໓. ອສ຺ສລາຍນສຸຕ຺ຕວຓ຺ຓນາ

໔໐໑. ອຎ຺ຎມຎ຺ຎວິສິຏ຺ຐຕ຺ຕາ ວິສທິສໍ ຣຊ຺ຊໍ ວິຣຊ຺ຊໍ, ວິຣຊ຺ຊໂຕ ອາຄຕາ, ຕຕ຺ຖ ຊາຕາຕິ ວາ ເວຣຊ຺ຊກາ, ເອວໍ ຊາຕາ ໂຂ ປນ ເຕ, ຍສ຺ມາ ວຕ຺ຖາຠຣຓາທິວິຠາເຄນ ນານປ຺ປກາຣາ ໂຫນ຺ຕິ, ຕສ຺ມາ ວຸຕ຺ຕໍ ‘‘ນານາເວຣຊ຺ຊການ’’ນ຺ຕິ. ອຏ຺ຐກຖາຍໍ ປນ ເວຣຊ຺ຊສ຺ເສວ ວເສນ ນານປ຺ປກາຣຕາ ວຸຕ຺ຕາ. ຍຎ຺ຎຸປາສນາທິນາຕິ ຍຎ຺ຎານຸຠວນມນ຺ຕຊ຺ເຌນທກ຺ຂິຓປຣິເຍສນາທິນາ. ຈຕຸວຓ຺ຓສາຘາຣຓນ຺ຕິ ຂຕ຺ຕິຍາທີນໍ ຈຕຸນ຺ນໍ ວຓ຺ຓານໍ ສາຘາຣຓໍ ສໍສາຣສຸທ຺ຘິປາປຕສ຺ສນໍ. ນ຺ຫານສຸທ຺ຘິຍາຕິ ຕິຕ຺ຖສມຸທ຺ທຂາເຕສຸ ມນ຺ຕຊປ຺ປນປຸພ຺ພກໍ ສາຍໍຕຕິຍອຸທໂກໂຣຫນາທິນ຺ຫານສຸທ຺ຘິຍາ. ຠາວນາສຸທ຺ຘິຍາຕິ ປຣມໂຊຕິຠູຕາຍ ປຸຣິສຠາວນາສງ຺ຂາຕາຍ ສຸທ຺ຘິຍາ. ວາປິຕສິໂຣຕິ ໂອໂຣປິຕເກໂສ. ຕເມວ ຫິ ສິໂຣ ວາປິຕນ຺ຕິ ວຸຈ຺ຈຕິ.

ສຠາວວາທີຕິ ຍຖາຠູຕວາທີ. ປພ຺ພຊນ຺ຕາຕິ ພ຺ຣາຫ຺ມຓປພ຺ພຊ຺ຊໍ ອຸປຄຈ຺ຉນ຺ຕາ, ຕສ຺ມາ ພ຺ຣາຫ຺ມຓານໍ ປພ຺ພຊ຺ຊາວິຘານໍ ສິກ຺ຂນ຺ເຕນ ໂຠຕາ ‘‘ພ຺ຣາຫ຺ມຓາວ ສຸຊ຺ຌນ຺ຕິ, ໂນ ອພ຺ຣາຫ຺ມຓາ’’ຕິ ອຍໍ ວິຘິ ສເຫຕຸໂກ ສອຸປາທາໂນ ສກ຺ກຈ຺ຈໍ ອຸຄ຺ຄຫິໂຕ, ຕສ຺ມາ ຕຸຍ຺ຫໍ ປຣາຊໂຍ ນຕ຺ຖິ…ເປ… ເອວມາຫໍສຸ.

