໑໑. ປຎ຺ຎຕ຺ຕິຫາຣວິຠງ຺ຄວຓ຺ຓນາ

໓໙. ຠຄວໂຕ ສາຠາວິກຘມ຺ມກຖາຍາຕິ ອຕ຺ຕໂນ ຠາໂວ ສຠາໂວ, ສຠາເວນ ນິພ຺ພຕ຺ຕາ, ຕໂຕ ວາ ອາຄຕາຕິ ສາຠາວິກາ, ສາ ເອວ ຘມ຺ມກຖາຕິ ສາຠາວິກຘມ຺ມກຖາ, ພຸທ຺ຘານໍ ສາມຸກ຺ກໍສິກຘມ຺ມກຖາຕິ ອຕ຺ໂຖ, ຕາຍ ກຣຓຠູຕາຍ ຘມ຺ມເທສນາຍ ອນຎ຺ຎຕ຺ເຕປິ ກຖາເທສນານໍ ອຸປຈາຣສິທ຺ເຘນ ເຠເທເນວໍ ວຸຕ຺ຕໍ, ອວຍວສມຸທາຍວິຠາເຄນ ວາ. ເຕນາຫ ‘‘ກາ ຈ ປກຕິກຖາຍ ເທສນາ? ຈຕ຺ຕາຣິ ສຈ຺ຈານີ’’ຕິ. ອິທຎ຺ຫິ ອຕ຺ຖສ຺ສ ເທສນາຍ ອເຠໂທປຈາຣໍ ກຕ຺ວາ ວຸຕ຺ຕໍ. ຕສ຺ສາ ເທສນາຍ ປຎ຺ຎາປນາ. ອຍໍ ປຎ຺ຎຕ຺ຕິຫາໂຣຕິ ສງ຺ເຂເປເນວ ປຎ຺ຎຕ຺ຕິຫາຣສ຺ສ ສຣູປມາຫ. ສາຕິ ຍຖາວຸຕ຺ຕເທສນາ. ຕຖາ ຕຖາຕິ ຍຖາ ຍຖາ ສຈ຺ຈານິ ເທເສຕພ຺ພານິ, ຕຖາ ຕຖາ. ກຖຎ຺ເຈຕານິ ເທເສຕພ຺ພານິ? ປຣິຎ຺ເຎຍ຺ຍາທິປ຺ປກາເຣນ. ຍຖາຘິປ຺ເປຕນ຺ຕິ ອຘິປ຺ເປຕານຸຣູປໍ, ໂພຘເນຍ຺ຍພນ຺ຘວານໍ ໂພຘນາຘິປ຺ປາຍານຸກູລນ຺ຕິ ອຕ຺ໂຖ. ອຕ຺ຖນ຺ຕິ ເທເສຕພ຺ພຕ຺ຖໍ, ທຸກ຺ຂາທິອຕ຺ຖເມວ ວາ. ນິກ຺ຂິປຕີຕິ ປຕິຏ຺ຐາເປຕິ. ຍໂຕ ‘‘ຈຕ຺ຕາໂຣ ສຸຕ຺ຕນິກ຺ເຂປາ’’ຕິອາທິ (ມ. ນິ. ອຏ຺ຐ. ໑.ມູລປຣິຍາຍສຸຕ຺ຕວຓ຺ຓນາ) ອຏ຺ຐກຖາສຸ ວຸຈ຺ຈຕິ.

ຕຕ຺ຖາຕິ ນິກ຺ເຂປເທສນາຍນ຺ຕິ ອຕ຺ໂຖ. ມຄ຺ຄປກ຺ຂິຍາຕິ ທຸກ຺ຂສຈ຺ຈໂຕ ພຫິກຕາຕິ ອຘິປ຺ປາໂຍ.

ຍສ຺ມິໍ ຐາເນຕິ ຍສ຺ມິໍ ຠວາທິສງ຺ຂາເຕ ຐາເນ. ຍຖາວຸຕ຺ຕາ ເທສນາຕິ ຈຕຸຣາຫາຣປຏິພທ຺ຘຣາຄາທິມຸເຂນ ວຏ຺ຏທີປນີ ວຸຕ຺ຕປ຺ປກາຣາ ເທສນາ.

໔໑. ເຕປຣິວຏ຺ຏວເສນາຕິ ເອຕ຺ຖາປິ ‘‘ສຈ຺ເຈສູ’’ຕິ ໂຍເຊຕພ຺ພໍ. ປຣິຎ຺ຎາປຎ຺ຎຕ຺ຕີຕິ ອາຫາຕິ ສມ຺ພນ຺ໂຘ. ອຊ຺ຌຕ຺ຕຣໂຕ, ສມາຫິໂຕຕິ ປທທ຺ວເຍນ ສມາຘານວິສິຏ຺ຐໍ ອຊ຺ຌຕ຺ຕຣຕຕາຠາວນໍ ທີເປຕິ ໂຄຈຣຊ຺ຌຕ຺ຕຕາທີປນໂຕ. ເກວໂລ ຫິ ອຊ຺ຌຕ຺ຕສທ຺ໂທ ອຊ຺ຌຕ຺ຕຊ຺ຌຕ຺ຕໂຄຈຣຊ຺ຌຕ຺ເຕສຸປິ ວຕ຺ຕຕິ. ອຊ຺ຌຕ຺ຕຣຕຕາວິສິຏ຺ຐຎ຺ຈ ສມາຘານໍ ສາຕິສຍໍ ຈິຕ຺ຕຏ຺ຐິຕິໍ ທີເປຕີຕິ ອິມມຕ຺ຖໍ ທສ຺ເສຕິ ‘‘ສມາຘານວິສິຏ຺ຐສ຺ສາ’’ຕິອາທິນາ.

