ອເສກ຺ຂຘມ຺ມທສກວຓ຺ຓນາ

ຜລຎ຺ຈ ເຕ ສມ຺ປຍຸຕ຺ຕຘມ຺ມາ ຈາຕິ ຜລສມ຺ປຍຸຕ຺ຕຘມ຺ມາ, ອຣິຍຜລສຠາວາ ສມ຺ປຍຸຕ຺ຕາ ຘມ຺ມາຕິ ອຕ຺ໂຖ. ຜລສມ຺ປຍຸຕ຺ຕຘມ຺ມາຕິ ຜລຘມ຺ມາ ເຈວ ຕໍສມ຺ປຍຸຕ຺ຕຘມ຺ມາ ຈາຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ທ຺ວີສຸປິ ຐາເນສຸ ປຎ຺ຎາວ ກຖິຕາ ສມ຺ມາ ທສ຺ສນຏ຺ເຐນ ສມ຺ມາທິຏ຺ຐິ, ສມ຺ມາ ຊານນຏ຺ເຐນ ສມ຺ມາຎາຓນ຺ຕິ ຈ. ອຕ຺ຖິ ຫິ ທສ຺ສນຊານນານໍ ສວິສເຍ ປວຕ຺ຕິອາກາຣວິເສໂສ, ສ຺ວາຍໍ ເຫຏ຺ຐາ ທສ຺ສິໂຕ ເອວ. ຜລສມາປຕ຺ຕິຘມ຺ມາຕິ ຜລສມາປຕ຺ຕິຍໍ ຘມ຺ມາ, ຜລສມາປຕ຺ຕິສຫຄຕຘມ຺ມາຕິ ອຕ຺ໂຖ. ອຣິຍຜລສມ຺ປຍຸຕ຺ຕຘມ຺ມາປິ ຫິ ສພ຺ພໂສ ປຏິປກ຺ຂໂຕ ວິມຸຕ຺ຕຕໍ ອຸປາທາຍ ‘‘ວິມຸຕ຺ຕີ’’ຕິ ວຕ຺ຕພ຺ພຕໍ ລຠນ຺ຕິ. ເກນຈິ ປນ ຍຖາ ອເສກ຺ຂາ ຜລປຎ຺ຎາ ທສ຺ສນກິຈ຺ຈໍ ອຸປາທາຍ ‘‘ສມ຺ມາທິຏ຺ຐີ’’ຕິ ວຸຕ຺ຕາ, ຊານນກິຈ຺ຈໍ ອຸປາທາຍ ‘‘ສມ຺ມາຎາຓ’’ນ຺ຕິປິ ວຸຕ຺ຕາ ເອວ; ເອວໍ ອຣິຍຜລສມາຘິ ສມາທານຏ຺ຐໍ ອຸປາທາຍ ‘‘ສມ຺ມາສມາຘີ’’ຕິ ວຸຕ຺ໂຕ, ວິມຸຈ຺ຈນຏ຺ຐໍ ອຸປາທາຍ ‘‘ສມ຺ມາວິມຸຕ຺ຕີ’’ ຕິປິ ວຸຕ຺ໂຕ. ເອວຎ຺ຈ ກຕ຺ວາ ‘‘ອນາສວໍ ເຈໂຕວິມຸຕ຺ຕິ’’ນ຺ຕິ ທຸຕິຍວິມຸຕ຺ຕິຄ຺ຄຫຓຎ຺ຈ ສມຕ຺ຖິຕໍ ໂຫຕີຕິ.

ທສກວຓ຺ຓນາ ນິຏ຺ຐິຕາ.