ນິສ຺ສຄ຺ຄິຍກຓ຺ຑໍ

໑. ປຕ຺ຕວຄ຺ໂຄ

໑. ປຕ຺ຕສນ຺ນິຈຍສິກ຺ຂາປທວຓ຺ຓນາ

ປຐມໍ ອຸຕ຺ຕານຕ຺ຖເມວ.

ປຕ຺ຕສນ຺ນິຈຍສິກ຺ຂາປທວຓ຺ຓນາ ນິຏ຺ຐິຕາ.

໒. ອກາລຈີວຣສິກ຺ຂາປທວຓ຺ຓນາ

ຍໍ ອຕ຺ຕນາ ລທ຺ຘໍ, ຕໍ ນິສ຺ສຄ຺ຄິຍໍ ໂຫຕີຕິ ຍໍ ຈີວຣໍ ຠາຊາປິຕາຍ ອຕ຺ຕນາ ລທ຺ຘໍ, ຕເມວ ນິສ຺ສຄ຺ຄິຍໍ ໂຫຕິ, ຕໍ ວິນຍກມ຺ມໍ ກຕ຺ວາປິ ອຕ຺ຕນາ ນ ລພ຺ຠຕິ. ເຕນາຫ ‘‘ນິສ຺ສຏ຺ຐ’’ນ຺ຕິອາທິ. ຕຕ຺ຖ ນິສ຺ສຏ຺ຐໍ ປຏິລຠິຕ຺ວາປີຕິ ‘‘ອຍ຺ຍາຍ, ທມ຺ມີ’’ຕິ ເອວໍ ນິສ຺ສຏ຺ຐໍ ປຏິລຠິຕ຺ວາປິ. ຍຖາທາເນເຍວ ອຸປເນຕພ຺ພນ຺ຕິ ຍຖາ ທາຍເກຫິ ທິນ຺ນໍ, ຕເຖວ ອຸປເນຕພ຺ພໍ, ອກາລຈີວຣປກ຺ເຂເຍວ ຐເປຕພ຺ພນ຺ຕິ ວຸຕ຺ຕໍ ໂຫຕິ.

ອກາລຈີວຣສິກ຺ຂາປທວຓ຺ຓນາ ນິຏ຺ຐິຕາ.

໓. ຈີວຣປຣິວຕ຺ຕນສິກ຺ຂາປທວຓ຺ຓນາ

ເມຕນ຺ຕິ ເມ ເອຕໍ. ສກສຎ຺ຎາຍ ຄຫິຕຕ຺ຕາ ປາຈິຕ຺ຕິຍຎ຺ເຈວ ທຸກ຺ກຏຎ຺ຈ ວຸຕ຺ຕໍ, ອິຕຣຖາ ຠຓ຺ຑຄ຺ເຆນ ກາເຣຕພ຺ພໍ.

ຈີວຣປຣິວຕ຺ຕນສິກ຺ຂາປທວຓ຺ຓນາ ນິຏ຺ຐິຕາ.

໔. ອຎ຺ຎວິຎ຺ຎາປນສິກ຺ຂາປທວຓ຺ຓນາ

ປຏິລາເຠນາຕິ ປຐມວິຎ຺ຎຕ຺ຕິໂຕ ອູນຕຣສ຺ສາປິ ອຎ຺ຎສ຺ສ ປຏິລາເຠນ.

