໑໐. ເວວຈນຫາຣວິຠງ຺ຄວຓ຺ຓນາ

໓໗. ອຎ຺ຎມຎ຺ເຎຫີຕິ ອຎ຺ເຎຫິ ອຎ຺ເຎຫິ. ອາຍຕິນ຺ຕິ ປຈ຺ຈເວກ຺ຂຓກາເລ. ກຖຎ຺ຈີຕິ ເຍນ ເກນຈິ ປກາເຣນ, ປຐມໍ ວຸຕ຺ເຕນ ປຣິຍາເຍນ ອປ຺ປຏິວິຊ຺ຌນ຺ໂຕ ອປເຣນ ປຣິຍາເຍນ ປຏິວິຊ຺ເຌຍ຺ຍາຕິ ອຘິປ຺ປາໂຍ. ປຣິຍາຍວຈນໍ ນິທ຺ທິສຕີຕິ ສມ຺ພນ຺ໂຘ. ເອວໍ ສພ຺ພຕ຺ຖ. ຕສ຺ມິໍ ຂເຓຕິ ປຣິຍາຍວຈນສ຺ສ ວຸຕ຺ຕກ຺ຂເຓ. ວິກ຺ຂິຕ຺ຕຈິຕ຺ຕານນ຺ຕິ ອາຣມ຺ມຓນ຺ຕເຣຫິ ວິວິຘຂິຕ຺ຕຈິຕ຺ຕານໍ. ອຎ຺ຎວິຫິຕານນ຺ຕິ ອຎ຺ຎໍ ຈິນ຺ເຕນ຺ຕານໍ. ກສ຺ມາ ປນ ອຎ຺ເຎນ ປຣິຍາເຍນ ຕທຕ຺ຖາວໂພຘນໍ, ນນຸ ເຕນ ວຸຕ຺ເຕ ທຬ຺ຫີກຣຓໍ ໂຫຕີຕິ ໂຈທນໍ ສນ຺ຘາຍາຫ ‘‘ເຕເນວາ’’ຕິອາທິ. ຕຕ຺ຖ ຕທຎ຺ເຎສນ຺ຕິ ເຕຫິ ວິກ຺ຂິຕ຺ຕຈິຕ຺ຕາທີຫິ ອຎ຺ເຎສໍ, ເຍຫິ ປຐມໍ ວຈນໍ ສມ຺ມເທວ ຄຫິຕໍ. ຕຕ຺ຖາຕິ ວຸຕ຺ຕວຈເນເນວ ປຸນປ຺ປຸນໍ ວຈເນ. ອຘິຄຕອນ຺ວຕ຺ຖຕາຍ ປຸນຣຸຕ຺ຕິ ປຣິວຊ຺ຊນຕ຺ຖໍ ວິເສສນຠາເວນ ຕາຫິ ຕາຫິ ສຎ຺ຎາຫິປິ ອຍມ຺ປິ ສທ຺ໂທ ອິມສ຺ສຕ຺ຖສ຺ສ ວາຈໂກ, ອຍມ຺ປິ ສທ຺ໂທ ອິມສ຺ສຕ຺ຖສ຺ສ ວາຈໂກຕິ ປຎ຺ຎາປເນຫິ. ເທເສຕພ຺ພສ຺ສ ຕສ຺ສ ຕສ຺ສ ອຕ຺ຖສ຺ສ ອຕ຺ຕໂນ ຈິຕ຺ເຕ ອຸປນິພນ຺ຘນໍ ຐປນໍ. ຕຕ຺ຖາຕິ ຘມ຺ມນິຣຸຕ຺ຕິປຏິສມ຺ຠິທາຍໍ. ພີຊາວາປນໍ ເຫຕຸສມ຺ປາທນໍ.

ເອວໍ ຠຄວໂຕ ປຣິຍາຍເທສນາຍໍ ອເນການິ ປໂຍຊນານິ ວຕ຺ວາ ອິທານິ ອຕ຺ຕໂນ ສມ຺ມາສມ຺ພຸທ຺ຘຕາຍ ເອວໍ ຕຖາຄຕາ ພຸທ຺ຘລີລາຍ ອເນເກຫິ ປຣິຍາເຍຫິ ຘມ຺ມໍ ເທເສນ຺ຕີຕິ ທສ຺ເສນ຺ໂຕ ‘‘ກິໍ ພຫຸນາ’’ຕິອາທິມາຫ.

