໑໒. ໂອຕຣຓຫາຣວິຠງ຺ຄວຓ຺ຓນາ

໔໒. ອິນ຺ທ຺ຣິເຍຫີຕິ ກຣເຓ ກຣຓວຈນໍ ‘‘ມຄ຺ເຄນ ຄຈ຺ຉຕີ’’ຕິອາທີສຸ ວິຍ, ‘‘ຜຣສຸນາ ຉິນ຺ທຕີ’’ຕິ ເອວມາທີສຸ ວິຍ ຈ. ໂອຕຣຓາຕິ ອນຸປ຺ປເວສນາ.

ປຎ຺ຎາກ຺ຂນ຺ເຘ ສງ຺ຄຓ຺ຫນວເສນ ສມ຺ມາສງ຺ກປ຺ໂປ ວິຍາຕິ ໂຍຊນາ. ອຘິຈິຕ຺ຕອນຸຍຸຕ຺ຕານໍ ສທ຺ທຫນຸສ຺ສຫນຸປຏ຺ຐານສມາທຫເນຫິ ສທ຺ຘາທີສຸ ອຸປກໂຣນ຺ເຕສຸ ເອວ ປຎ຺ຎາ ທສ຺ສນກິຈ຺ຈໍ ສາເຘຕີຕິ ທສ຺ເສນ຺ໂຕ ‘‘ສທ຺ຘາ..ເປ… ວຸຕ຺ຕານີ’’ຕິ ອາຫ. ໂນ ຈ ຠວງ຺ຄາຕິ ເຕສໍ ສງ຺ຂາຣານໍ ປວຕ຺ຕິກາຣຓຕາຠາວໍ ທສ຺ເສຕິ.

໔໓. ຕຖາ ວຸຕ຺ໂຕຕິ ‘‘ນິສ຺ສໂຍ’’ຕິ ວຸຕ຺ໂຕ. ເຈຕນາສີເສນ ຕຓ຺ຫໍ ເອວ ວທຕິ ເຈຕນາສຫຈຣຓໂຕ.

ຣຕ຺ຕສ຺ສາຕິ ມຄ຺ເຄນ ອສມຸຈ຺ຉິນ຺ນຣາຄສ຺ສ. ເຍນ ປຸຄ຺ຄໂລ ‘‘ຣຕ຺ໂຕ’’ຕິ ວຸຈ຺ຈຕິ, ຕສ຺ສ ຣາຄສ຺ສ ສມ຺ພນ຺ຘິນີ ສຸຂາ ເວທນາ ວຸຕ຺ຕາ ຕຕ຺ຖ ຕສ຺ສ ອນຸສຍນໂຕ. ເຕນາຫ ‘‘ສຸຂາຍ…ເປ… ວຸຕ຺ຕ’’ນ຺ຕິ. ເອສ ນໂຍ ເສເສສຸປິ. ເຕນາຫ ‘‘ຕຖາ’’ຕິອາທິ.

ຕານິ ເອວ ອິນ຺ທ຺ຣິຍານີຕິ ສຸຂໂສມນສ຺ສຸເປກ຺ຂິນ຺ທ຺ຣິຍານິ. ‘‘ສງ຺ຂາຣປຣິຍາປນ຺ນານີ’’ຕິ ວຈນໍ ສນ຺ຘາຍາຫ ‘‘ອິຘ ເວທນາສີເສນ ເຈຕນາ ວຸຕ຺ຕາ’’ຕິ. ນ ຫິ ເວທນາ ສງ຺ຂາຣກ຺ຂນ຺ຘປຣິຍາປນ຺ນາ ໂຫຕິ. ຕຓ຺ຫາຍ, ທິຏ຺ຐິຍາຕິ ຈ ອຸປໂຍເຄ ກຣຓວຈນນ຺ຕິ ທສ຺ເສນ຺ໂຕ ‘‘ຕຓ຺ຫາຍາ’’ຕິອາທິມາຫ. ອິທານິ ອຸປໂຍຄວເສເນວ ‘‘ຕຓ຺ຫາຍາ’’ຕິອາທີນໍ ອຕ຺ຖໍ ທສ຺ເສຕຸໍ ‘‘ຍຖາ ວາ’’ຕິອາທິມາຫ. ຕຕ຺ຖ ເສສຘມ຺ມານນ຺ຕິ ຕຓ຺ຫາວຊ຺ຊິຕອວິສິຏ຺ຐຘມ຺ມານໍ. ຕຓ຺ຫາຍ ນິສ຺ສຍຠາເວຕິ ຍທາ ຕຓ຺ຫາ ເຕສໍ ນິສ຺ສໂຍ ໂຫຕິ.

