໕. ມາຄຓ຺ຑິຍສຸຕ຺ຕວຓ຺ຓນາ

໒໐໗. ທ຺ເວ ມາຄຓ຺ຑິຍາຕິ ທ຺ເວ ມາຄຓ຺ຑິຍນາມກາ. ເທວຄພ຺ຠສທິສນ຺ຕິ ເທວານໍ ວສນໂອວຣກສທິສໍ. ເອຕໍ ວຸຕ຺ຕນ຺ຕິ ‘‘ຠາຣທ຺ວາຊໂຄຕ຺ຕສ຺ສ ພ຺ຣາຫ຺ມຓສ຺ສ ອຄ຺ຍາຄາເຣ ຕິຓສນ຺ຖາຣເກ’’ຕິ ເອຕໍ ວຸຕ຺ຕໍ. ນ ເກວລໍ ຕໍ ທິວສເມວາຕິ ຍໍ ທິວສໍ ມາຄຓ຺ຑິໂຍ ປຣິພ຺ພາຊໂກ ຕິຓສນ຺ຖາຣກໍ ປຎ຺ຎຕ຺ຕໍ, ນ ເກວລໍ ຕໍ ທິວສເມວ ຠຄວາ ເຍນຎ຺ຎຕໂຣ ວນສຓ຺ໂຑ, ເຕນຸປສງ຺ກມີຕິ ໂຍຊນາ. ຄາມູປຈາເຣຕິ ຄາມສມີເປ. ສຎ຺ຎາຓໍ ກຕ຺ວາຕິ ສຎ຺ຎາຓໍ ກຕ຺ວາ ວິຍ. ນ ຫິ ຠຄວໂຕ ຕສ຺ສ ສຎ຺ຎາຓກຣເຓ ປໂຍຊນໍ ອຕ຺ຖິ.

ສມຓເສຍ຺ຍານຸຣູປນ຺ຕິ ສມຓສ຺ສ ອນຸຈ຺ຉວິກາ ເສຍ຺ຍາ. ປາສໍສຕ຺ໂຖ ຫິ ອຍໍ ຣູປ-ສທ຺ໂທ. ເຕນາຫ ‘‘ອິມໍ ຕິຓສນ຺ຖາຣກ’’ນ຺ຕິອາທິ. ອນາກິຓ຺ໂຓຕິ ວິລຸຬິໂຕ ອຆຏ຺ຏິໂຕ. ຫຕ຺ຖປາທສີເສຫິ ຕຕ຺ຖ ຕຕ຺ຖ ປຫເຏນ ນ ຈລິໂຕ ອຠິນ຺ໂນ, ອຈລິຕຕ຺ຕາ ເອວ ອຠິນ຺ນໍ ອຕ຺ຖຣຓໍ. ປຣິຈ຺ຉິນ຺ທິຕ຺ວາ ປຎ຺ຎຕ຺ໂຕ ວິຍາຕິ ອຍໍ ເຉເກນ ຈິຕ຺ຕກາເຣນ ຈິນ຺ເຕຕ຺ວາ ຕຸລິກາຍ ປຣິຈ຺ຉິນ຺ນເລຂາຍ ປຣິຈ຺ຉິນ຺ທິຕ຺ວາ ລິຂິຕາ ຈິຕ຺ຕກຕເສຍ຺ຍາ ວິຍ. ຠູນໍ ວຸຈ຺ຈຕິ ວຑ຺ຒິຕໍ, ຕໍ ຫນ຺ຕີຕິ ຠູນຫຸໂນ. ເຕນາຫ ‘‘ຫຕວຑ຺ຒິໂນ’’ຕິ. ຕໍ ປນາຍໍ ຈກ຺ຂາທີສຸ ສໍວຣວິຘານໍ ວຑ຺ຒິຫນນໍ ມຎ຺ຎຕິ. ເຕນາຫ ‘‘ມຣິຍາທກາຣກສ຺ສາ’’ຕິ. ພ຺ຣູເຫຕພ຺ພນ຺ຕິ ອຸຬາຣວິສຍູປຫາເຣນ ວຑ຺ເຒຕພ຺ພໍ ປີເຓຕພ຺ພໍ. ຕໍ ປນ ອນນຸຠູຕານຸຠວເນນ ໂຫຕີຕິ ອາຫ ‘‘ອທິຏ຺ຐໍ ທກ຺ຂິຕພ຺ພ’’ນ຺ຕິ. ອນຸຠູຕໍ ປນ ອປຓີຕໍ ໂຫຕີຕິ ວຸຕ຺ຕໍ ‘‘ທິຏ຺ຐໍ ສມຕິກ຺ກມິຕພ຺ພ’’ນ຺ຕິ. ເສສວາເຣສຸປິ ເອເສວ ນໂຍ. ປຣມທິຏ຺ຐຘມ຺ມນິພ຺ພານວາທີ ກິເຣສ ປຣິພ຺ພາຊໂກ, ຕສ຺ມາ ເອວໍ ຉສຸ ທ຺ວາເຣສຸ ວຑ຺ຒິໍ ປຎ຺ຎເປຕິ. ຍສ຺ມາ ຍໍ ຉນ຺ນມ຺ປິ ຈກ຺ຂາທີນໍ ຍຖາສກໍ ວິສຍຄ຺ຄຫຓໍ ປຏິກ຺ຂິປນ຺ໂຕ ໂລກສ຺ສ ອວຑ຺ຒິຕໍ ວິນາສເມວ ປຎ຺ຎເປຕິ, ຕສ຺ມາ ໂສ ສຍມ຺ປິ ວຑ຺ຒິຫໂຕ ຫຕວຑ຺ຒິໂຕ.

