໑໐. ກຓ຺ຓກຕ຺ຖລສຸຕ຺ຕວຓ຺ຓນາ

໓໗໕. ອນນ຺ຕຣສຸຕ຺ເຕ ວຸຕ຺ຕກຣຓີເຍເນວາຕິ ‘‘ປາສາເທ ວາ ນາຏເກສຸ ວາ ຈິຕ຺ຕສ຺ສາທໍ ອລຠມາໂນ ຕຕ຺ຖ ຕຕ຺ຖ ວິຈຣິຕຸໍ ອາຣທ຺ໂຘ’’ຕິ ວຸຕ຺ຕກຣຓີເຍນ. ອປ຺ປທຸຏ຺ຐປໂທສີນຎ຺ຫິ ເອວໍ ໂຫຕີຕິ.

໓໗໖. ປຸຈ຺ຉິໂຕຕິ ‘‘ອຎ຺ຎໍ ທູຕໍ ນາລຕ຺ຖຸ’’ນ຺ຕິ ປຸຈ຺ຉິໂຕ. ໂສຕິ ຣາຊາ. ຕາສໍ ວນ຺ທນາ ສເຈ ອຸຕ຺ຕຣກາລໍ, ອຕ຺ຕໂນ ອາຄມນກາຣຓໍ ກເຖສ຺ສຕິ.

໓໗໘. ເອກາວຊ຺ຊເນນາຕິ ເອກວີຖິຊວເນນ. ເຕນ ເອກຈິຕ຺ຕໍ ຕາວ ຕິຏ຺ຐຕຸ, ເອກຈິຕ຺ຕວີຖິຍາປິ ສພ຺ພໍ ຊານິຕຸໍ ນ ສກ຺ກາຕິ ທສ຺ເສຕິ. ‘‘ອິທໍ ນາມ ອຕີຕໍ ຊານິສ຺ສາມີ’’ຕິ ອນິຍເມຕ຺ວາ ອາວຊ຺ຊໂຕ ຍໍ ກິຎ຺ຈິ ອຕີຕໍ ຊານາຕິ, ນິຍມິເຕ ປນ ນິຍມິຕເມວາຕິ ອາຫ – ‘‘ເອເກນ ຫິ…ເປ… ເອກເທສເມວ ຊານາຕີ’’ຕິ. ເຕນ ຈິຕ຺ເຕນາຕິ ‘‘ອຕີຕໍ ສພ຺ພໍ ຊານິສ຺ສາມີ’’ຕິ ເອວໍ ປວຕ຺ຕຈິຕ຺ເຕນ. ອິຕເຣສູຕິ ອນາຄຕປຈ຺ຈຸປ຺ປນ຺ເນສຸ. ກາຣຓຊາຕິກນ຺ຕິ ຍຸຕ຺ຕິສຠາວໍ, ຍຸຕ຺ຕິຍາ ຍຸຕ຺ຕນ຺ຕິ ອຕ຺ໂຖ. ສມ຺ປຣາຍຄຸຓນ຺ຕິ ສມ຺ປຣາເຍ ກຕກມ຺ມສ຺ສ ວິເສສໍ.