ຕຓ຺ຫາຍ ເສສຘມ຺ມານໍ ປຈ຺ຈຍຠາເວຕິ ຍທາ ເສສຘມ຺ມາ ຕຓ຺ຫາປຈ຺ຈຍາ ໂຫນ຺ຕິ. ‘‘ກຣຊກາຍສນ຺ນິສ຺ສິຕາ’’ຕິ ອິມິນາ ເວທນາທິກ຺ຂນ຺ຘຕ຺ຕຍນິສ຺ສິຕາປິ ຄຫິຕາ ກາຍປ຺ປສ຺ສທ຺ຘິຠາວໂຕ. ກາຣຓຠາວນ຺ຕິ ປຣມ຺ປຣເຫຕຸຠາວໍ. ຕຓ຺ຫາທິຏ຺ຐິອຸປເຍນາຕິ ທິຏ຺ຐິອຸປເຍນ ຈ ທິຏ຺ຐິສຫຄຕຕຓ຺ຫາອຸປເຍນ ຈ.

‘‘ອາຄຕີຕິ ອິຘາຄຕິ, ຄຕີຕິ ເປຈ຺ຈຠໂວ’’ຕິ ປທທ຺ວເຍນ ວຸຕ຺ຕເມວຕ຺ຖໍ ປາກຏຕຣໍ ກາຕຸໍ ປາຬິຍໍ ‘‘ອາຄຕິຄຕີປິ ນ ຠວນ຺ຕີ’’ຕິ ວຸຕ຺ຕໍ. ອິຘ ຫຸຣນ຺ຕິ ທ຺ວາຣາຣມ຺ມຓຘມ຺ມາ ທສ຺ສິຕາ ອາສນ຺ນທູຣຠາເວຫິ ທ຺ວາຣາຣມ຺ມເຓຫິ ວິນິວຕ຺ເຕຕ຺ວາ ຄຫິຕຕ຺ຕາ. ອິຘ ທ຺ວາຣປ຺ປວຕ຺ຕຘມ຺ມາ ‘‘ອຸຠຍມນ຺ຕເຣນາ’’ຕິ ປທສ຺ສ ອຕ຺ຖຠາເວນ ວຸຕ຺ຕາ. ຈຕຸພ຺ຍູຫຫາເຣ ປນ ອນິນ຺ທ຺ຣິຍພທ຺ຘຣູປຘມ຺ມາ ຕຖາ ວຸຕ຺ຕາ. ກາຣຓຠູເຕນ ອນນ຺ຕຣປຈ຺ຈຍຠູເຕນ, ອຸປນິສ຺ສຍປຈ຺ຈຍຠູເຕນ ຈ. ເຍ ຘມ຺ມາ ອຸປາທາຍ ‘‘ອຕ຺ຕາ’’ຕິ ສມຎ຺ຎາ, ເຕສໍ ວິຎ຺ຎາຓາທິຘມ຺ມານໍ ອຠາເວນ ອນຸປ຺ປາທຘມ຺ມຕໍ ອາປາທິຕຕ຺ຕາຕິ ອຕ຺ໂຖ. ‘‘ອນິສ຺ສິຕສ຺ສ ຈລິຕໍ ນຕ຺ຖີ’’ຕິອາທິນາ ປຏິໂລມໂຕ ປຈ຺ຈຍຠາໂວ ທສ຺ສິໂຕຕິ ທສ຺ເສນ຺ໂຕ ປາຬິຍໍ ‘‘ເອເສວນ຺ໂຕ ທຸກ຺ຂສ຺ສາຕິ ປຏິຈ຺ຈສມຸປ຺ປາໂທ’’ຕິ ວຕ຺ວາ ນນຸ ‘‘ອວິຊ຺ຊາປຈ຺ຈຍາ ສງ຺ຂາຣາ’’ຕິອາທິໂກ ປຏິຈ຺ຈສມຸປ຺ປາໂທຕິ ໂຈທນໍ ສນ຺ຘາຍ ຍຖາວຸຕ຺ຕສ຺ສ ປຏິຈ຺ຈສມຸປ຺ປາທຠາວໍ ທສ຺ເສຕຸໍ ‘‘ໂສ ທຸວິໂຘ’’ຕິອາທິນາ ໂລກິຍໂລກຸຕ຺ຕຣວເສນ ປຏິຈ຺ຈສມຸປ຺ປາໂທ ວິຠຕ຺ໂຕ. ຕທຕ຺ຖຕາຍາຕິ ວີຕຣາຄວິມຸຕ຺ຕິອຕ຺ຖຕາຍ. ຕພ຺ຠາວນ຺ຕິ ໂລກຸຕ຺ຕຣປຏິຈ຺ຈສມຸປ຺ປາທຠາວໍ.

ໂອຕຣຓຫາຣວິຠງ຺ຄວຓ຺ຓນາ ນິຏ຺ຐິຕາ.