ນວກວຓ຺ຓນາ

໓໔໐. ວສຕິ ຕຕ຺ຖ ຜລໍ ຕນ຺ນິມິຕ຺ຕກຕາຍ ປວຕ຺ຕຕີຕິ ວຕ຺ຖຸ, ກາຣຓນ຺ຕິ ວຸຕ຺ໂຕວາຍມຕ຺ໂຖ. ເຕນາຫ ‘‘ອາຆາຕວຕ຺ຖູນີຕິ ອາຆາຕກາຣຓານີ’’ຕິ. ໂກໂປ ນາມາຍໍ ຍສ຺ມິໍ ວຕ຺ຖຸສ຺ມິໍ ອຸປ຺ປຊ຺ຊຕິ, ນ ຕຕ຺ຖ ເອກວາຣເມວ ອຸປ຺ປຊ຺ຊຕິ, ອຖ ໂຂ ປຸນປິ ອຸປ຺ປຊ຺ຊເຕວາຕິ ວຸຕ຺ຕໍ ‘‘ພນ຺ຘຕີ’’ຕິ. ອຖ ວາ ໂຍ ປຈ຺ຈຍວິເສເສນ ອຸປ຺ປຊ຺ຊມາໂນ ອາຆາໂຕ ສວິສເຍ ພທ຺ໂຘ ວິຍ ນ ວິຄຈ຺ຉຕິ, ປຸນປິ ອຸປ຺ປຊ຺ເຊຍ຺ເຍວ, ຕໍ ສນ຺ຘາຍາຫ ‘‘ອາຆາຕໍ ພນ຺ຘຕີ’’ຕິ. ຕໍ ປນສ຺ສ ປຈ຺ຈຍວເສນ ນິພ຺ພຕ຺ຕນໍ ອຸປ຺ປາທນເມວາຕິ ວຸຕ຺ຕໍ ‘‘ກໂຣຕິ ອຸປ຺ປາເທຕີ’’ຕິ.

ຕໍ ກຸເຕຕ຺ຖ ລພ຺ຠາຕິ ເອຕ຺ຖ ຕນ຺ຕິ ກິຣິຍາປຣາມສນໍ, ປທຊ຺ຌາຫາເຣນ ຈ ອຕ຺ໂຖ ເວທິຕພ຺ໂພຕິ ທສ຺ເສນ຺ໂຕ ‘‘ຕໍ ອນຕ຺ຖຈຣຓໍ ມາ ອໂຫສີ’’ຕິອາທິມາຫ. ເກນ ກາຣເຓນ ລທ຺ຘພ຺ພໍ ນິຣຕ຺ຖກຠາວໂຕ. ກມ຺ມສ຺ສກາ ຫິ ສຕ຺ຕາ, ເຕ ກສ຺ສ ຣຸຈິຍາ ທຸກ຺ຂິຕາ, ສຸຂິຕາ ວາ ຠວນ຺ຕິ, ຕສ຺ມາ ເກວລໍ ຕສ຺ມິໍ ມຍ຺ຫໍ ກຸຊ຺ຌນມຕ຺ຕໍ ເອວາຕິ ອຘິປ຺ປາໂຍ. ອຖ ວາ ຕໍ ໂກປກຣຓເມຕ຺ຖ ປຸຄ຺ຄເລ ກຸໂຕ ລພ຺ຠາ ປຣມຕ຺ຖໂຕ ກຸຊ຺ຌິຕພ຺ພສ຺ສ, ກຸຊ຺ຌນກສ຺ສ ຈ ອຠາວໂຕ. ສງ຺ຂາຣມຕ຺ຕຎ຺ເຫຕໍ, ຍທິທໍ ຂນ຺ຘປຎ຺ຈກໍ. ຍໍ ‘‘ສຕ຺ໂຕ’’ຕິ ວຸຈ຺ຈຕິ, ເຕ ສງ຺ຂາຣາ ອິຕ຺ຕຣກາລາ ຂຓິກາ, ກສ຺ສ ໂກ ກຸຊ຺ຌຕີຕິ ອຕ຺ໂຖ. ລາຠາ ນາມ ເກ ສິຍຸໍ ອຎ຺ຎຕ຺ຣ ອນຸປ຺ປຕ຺ຕິໂຕ.

