໗. ຘນຎ຺ຊານິສຸຕ຺ຕວຓ຺ຓນາ

໔໔໕. ຣາຊຄຫໍ ປຣິກ຺ຂິປິຕ຺ວາ ຐິຕປພ຺ພຕສ຺ສາຕິ ປຓ຺ຑວປພ຺ພຕໍ ສນ຺ຘາຍາຫ. ຣາຊຄຫນຄຣສ຺ສ ທກ຺ຂິຓທິສາຠາເຄ ປພ຺ພຕສ຺ສ ສມີເປ ຐິໂຕ ຊນປໂທ ທກ຺ຂິຓາຄິຣິ. ຕຓ຺ຑຸລປຸຏການໍ ປາລິ ເອຕ຺ຖາຕິ ຕຓ຺ຑຸລປາລິ. ຕສ຺ສ ກິຣ ທ຺ວາຣສມີເປ ຕຓ຺ຑຸລວາຓິຊາ ຕຓ຺ຑຸລປສິພ຺ພເກ ວິວຣິຕ຺ວາ ປຏິປາຏິຍາ ຐເປຕ຺ວາ ນິສີທນ຺ຕິ, ເຕນສ຺ສ ‘‘ຕຓ຺ຑຸລປາລິທ຺ວາຣ’’ນ຺ຕິ ສມຎ຺ຎາ ອໂຫສິ. ສພ຺ພເມວ ສສ຺ສໍ ຄຓ຺ຫາຕີຕິ ທລິທ຺ທກສ຺ສການໍ ທິວສປຣິພ຺ພຍມຕ຺ຕເມວ ວິສ຺ສຊ຺ເຊຕ຺ວາ ສພ຺ພເມວ ອາຍໂຕ ນິປ຺ຜນ຺ນໍ ຘຎ຺ຎໍ ຄຓ຺ຫາຕິ. ມນ຺ທສສ຺ສານີຕິ ມນ຺ທນິປ຺ຜຕ຺ຕິການິ ສສ຺ສານິ.

໔໔໖. ອິມິນາ ນເຍນາຕິ ທາສກມ຺ມກຣສ຺ສ ນິວາສນຠຕ຺ຕເວຕ຺ຕນານຸປ຺ປທາເນນ ມງ຺ຄລທິວເສສຸ ຘນວຕ຺ຖາລງ຺ກາຣານຸປ຺ປທານາທິນາ ຈ ໂປເສຕພ຺ໂພ. ມິຕ຺ຕາມຈ຺ຈານໍ ປິຍວຈນອຕ຺ຖຈຣິຍາສມານຕ຺ຕຕາທິ ມິຕ຺ຕາມຈ຺ຈກຣຓີຍໍ ກຕ຺ຕພ຺ພໍ, ຕຖາ ຎາຕິສາໂລຫິຕານໍ. ຕຕ຺ຖ ອາວາຫວິວາຫສມ຺ພທ຺ເຘນ ‘‘ອມ຺ຫາກໍ ອິເມ’’ຕິ ຎາຍນ຺ຕີຕິ ຎາຕີ, ມາຕາປິຕາທິສມ຺ພທ຺ຘຕາຍ ສມານໂລຫິຕາຕິ ສາໂລຫິຕາ. ສມ຺ມາ ທທນ຺ເຕສຸປິ ອສຊ຺ຊນໂຕ ນຕ຺ຖິ ເອເຕສໍ ຕິຖີຕິ ອຕິຖິ, ເຕສໍ ອຕ຺ຕນາ ສມານປຣິໂຠຄວເສນ ອຕິຖິກຣຓີຍໍ ກາຕພ຺ພໍ, ອຕິຖິພລີຕິ ອຕ຺ໂຖ. ຎາຕກຠູຕປຸພ຺ພາ ເປຕ຺ຕິວິສຍໍ ອຸປຄຕາ ປຸພ຺ພເປຕາ, ທກ຺ຂິເຓຍ຺ເຍສຸ ກາເລນ ກາລໍ ທານໍ ທຕ຺ວາ ເຕສໍ ອຸທ຺ທິສນໍ ປຸພ຺ພເປຕກຣຓີຍໍ, ເປຕພລີຕິ ອຕ຺ໂຖ. ຄນ຺ຘປຸປ຺ຜວິເລປນຊາລາຠຕ຺ເຕຫິ ກາເລນ ກາລໍ ເທວຕານໍ ປູຊາ ເທວຕາກຣຓີຍໍ, ເທວຕາພລີຕິ ອຕ຺ໂຖ, ຣາຊກິຈ຺ຈກຣຓໍ ອຸປຏ຺ຐານໍ ຣາຊກຣຓີຍໍ. ອຍມ຺ປິ ກາໂຍຕິ ອຕ຺ຕໂນ ກາຍໍ ສນ຺ຘາຍ ວທຕິ. ອິມມຕ຺ຖໍ ສນ຺ຘາຍາຫ ‘‘ອິມິນາ ນເຍນ ອຕ຺ໂຖ ເວທິຕພ຺ໂພ’’ຕິ.