ສໍກິເລສໂຕ ອາຣກຕ຺ຕາ ອຣິໂຍ ນິຍ຺ຍານິກຘມ຺ມຠາວໂຕ ຎາໂຍ ຘມ຺ໂມ. ວຊ຺ຊເລສສ຺ສປິ ອຠາວໂຕ ກຸສໂລ. ເຕນາຫ ‘‘ປຣິສຸທ຺ເຘ ກາຣຓຘມ຺ເມ ອນວຊ຺ເຊ’’ຕິ. ອຸຄ຺ຄຕສ຺ສາຕິ ອຸຈ຺ຈກຸລີນຕາທິນາ ອຸຬາຣສ຺ສ. ມຸເຂ ອາຣກ຺ຂໍ ຐເປຕ຺ວາຕິ ມຸເຂນ ສໍຍໂຕ ຫຸຕ຺ວາ. ອມ຺ພຊມ຺ພູອາທີນິ ຄເຫຕ຺ວາ ວິຍ ອປູຣຍມາໂນຕິ ອມ຺ພຊມ຺ພູອາທີນິ ອຎ຺ຎມຎ຺ຎວິສທິສານິ ວິຍ ປູຣຓກຖານເຍນ ຍໍ ກິຎ຺ຈິ ອກເຖຕ຺ວາ. ເຕນາຫ ‘‘ມຍາ ກຖິຕນິຍາເມນາ’’ຕິ.

໒໐໘. ຜລສມາປຕ຺ຕິຍາ ວຸຏ຺ຐິໂຕຕິ ທິວາວິຫາຣໂຕ ວຸຏ຺ຐິໂຕຕິ ອຕ຺ໂຖ. ທິວາວິຫາໂຣປິ ຫິ ‘‘ປຏິສລ຺ລານ’’ນ຺ຕິ ວຸຈ຺ຈຕິ ‘‘ຣໂຫຄຕສ຺ສ ປຏິສລ຺ລີນສ຺ສ ເອວໍ ເຈຕໂສ ປຣິວິຕກ຺ໂກ ອຸທປາທີ’’ຕິອາທີສຸ (ປາຣາ. ໑໘). ຠຄວາ ຫິ ຜລສມາປຕ຺ຕິໂຕ ວຸຏ຺ຐານຸຕ຺ຕຣກາລໍ ເຕສໍ ກຖາສລ຺ລາປໍ ສຸຕ຺ວາ ທິວາວິຫາຣໂຕ ວຸຏ຺ຐາຍ ຕຕ຺ຖ ຄໂຕ. ສໍເວໂຄ ນາມ ສໂຫຕ຺ຕປ຺ປຎາຓໍ, ຕໍ ນິພ຺ພິນ຺ທນວເສນປິ ໂຫຕິ, ສໍເວຄນິສ຺ສິຕໍ ສນ຺ຘາຍາຫ ‘‘ປີຕິສໍເວເຄນ ສໍວິຄ຺ໂຄ’’ຕິ. ໂສ ປນ ຍສ຺ມາ ປຸຣິມາວຕ຺ຖາຍ ຈລນໍ ໂຫຕິ ຈິຕ຺ຕສ຺ສ, ຕສ຺ມາ ອາຫ ‘‘ຈລິໂຕ ກມ຺ປິໂຕ’’ຕິ. ຕິຂິຓໂສເຕນ ປຸຣິເສນາຕິ ຠຄວນ຺ຕໍ ສນ຺ຘາຍາຫ.

