ປຎ຺ຫສໂມຘານວຓ຺ຓນາ

ສໂມຘາເນຕພ຺ພາຕິ ສມາຫຣິຕພ຺ພາ.

໓໔໙. ໂອກປ຺ປນາຕິ ພລວສທ຺ຘາ. ອາຍຕິໍ ຠິກ຺ຂູນໍ ອວິວາທເຫຕຸຠູຕໍ ຕຕ຺ຖ ຕຕ຺ຖ ຠຄວຕາ ເທສິຕານໍ ອຕ຺ຖານໍ ສງ຺ຄາຍນໍ ສງ຺ຄີຕິ, ຕສ຺ສ ຈ ກາຣຓໍ ອຍໍ ສຸຕ຺ຕເທສນາ ຕຖາ ປວຕ຺ຕຕ຺ຕາຕິ ວຸຕ຺ຕໍ ‘‘ສງ຺ຄີຕິປຣິຍາຍນ຺ຕິ ສາມຄ຺ຄິຍາ ກາຣຓ’’ນ຺ຕິ. ສມນຸຎ຺ໂຎ ສຕ຺ຖາ ອໂຫສິ ‘‘ປຏິຠາຕຸ ຕ,ໍ ສາຣິປຸຕ຺ຕ, ຠິກ຺ຂູນໍ ຘມ຺ມິໍ ກຖາ’’ຕິ ອຸສ຺ສາເຫຕ຺ວາ ອາທິໂຕ ປຏ຺ຐາຍ ຍາວ ປຣິໂຍສານາ ສຸຓນ຺ໂຕ, ສາ ປເນຕ຺ຖ ຠຄວໂຕ ສມນຸຎ຺ຎຕາ ‘‘ສາຘຸ, ສາຘູ’’ຕິ ອນຸໂມທເນນ ປາກຏາ ຊາຕາຕິ ວຸຕ຺ຕໍ ‘‘ອນຸໂມທເນນ ສມນຸຎ຺ໂຎ ອໂຫສີ’’ຕິ. ຊິນຠາສິໂຕ ນາມ ຊາໂຕ, ນ ສາວກຠາສິໂຕ. ຍຖາ ຫິ ຣາຊຍຸຕ຺ເຕຫິ ລິຂິຕປຓ຺ຓໍ ຍາວ ຣາຊມຸທ຺ທິກາຍ ນ ລຎ຺ຊິຕໍ ໂຫຕິ, ນ ຕາວ ‘‘ຣາຊປຓ຺ຓ’’ນ຺ຕິ ສງ຺ຂ຺ຍໍ ຄຈ຺ຉຕິ, ລຎ຺ຊິຕມຕ຺ຕໍ ປນ ຣາຊປຓ຺ຓໍ ນາມ ໂຫຕິ. ເອວເມວ ‘‘ສາຘຸ, ສາຘຸ ສາຣິປຸຕ຺ຕາ’’ຕິອາທິ ອນຸໂມທນວຈນສໍສູຈິຕາຍ ສມນຸຎ຺ຎາສງ຺ຂາຕາຍ ຊິນວຈນມຸທ຺ທາຍ ລຎ຺ຊິຕຕ຺ຕາ ອຍໍ ສຸຕ຺ຕນ຺ໂຕ ຊິນຠາສິໂຕ ນາມ ຊາໂຕ ອາຫຈ຺ຈວຈໂນ. ຍໍ ປເນຕ຺ຖ ອຕ຺ຖໂຕ ນ ວິຠຕ຺ຕໍ, ຕໍ ສຸວິຎ຺ເຎຍ຺ຍເມວາຕິ.

ສງ຺ຄີຕິສຸຕ຺ຕວຓ຺ຓນາຍ ລີນຕ຺ຖປ຺ປກາສນາ.