນາສນາ ທຓ຺ຑກມ຺ມນາສນາ. ຕຕ຺ຖາຕິ ຕິວິຘາສຸ ນາສນາສຸ. ທູສໂກ…ເປ… ນາເສຖາຕິ ເອຕ຺ຖ ອຍໍ ນາສນາ ລິງ຺ຄນາສນາ ນາມາຕິ ໂຍຊນາ. ອຍນ຺ຕິ ທຓ຺ຑກມ຺ມນາສນາ. ອິຘາຕິ ອິມສ຺ມິໍ ສິກ຺ຂາປເທ, ‘‘ນາເສຕູ’’ຕິ ປເທ ວາ. ຕຕ຺ຖາຕິ ປຸຣິມວຈນາເປກ຺ຂໍ, ‘‘ເອວຎ຺ຈ ປນ ຠິກ຺ຂເວ’’ຕິ ອາທິວຈເນຕິ ອຕ຺ໂຖ. ປິເຣຕິ ອາມນ຺ຕນປທໍ ປຣສທ຺ເທນ ສມານຕ຺ຖນ຺ຕິ ອາຫ ‘‘ປຣາ’’ຕິ. ‘‘ອມ຺ຫາກໍ ອນຊ຺ຌຕ຺ຕິກຠູຕ’’ອິຕິ ວາ ‘‘ອມ຺ຫາກໍ ປຈ຺ຈນີກຠູຕ’’ ອິຕິ ວາ ອຕ຺ໂຖ ທຏ຺ຐພ຺ໂພ. ‘‘ອມາມກ’’ອິຕິປເທນ ‘‘ປຣ’’ອິຕິປທສ຺ສ ອຘິປ຺ປາຍຕ຺ຖໍ ທສ຺ເສຕິ. ອມ຺ເຫ ນມມາຍກ, ອມ຺ເຫຫິ ວາ ນມມາຍິຕພ຺ພ ອິຕິ ອຕ຺ໂຖ. ‘‘ອມ຺ຫາມກ’’ອິຕິປິ ຫກາຣຍຸຕ຺ໂຕ ປາໂຐ. ອມ຺ເຫຫິ ອາມກອິຕິ ອຕ຺ໂຖ. ຍຕ຺ຖາຕິ ຍສ຺ມິໍ ຐາເນ. ເຕຕິ ອຸປໂຍຄຕ຺ເຖ ສາມິວຈນໍ, ຕນ຺ຕິ ອຕ຺ໂຖ. ຕວ ຣູປສທ຺ເທ ວາຕິ ສມ຺ພນ຺ໂຘ. ນ ປສ຺ສາມາຕິ ນ ປສ຺ສາມ, ນ ສຸຓາມ.

໔໒໙. ເຕນາຕິ ສາມເຓເຣນ. ‘‘ກາຣາເປຍ຺ຍາ’’ຕິ ປເທ ກາຣິຕກມ຺ມນ຺ຕິ. ທສມໍ.

ສປ຺ປາຓກວຄ຺ໂຄ ສຕ຺ຕໂມ.