໒໐໙. ຘມ຺ມເທສນໍ ອາຣຠິ ຍຖາ ວິເນຍ຺ຍທມນກຸສໂລ ວສນຏ຺ຐານຏ຺ເຐນາຕິ ອິທໍ ອາຣມິຕພ຺ພຠາວສ຺ສ ຠາວລກ຺ຂຓວຈນໍ. ອາຣມຕິ ເອຕ຺ຖາຕິ ອາຣາໂມ, ຣູປໍ ອາຣາໂມ ເອຕສ຺ສາຕິ ຣູປາຣາມໍ, ຕໂຕ ເອວ ຕນ຺ນິນ຺ນຠາເວນ ຣູເປ ຣຕນ຺ຕິ ຣູປຣຕໍ, ເຕນ ສມ຺ໂມ ທຸປ຺ປຕ຺ຕິຍາ ຣູເປນ ສມ຺ມຸທິຕນ຺ຕິ ຣູປສມ຺ມຸທິຕໍ, ຕເທຕໍ ຕທຠິຫຕຊວນກິຈ຺ຈໍ ຕຕ຺ຖ ອາໂຣເປຕ຺ວາ ວຸຕ຺ຕໍ. ທນ຺ຕນ຺ຕິອາທີສຸປິ ເອເສວ ນໂຍ. ທນ຺ຕໍ ທມິຕໍ. ນິພ຺ພິເສວນນ຺ຕິ ວິຄຕວິສຸກາຍິກໍ. ຄຸຕ຺ຕນ຺ຕິ ສຕິຍາ ຄຸຕ຺ຕໍ. ຣກ຺ຂິຕນ຺ຕິ ຕສ຺ເສວ ເວວຈນໍ. ສໍວຸຕນ຺ຕິ ອປນີຕໍ ປເວສນິວາຣເຓນ. ເຕນາຫ ‘‘ປິຫິຕ’’ນ຺ຕິ.

໒໑໐. ອຸປ຺ປຊ຺ຊນປຣິຬາຫນ຺ຕິ ອຸປ຺ປຊ຺ຊນກິເລສປຣິຬາຫໍ. ກິໍ ວຈນໍ ວຕ຺ຕພ຺ພໍ ອສ຺ສາຕິ ຣູປາຣມ຺ມຓໍ ອນຸຠວິຕ຺ວາ ສມຸທຍາທິປຫານໍ ປຣິຄ຺ຄຓ຺ຫິຕ຺ວາ ປຣິນິພ຺ພິນ຺ທິຕ຺ວາ ວິຣຊ຺ຊິຕ຺ວາ ໂຍ ວິມຸຕ຺ໂຕ, ຕຕ຺ຖ ກິໍ ວຸທ຺ຘິຫຕປຣິຍາໂຍ ອວສ຺ສໍ ລຠຕິ ນ ລຠຕີຕິ ປຸຈ຺ຉຕິ. ປຣິພ຺ພາຊໂກ ຕາທິເສ ສາຣພທ຺ຘວິມຸຕ຺ຕິເກ ວຸທ຺ຘິຫໂຕຕິ ນ ວເທຍ຺ຍາຕິ ອາຫ ‘‘ນ ກິຎ຺ຈິ, ໂຠ, ໂຄຕມາ’’ຕິ.

໒໑໑. ເຕຕິ ຕຍາ, ອຍເມວ ວາ ປາໂຐ. ວສ຺ສໍ ວາໂສ ວສ຺ສໍ ອຸຕ຺ຕຣປທໂລເປນ, ວສ຺ສິຕຸໍ ອຣຫຕີຕິ ວສ຺ສິໂກ, ວສ຺ສກາເລ ນິວາສານຸຈ຺ຉວິໂກຕິ ອຕ຺ໂຖ.