໓໔໑. ສຕ຺ຕາ ອາວສນ຺ຕິ ເອເຕສູຕິ ສຕ຺ຕາວາສາ. ນານຕ຺ຕກາຍາ ນານຕ຺ຕສຎ຺ຎີ ອາທິເຠທາ ສຕ຺ຕນິກາຍາ. ຍສ຺ມາ ເຕ ເຕ ສຕ຺ຕນິກາຍາ ຕປ຺ປຣິຍາປນ຺ນານໍ ສຕ຺ຕານໍ ຕາຍ ເອວ ຕປ຺ປຣິຍາປນ຺ນຕາຍ ອາຘາໂຣ ວິຍ ວຕ຺ຕພ຺ພຕໍ ອຣຫນ຺ຕິ ສມຸທາຍາຘາຣຕາຍ ອວຍວສ຺ສ ຍຖາ ‘‘ຣຸກ຺ເຂ ສາຂາ’’ຕິ, ຕສ຺ມາ ‘‘ສຕ຺ຕານໍ ອາວາສາ, ວສນຏ຺ຐານານີຕິ ອຕ຺ໂຖ’’ຕິ ວຸຕ຺ຕໍ. ສຸທ຺ຘາວາສາປິ ສຕ຺ຕາວາໂສວ ‘‘ນ ໂສ, ຠິກ຺ຂເວ, ສຕ຺ຕາວາໂສ ສຸລຠຣູໂປ, ໂຍ ມຍາ ອນາວຸຕ຺ຖປຸພ຺ໂພ ອິມິນາ ທີເຆນ ອທ຺ຘຸນາ ອຎ຺ຎຕ຺ຣ ສຸທ຺ຘາວາເສຫິ ເທເວຫີ’’ຕິ ວຈນໂຕ. ຍທິ ເອວໍ ກສ຺ມາ ອິຘ ນ ຄຫິຕາຕິ ຕຕ຺ຖ ກາຣຓມາຫ ‘‘ອສພ຺ພກາລິກຕ຺ຕາ’’ຕິອາທິ. ເວຫປ຺ຜໂລ ປນ ຈຕຸຕ຺ຖໍເຍວ ສຕ຺ຕາວາສໍ ຠຊຕີຕິ ທຏ຺ຐພ຺ພໍ.

໓໔໒. ໂອປສມິໂກຕິ ວຏ຺ຏທຸກ຺ຂສ຺ສ ອຸປສມາວໂຫ, ຕໍ ປນ ວຏ຺ຏທຸກ຺ຂໍ ກິເລເສສຸ ອຸປສນ຺ເຕສຸ ອຸປສມຕິ, ນ ອຎ຺ຎຖາ, ຕສ຺ມາ ‘‘ກິເລສູປສມກໂຣ’’ຕິ ວຸຕ຺ຕໍ. ຕກ຺ກຣໍ ສມ຺ໂພຘໍ ຄເມຕີຕິ ສມ຺ໂພຘຄາມີ.

ຍສ຺ມິໍ ເທວນິກາເຍ ຘມ຺ມເທສນາ ນ ວິຍຸຊ຺ຊຕິ ສວນສ຺ເສວ ອຠາວໂຕ, ໂສ ປາຬິຍໍ ‘‘ທີຆາຍຸໂກ ເທວນິກາໂຍ’’ຕິ ອຘິປ຺ເປໂຕຕິ ອາຫ ‘‘ອສຎ຺ຎຠວໍ ວາ ອຣູປຠວໍ ວາ’’ຕິ.

໓໔໓. ອນຸປຸພ຺ພໂຕ ວິຫຣິຕພ຺ພາຕິ ອນຸປຸພ຺ພວິຫາຣາ. ອນຸປຏິປາຏິຍາຕິ ອນຸກ຺ກເມນ. ສມາປຊ຺ຊິຕພ຺ພວິຫາຣາຕິ ສມາປຊ຺ຊິຕ຺ວາ ສມງ຺ຄິໂນ ຫຸຕ຺ວາ ວິຫຣິຕພ຺ພວິຫາຣາ.

໓໔໔. ອນຸປຸພ຺ພນິໂຣຘາຕິ ອນຸປຸພ຺ເພນ ອນຸກ຺ກເມນ ປວຕ຺ເຕຕພ຺ພນິໂຣຘາ. ເຕນາຫ ‘‘ອນຸປຏິປາຏິຍາ ນິໂຣຘາ’’ຕິ.

ນວກວຓ຺ຓນາ ນິຏ຺ຐິຕາ.