໑໐. ປຖວີຂຓນສິກ຺ຂາປທວຓ຺ຓນາ

ທສເມ ປຖວິນ຺ຕິ ທຸວິຘາ ປຖວີ ຊາຕປຖວີ ອຊາຕປຖວີຕິ. ຕຕ຺ຖ ຊາຕປຖວີ ສຸທ຺ຘມິສ຺ສປຸຎ຺ຊວເສນ ຕິວິຘາ, ຕຕ຺ຖ ສຸທ຺ຘປຖວີ ນາມ ປກຕິຍາ ສຸທ຺ຘປໍສຸ ວາ ສຸທ຺ຘມຕ຺ຕິກາ ວາ. ມິສ຺ສປຖວີ ນາມ ຍຕ຺ຖ ປໍສຸໂຕ ວາ ມຕ຺ຕິກາໂຕ ວາ ປາສາຓສກ຺ຂຣກຖລມຣຸມ຺ພວາລຸກາສຸ ອຎ຺ຎຕຣສ຺ສ ຕຕິຍຠາໂຄ ໂຫຕິ. ປຸຎ຺ຊປຖວີ ນາມ ‘‘ອຕິເຣກຈາຕຸມາສໍ ໂອວຏ຺ໂຐ ປໍສຸປຸຎ຺ໂຊ ວາ ມຕ຺ຕິກາປຸຎ຺ໂຊ ວາ’’ຕິ (ປາຈິ. ໘໖) ວຸຕ຺ຕໍ, ວຸຕ຺ຕລກ຺ຂເຓນ ປນ ມິສ຺ສກປຸຎ຺ໂຊປິ ປິຏ຺ຐິປາສາເຓ ຐິຕສຸຂຸມຣຊມ຺ປິ ຈ ເທເວ ຜຸສາຍນ຺ເຕ ສກິໍ ຕິນ຺ຕໍ ຈຕຸມາສຈ຺ຈເຍນ ຕິນ຺ໂຕກາໂສ ປຸຎ຺ຊປຖວິສງ຺ຂເມວ ຄຈ຺ຉຕິ. ຕິວິຘາປິ ເຈສາ ປຖວີ ອຸທ຺ຘນປຕ຺ຕປຈນາທິວເສນ ວາ ຍຖາ ຕຖາ ວາ ອທຑ຺ຒາ ‘ຊາຕປຖວີ’ຕິ ວຸຈ຺ຈຕິ, ທຑ຺ຒາ ປນ ວຸຕ຺ຕປ຺ປມາຓໂຕ ອຘິກຕຣປາສາຓາທິມິສ຺ສາ ວາ ອຊາຕປຖວີ ນາມ ໂຫຕິ, ໂກ ປນ ວາໂທ ສຸທ຺ຘປາສາຓາທິເຠທາຍ. ຕຕ຺ຖ ຍາ ‘ຊາຕປຖວີ’ຕິ ວຸຕ຺ຕາ, ອຍໍ ອກປ຺ປິຍປຖວີ. ໂຍ ຠິກ຺ຂຸ ຕໍ ເອວຣູປໍ ປຖວິໍ ສຍໍ ຂຓຕິ, ຂຓນເຠທນວິເລຂນປຈນາທີຫິ ວິໂກເປຕິ, ຕສ຺ສ ປໂຍຄຄຓນາຍ ປາຈິຕ຺ຕິຍໍ. ໂຍ ປນ ຂຓາເປຕິ, ວຸຕ຺ຕນເຍເນວ ວິໂກປາເປຕິ, ຕສ຺ສ ‘‘ອິມໍ ປເທສ’’ນ຺ຕິ ວາ ‘‘ອິມໍ ປຖວິ’’ນ຺ຕິ ວາ ເອວໍ ນິຍເມຕ຺ວາ ‘‘ຂຓ, ຠິນ຺ທາ’’ຕິອາທິນາ ນເຍນ ອາຓາເປນ຺ຕສ຺ສ ອາຓຕ຺ຕິຍາ ທຸກ຺ກຏໍ, ສກິໍ ອາຓຕ຺ເຕ ທິວສມ຺ປິ ຂຓນ຺ເຕ ອາຓາປກສ຺ສ ເອກເມວ ປາຈິຕ຺ຕິຍໍ, ສເຈ ອິຕໂຣ ປຸນປ຺ປຸນໍ ອາຓາເປຕິ, ວາຈາຍ ວາຈາຍ ປາຈິຕ຺ຕິຍໍ.

