໓. ຍຸຕ຺ຕິຫາຣສມ຺ປາຕວຓ຺ຓນາ

໖໕. ປຏິປກ຺ຂປຏິພາຬ຺ຫາ ກຸສລາ ຘມ຺ມາ ອຸປ຺ປຊ຺ຊິຕຸເມວ ນ ສກ຺ໂກນ຺ຕິ, ອຸປ຺ປນ຺ນາປິ ສມ຺ມເທວ ອຕ຺ຕໂນ ກິຈ຺ຈໍ ກາຕຸໍ ອສມຕ຺ຖຕາຍ ອນຸປ຺ປນ຺ນສທິສາຕິ ປຏິປກ຺ຂນິວາຣເຓນ ກຸສລານໍ ຘມ຺ມານໍ ກິຈ຺ຈກຣຓຠາວໍ ທສ຺ເສຕຸໍ ‘‘ມນຈ຺ຉຏ຺ຐານິ…ເປ… ຠວິສ຺ສຕີ’’ຕິ ວຸຕ຺ຕໍ. ວິຫຣນ຺ຕສ຺ສາຕິ ວິຫຣຓເຫຕຸ. ວິຫຣນ຺ໂຕຕິ ເອຕ຺ຖາປິ ເອເສວ ນໂຍ, ເຕນ ຣກ຺ຂິຕຈິຕ຺ຕຕາ ວຸຕ຺ຕນເຍນ ເອກນ຺ຕໂຕ ສມ຺ມາສງ຺ກປ຺ປໂຄຈຣຕາຍ ຈ ສໍວຕ຺ຕຕີຕິ ທສ຺ເສຕິ. ວຸຕ຺ຕນເຍນາຕິ ມິຈ຺ຉາສງ຺ກປ຺ປານໍ ອວສຣໍ ອທຕ຺ວາ ວິໂສຘິຕເນກ຺ຂມ຺ມາທິວິຕກ຺ກຕາຍ. ອວິປຣີຕເມວາຕິ ກາຍາທິອສຸຠາທິໂຕ ອາທານໍ. ວິນິປາຕຠຍນ຺ຕິ ທຸຄ຺ຄຕິຠຍໍ. ສພ຺ໂພປິ ຈາຍມຕ຺ໂຖຕິ ‘‘ສມ຺ມາສງ຺ກປ຺ປໂຄຈໂຣ ສມ຺ມາທິຏ຺ຐິ ຠວິສ຺ສຕີ’’ຕິອາທີສຸ ອຕ຺ໂຖ ຍຸຕ຺ຕິຍາ ຍຸຕ຺ໂຕ ເອວ ອນຣູປກາຣຓຠາວໂຕ.

ຍຸຕ຺ຕິຫາຣສມ຺ປາຕວຓ຺ຓນາ ນິຏ຺ຐິຕາ.