໗-໘. ໂອກ຺ຂິຕ຺ຕຈກ຺ຂຸສິກ຺ຂາປທວຓ຺ຓນາ

ກິຕ຺ຕເກນ ປນ ໂອກ຺ຂິຕ຺ຕຈກ຺ຂຸ ໂຫຕີຕິ ອາຫ ‘‘ຍຸຄມຕ຺ຕໍ ຠູມິຠາຄໍ ເປກ຺ຂມາໂນ’’ຕິ. ຍຸຄຍຸຕ຺ຕໂກ ຫິ ທນ຺ໂຕ ອາຊາເນຍ຺ໂຍ ຍຸຄມຕ຺ຕໍ ເປກ຺ຂຕິ, ປຸຣໂຕ ຈຕຸຫຕ຺ຖປ຺ປມາຓໍ ຠູມິຠາຄໍ, ອິມິນາປິ ເອຕ຺ຕກໍ ເປກ຺ຂນ຺ເຕນ ຄນ຺ຕພ຺ພໍ. ໂຍ ອນາທຣິຍໍ ປຏິຈ຺ຈ ຕໍ ຕໍ ທິສາຠາຄໍ ປາສາທໍ ກູຏາຄາຣໍ ວີຖິໍ ໂອໂລເກນ຺ໂຕ ຄຈ຺ຉຕິ, ອາປຕ຺ຕິ ທຸກ຺ກຏສ຺ສ. ຫຕ຺ຖິອສ຺ສາທິປຣິສ຺ສຍາຠາວນ຺ຕິ ປຣິສ຺ສຍນຏ຺ເຐນ, ອຠິຠວນຏ຺ເຐນ, ວິເຫຐນຏ຺ເຐນ ວາ ປຣິສ຺ສໂຍ, ຫຕ຺ຖິອສ຺ສາທິເຍວ ປຣິສ຺ສໂຍ ຫຕ຺ຖິອສ຺ສາທິປຣິສ຺ສໂຍ, ຕສ຺ສາຠາວໍ, ຫຕ຺ຖິອສ຺ສາທິ ອຸປທ຺ທວາຠາວນ຺ຕິ ອຕ຺ໂຖ. ‘‘ຍຖາ ຈ ເອກສ຺ມິໍ ຐາເນ ຐຕ຺ວາ, ເອວໍ ຄຈ຺ຉນ຺ໂຕປິ ປຣິສ຺ສຍາຠາວໍ ໂອໂລເກຕຸໍ ລຠຕິເຍວ, ຕຖາ ຄາເມ ປູຊ’’ນ຺ຕິ (ສາຣຕ຺ຖ. ຏີ. ປາຈິຕ຺ຕິຍ ໓.໕໘໒) ວທນ຺ຕິ.

ໂອກ຺ຂິຕ຺ຕຈກ຺ຂຸສິກ຺ຂາປທວຓ຺ຓນາ ນິຏ຺ຐິຕາ.