໔໔໗. ປຎ຺ຈ ທຸສ຺ສີລ຺ຍກມ຺ມານີຕິ ນິຈ຺ຈສີລປຏິປກ຺ຂຘມ຺ມາ. ທສ ອກຸສລກມ຺ມປຖຘມ຺ມາ ທສ ທຸສ຺ສີລ຺ຍກມ຺ມານິ. ອຘມ຺ມຈາຣີ ເອວ ວິສມຈາຣີ ກາຍວິສມາທິຈຣຓໂຕຕິ ວິສມຈາຣີປທສ຺ສ ອຕ຺ໂຖ ວິສຸໍ ນ ວຸຕ຺ໂຕ.

໔໔໘-໔໕໓. ໂອສຣນ຺ຕິ ອປສກ຺ກນ຺ຕິ, ຂີຍນ຺ຕີຕິ ອຕ຺ໂຖ. ເຕນາຫ ‘‘ປຣິຫາຍນ຺ຕີ’’ຕິ. ອຠິສຣນ຺ຕີຕິ ອຠິວຑ຺ຒນວເສນ ປວຕ຺ຕນ຺ຕິ. ເຕນາຫ ‘‘ວຑ຺ຒນ຺ຕີ’’ຕິ. ຕຕ຺ຣາຕິ ພ຺ຣຫ຺ມໂລເກ. ອສ຺ສາຕິ ພ຺ຣຫ຺ມໂລເກ ອຸປ຺ປນ຺ນສ຺ສ ຘນຎ຺ຊານິສ຺ສ. ຕໂຕ ປຏ຺ຐາຍາຕິ ຍທາ ຠຄວຕາ ‘‘ເອໂສ, ຠິກ຺ຂເວ, ສາຣິປຸຕ຺ໂຕ’’ຕິອາທິ ວຸຕ຺ຕໍ, ຕໂຕ ປຏ຺ຐາຍ. ຈຕຸສຈ຺ຈວິນິມຸຕ຺ຕນ຺ຕິ ນິທ຺ຘາເຣຕ຺ວາ ວິຠຊິຕ຺ວາ ວຸຈ຺ຈມາເນຫິ ສຈ຺ເຈຫິ ວິມຸຕ຺ຕໍ. ອຕ຺ຖໂຕ ປນ ຕໂຕ ປຸພ຺ເພປິ ສຈ຺ຈວິມຸຕ຺ຕໍ ກຖໍ ນ ກເຖສິເຍວ ສຈ຺ຈວິມຸຕ຺ຕສ຺ສ ນິຍ຺ຍານສ຺ສ ອຠາວໂຕ.

ຘນຎ຺ຊານິສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.