໓໗໙. ໂລກຸຕ຺ຕຣມິສ຺ສການິ ກຖິຕານິ ໂພຘິຣາຊກຸມາຣສຸຕ຺ເຕ ວິຍ ໂລກິຍາ ເຈວ ໂລກຸຕ຺ຕຣາ ຈ. ຍຖາລາຠວເສນ ເຈຕ຺ຖ ປຘານິຍງ຺ຄານໍ ໂລກຸຕ຺ຕຣຄ຺ຄຫຓໍ ເວທິຕພ຺ພໍ. ປຈ຺ເຈກໍ ເອວ ເນສຎ຺ຈ ປຘານິຍງ຺ຄຕາ ທຏ຺ຐພ຺ພາ ຍຖາ ‘‘ອຏ຺ຐວິໂມກ຺ຂາ ສນ຺ທິສ຺ສນ຺ຕິ ໂລກຸຕ຺ຕຣມິສ຺ສກາ’’ຕິ. ໂລກຸຕ຺ຕຣາເນວາຕິ ເຈຕ຺ຖ ຍໍ ວຕ຺ຕພ຺ພໍ, ຕໍ ປຣໂຕ ອາວິ ຠວິສ຺ສຕິ. ປຘານນານຕ຺ຕນ຺ຕິ ປທຫນນານຕ຺ຕໍ, ຠາວນານຸໂຍຄວິເສສນ຺ຕິ ອຕ຺ໂຖ. ສງ຺ຂາເຣ ປຣິມທ຺ທິຕ຺ວາ ປຏິປກ຺ຂຘມ຺ເມ ເອກເທສໂຕ ປຊຫິຕ຺ວາ ຐິຕສ຺ສ ຠາວນານຸໂຍໂຄ ສພ຺ເພນ ສພ຺ພໍ ອປຣິມທ຺ທິຕສງ຺ຂາຣສ຺ສ ອປ຺ປຫີນປຏິປກ຺ຂສ຺ສ ຠາວນານຸໂຍຄໂຕ ສຸຂຸໂມ ວິສໂທວ ໂຫຕິ, ສຈ຺ຈາຠິສມເຍນ ສນ຺ຕານສ຺ສ ອາຫິຕວິເສສຕ຺ຕາຕິ ອາຫ – ‘‘ອຎ຺ຎາທິສເມວ ຫິ ປຸຖຸຊ຺ຊນສ຺ສ ປຘານໍ, ອຎ຺ຎາທິສໍ ໂສຕາປນ຺ນສ຺ສາ’’ຕິອາທິ. ອຍຎ຺ຈ ວິເສໂສ ນ ເກວລໍ ອນຣິຍອຣິຍປຸຄ຺ຄລໂຕ ເອວ, ອຖ ໂຂ ອຣິເຍສຸປິ ເສກ຺ຂາທິວິເສສໂຕປິ ລພ຺ຠຕິ ອຠິສງ຺ຂາຣວິເສສໂຕ ອຠິນີຫາຣໂຕ ຈ ອິຊ຺ຌນໂຕຕິ ທສ຺ເສນ຺ໂຕ ‘‘ອຎ຺ຎາທິສໍ ສກທາຄາມິໂນ’’ຕິອາທິມາຫ. ນ ປາປຸຓາຕີຕິ ຍສ຺ມາ ປຸຖຸຊ຺ຊໂນ ສພ຺ພຖາວ ປຘານໍ ປທຫນ຺ໂຕ ໂສຕາປຕ຺ຕິມຄ຺ຄໍ ອຘິຄຈ຺ຉຕິ, ໂສຕາປນ຺ໂນ ຈ ສກທາຄາມິມຄ຺ຄນ຺ຕິ ເຫຏ຺ຐິມໍ ອຸປຣິມໂຕ ໂອຬາຣິກໍ, ອຸປຣິມຎ຺ຈ ອິຕຣໂຕ ສຸຂຸມໍ ເຕນ ປຫາຕຸໍ ອສກ຺ກຸເຓຍ຺ຍສ຺ສ ປຊຫນໂຕ, ອິຕິ ອຘິຄນ຺ຕພ຺ພວິເສເສນ ຈ ອຘິຄມປຏິປທາຍ ສຓ຺ຫສຸຂຸມຕາ ຕິກ຺ຂວິສທຕາ ຈ ວິຎ຺ຎາຍຕີຕິ ອາຫ – ‘‘ປຸຖຸຊ຺ຊນສ຺ສ ປຘານໍ ໂສຕາປນ຺ນສ຺ສ ປຘານໍ ນ ປາປຸຓາຕີ’’ຕິອາທິ.

ອກູຏກຣຓນ຺ຕິ ອວຎ຺ຈນກິຣິຍໍ. ອນວຈ຺ຉິນ຺ທນນ຺ຕິ ອຕິຍານໍ. ອວິຎ຺ຉນໍ ນ ອາກຑ຺ຒນໍ, ນິຍຸຕ຺ຕຕໍ ວິນິເວເຐຕ຺ວາ ສມນ຺ຕາ ວິປຣິວຕ຺ຕິຕ຺ວາ ສມຘາຣາຍ ຉຑ຺ຑນໍ ວາ. ຕສ຺ສ ກາຣຓໍ ຕໍກາຣຓໍ, ຕໍ ກາຣຓນ຺ຕິ ວາ ຕໍ ກິຣິຍໍ ຕໍ ອຘິກາຣໍ. ທນ຺ເຕຫິ ຄນ຺ຕພ຺ພຠູມິນ຺ຕິ ທນ຺ເຕຫິ ປຕ຺ຕພ຺ພຏ຺ຐານໍ, ປຕ຺ຕພ຺ພວຕ຺ຖຸໍ ວາ. ຈຕ຺ຕາໂຣປິ ອສ຺ສທ຺ຘາ ນາມ ອຸປຣິມອຸປຣິມສທ຺ຘາຍ ອຠາວໂຕ. ເຍນ ຫິ ຍໍ ອປ຺ປຕ຺ຕໍ, ຕສ຺ສ ຕໍ ນຕ຺ຖິ. ອຣິຍສາວກສ຺ສ…ເປ… ນຕ຺ຖິ ປຐມມຄ຺ເຄເນວ ມາຍາສາເຐຍ຺ຍານໍ ປຫາຕພ຺ພຕ຺ຕາ. ເຕເນວາຕິ ສມ຺ມເທວ ວິຣຸທ຺ຘປກ຺ຂານໍ ສທ຺ຘາທີນໍ ອິຘາຘິປ຺ເປຕຕ຺ຕາ. ຍທິ ເອວໍ ກຖໍ ມິສ຺ສກກຖາຕິ ອາຫ ‘‘ອສ຺ສຂຬຸງ຺ກສຸຕ຺ຕນ຺ເຕ ປນາ’’ຕິອາທິ. ຈຕ຺ຕາໂຣວ ໂຫນ຺ຕິ ປຸຖຸຊ຺ຊນາທິວເສນ.

