໔. ໂຆຏມຸຂສຸຕ຺ຕວຓ຺ຓນາ

໔໑໒. ເຂມິຍາ ນາມ ຣຎ຺ໂຎ ເທວິຍາ ໂຣປິຕຕ຺ຕາ ຕໍ ອມ຺ພວນໍ ເຂມິຍມ຺ພວນນ຺ຕິ ວຸຈ຺ຈຕີຕິ ວທນ຺ຕິ. ຘມ຺ມິໂກຕິ ຘມ຺ມຍຸຕ຺ໂຕ ສພ຺ພໂສວ ອຘມ຺ມໍ ປຫາຍ ຘມ຺ເມ ຐິໂຕ. ປຣິພ຺ພຊຕິ ປພ຺ພຊຕິ ເອເຕນາຕິ ປຣິພ຺ພໂຊ, ຆຣາວາສໂຕ ນິກ຺ຂມນປຸພ຺ພກໍ ລິງ຺ຄຄ຺ຄຫຓວເສນ ສີລສມາທານໍ. ເອຕ຺ຖາຕິ ເອຕສ຺ມິໍ ປຣິພ຺ພເຊ. ສຠາໂວຕິ ຕໍ ປຣິພ຺ພາຊນິຍໍ, ເຕຫິ ເຕຫິ ປຣິພ຺ພາຊເກຫິ ອນຸຏ຺ຐາຕພ຺ໂພ ປຏິປຕ຺ຕິຘມ຺ມສງ຺ຂາໂຕ ສຠາໂວ. ຘມ຺ໂມວ ປມາຓນ຺ຕິ ເອເຕນ ມຍໍ ອຫິຣິມນາ ຈິຕ຺ຕສ຺ສ ຍຖາອຸປຏ຺ຐິຕໍ ກເຖມ, ຕສ຺ມາ ຕໍ ອປ຺ປມາຓໍ, ໂຍ ປເນຕ຺ຖ ອວິຕໂຖ ຘມ຺ໂມ, ຕເທວ ປມາຓໍ. ອຘິຄຕປຏິປຕ຺ຕິສງ຺ຂາໂຕ ສຠາໂວ ອຕ຺ຖິ, ຕສ຺ສ ຕຸມ຺ເຫຫິ ຕຸມ຺ເຫຫິ ພຫຸນາ ນານາສນ຺ທສ຺ສນາທິ ກມ຺ເມນ ອິຘ ຠວິຕພ຺ພໍ, ພຫຸເທເວຕ຺ຖ ວຕ຺ຕພ຺ພນ຺ຕິ ອຘິປ຺ປາໂຍ.

໔໑໔. ສາຣຕ຺ຕຣຕ຺ຕາຕິ ສາຣຊ຺ຊນວເສນ ຣຕ຺ຕາ, ພຫຸລຣາຄວເສນ ອຠິຣຕ຺ຕາຕິ ອຕ຺ໂຖ. ອຕ຺ຕນາ ຎາເປຕພ຺ພມຕ຺ຖໍ ອນຸຄ຺ຄຫາເປຕິ ໂພເຘຕີຕິ ອນຸຄ຺ຄໂຫ, ຎາປິຕກາຣຓໍ, ສຫ ອນຸຄ຺ຄເຫນາຕິ ສານຸຄ຺ຄຫາ. ເຕນາຫ ‘‘ສກາຣຓາ’’ຕິ. ກິໍ ປນ ຕໍ ກາຣຓໍ? ອິມສ຺ສາຘິປ຺ປາໂຍ ‘‘ນຕ຺ຖິ ຘມ຺ມິໂກ ປຣິພ຺ພໂຊ’’ຕິ ມຍາ ວຸຕ຺ໂຕ, ອທ຺ຘາ ປນາຍສ຺ມາ ອຸເທໂນ ຍາຖາວໂຕ ຘມ຺ມິກໍ ປຣິພ຺ພຊໍ ເມ ອາຈິກ຺ຂຕີຕິ. ເຕນາຫ ‘‘ວຸຕ຺ຕຎ຺ເຫຕ’’ນ຺ຕິອາທິ.

໔໒໑. ສພ຺ພມິທໍ ຖາວຣຊງ຺ຄມໍ ປຸຣິສກຕໍ, ຕສ຺ມາ ຍໍ ກິຎ຺ຈິ ກຕ຺ວາ ອຕ຺ຕາ ໂປເສຕພ຺ໂພ ຣກ຺ຂິຕພ຺ໂພຕິ ໂລກາຍຕນິສ຺ສິໂຕ ນີຕິມຄ຺ໂຄ ໂຆຏມຸຂກນ຺ໂຕ, ຕສ຺ມາ ອາຫ ‘‘ເອຕສ຺ສ ກິຣ ຊານນສິປ຺ເປ’’ຕິອາທິ. ສຄ຺ເຄ ນິພ຺ພຕ຺ໂຕ ນາມ ນຕ຺ຖິ ອກຕ຺ຕພ຺ພເມວ ກຣຓໂຕ. ເທວໂລກປຣິຍາປນ຺ນຘນໍ ມນຸສ຺ສານໍ ອຸປກປ຺ປປຸຎ຺ຎາຠາວໂຕ ປຸພ຺ເພ ອຕ຺ຕນາ ນິຫິຕຘນໍ ‘‘ອສຸເກ ຈາ’’ຕິ ອາຈິກ຺ຂິຕ຺ວາ ຄໂຕ. ເສສໍ ສຸວິຎ຺ເຎຍ຺ຍເມວ.

ໂຆຏມຸຂສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.