໔໐໒. ລທ຺ຘິຠິນ຺ທນຕ຺ຖນ຺ຕິ ‘‘ພ຺ຣາຫ຺ມຓາວ ພ຺ຣຫ຺ມຸໂນ ປຸຕ຺ຕາ ໂອຣສາ ມຸຂໂຕ ຊາຕາ ພ຺ຣຫ຺ມຊາ’’ຕິ ເອວໍ ປວຕ຺ຕລທ຺ຘິຍາ ວິນິເວຐນຕ຺ຖໍ. ປຸຕ຺ຕປຏິລາຠຕ຺ຖາຍາຕິ ‘‘ເອວໍ ມຍໍ ເປຕ຺ຕິກໍ ອິຓຘາຣໍ ໂສເຘຍ຺ຍາມາ’’ຕິ ລທ຺ຘິຍໍ ຐຕ຺ວາ ປຸຕ຺ຕປຏິລາຠຕ຺ຖາຍ. ອຍຎ຺ເຫຕ຺ຖ ອຘມ຺ມິການໍ ພ຺ຣາຫ຺ມຓານໍ ອຊ຺ຌາສໂຍ. ເນສນ຺ຕິ ພ຺ຣາຫ຺ມຓານໍ. ສຈ຺ຈວຈນໍ ສິຍາຕິ ‘‘ພ຺ຣຫ຺ມຸໂນ ປຸຕ຺ຕາ’’ຕິອາທິວຈນໍ ສຈ຺ຈໍ ຍທິ ສິຍາ ພ຺ຣາຫ຺ມຓີນໍ…ເປ… ຠເວຍ຺ຍ, ນ ເຈຕໍ ອຕ຺ຖິ. ມຫາພ຺ຣຫ຺ມຸໂນ ມຸຂໂຕ ຊາໂຕຕິ ວາທຈ຺ເຉທກວາໂທ ມຸຂໂຕຊາຕຈ຺ເຉກວາໂທ. ອສ຺ສລາຍໂນວິຎ຺ຎູ ຊາຕິໂກ ‘‘ນິຣກ຺ເຂປໍ ສມເຓນ ໂຄຕເມນ ວຸຕ຺ຕ’’ນ຺ຕິ ຊານນ຺ໂຕປິ ສຫຄຕານໍ ພ຺ຣາຫ຺ມຓານໍ ຈິຕ຺ຕານຸຣກ຺ຂຓຕ຺ຖໍ ‘‘ກິຎ຺ຈາປິ ຠວໍ ໂຄຕໂມ’’ຕິອາທິມາຫ.