ນາຕິອຸຈ຺ໂຈ ໂຫຕິ ນາຕິນີໂຈຕິ ຄິມ຺ຫິໂກ ວິຍ ອຸຈ຺ໂຈ, ເຫມນ຺ຕິໂກ ວິຍ ນີໂຈ ນ ໂຫຕິ, ອຖ ໂຂ ຕທຸຠຍເວມຊ຺ຌລກ຺ຂຓຕາຍ ນາຕິອຸຈ຺ໂຈ ໂຫຕິ ນາຕິນີໂຈ. ນາຕິຕນູນີຕິ ເຫມນ຺ຕິກສ຺ສ ວິຍ ນ ຂຸທ຺ທການິ. ນາຕິພຫູນີຕິ ຄິມ຺ຫິກສ຺ສ ວິຍ ນ ອຕິພຫູນິ. ມິສ຺ສກາເນວາຕິ ເຫມນ຺ຕິກຄິມ຺ຫິເກສຸ ວຸຕ຺ຕລກ຺ຂຓໂວມິສ຺ສການິ. ອຸຓ຺ຫປເວສນຕ຺ຖາຍາຕິ ນິຍູເຫສຸ ປຸເຣຠຕ຺ຕໍ ປຈ຺ຉາຠຕ຺ຕຎ຺ຈ ປຕິຕສູຣິໂຍຠາສວເສນ ອຸຓ຺ຫສ຺ສ ອພ຺ຠນ຺ຕຣປເວສນຕ຺ຖາຍ. ຠິຕ຺ຕິນິຍູຫານິ ນີຫຣີຍນ຺ຕີຕິ ທກ຺ຂິຓປສ຺ເສ ຠິຕ຺ຕີສຸ ນິຍູຫານິ ນີຫຣິຕ຺ວາ ກຣີຍນ຺ຕິ. ວິປຸລຊາລານີຕິ ປຸຖຸລຉິທ຺ທານິ. ອຸທກຍນ຺ຕານີຕິ ອຸທກວາຫກຍນ຺ຕານິ.

ນີລຸປ຺ປລຄຈ຺ຉເກ ກຕ຺ວາຕິ ວິກສິເຕຫິ ນີລຸປ຺ປເລຫິ ຄຈ຺ຉເກ ນຬິນິເກ ກຕ຺ວາ. ຄນ຺ຘກລລນ຺ຕິ ຄນ຺ຘມິສ຺ສກກທ຺ທມໍ. ຍມກຠິຕ຺ຕີຕິ ຍຸຄຬຠິຕ຺ຕິ, ຕສ຺ສາ ອນ຺ຕເຣ ນາຬິ, ຍໂຕ ອຸທກໍ ອຠິຣຸຫຕິ. ໂລຫນາຬິນ຺ຕິ ໂລຫມຍຍນ຺ຕນາຬິໍ. ຊາລນ຺ຕິ ຕມ຺ພໂລຫມຍໍ ຊາລໍ. ເຫຏ຺ຐາ ຍນ຺ຕໍ ປຣິວຕ຺ເຕນ຺ຕີຕິ ເຫຏ຺ຐາຠາເຄ ອຸທກຍນ຺ຕໍ ຄເມນ຺ຕິ. ອຸທກຜຸສິເຕ ເຕເມນ຺ເຕ ວິວຓ຺ຓຕາ ມາໂຫສີຕິ ນີລປຏໍ ນິວາເສຕິ. ທິວາກາເລຕິ ທິວສເວລາຍ. ອຊ຺ຌຕ຺ຕໍ ວູປສນ຺ຕຈິຕ຺ໂຕ ວິຫຣາມີຕິ ເອເຕນ ອຕ຺ຕໂນ ຜລສມາປຕ຺ຕິວິຫາໂຣ ຠຄວຕາ ທສ຺ສິໂຕຕິ ອາຫ – ‘‘ຕາຍ ຣຕິຍາ ຣມມາໂນຕິ ອິທໍ ຈຕຸຕ຺ຖຊ຺ຌານິກຜລສມາປຕ຺ຕິຣຕິໍ ສນ຺ຘາຍ ວຸຕ຺ຕ’’ນ຺ຕິ.

