໓໐-໓໒. ສມຕິຕ຺ຕິກາທິສິກ຺ຂາປທວຓ຺ຓນາ

ສມຕິຕ຺ຕິກນ຺ຕິ ຠາວນປຸໍສກນິທ຺ເທໂສ, ສມຕິຕ຺ຕິກໍ ກຕ຺ວາຕິ ອຕ຺ໂຖ. ເອວມຎ຺ເຎສຸປິ ອີທິເສສຸ ຐາເນສຸ ອຕ຺ໂຖ ທຏ຺ຐພ຺ໂພ. ສມປຸຓ຺ຓນ຺ຕິ (ສາຣຕ຺ຖ. ຏີ. ປາຈິຕ຺ຕິຍ ໓.໖໐໕) ປຕ຺ຕສ຺ສ ອນ຺ໂຕມຸຂວຏ຺ຏິເລຂາສມປຸຓ຺ຓໍ. ສມຠຣິຕນ຺ຕິ ເອຕ຺ຖາປິ ເອເສວ ນໂຍ. ຕຎ຺ຈ ໂຂ ອຘິຏ຺ຐານຸປຄປຕ຺ຕສ຺ເສວ, ເນຕຣສ຺ສ. ເຕນາຫ ‘‘ອຘິຏ຺ຐານຸປຄປຕ຺ຕສ຺ສາ’’ຕິອາທິ. ຣຈິຕນ຺ຕິ ກຕໍ, ປກ຺ຂິຕ຺ຕໍ ປູຣິຕນ຺ຕິ ອຕ຺ໂຖ. ຍໍ ກິຎ຺ຈິ ຍາວກາລິກນ຺ຕິ ຍາຄຸຠຕ຺ຕຜລາຜລາທິໍ ຍໍ ກິຎ຺ຈິ ອາມິສຊາຕິກໍ. ຍຕ຺ຖ ກຕ຺ຖຈີຕິ ອຘິຏ຺ຐານຸປໂຄ ວາ ໂຫຕຸ, ອນຘິຏ຺ຐານຸປໂຄ ວາ ຍຕ຺ຖ ກຕ຺ຖຈິ ປຕ຺ເຕ. ຖູປີກຕານີຕິ ຖູປໍ ວິຍ ກຕານິ, ອຘິຏ຺ຐານຸປຄສ຺ສ ປຕ຺ຕສ຺ສ ອນ຺ໂຕມຸຂວຏ຺ຏິເລຂໍ ອຕິກ຺ກມິຕ຺ວາ ກຕານີຕິ ອຕ຺ໂຖ. ອິທຎ຺ຈ ‘‘ຍາມກາລິກາທີນີ’’ຕິ ອິມສ຺ສ ວເສນ ວຸຕ຺ຕໍ, ‘‘ຍາວກາລິກ’’ນ຺ຕິ ອິມສ຺ສ ປນ ວເສນ ວຈນພ຺ຍຕ຺ຕຍໍ ກຕ຺ວາ ‘‘ຖູປີກຕມ຺ປິ ວຏ຺ຏຕີ’’ຕິ ໂຍເຊຕພ຺ພໍ. ປິ-ສທ຺ເທນ ອຖູປີກຕານິ ວຏ຺ຏນ຺ຕີຕິ ເອຕ຺ຖ ກຖາວ ນຕ຺ຖີຕິ ທສ຺ເສຕິ. ເຫຏ຺ຐາ ໂອໂຣຫຕີຕິ ສມນ຺ຕາ ໂອກາສສພ຺ຠາວໂຕ ຈາລິຍມານໍ ເຫຏ຺ຐາ ຠສ຺ສຕິ. ຕກ຺ໂກລວຏໍສກາທໂຍຕິ ເອຕ຺ຖ ມຕ຺ຖເກ ຐປິຕຕກ຺ໂກລເມວ ວຏໍສກສທິສຕ຺ຕາ ຕກ຺ໂກລວຏໍສກໍ. ອາທິສທ຺ເທນ ປຸປ຺ຜວຏໍສກກຏຸກຜລາທິວຏໍສການໍ (ປາຈິ. ອຏ຺ຐ. ໖໐໕) ຄຫຓໍ, ນ ຕໍ ຖູປີກຕໍ ນາມ ໂຫຕິ ປາເຏກ຺ກໍ ຠາຊນຕ຺ຕາ ປຓ຺ຓາທີນໍ.

ສມຕິຕ຺ຕິກາທິສິກ຺ຂາປທວຓ຺ຓນາ ນິຏ຺ຐິຕາ.