ປາຬິຍໍ ‘‘ປິຫາ ນາມ ຍາ ວຕ຺ຕມານສ຺ສ ອຕ຺ຖສ຺ສ ປຕ຺ຖນາ’’ຕິ ປຈ຺ຈຸປ຺ປນ຺ນວິສຍຕໍ ທສ຺ເສຕ຺ວາ ປຸນ ອນາຄຕວິສຍຕໍ ທສ຺ເສຕຸໍ ‘‘ເສຍ຺ຍຕຣໍ ວາ’’ຕິອາທິ ວຸຕ຺ຕນ຺ຕິ ‘‘ອນາຄຕປຈ຺ຈຸປ຺ປນ຺ນຕ຺ຖວິສຍາ ຕຓ຺ຫາ ປິຫາ’’ຕິ ອາຫ.

ອຕ຺ຖນິປ຺ຜຕ຺ຕິປຏິປາລນາຕິ ອິມສ຺ມິໍ ວາ ປເທ ປິຫາຍ ເອວຕ຺ຖວເສນ ອນາຄຕປຈ຺ຈຸປ຺ປນ຺ນຕ຺ຖວິສຍຠາວທີປນໂຕ.

ຘມ຺ມາຣມ຺ມເຓເນວ ສງ຺ຄຫິຕາ ‘‘ຘມ຺ມາຣມ຺ມຓ’’ນ຺ຕ຺ເວວ ຄຫຓໍ ຄຕາ. ຈຕຸວີສຕິ ປທານີຕິ ເອຕ຺ຖ ເຄຫສິຕໂທມນສ຺ສູປວິຈາຣາທີນໍ ຈຕຸນ຺ນໍ ຉກ຺ການໍ ວເສນ ຈຕຸວີສ ໂກຏ຺ຐາສາ.

໓໘. ສາເຍວ ປຕ຺ຖນາກາເຣນ ຘມ຺ມນນ຺ທີຕິອາທິມາຫາຕິ ເອຕ຺ຖ ອຍມຕ຺ໂຖ – ສາ ເອວ ປຕ຺ຖນາກາເຣນ ປວຕ຺ຕິຍາ ອາສາທິປຣິຍາເຍນ ວຸຕ຺ຕາ ຕຓ຺ຫາ ຣູປາທິຘມ຺ເມສຸ ນນ຺ທນຏ຺ເຐນ ຘມ຺ມນນ຺ທີ. ເຕສໍ ເອວ ປິຍາຍນຏ຺ເຐນ ຘມ຺ມເປມໍ. ຄິລິຕ຺ວາ ປຣິນິຏ຺ຐເປຕ຺ວາ ຐານໂຕ ຘມ຺ມຊ຺ໂຌສານນ຺ຕິ.

ອິມິນາປີຕິ ນ ເກວລໍ ‘‘ປຎ຺ຎາ ປຊານນາ’’ຕິອາທິອາເວຓິກປຣິຍາເຍເນວ ເວວຈນໍ ວຕ຺ຕພ຺ພໍ, ອຖ ໂຂ ອິມິນາ ອາຘິປເຕຍ຺ຍາທິສາຘາຣຓປຣິຍາເຍນປິ ເວວຈນໍ ວຕ຺ຕພ຺ພນ຺ຕິ ອຕ຺ໂຖ. ອິມິນາວ ນເຍນາຕິ ເອເຕນ ປຣິຍາຍວຈເນນ. ນ ຫິ ເທສນຕ຺ຖສາຘນໍ ‘‘ອິຕິປິ ໂສ ຠຄວາ’’ຕິອາທິປາຬິນຍທສ຺ສນນ຺ຕິ ທສ຺ເສຕິ. ພລນິປ຺ຜຕ຺ຕິຄໂຕຕິອາທີສຸ ທສສຸ ຕຖາຄຕພເລສຸ ນິປ຺ຜຕ຺ຕິໍ ປາຣິປູຣິໍ ຄໂຕ. ສມ຺ໂພຘິປຫານນ຺ຕຣາຍເທສນາ ວິເສສໂຈທນາສຸ ວິສາຣທຠາວສງ຺ຂາຕານິ ຈຕ຺ຕາຣິ ຎາຓານິ ປຕ຺ໂຕ ອຘິຄໂຕຕິ ເວສາຣຊ຺ຊປ຺ປຕ຺ໂຕ.