໔໐໓. ອິທານິ ພ຺ຣາຫ຺ມໂຓວ ເສຏ຺ໂຐ ວຓ຺ໂຓຕິ ວາທໍ ຠິນ຺ທິຕຸໍ ‘‘ສຸຕໍ ເຕ ໂຍນກກມ຺ໂພເຊສູ’’ຕິອາທິ ອາຣທ຺ຘໍ. ຍທິ ພ຺ຣາຫ຺ມໂຓວ ເສຏ຺ໂຐ ວຓ຺ໂຓ, ສພ຺ພຕ຺ຖ ພ຺ຣາຫ຺ມໂຓວ ເສຏ຺ໂຐ ຠເວຍ຺ຍ, ອຖ ກສ຺ມາ ໂຍນກກມ຺ໂພຊາທິຊນປເທສຸ ພ຺ຣາຫ຺ມຓານໍ ເສຏ຺ຐຠາໂວ ນຕ຺ຖິ? ເອວຎ຺ຫິ ຕຕ຺ຖ ວຓ຺ຓາ, ຕສ຺ມາ ‘‘ພ຺ຣາຫ຺ມໂຓວ ເສຏ຺ໂຐ’’ຕິ ລທ຺ຘິມຕ຺ຕເມຕໍ. ເຕສຸ ຫິ ຊນປເທສຸ ຊນາ ເອກຊ຺ຌໍ ສນ຺ນິປຕິຕ຺ວາ ສມ຺ມນ຺ຕຍິຕ຺ວາ ກຕິກໍ ອກໍສຸ, ທາສໍ ສາມິກໍ ກຕ຺ວາ ອິຕເຣ ສພ຺ເພ ຕໍ ປູເຊຕ຺ວາ ຕສ຺ສ ວເສ ວຕ຺ຕນ຺ຕິ, ໂຍ ເຕສໍ ອຍ຺ໂຍ ໂຫຕິ ອິຕເຣ ສພ຺ເພ ຕສ຺ສ ທາສາ ໂຫນ຺ຕິ, ເຕ ກຕິປຍສໍວຈ຺ຉຣາຕິກ຺ກເມນ ຕສ຺ສ ກິຎ຺ຈິ ໂທສໍ ທິສ຺ວາ ຕໍ ຕໂຕ ຐານໂຕ ອປເນຕ຺ວາ ອຎ຺ຎໍ ຐເປນ຺ຕິ, ອິຕິ ໂສ ອຍ຺ໂຍ ຫຸຕ຺ວາ ທາໂສ ໂຫຕິ, ອິຕໂຣ ທາໂສ ຫຸຕ຺ວາ ອຍ຺ໂຍ ໂຫຕິ, ເອວໍ ຕາວ ເກຈິ ‘‘ອຍ຺ໂຍ ຫຸຕ຺ວາ ທາໂສ ໂຫຕິ, ທາໂສ ຫຸຕ຺ວາ ອຍ຺ໂຍ ໂຫຕີ’’ຕິ ເອຕ຺ຖ ອຕ຺ຖໍ ວທນ຺ຕິ. ອຏ຺ຐກຖາຍໍ ປນ ປຸຣິມວເສເນວ ຕມຕ຺ຖໍ ທສ຺ເສຕຸໍ ‘‘ພ຺ຣາຫ຺ມໂຓ ສຠຣິໂຍ’’ຕິອາທິ ວຸຕ຺ຕໍ. ວຍປ຺ປຕ຺ເຕ ປຸຕ຺ເຕ ອສຕີຕິ ອິທໍ ວກ຺ຂມານສ຺ສ ທາຣກສ຺ສ ທາຍຊ຺ຊສາມິກຠາວສ຺ສ ຕາວ ທສ຺ສນໍ. ມາຕິໂຕ ສຸທ຺ໂຘຕິ ເອຕ຺ຖ ໂຍ ມາຕິໂຕ ສຸທ຺ຘຕ຺ຕາ ອຍ຺ໂຍ, ປິຕິໂຕ ອສຸທ຺ຘຕ຺ຕາ ທາໂສ ໂຫຕິ, ໂສ ເອວ ປິຕິໂຕ ອສຸທ຺ຘຕ຺ຕາ ທາໂສ ຫຸຕ຺ວາ ມາຕິໂຕ ອຍ຺ໂຍ ໂຫຕີຕິ ຊາຕິໍ ສມ຺ເຠເທຕິ. ໂສວ ສພ຺ເພນ ສພ຺ພໍ ໂຫຕີຕິ ນ ສກ຺ກາ ວຕ຺ຕຸນ຺ຕິ ອປເຣ. ໂກ ຖາໂມຕິ ມຫນ຺ເຕ ໂລກສນ຺ນິວາເສ ອນມຕຄ຺ເຄ ອຕີເຕ ກາເລ ອິຕ຺ຖີນໍ ວາ ຈິຕ຺ເຕ ອນວຏ຺ຐິເຕ ທາສາ ທາສາ ເອວ ໂຫນ຺ຕິ, ອຍ຺ຍາ ອຍ຺ຍາ ເອວ ໂຫນ຺ຕີຕິ ເອຕ຺ຖ ໂກ ເອກນ຺ຕິໂກ ສເຫຕຸໂກ ອວສ຺ສໂຍ, ຕສ຺ສ ສາຘໂກ ສິທ຺ຘນ຺ໂຕ, ກິໍ ນິທສ຺ສນນ຺ຕິ ອຕ຺ໂຖ.

໔໐໔. ສຸກ຺ກຈ຺ເຉທກວາໂທ ນາມາຕິ ‘‘ພ຺ຣາຫ຺ມໂຓວ ສຸກ຺ໂກ ວຓ຺ໂຓ’’ຕິ ເອວໍ ວຸຕ຺ໂຕ ສຸກ຺ກຈ຺ເຉທກວາໂຣ ນາມ.

໔໐໘. ສພ຺ພສ຺ມິໍ ອຄ຺ຄິກິຈ຺ຈໍ ກໂຣນ຺ເຕຕິ ເອເຕນ ຍຖາ ຍໂຕ ກຸໂຕຈິ ນິສ຺ສຍໂຕ ອຸປ຺ປນ຺ໂນ ອຄ຺ຄິອຸປາທານສມ຺ປນ຺ໂນ ອຄ຺ຄິກິຈ຺ຈໍ ກໂຣຕິ, ເອວໍ ຍສ຺ມິໍ ກສ຺ມິຎ຺ຈິ ທາສກຸເລ ຊາໂຕ ອຸປນິສ຺ສຍສມ຺ປນ຺ໂນ ສມ຺ມາປຏິປຊ຺ຊມາໂນ ສໍສາຣໂຕ ສຸຊ຺ຌຕິ ເອວາຕິ ທສ຺ເສຕິ.

