໙. ປຣິວຕ຺ຕນຫາຣວິຠງ຺ຄວຓ຺ຓນາ

໓໕. ສມ຺ມາທິຏ຺ຐິສ຺ສ…ເປ… ນິຊ຺ຊິຓ຺ຓາ ຠວຕີຕິ ເອຕ຺ຖ ຍຖາ ມຄ຺ຄສມ຺ມາທິຏ຺ຐິວເສນຕ຺ໂຖ ວຸຕ຺ໂຕ, ເອວໍ ກມ຺ມສ຺ສກຕາກມ຺ມປຖສມ຺ມາທິຏ຺ຐີນມ຺ປິ ວເສນ ອຕ຺ໂຖ ລພ຺ຠເຕວ. ກມ຺ມປຖກຖາ ເຫສາ. ຍຖາວຸຕ຺ເຕນາກາເຣນາຕິ ‘‘ອວິມຸຕ຺ຕາວ ສມານາ’’ຕິ, ‘‘ອວິມຸຕ຺ຕິຍ’’ນ຺ຕິ ຈ ວຸຕ຺ຕປ຺ປກາເຣນ. ມິຈ຺ຉາຠິນິເວສວເສນາຕິ ອສມ຺ມາສມ຺ພຸທ຺ຘໍ ເອວ ສມ຺ມາສມ຺ພຸທ຺ໂຘຕິ, ອນິຍ຺ຍານິກໍ ເອວ ນິຍ຺ຍານິໂກຕິ, ອສນ຺ຕໍ ເອວ ປນ ສນ຺ຕນ຺ຕິ, ອນຣິຍໍ ເອວ ອຣິໂຍຕິ ວິປຣີຕາຠິນິເວສວເສນ. ມິຈ຺ຉາຘິໂມກ຺ໂຂຕິ ອຍາຖາວປສາໂທ, ອຍາຖາວສນ຺ນິຏ຺ຐານໍ ວາ. ອຸປ຺ປນ຺ນໂມໂຫ ມິຈ຺ຉາວິມຸຕ຺ຕິຎາຓທສ຺ສນນ຺ຕິ ສມ຺ພນ຺ໂຘ.

໓໖. ວາທານໍ ວາ ອນຸວາທາ ວາທານຸວາທາ, ເຕສໍ ວາທານໍ ອຸປາທາຕິ ອຕ຺ໂຖ. ວາທານຸປວຕ຺ຕິໂຍຕິ ວາທານໍ ໂທສານໍ ອນຸປວຕ຺ຕິໂຍ.

ອນ຺ຕທ຺ວຍປຣິວຕ຺ຕນນ຺ຕິ ກາມສຸຂອຕ຺ຕກິລມຖານຸໂຍຄສງ຺ຂາຕສ຺ສ ອນ຺ຕທ຺ວຍສ຺ສ ປຏິປກ຺ຂວເສນ ປຣິວຕ຺ຕນໍ.

ເອເຕສຸປິ ວາເຣສູຕິ ‘‘ນິຍ຺ຍານິໂກ ຘມ຺ໂມ ເຕສໍ ອຘມ຺ໂມ, ສຸໂຂ ເຕສໍ ອຘມ຺ໂມ’’ຕິ ຈ ອິເມສຸ ວາເຣສຸ. ວຸຕ຺ຕນເຍນາຕິ ຍທິ ອຕ຺ຕປຣິຕາປນໍ ອຕ຺ຕໂນ ທຸກ຺ຂາປນໍ ຘມ຺ໂມ, ຘມ຺ມສ຺ສ ປຏິວິຣຸທ຺ໂຘ ອຘມ຺ໂມ ສິຍາ, ທຸກ຺ຂສ຺ສ ຈ ສຸຂປຏິວິຣຸທ຺ຘນ຺ຕິ ຌານມຄ຺ຄຜລສຸຂສ຺ສ, ອນວຊ຺ຊປຈ຺ຈຍປຣິໂຠຄສຸຂສ຺ສ ຈ ເຕສໍ ອຘມ຺ມຠາໂວ ອາປຊ຺ຊຕີຕິ ເອວໍ ວຕ຺ຕພ຺ພາ. ‘‘ຍໍ ຍໍ ວາ ປນາຕິອາທິນາ’’ຕິ ອິທໍ ອວເສສປາຐາມສນໍ. ເອຕ຺ຖ ຍໍ ຍໍ ວາ ປນ ຘມ຺ມນ຺ຕິ ຍໍ ວາ ຕໍ ວາ ຘມ຺ມໍ, ກຸສລໍ ວາ ອກຸສລໍ ວາ ອິຏ຺ຐໍ ວາ ອນິຏ຺ຐໍ ວາຕິ ວຸຕ຺ຕໍ ໂຫຕິ. ໂຣຈຍຕິ ວາ ອຸປຄຈ຺ຉຕິ ວາຕິ ຈິຕ຺ເຕນ ໂຣຈຕິ, ທິຏ຺ຐິຍາ ອຸປຄຈ຺ຉຕີຕິ. ຕສ຺ສ ຕສ຺ສ ຘມ຺ມສ຺ສ ໂຍ ປຏິປກ຺ໂຂຕິ ຕສ຺ສ ຕສ຺ສ ຣຸຈິຕສ຺ສ, ອຸປຄຕສ຺ສ ວາ ຘມ຺ມສ຺ສ ໂຍ ປຏິປກ຺ໂຂ ນາມ. ສ຺ວສ຺ສ ອນິຏ຺ຐໂຕ ອຊ຺ຌາປນ຺ໂນ ຠວຕີຕິ ໂຍ ຘມ຺ໂມ ອສ຺ສ ຣຸຈິຕສ຺ສ, ອຸປຄຕສ຺ສ ວາ ຘມ຺ມສ຺ສ ອນິຏ຺ຐໂຕ ປຈ຺ຈນີກໂຕ ອພ຺ຠຸປຄໂຕ ໂຫຕິ, ເຕນ ປຏິປກ຺ເຂນ ເທສນາຍ ປຣິວຕ຺ຕນໍ ປຣິວຕ຺ຕໂນ ຫາໂຣຕິ ອຕ຺ໂຖ. ເຕນາຫ ‘‘ປຏິປກ຺ຂສ຺ສ ລກ຺ຂຓໍ ວິຠາເວຕີ’’ຕິ.

ປຣິວຕ຺ຕນຫາຣວິຠງ຺ຄວຓ຺ຓນາ ນິຏ຺ຐິຕາ.