ໂລຠຊ຺ຌາສຍາທິອຊ຺ຌາສຍໍ ວິເສເສນ ອຕິວຕ຺ໂຕຕິ ອຊ຺ຌາສຍວີຕິວຕ຺ໂຕ. ອຕີຕເຫຕຸສງ຺ເຂປາທິສງ຺ເຂປວິຣຫິຕຕາຍ ອສງ຺ເຂປສງ຺ຂາຕໍ ນິພ຺ພານໍ, ອກຸປ຺ປຘມ຺ມຕາຍ ຄຸເຓຫິ ວາ ອສງ຺ເຂປໍ ອສງ຺ຂ຺ເຍຍ຺ຍໍ ຄໂຕ ອຸປຄໂຕຕິ ອສງ຺ເຂປຄໂຕ. ເສສໍ ສຸວິຎ຺ເຎຍ຺ຍເມວ. ອຸທ຺ເຘຍ຺ຍນ຺ຕິ ອຸທ຺ຘຣິຕພ຺ພໍ.

ຘມ຺ມານຸສ຺ສຕິຍໍ ເອວໍ ອຕ຺ໂຖ ທຏ຺ຐພ຺ໂພຕິ ສມ຺ພນ຺ໂຘ. ສໍສາຣທຸກ຺ຂໂຕ ປາຕິ, ສນ຺ເຕນ ສຸເຂນ ຣເມຕິ ຈາຕິ ວາ ປາຣໍ.

ອຠູຕປຸພ຺ພຕ຺ຕາຕິ ອນຸປ຺ປນ຺ນປຸພ຺ພຕ຺ຕາ, ເຕນສ຺ສ ນິຈ຺ຈຕໍວ ວິຠາເວຕິ ເກນຈິ ເທວໂຕປສຄ຺ຄາທິນາ ອນຸປສຊ຺ຊນີຍຕ຺ຕາ ອນຸປສຏ຺ຐຕ຺ຕາ.

‘‘ທຸປ຺ປສ຺ສ’’ນ຺ຕິປິ ປາຬິ, ທຸຣຘິຄມນ຺ຕິ ອຕ຺ໂຖ. ຄຸຓໂສຠາສຸຣຠິຠາເວນາຕິ ຄຸເຓຫິ ໂສຠາຍ, ສຸຄນ຺ຘິຠາເວນ ຈ.

ຍຖາ ອກ຺ຂຓເວຘີ ປຸຄ຺ຄໂລ ສິປ຺ປນິປ຺ຜຕ຺ຕິຍາ ຣຕ຺ຕນ຺ຘກາຣຕິມິສາຍ ອຈິຣກ຺ຂຓາໂລເກນ ອຕິສຸຂຸມມ຺ປິ ທູຣຄຕໍ ລກ຺ຂໍ ວິຊ຺ຌຕິ, ເອວໍ ອຣິຍສາວໂກ ສີລສມ຺ປຕ຺ຕິຍາ ອຕິສຸຂຸມໍ ນິພ຺ພານໍ ຈຕຸສຈ຺ຈຘມ຺ມໍ ເອກປຏິເວເຘເນວ ປຏິວິຊ຺ຌຕີຕິ ອາຫ ‘‘ສິປ຺ປຎ຺ຈ ສີລໍ ອກ຺ຂຓເວຘິຕາຍາ’’ຕິ. ໂລກິກນ຺ຕິ ນິທສ຺ສນມຕ຺ຕໍ ທຏ຺ຐພ຺ພໍ ໂລກຸຕ຺ຕຣຘມ຺ມໂອໂລກນສ຺ສາປິ ອຘິຏ຺ຐານຠາວໂຕ.

ເວວຈນຫາຣວິຠງ຺ຄວຓ຺ຓນາ ນິຏ຺ຐິຕາ.