໔໐໙. ປາທສິກວຓ຺ໂຓຕິ ອນ຺ຕຣາຬວຓ຺ໂຓ. ເອເຕສນ຺ຕິ ຂຕ຺ຕິຍກຸມາເຣນ ພ຺ຣາຫ຺ມຓກຎ຺ຎາຍ ອຸປ຺ປນ຺ນປຸຕ຺ໂຕ, ພ຺ຣາຫ຺ມຓກຸມາເຣນ ຂຕ຺ຕິຍກຎ຺ຎາຍ ອຸປ຺ປນ຺ນປຸຕ຺ໂຕຕິ ເອເຕສໍ ທ຺ວິນ຺ນໍ ມາຓວການໍ. ມຕກຠຕ຺ເຕຕິ ມເຕ ອຸທ຺ທິສ຺ສ ກຕຠຕ຺ເຕ. ຖາລິປາເກຕິ ກຕມງ຺ຄລຠຕ຺ເຕ.

໔໑໐. ຕຸມ຺ເຫຕິ ຊາຕິສາມຎ຺ຎໂຕ ມາຓວໍ ພ຺ຣາຫ຺ມເຓຫິ ສທ຺ຘິໍ ເອກຊ຺ຌໍ ສງ຺ຄຓ຺ຫນ຺ໂຕ ອາຫ. ໂກ ນຸ ໂຂຕິ ອວໍສິໂຣ ອິສິວາໂທ, ເຕສໍ ພ຺ຣາຫ຺ມຓີສີນໍ ອສາມຕ຺ຖິຍທສ຺ສເນນ ຊາຕິຍາ ອປ຺ປມາຓຕໍ ວິຠາເວຕຸໍ ຄາມທາຣກເວເສນ ອຸປຄຈ຺ຉິ. ເຕນ ວຸຕ຺ຕໍ ‘‘ຄາມຓ຺ຑລຣູໂປ ວິຍາ’’ຕິ. ໂກຓ຺ຑທມໂກຕິ ອທນ຺ຕທມໂກ.

໔໑໑. ຊເນຕີຕິ ຊນິກາ ຊເນຕ຺ຕິ. ຊນໂກ ປິຕາຕິ ເອຕ຺ຖາປິ ເອເສວ ນໂຍ. ຄນ຺ຘພ຺ພປຎ຺ຫນ຺ຕິ ຄນ຺ຘພ຺ພສ຺ສ ມາຕຸກຸຈ຺ຉິຍໍ ອຸປ຺ປຊ຺ຊນກສຕ຺ຕສ຺ສ ຂຕ຺ຕິຍຠາວາທິປຸຈ຺ຉໍ. ທພ຺ພິຄຫຓສິປ຺ປມ຺ປິ ເອກາ ວິຊ຺ຊາ ເວທິຕພ຺ພາ. ຕຕ຺ຖ ກິຣ ກຸສໂລ ຍໍ ກິຎ຺ຈິ ອາຫາຣູປຄປຓ຺ຓປຸປ຺ຜຜລພີຊໍ ອນ຺ຕມໂສ ເອລາລຸກມ຺ປິ ຄເຫຕ຺ວາ ເຠສຊ຺ເຊຫິ ໂຍເຊຕ຺ວາ ປຈນ຺ໂຕ ສປ຺ປິມຘຸຜາຓິເຕຫິ ສມານຣສໍ ກຕ຺ວາ ສມ຺ປາເທຕຸໍ ສກ຺ໂກຕິ, ປຸຓ຺ໂຓປິ ຕາທິໂສ, ເຕນ ຎາຕໍ ຕ຺ວໍ ທພ຺ພິຄຫຓສິປ຺ປມຕ຺ຕມ຺ປິ ນ ຊານາສີຕິ ສມ຺ພນ຺ໂຘ. ສທ຺ໂຘຕິ ກມ຺ມຜລສທ຺ຘາຍ ສທ຺ໂຘ, ໂປຖຸຊ຺ຊນິເກເນວ ຣຕນຕ຺ຕຍປສາເທນ ປສນ຺ໂນ. ເຕເນວາຫ – ‘‘ອຸປາສກໍ ມໍ ຠວໍ…ເປ… ສຣຓໍ ຄຕ’’ນ຺ຕິ.

ອສ຺ສລາຍນສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.