໖. ເອສຸກາຣີສຸຕ຺ຕວຓ຺ຓນາ

໔໓໗. ໂກຏ຺ຐາສນ຺ຕິ ມໍສຠາຄໍ. ລຄ຺ຄາເປຍ຺ຍຸນ຺ຕິ ນ຺ຫາຣຸນາ ວາ ວາເກນ ວາ ພນ຺ຘິຕ຺ວາ ປຸຣິສສ຺ສ ຫຕ຺ເຖ ວາ ວສນເຄເຫ ວາ ໂອລມ຺ພນວເສນ ພນ຺ເຘຍ຺ຍຸໍ. ສຕ຺ຖຘມ຺ມນ຺ຕິ ສຕ຺ຖິເກສຸ ສຕ຺ຖວາເຫນ ປເຓຕພ຺ພໍ ອາຓາຘມ຺ມໍ. ຕສ຺ສ ນິກ຺ຂມນຕ຺ຖນ຺ຕິ ຕໍ ມູລໍ ສຕ຺ຖິເກຫິ ນິຕ຺ຖຣຓຕ຺ຖໍ. ປາປໍ ອສ຺ສາຕິ ປຣິຈຣນ຺ຕສ຺ສ ປາຣິຈຣິຍາຍ ອຫິຕໍວ ອສ຺ສ. ເຕນາຫ ‘‘ນ ເສຍ຺ໂຍ’’ຕິ. ອຸຈ຺ຈກຸລີນາທໂຍ ທຸຕິຍວາຣາທີຫິ ວຸຈ຺ຈນ຺ຕິ, ອິຘ ອຸປຘິວິປຕ຺ຕິສມ຺ປຕ຺ຕິໂຍ ປາປິຍາທິປເທຫິ ວຸຕ຺ຕາຕິ ອຘິປ຺ປາໂຍ. ເຕນາຫ – ‘‘ປາປິໂຍຕິ ປາປໂກ ລາມໂກ ອຕ຺ຕຠາໂວ ອສ຺ສາ’’ຕິ. ເສຍ຺ຍໍໂສຕິ ຫິຕໂກຏ຺ຐາໂສ, ຫິຕສຠາໂວຕິ ອຕ຺ໂຖ. ອຸຈ຺ຈກຸລີນຕາຕິ ກຣຓຕ຺ເຖ ປຈ຺ຈຕ຺ຕວຈນນ຺ຕິ ອາຫ ‘‘ອຸຈ຺ຈາກຸລີນຕ຺ເຕນາ’’ຕິ. ‘‘ວຓ຺ໂຓ ນ ຂີເຍຖ ຕຖາຄຕສ຺ສາ’’ຕິອາທີສຸ (ທີ. ນິ. ອຏ຺ຐ. ໑.໓໐໕; ໓.໑໔໑; ມ. ນິ. ອຏ຺ຐ. ໒.໔໒໕; ອຸທາ. ໕໓; ອປ. ອຏ຺ຐ. ໒.໗.໒໐; ພຸ. ວໍ. ອຏ຺ຐ. ໔.໔; ຈຣິຍາ. ອຏ຺ຐ. ໑.ນິທານກຖາ; ໒.ປກິຓ຺ຓກກຖາ; ທີ. ນິ. ຏີ. ໑.ຄນ຺ຖາຣມ຺ຠກຖາວຓ຺ຓນາ; ສໍ. ນິ. ຏີ. ໑.໒.໑; ອ. ນິ. ຏີ. ໑.໑.໑; ວຊິຣ. ຏີ. ຄນ຺ຖາຣມ຺ຠກຖາວຓ຺ຓນາ; ສາຣຕ຺ຖ. ຏີ. ໑.ຄນ຺ຖາຣມ຺ຠກຖາວຓ຺ຓນາ; ເນຕ຺ຕິ. ຏີ. ຄນ຺ຖາຣມ຺ຠກຖາວຓ຺ຓນາ; ມ. ນິ. ຏີ. ໑.໑) ວິຍ ວຓ຺ຓສທ຺ໂທ ອິຘ ປສໍສາປຣິຍາໂຍຕິ ອາຫ ‘‘ເວສ຺ໂສປິ ຫິ ອຸຬາຣວຓ຺ໂຓ ໂຫຕີ’’ຕິ.

໔໔໐. ‘‘ນິຣໂວ ປທສທ຺ໂທ ໂສຬາຣໂຄຕ຺ຕສ຺ສ ອກິຓ຺ຓມຕ຺ຕິກາປຕ຺ໂຕ ຕິຏ຺ເຐຍ຺ຍ ອສງ຺ຄຈາຣີ’’ຕິ ວຸຕ຺ຕຕ຺ຕາ ຠິກ຺ຂາ ຈຣິຕພ຺ພາວ, ອຍໍ ເຕສໍ ກຸລຘມ຺ໂມຕິ ອຘິປ຺ປາໂຍ. ຫຣິຕ຺ວາຕິ ອປເນຕ຺ວາ. ສຕ຺ຕຊີໂວ ສຕ຺ຕວາຓິຊໂກ. ໂຄເປຕິ ຣກ຺ຂຕີຕິ ໂຄໂປ, ອາຣກ຺ຂາຘິກາເຣ ນິຍຸຕ຺ໂຕ. ອສນ຺ຕິ ລູນນ຺ຕິ ເຕນາຕິ ອສິຕໍ, ລວິຕ຺ຕໍ. ວິວິຘໍ ຠາຣໍ ອາຠຎ຺ຊນ຺ຕິ ໂອລມ຺ພນ຺ຕິ ເອຕ຺ຖາຕິ ພ຺ຍາຠງ຺ຄີ, ກາຊໍ.

໔໔໑. ອນຸສ຺ສຣໂຕຕິ ອນຸສ຺ສຣຓເຫຕຸ ກຸລວໍສານຸສ຺ສຣຓກ຺ຂເຓ ຂຕ຺ຕິໂຍຕິອາທິນາ ສງ຺ຂ຺ຍໍ ຄຈ຺ຉຕິ. ເຕນາຫ ‘‘ໂປຣາເຓ…ເປ… ອນຸສ຺ສຣິຍມາເນ’’ຕິ. ອຸຈ຺ຈນີຈຕ຺ຕຊານນຕ຺ຖຎ຺ຈ ກຸລວວຕ຺ຖານໍ ກຕໍ ໂຫຕີຕິ ຂຕ຺ຕິຍາທິກຸລກມ຺ມຸນາ ເຕສໍ ຈຕຸນ຺ນໍ ວຓ຺ຓານໍ ສນ຺ຘນໍ ຊີວິກໍ ປຎ຺ຎເປນ຺ຕິ ພ຺ຣາຫ຺ມຓາ, ຕຖາຄໂຕ ປນ ໂລກຸຕ຺ຕຣຘມ຺ມເມວ ປຸຣິສສ຺ສ ສນ຺ຘນໍ ປຎ຺ຎເປຕິ ເຕນ ສຕ຺ຕສ຺ສ ໂລກຄ຺ຄຠາວສິທ຺ຘິໂຕ. ເສສໍ ສຸວິຎ຺ເຎຍ຺ຍເມວ.

ເອສຸກາຣີສຸຕ຺ຕວຓ຺ຓນາ ລີນຕ຺ຖປ຺ປກາສນາ ສມຕ຺ຕາ.