ຕສ຺ມິໍ ອປ຺ປໂຫນ຺ເຕ ປຸນ ຕຎ຺ເຎວາຕິ ຍໍ ປຐມໍ ວິຎ຺ຎຕ຺ຕໍ, ໂຖກຕ຺ຕາ ຕສ຺ມິໍ ອປ຺ປໂຫນ຺ເຕ ປຸນ ຕຎ຺ເຎວ ວິຎ຺ຎາເປນ຺ຕິຍາຕິ ອຕ຺ໂຖ. ອຎ຺ເຎນປິ ອຕ຺ເຖ ສຕີ ຕິ ປຐມໍ ວິຎ຺ຎຕ຺ຕິໂຕ ອຎ຺ເຎນປິ ອຕ຺ເຖ ສຕິ. ເຕນ ສທ຺ຘິໍ ອຎ຺ຎຎ຺ຈາຕິ ຍໍ ປຐມໍ ວິຎ຺ຎຕ຺ຕໍ, ເຕນ ສທ຺ຘິໍ ອຎ຺ຎຎ຺ຈ. ກິໍ ວຸຕ຺ຕໍ ໂຫຕິ? ສເຈ ປຐມໍ ສປ຺ປິ ວິຎ຺ຎຕ຺ຕໍ, ‘‘ຍມກໍ ປຈິຕພ຺ພ’’ນ຺ຕິ ຈ ເວຊ຺ເຊນ ວຸຕ຺ຕຕ຺ຕາ ເຕເລນາປິ ອຕ຺ໂຖ ໂຫຕິ. ຕໂຕ ‘‘ເຕເລນາປິ ເມ ອຕ຺ໂຖ’’ຕິ ເອວມາທິນາ ອຎ຺ຎຎ຺ຈ ວິຎ຺ຎາເປນ຺ຕິຍາຕິ ວຸຕ຺ຕໍ ໂຫຕິ. ອານິສໍສໍ ທສ຺ເສຕ຺ວາຕິ ‘‘ສເຈ ກຫາປຓສ຺ສ ສປ຺ປິ ອາຠຕໍ ໂຫຕິ, ອິມິນາ ມູເລນ ທ຺ວິຄຸຓໍ ເຕລໍ ລພ຺ຠຕິ, ເຕເລນາປິ ຈ ອິທໍ ກິຈ຺ຈໍ ນິປ຺ປຊ຺ຊຕິ, ຕສ຺ມາ ເຕລໍ ອາຫຣາ’’ຕິ ເອວໍ ອານິສໍສໍ ທສ຺ເສຕ຺ວາ.

ອຎ຺ຎວິຎ຺ຎາປນສິກ຺ຂາປທວຓ຺ຓນາ ນິຏ຺ຐິຕາ.

໕. ອຎ຺ຎເຈຕາປນສິກ຺ຂາປທວຓ຺ຓນາ

ຕໂຕ ອຎ຺ຎໍ ເຈຕາເປຍ຺ຍາຕິ ປຐມໍ ເຈຕາປິຕໂຕ ຍໍ ກິຎ຺ຈິ ອຎ຺ຎໍ ເຈຕາເປຍ຺ຍ.

ອຎ຺ຎເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໖. ປຐມສງ຺ຆິກເຈຕາປນສິກ຺ຂາປທວຓ຺ຓນາ

ອຎ຺ຎສ຺ສຕ຺ຖາຍ ທິນ຺ເນນາຕິ ຍໍ ເຈຕາເປຕິ, ຕໂຕ ອຎ຺ຎສ຺ສຕ຺ຖາຍ ທິນ຺ເນນ. ອຎ຺ຎຸທ຺ທິສິເກນາຕິ ປຸຣິມສ຺ເສວຕ຺ຖທີປນໍ.

ເສສກໍ ອຸປເນນ຺ຕິຍາຕິ ຍທຕ຺ຖາຍ ທິນ຺ໂນ, ຕໍ ເຈຕາເປຕ຺ວາ ອວເສສໍ ອຎ຺ຎສ຺ສຕ຺ຖາຍ ອຸປເນນ຺ຕິຍາ. ສາມິເກ ອປໂລເກຕ຺ວາຕິ ທາຍເກ ອາປຸຈ຺ຉິຕ຺ວາ. ເອວຣູປາສູ ອາປທາສຸ ອຸປເນນ຺ຕີນນ຺ຕິ ເອວຣູເປສຸ ອຸປທ຺ທເວສຸ ອຎ຺ຎສ຺ສ ຍສ຺ສ ກສ຺ສຈິ ອຕ຺ຖາຍ ອຸປເນນ຺ຕີນໍ.