ອາສຊ຺ຊນຏ຺ເຐນາຕິ ອາສງ຺ຄນຏ຺ເຐນ. ຕຖາ ທສ຺ສນນ຺ຕິ ອຕຖາຠູຕສ຺ສາປິ ຠພ຺ພຣູປສ຺ສ ວິຍ ອຕ຺ຕໂນ ວິທໍສນໍ. ອລກ຺ຂິໂກຕິ ວິລກ຺ຂິໂກ.

ກາມານນ຺ຕິ ກາມາວຈຣຘມ຺ມານໍ. ຣູປານນ຺ຕິ ຣູປາວຈຣຘມ຺ມານໍ. ນິສ຺ສຣຓນ຺ຕິ ກາມານໍ ຣູປາວຈຣຘມ຺ມາ ນິສ຺ສຣຓໍ, ເຕສໍ ອຣູປາວຈຣຘມ຺ມາ ນິສ຺ສຣຓໍ. ເອວໍ ຕໍສຠາວານນ຺ຕິ ສອຸຕ຺ຕຣສຠາວານໍ. ຕຖາຕິ ຍຖາ ສງ຺ຂຕຘມ຺ມານໍ ນິສ຺ສຣຓຠາວໂຕ, ກິເລສສມຸຈ຺ເຉທກສ຺ສ ອຣິຍມຄ຺ຄສ຺ສ ອາຣມ຺ມຓຠາວໂຕ ຈ ອຕ຺ເຖວ ອສງ຺ຂຕາ ຘາຕຸ, ຕຖາ ວຸຈ຺ຈມາເນນາປິ ກາຣເຓນ ອຕ຺ເຖວ ອສງ຺ຂຕາ ຘາຕູຕິ ທສ຺ເສຕິ. ກຕ຺ຖຈິ ວິສເຍຕິ ອສງ຺ຂຕຘາຕຸໍ ສນ຺ຘາຍ ວທຕິ. ອວິປຣີຕຕ຺ໂຖຕິ ຠູຕຕ຺ໂຖ. ‘‘ຍໂຕ ໂຂ ໂຠ ອຍໍ ອຕ຺ຕາ ປຎ຺ຈຫິ ກາມຄຸເຓຫິ ສມປ຺ປິໂຕ ສມງ຺ຄີຠູໂຕ ປຣິຈາເຣຕິ, ເອຕ຺ຕາວຕາ ໂຂ ໂຠ ອຍໍ ອຕ຺ຕາ ປຣມທິຏ຺ຐຘມ຺ມນິພ຺ພານປ຺ປຕ຺ໂຕ ໂຫຕິ (ທີ. ນິ. ໑.໙໔), ສປກຏ຺ຐນິພ຺ພານຠາວິໂນ’’ຕິ ຈ ເອວມາທີສຸ ອຸປຈາຣວຸຕ຺ຕິສພ຺ຠາວໂຕ. ຍຖາ ຕໍ ສີຫສທ຺ໂທຕິ ຍຖາ ‘‘ສີໂຫ ມາຓວໂກ’’ຕິອາທິນາ ມາຓວກາທີສຸ ອຸປຈາຣວຸຕ຺ຕິນາ ວຕ຺ຕມາໂນ ມິຄຣາເຊ ຠູຕຕ຺ຖວິສເຍ ທິຏ຺ໂຐ, ເອວໍ ນິພ຺ພານສທ຺ໂທປິ ກາມຄຸຓຣູປຊ຺ຌານສມງ຺ຄິຕາສຸ ອຸປຈາຣວຸຕ຺ຕິຍາ ວຕ຺ຕມາໂນ ກຕ຺ຖຈິ ວິສເຍ ອວິປຣີຕຕ຺ໂຖ. ຍຕ຺ຖ ຈ ວິສເຍ ອວິປຣີຕຕ຺ໂຖ, ສາ ອສງ຺ຂຕາ ຘາຕຸ. ຫຕ຺ຖຕເລ ສອາມລກໍ ວິຍ ເຎຍ຺ຍໍ ປຈ຺ຈກ຺ຂໂຕ ປສ຺ສນ຺ຕສ຺ສ ເອກປ຺ປມາຓສ຺ສ ສຕ຺ຖຸວຈນເມເວຕ຺ຖ ປມາຓນ຺ຕິ ທສ຺ເສນ຺ໂຕ ‘‘ກິໍ ວາ ເອຕາຍ ຍຸຕ຺ຕິຈິນ຺ຕາຍາ’’ຕິອາທິມາຫ. ‘‘ປຏິຎ຺ຎາຕສ຺ສ ອຕ຺ຖສ຺ສ ສິທ຺ຘິຍາ ປກາສນາປຎ຺ຎຕ຺ຕີ’’ຕິ ນິຄມໍ ສນ຺ຘາຍາຫາຕິ.

ປຎ຺ຎຕ຺ຕິຫາຣວິຠງ຺ຄວຓ຺ຓນາ ນິຏ຺ຐິຕາ.