ອາຬວິຍໍ ອາຬວເກ ຠິກ຺ຂູ ອາຣພ຺ຠ ປຖວິຂຓນວຕ຺ຖຸສ຺ມິໍ ປຎ຺ຎຕ຺ຕໍ, ສາຘາຣຓປຎ຺ຎຕ຺ຕິ, ສາຓຕ຺ຕິກໍ, ປຖວິຍາ ເວມຕິກສ຺ສ, ອປຖວິຍາ ປຖວິສຎ຺ຎິໂນ ເຈວ ເວມຕິກສ຺ສ ຈ ທຸກ຺ກຏໍ. ໂອກາສໍ ອນິຍເມຕ຺ວາ ‘‘ໂປກ຺ຂຣຓິໍ ຂຓ, ອາວາຏໍ ຂຓ, ກນ຺ທໍ ຂຓາ’’ຕິອາທີນິ ຠຓນ຺ຕສ຺ສ, ອາຕເປນ ສຸສ຺ສິຕ຺ວາ ຜລິຕກທ຺ທມໍ ວາ ໂຄກຓ຺ຏກໍ ວາ ເຫຏ຺ຐາ ປຖວິຍາ ອສມ຺ພທ຺ຘໍ ຠິຊ຺ຊິຕ຺ວາ ປຕິຕນທິຕຏໍ ວາ ມຫນ຺ຕມ຺ປິ ນງ຺ຄລຈ຺ຉິນ຺ນມຕ຺ຕິກາປິຓ຺ຑນ຺ຕິເອວມາທີນິ ສພ຺ພຎ຺ຈ ອຊາຕປຖວິໍ ວິໂກເປນ຺ຕສ຺ສ, ‘‘ອິມສ຺ສ ຖມ຺ຠສ຺ສ ອາວາຏໍ ຊານ, ມຕ຺ຕິກໍ ເທຫິ, ມຕ຺ຕິກໍ ອາຫຣ, ປໍສຸນາ ເມ ອຕ຺ໂຖ, ມຕ຺ຕິກໍ ກປ຺ປິຍໍ ກໂຣຫີ’’ຕິ ຠຓນ຺ຕສ຺ສ, ອສຎ຺ຈິຈ຺ຈ ຣຸກ຺ຂາທິປວຏ຺ຏເນນ ຠິນ຺ທນ຺ຕສ຺ສ, ອສຕິຍາ ປາທງ຺ຄຸຏ຺ຐກາທີຫິ ວິເລຂນ຺ຕສ຺ສ, ຊາຕປຖວິຠາວໍ ວາ, ‘‘ຂຓາມິ ວາ ອຫ’’ນ຺ຕິ ອຊານນ຺ຕສ຺ສ, ອຸມ຺ມຕ຺ຕກາທີນຎ຺ຈ ອນາປຕ຺ຕິ. ຊາຕປຖວີ, ປຖວິສຎ຺ຎິຕາ, ຂຓນຂຓາປນານໍ ອຎ຺ຎຕຣນ຺ຕິ ອິມາເນຕ຺ຖ ຕີຓິ ອງ຺ຄານິ. ສມຸຏ຺ຐານາທີນິ ອທິນ຺ນາທານສທິສານິ, ອິທໍ ປນ ປຓ຺ຓຕ຺ຕິວຊ຺ຊໍ, ຕິຈິຕ຺ຕໍ, ຕິເວທນນ຺ຕິ.

ປຖວີຂຓນສິກ຺ຂາປທວຓ຺ຓນາ ນິຏ຺ຐິຕາ.

ມຸສາວາທວຄ຺ໂຄ ປຐໂມ.