໒໑໒. ມຫາຈ ເນສໍ ປປຎ຺ໂຈຕິ ເນສໍ ຣາຊູນໍ ມຫາປປຎ຺ໂຈ ຣາຊິທ຺ຘິວເສນ ສພ຺ພທາ ສມ຺ປຕ຺ຕິວິສໂຍ ຈ, ອນຸຠວິຕຸໍ ນ ລຠນ຺ຕີຕິ ອຘິປ຺ປາໂຍ. ມນ຺ເຕ ຄເວສນ຺ຕາ ວິຈຣນ຺ຕິ, ນ ໂຠຄສຸຂໍ. ຄຓນາ ນາມ ອຈ຺ຉິນ຺ນຄຓນາ, ນ ວິຄຓຄຓນາ ນ ປຓຄຓນາ. ອາວຏ຺ໂຏຕິ ຍຖາຘິຄເຕ ທິພ຺ເພ ກາເມ ປຫາຍ ກາມເຫຕຸ ອາວຏ຺ໂຏ ນິວຕ຺ໂຕ ປຣິວຕ຺ຕິໂຕ ຠເວຍ຺ຍ. ເອວໍ ມານຸສກາ ກາມາຕິ ຍຖາ ໂກຈິ ກຸສຄ຺ເຄນ ອຸທກໍ ຄເຫຕ຺ວາ ມຫາສມຸທ຺ເທ ອຸທກໍ ມິເນຍ຺ຍ. ຕຕ຺ຖ ມຫາສມຸທ຺ເທ ອຸທກເມວ ມຫນ຺ຕໍ ວິປຸລໍ ປຓີຕຎ຺ຈ, ເອວໍ ທິພ຺ພານໍ ກາມານໍ ສມີເປ ອຸປນິຘາຍ ມານຸສກາ ກາມາ ອປ຺ປມຕ຺ຕກາ ໂອຣມຕ຺ຕກາ ນິຫີນາ, ທິພ຺ພາວ ກາມາ ມຫນ຺ຕາ ວິປຸລາ ອຸຬາຣາ ປຓີຕາ. ສມຘິຄຍ຺ຫາຕິ ສມ຺ມາ ອຘິຄມນວເສນ ນິຄ຺ຄຍ຺ຫ ທິພ຺ພມ຺ປິ ສຸຂໍ ຫີນໍ ກຕ຺ວາ ຕິຏ຺ຐຕິ.

໒໑໓. ອາໂຣຄ຺ຍເຫຕຸກໍ ສຸຂໍ ອສ຺ສ ອຕ຺ຖີຕິ ສຸຂີ, ຕໍ ປນສ຺ສ ໂຣຄວິຄມໂຕວາຕິ ອາຫ ‘‘ປຐມໍ ທຸກ຺ຂິໂຕ ປຈ຺ຉາ ສຸຂິໂຕ’’ຕິ. ເສຣີ ນາມ ອຕ຺ຕາຘີນວຸຕ຺ຕີຕິ ອາຫ ‘‘ເສຣີ ເອກໂກ ຠເວຍ຺ຍາ’’ຕິ. ອຕ຺ຕໂນ ວໂສ ສຍໍວໂສ, ໂສ ເອຕສ຺ສ ອຕ຺ຖີຕິ ສຍໍວສີ. ອງ຺ຄາຣກປລ຺ລໍ ວິຍ ກາມວຕ຺ຖຸປຣິຬາຫເຫຕຸໂຕ. ຕຈ຺ເຉຕ຺ວາຕິ ຆຏ຺ເຏຕ຺ວາ, ກຓ຺ຑູຍິຕ຺ວາຕິ ອຕ຺ໂຖ.

໒໑໔. ເຍນ ກາໂຍ ມຘຸຣກຊາໂຕ ໂຫຕິ, ຕໍ ກິຣ ກຸຏ຺ຐໍ ຉວິໍ ວິນາເສຕິ, ຈມ຺ມໍ ຉິທ຺ທຊາຕໍ ວິຍ ໂຫຕິ. ເຕເນວາຫ ‘‘ອຸປຫຕກາຍປ຺ປສາໂທ’’ຕິ. ປຈ຺ຈລຕ຺ຖາຕິ ປຏິລຠິ. ອວິຊ຺ຊາຠິຠູຕຕາຍ ວິໂຣຘິປຈ຺ຈຍສມາໂຍເຄນ ປຎ຺ຎິນ຺ທ຺ຣິຍສ຺ສ ອຸປຫຕຕ຺ຕາ. ອາຍຕິໍ ທຸກ຺ຂຜລຕາຍ ເອຕຣຫິ ຈ ກິເລສທຸກ຺ຂພຫຸລຕາຍ ກາມານໍ ທຸກ຺ຂສມ຺ຜສ຺ສຕາ, ຕທຸຠຍສໍຍຸຕ຺ເຕສຸ ເຕສຸ ຈ ຕໍ ອສລ຺ລກ຺ຂິຕ຺ວາ ເອກນ຺ຕສຸຂາຠິນິເວໂສ ວິປຣີຕສຎ຺ຎາຍ, ນ ເກວລາຍ ສຸຂເວທນາຍ ສຸຂາຕິ ປວຕ຺ຕສຎ຺ຎີ.