ປຐມສງ຺ຆິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໗. ທຸຕິຍສງ຺ຆິກເຈຕາປນສິກ຺ຂາປທວຓ຺ຓນາ

ນ ເກວລໍ ເຕເນວ ປຣິກ຺ຂາເຣນາຕິ ອາຫ ‘‘ສຍໍ ຍາຈິຕເກນາປີ’’ຕິ. ວຸຕ຺ຕຎ຺ເຫຕໍ ປາຬິຍໍ ‘‘ຠິກ຺ຂຸນິໂຍ ເຕນ ຈ ປຣິກ຺ຂາເຣນ ສຍມ຺ປິ ຍາຈິຕ຺ວາ ເຠສຊ຺ຊໍ ເຈຕາເປຕ຺ວາ ປຣິຠຸຎ຺ຊິໍສູ’’ຕິ (ປາຈິ. ໗໖໓). ມາຕິກາຍໍ ປນ ຄມ຺ຍມານຕ຺ຕາ ປິ-ສທ຺ໂທ ນປ຺ປຍຸຕ຺ໂຕ. ຄມ຺ຍມານຕ຺ຖສ຺ສ ຫິ ສທ຺ທສ຺ສ ປໂຍຄໍ ປຕິ ກາມຈາໂຣຕິ ຍຸຕ຺ຕິ.

ທຸຕິຍສງ຺ຆິກເຈຕາປນສິກ຺ຂາປທວຓ຺ຓນາ ນິຏ຺ຐິຕາ.

໘-໙-໑໐. ປຐມຄຓິກເຈຕາປນາທິສິກ຺ຂາປທວຓ຺ຓນາ

ອຏ຺ຐມນວມທສມານິ ອຸຕ຺ຕານຕ຺ຖາເນວ.

ປຐມຄຓິກເຈຕາປນາທິສິກ຺ຂາປທວຓ຺ຓນາ ນິຏ຺ຐິຕາ.

ປຕ຺ຕວຄ຺ໂຄ ປຐໂມ.

໒. ຈີວຣວຄ຺ໂຄ

໑໑. ຄຣຸປາວຸຣຓສິກ຺ຂາປທວຓ຺ຓນາ

ຍສ຺ມາ ປວາຣິຕຏ຺ຐາເນ ວິຎ຺ຎຕ຺ຕິ ນາມ ນ ປຏິເສເຘຕພ຺ພາ, ຕສ຺ມາ ຠຄວາ ຘມ຺ມນິມນ຺ຕນວເສນ ປວາຣິຕຏ຺ຐາເນ ‘‘ວເທຖາຍ຺ເຍ, ເຍນຕ຺ໂຖ’’ຕິ (ສາຣຕ຺ຖ. ຏີ. ປາຈິຕ຺ຕິຍ ໓.໗໘໔) ວຸຕ຺ຕາຍ ຈຕຸກ຺ກໍສປຣມໍ ວິຎ຺ຎາເປຕພ຺ພນ຺ຕິ ປຣິຈ຺ເຉທໍ ທສ຺ເສຕີຕິ ເວທິຕພ຺ພໍ. ເຕເນວ ‘‘ເຈຕາເປຕພ຺ພນ຺ຕິ ຐເປຕ຺ວາ ສຫຘມ຺ມິເກ ຈ ຎາຕກປ຺ປວາຣິເຕ ຈ ອຎ຺ເຎນ ກິສ຺ມິຎ຺ຈິເທວ ຄຸເຓ ປຣິຕຸຏ຺ເຐນ ‘ວເທຖາຍ຺ເຍ, ເຍນຕ຺ໂຖ’ຕິ ວຸຕ຺ຕາຍ ວິຎ຺ຎາເປຕພ຺ພ’’ນ຺ຕິ ວຸຕ຺ຕໍ. ຣາຊານນ຺ຕິ ປເສນທິໂກສລຣາຊານໍ.

ຄຣຸປາວຸຣຓສິກ຺ຂາປທວຓ຺ຓນາ ນິຏ຺ຐິຕາ.

໑໒. ລຫຸປາວຸຣຓສິກ຺ຂາປທວຓ຺ຓນາ

ທຸຕິຍໍ ອຸຕ຺ຕານຕ຺ຖເມວ.

ລຫຸປາວຸຣຓສິກ຺ຂາປທວຓ຺ຓນາ ນິຏ຺ຐິຕາ.

ຈີວຣວຄ຺ໂຄ ທຸຕິໂຍ.

ອິຕິ ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ວິນຍຕ຺ຖມຎ຺ຊູສາຍໍ ລີນຕ຺ຖປ຺ປກາສນິຍໍ

ຠິກ຺ຂຸນິປາຕິໂມກ຺ເຂ ນິສ຺ສຄ຺ຄິຍວຓ຺ຓນາ ນິຏ຺ຐິຕາ.