ໂອປມ຺ມສໍສນ຺ທເນ ອທນ຺ຕຫຕ຺ຖິອາທໂຍ ວິຍາຕິອາທິນາ ກຓ຺ຫປກ຺ເຂ, ຍຖາ ປນ ທນ຺ຕຫຕ຺ຖິອາທໂຍຕິອາທິນາ ສຸກ຺ກປກ຺ເຂ ຈ ສາຘາຣຓໂຕ ເອກຊ຺ຌໍ ກຕ຺ວາ ວຸຕ຺ຕໍ, ອສາຘາຣຓໂຕ ຠິນ຺ທິຕ຺ວາ ທສ຺ເສຕຸໍ ‘‘ອິທໍ ວຸຕ຺ຕໍ ໂຫຕີ’’ຕິອາທິ ວຸຕ຺ຕໍ.

໓໘໐. ສມ຺ມປ຺ປຘານາ ນິພ຺ພິສິຏ຺ຐວີຣິຍາ. ເຕນາຫ – ‘‘ນ ກິຎ຺ຈິ ນານາກຣຓໍ ວທາມິ, ຍທິທໍ ວິມຸຕ຺ຕິຍາ ວິມຸຕ຺ຕິ’’ນ຺ຕິ. ນ ຫິ ສຸກ຺ຂວິປສ຺ສກເຕວິຊ຺ຊຉຬຠິຎ຺ຎານໍ ວິມຸຕ຺ຕິຍາ ນານາກຣຓໍ ອຕ຺ຖິ. ເຕນ ວຸຕ຺ຕໍ ‘‘ຍໍ ເອກສ຺ສາ’’ຕິອາທິ. ກິໍ ຕ຺ວໍ ນ ຊານາສີຕິ ສມ຺ພນ຺ໂຘ. ອາຄຈ຺ຉນ຺ຕີຕິ ອຸປ຺ປຊ຺ຊນວເສນ ອາຄຈ຺ຉນ຺ຕິ. ນາຄຈ຺ຉນ຺ຕີຕິ ເອຕ຺ຖາປິ ເອເສວ ນໂຍ. ອິທໍ ປຸຈ຺ຉນ຺ໂຕຕິ ອິທໍ ປຸຈ຺ຉາມີຕິ ທສ຺ເສນ຺ໂຕ. ອປ຺ປຫີນເຈຕສິກທຸກ຺ຂາ ອນຘິຄຕອນາຄາມິຕາ. ເຕນາຫ ‘‘ອຸປປຕ຺ຕິວເສນ ອາຄນ຺ຕາໂຣ’’ຕິ. ສມຸຈ຺ຉິນ຺ນທຸກ຺ຂາຕິ ສມຸຄ຺ຆາຏິຕເຈຕສິກທຸກ຺ຂາ.

໓໘໑. ຕມ຺ຫາ ຐານາຕິ ຕໂຕ ຍຖາຘິຄຕອິສ຺ສຣິຍຏ຺ຐານໂຕ. ປຸນ ຕມ຺ຫາ ຐານາຕິ ຕໂຕ ທຸຄ຺ຄຕາ. ສມ຺ປນ຺ນກາມຄຸຓນ຺ຕິ ອຸຬາຣກາມຄຸຓສມນ຺ນາຄຕໍ.

ຕຕ຺ຖາຕິ ກາມເທວໂລເກ. ຐານຠາວໂຕຕິ ອຣຫຕ຺ຕຎ຺ເຈ ອຘິຄຕໍ, ຕາວເທວ ປຣິນິພ຺ພານໂຕ. ອຸປຣິເທເວ ຈາຕິ ອຸປຣູປຣິ ຠູມິວາເສ ເທເວ ຈ, ຈກ຺ຂຸວິຎ຺ຎາຓທສ຺ສເນນປິ ທສ຺ສນາຍ ນປ຺ປໂຫນ຺ຕີຕິ ໂຍຊນາ.

໓໘໒. ວຸຕ຺ຕນເຍເນວາຕິ ເທວປຸຈ຺ຉາຍ ວຸຕ຺ເຕເນວ ນເຍນ. ສາ ກິຣ ກຖາຕິ ‘‘ນຕ຺ຖິ ໂສ ສມໂຓ ວາ ພ຺ຣາຫ຺ມໂຓ ວາ, ໂຍ ສກິເທວ ສພ຺ພໍ ເນຍ຺ຍ’’ນ຺ຕິ ກຖາ. ເຕຕິ ວິຏຏູຠສຎ຺ຊຍາ. ອິມສ຺ມິໍເຍວ ຐາເນຕິ ອິມສ຺ມິໍ ມິຄທາເຍເຍວ. ເສສໍ ສຸວິຎ຺ເຎຍ຺ຍເມວ.

ກຓ຺ຓກຕ຺ຖລສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.

ນິຏ຺ຐິຕາ ຈ ຣາຊວຄ຺ຄວຓ຺ຓນາ.