໒໑໕. ຕານີຕິ ກຸຏ຺ຐສຣີເຣ ວຓມຸຂານິ. ອສຸຈີນີຕິ ອສຸຠານິ. ທຸຄ຺ຄນ຺ຘານີຕິ ວິສ຺ສຄນ຺ຘານິ. ປູຕີນີຕິ ກຸຓປຠູຕານິ. ອິທານີຕິ ເອຕຣຫິ. ນເຂຫິ ວິປ຺ປຕຈ຺ຉນອຄ຺ຄິປຣິຕາປເນຫິ ອຕິນິປ຺ປີຬນກາເລ ປາຓກາ…ເປ… ປຄ຺ຆຣນ຺ຕິ, ເຕນ ເວທນາ ຕນຸກາ ໂຫຕິ. ເອວນ຺ຕິ ວຸຕ຺ຕນເຍນ ເວທນາຍ ຕນຸກຠາວໂຕ.

ອາໂຣຄ຺ຍຠາເວ ຘນລາຠາທິລາຠຸປ຺ປຕ຺ຕິໂຕ, ອສຕິ ຈ ອາໂຣຄ຺ເຍ ລາຠສ຺ສ ນິຣຕ຺ຖກຠາວໂຕ, ທິຏ຺ຐຘມ຺ມິກາທິສພ຺ພສມ຺ປຕ຺ຕີນໍ ລາຠສ຺ສ ນິມິຕ຺ຕຠາວໂຕ ຈ ອາໂຣຄ຺ຍປຣມາ ລາຠາ. ນິພ຺ພາເນ ສຸຂຸປ຺ປຕ຺ຕິໂຕ, ອສຕິ ຈ ນິພ຺ພານາຘິຄເມ ຕາທິສສ຺ສ ສຸຂສ຺ສ ອນຸປລພ຺ຠນໂຕ, ສພ຺ພສງ຺ຂຕວິວິຕ຺ຕຕ຺ຕາ ຈ ສພ຺ພໂສ ຈ ສໍສາຣທຸກ຺ຂາຠາວໂຕ, ອຘິຄເຕ ຈ ຕສ຺ມິໍ ສກລວຏ຺ຏທຸກ຺ຂາຠາວໂຕ ຈ ນິພ຺ພານໍ ປຣມໍ ສຸຂໍ. ປຸພ຺ພຠາຄມຄ຺ຄານນ຺ຕິ ກາຍານຸປສ຺ສນາທິເຠທຠິນ຺ນານໍ ອຣິຍມຄ຺ຄສ຺ສ ປຸພ຺ພຠາຄິຍານໍ ມຄ຺ຄານໍ. ເຕສຎ຺ຈ ອມຕຄາມິຕາ ນາມ ຕນ຺ນິນ຺ນຕາວເສເນວ ສຈ຺ຉິກິຣິຍາວເສນາຕິ ອາຫ ‘‘ປຸພ຺ພຠາຄຄມເນເນວ ອມຕຄາມິນ’’ນ຺ຕິ. ອຏ຺ຐງ຺ຄິໂກ ອຣິຍມຄ຺ໂຄ ເຂໂມ ສພ຺ພປຣິສ຺ສຍສມຸຄ຺ຆາຕເນນ ອນຸປທ຺ທຸຕຕ຺ຕາ, ຕໍສມງ຺ຄີນໍ ສພ຺ພໂສ ອນຸປທ຺ທຸຕຕ຺ຕາ ຕໍສມງ຺ຄີນໍ ສພ຺ພໂສ ອນຸປທ຺ທວເຫຕຸໂຕ ຈ. ລທ຺ຘິວເສນ ຄຫິຕາຕິ ສສ຺ສຕວາທາທີຫິ ເກວລໍ ເຕສໍ ລທ຺ຘິວເສນ ຕຖາ ຄຫິຕາ. ເຂມອມຕຄາມິນນ຺ຕິ ອິມິນາ ຫິ ‘‘ເຂມໍອມຕຄາມິນ’’ນ຺ຕິ ວິຠຕ຺ຕິອໂລເປນ ນິທ຺ເທໂສ, ອຕ຺ໂຖ ປນ ວິຠຕ຺ຕິໂລເປນ ທຏ຺ຐພ຺ໂພຕິ ທສ຺ເສຕິ.

໒໑໖. ອໂນມຊ຺ຊຕີຕິ ອນຸ ອນຸ ໂອມຊ຺ຊຕິ. ອປຣາປຣໍ ຫຕ຺ຖໍ ເຫຏ຺ຐາ ໂອຕາເຣນ຺ໂຕ ມຊ຺ຊຕິ.

໒໑໗. ເຉກນ຺ຕິ ຆນຠາເວນ ວີຕໍ. ຆນມຏ຺ຐຠາເວນ ສຸນ຺ທຣໍ ໂຫຕີຕິ ອາຫ ‘‘ສມ຺ປນ຺ນ’’ນ຺ຕິ. ສາຘູຫິ ປຣມປ຺ປິຈ຺ຉສນ຺ຕຸຏ຺ເຐຫິ ລາໂຕ ຄຫິໂຕຕິ ສາຫຸຬິ. ສງ຺ກາຣໂຈຬກໍ ນິຈ຺ຈກາຬກໍ.

໒໑໘. ຕຕ຺ຖ ຕຕ຺ຖ ຣຸຊນຏ຺ເຐນ ວິພາຘນຏ຺ເຐນ ໂຣໂຄວ ຠູໂຕ. ວິປສ຺ສນາຎາເຓນປິ ສິຂາປ຺ປຕ຺ເຕນ ອາໂຣຄ຺ຍໍ ເອກເທເສນ ປສ຺ສຕິ, ນິພ຺ພານຎ຺ຈ ວຏ຺ຏປຏິປກ຺ຂໂຕຕິ ອາຫ ‘‘ວິປສ຺ສນາຎາຓຎ຺ເຈວາ’’ຕິ.

໒໑໙. ອນ຺ຕຣາຕິ ປຐມຸປ຺ປຕ຺ຕິ ຊຣາມຣຓານໍ ເວມຊ຺ເຌ. ອຸປຫໂຕຕິ ປິຕ຺ຕເສມ຺ຫາທິໂທເສຫິ ທູສິຕຠາເວນ ກຖິໂຕ. ປິຕ຺ຕາທິໂທເສ ປນ ເຠສຊ຺ຊເສວນາຍ ນິວຕ຺ເຕນ຺ໂຕ ອຸປຫຕໍ ປຏິປາກຕິກໍ ກໂຣນ຺ໂຕ ຈກ຺ຂູນິ ອຸປ຺ປາເທຕິ ນາມ. ວິນຏ຺ຐານີຕິ ອນຸປ຺ປຕ຺ຕິຘມ຺ມຕໍ ອາປນ຺ນານິ.

໒໒໐. ປຸພ຺ເພ ວຸຕ຺ເຕ ສາຫຸຬິຍຈີເຣ. ວຏ຺ເຏ ອນຸຄຕຈິຕ຺ເຕນາຕິ ອນມຕຄ຺ເຄ ສໍສາຣວຏ຺ເຏ ອນາທີນວທສ຺ສິຕາຍ ອນຸຄາມິຈິຕ຺ເຕນ.

໒໒໑. ຘມ຺ມສ຺ສາຕິ ນິພ຺ພານສ຺ສ. ອນຸຘມ຺ມນ຺ຕິ ອນຸຣູປໍ ນິຍ຺ຍານຘມ຺ມໍ. ເຕນາຫ ‘‘ອນຸຈ຺ຉວິກໍ ປຏິປທ’’ນ຺ຕິ. ປຎ຺ຈກ຺ຂນ຺ເຘຕິ ປຎ຺ຈຸປາທານກ຺ຂນ຺ເຘ ທສ຺ເສຕິ. ‘‘ທີຆຣຕ຺ຕໍ ວຕ, ໂຠ’’ຕິອາທິນາ ປາຬິຍໍ ວິວຏ຺ຏໍ ທສ຺ສິຕໍ. ເຕນາຫ ‘‘ອຸປາທານນິໂຣຘາຕິ ວິວຏ຺ຏໍ ທສ຺ເສນ຺ໂຕ’’ຕິ. ເສສໍ ສຸວິຎ຺ເຎຍ຺ຍເມວ.

ມາຄຓ຺ຑິຍສຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.