ອຏ຺ຐກວຓ຺ຓນາ

໓໓໓. ອຍາຖາວາຕິ ນ ຍາຖາວາ. ອນິຍ຺ຍານິກຕາຍ ມິຈ຺ຉາສຠາວາ. ວິປຣີຕວຸຕ຺ຕິກຕາຍ ຍາຖາວາ. ນິຍ຺ຍານິກຕາຍ ສມ຺ມາສຠາວາ ອວິປຣີຕວຸຕ຺ຕິກາ.

໓໓໔. ກຸຈ຺ຉິຕໍ ສີທຕີຕິ ກຸສີໂຕ ທ-ກາຣສ຺ສ ຕ-ກາຣໍ ກຕ຺ວາ. ຍສ຺ສ ຘມ຺ມສ຺ສ ວເສນ ປຸຄ຺ຄໂລ ‘‘ກຸສີໂຕ’’ຕິ ວຸຈ຺ຈຕິ, ໂສ ກຸສີຕຠາໂວ ອິຘ ກຸສີຕ-ສທ຺ເທນ ວຸຕ຺ໂຕ. ວິນາປິ ຫິ ຠາວໂຊຕນໍ ສທ຺ທໍ ຠາວຕ຺ໂຖ ວິຎ຺ຎາຍຕິ ຍຖາ ‘‘ປຏສ຺ສ ສຸກ຺ກ’’ນ຺ຕິ, ຕສ຺ມາ ກຸສີຕຠາວວຕ຺ຖູນີຕິ ອຕ຺ໂຖ. ເຕນາຫ ‘‘ໂກສຊ຺ຊກາຣຓານີຕິ ອຕ຺ໂຖ’’ຕິ. ກມ຺ມໍ ນາມ ສມຓສາຣຸປ຺ປໍ ອີທິສນ຺ຕິ ອາຫ ‘‘ຈີວຣວິຈາຣຓາທີ’’ຕິ. ວີຣິຍນ຺ຕິ ປຘານວີຣິຍໍ, ຕໍ ປນ ຈງ຺ກມນວເສນ ກຣເຓ ‘‘ກາຍິກ’’ນ຺ຕິປິ ວຕ຺ຕພ຺ພຕໍ ລຠຕີຕິ ອາຫ ‘‘ທຸວິຘມ຺ປີ’’ຕິ. ປຕ຺ຕິຍາຕິ ປາປຸຓນຕ຺ຖໍ. ໂອສີທນນ຺ຕິ ຠາວນານຸໂຍເຄ ສງ຺ໂກໂຈ. ມາເສຫິ ອາຈິຕໍ ນິຈິຕໍ ວິຍາຕິ ມາສາຈິຕໍ, ຕໍ ມຎ຺ເຎ. ຍສ຺ມາ ມາສາ ຕິນ຺ຕາວິເສເສນ ຄຣຸກາ ໂຫນ຺ຕິ, ຕສ຺ມາ ‘‘ຍຖາ ຕິນ຺ຕມາໂສ’’ຕິອາທິ ວຸຕ຺ຕໍ. ວຸຏ຺ຐິໂຕ ໂຫຕິ ຄິລານຠາວາຕິ ອຘິປ຺ປາໂຍ.

໓໓໕. ເຕສນ຺ຕິ ອາຣມ຺ຠວຕ຺ຖູນໍ. ອິມິນາວ ນເຍນາຕິ ອິມິນາ ກຸສີຕວຕ຺ຖູສຸ ວຸຕ຺ເຕເນວ ນເຍນ. ‘‘ທຸວິຘມ຺ປິ ວີຣິຍໍ ອາຣຠຕີ’’ຕິອາທິນາ, ‘‘ອິທໍ ປຐມນ຺ຕິ ອິທໍ ຫນ຺ທາຫໍ ວີຣິຍໍ ອາຣຠາມີຕິ ເອວໍ ຠາວນາຍ ອພ຺ຠຸສ຺ສຫນໍ ປຐມໍ ອາຣມ຺ຠວຕ຺ຖູ’’ຕິອາທິນາ ຈ ອຕ຺ໂຖ ເວທິຕພ຺ໂພ. ຍຖາ ຕຖາ ປຐມໍ ປວຕ຺ຕໍ ອພ຺ຠຸສ຺ສຫນຎ຺ຫິ ອຸປຣິ ວີຣິຍາຣມ຺ຠສ຺ສ ກາຣຓໍ ໂຫຕິ. ອນຸຣູປປຈ຺ຈເວກ຺ຂຓາສຫິຕານິ ຫິ ອພ຺ຠຸສ຺ສຫນານິ, ຕມ຺ມູລການິ ວາ ປຈ຺ຈເວກ຺ຂຓານິ ອຏ຺ຐ ອາຣມ຺ຠວຕ຺ຖູນິ ເວທິຕພ຺ພານິ.

໓໓໖. ອາສຊ຺ຊາຕິ ຍສ຺ສ ເທຕິ, ຕສ຺ສ ອາໂມທນເຫຕຸ ເຕນ ສມາຄມນິມິຕ຺ຕໍ. ເຕນາຫ ‘‘ເອຕ຺ຖ ອາສາທນໍ ທານກາຣຓໍ ນາມາ’’ຕິ. ຠຍາຕິ ຠຍເຫຕຸ. ນນຸ ຠຍໍ ນາມ ລທ຺ຘຸກາມຕາ ຣາຄາທໂຍ ວິຍ ເຈຕນາຍ ອວິສຸທ຺ຘິກຣໍ, ຕໍ ກສ຺ມາ ອິຘ ຄຫິຕນ຺ຕິ? ນ ອິທໍ ຕາທິສໍ ໂຈຣຠຍາທິໍ ສນ຺ຘາຍ ວຸຕ຺ຕນ຺ຕິ ທສ຺ເສຕຸໍ ‘‘ຕຕ຺ຖາ’’ຕິອາທິ ວຸຕ຺ຕໍ. ອທາສິ ເມຕິ ຍໍ ປຸພ຺ເພ ກຕໍ ອຸປກາຣໍ ຈິນ຺ເຕຕ຺ວາ ທີຍຕິ, ຕໍ ສນ຺ຘາຍ ວຸຕ຺ຕໍ. ທສ຺ສຕິ ເມຕິ ປຈ຺ຈຸປກາຣາສີສາຍ ຍໍ ທີຍຕິ, ຕໍ ສນ຺ຘາຍ ວທຕິ. ສາຫຸ ທານນ຺ຕິ ‘‘ທານໍ ນາເມຕໍ ປຓ຺ຑິຕປຎ຺ຎຕ຺ຕ’’ນ຺ຕິ ສາຘຸສມາຈາເຣ ຐຕ຺ວາ ເທຕິ. ອລງ຺ກາຣຕ຺ຖນ຺ຕິ ອຸປໂສຠນຕ຺ຖໍ. ປຣິວາຣຕ຺ຖນ຺ຕິ ປຣິກ຺ຂາຣຕ຺ຖໍ. ທານຎ຺ຫິ ທຕ຺ວາ ຕໍ ປຈ຺ຈເວກ຺ຂນ຺ຕສ຺ສ ປາໂມຊ຺ຊປີຕິໂສມນສ຺ສາທໂຍ ອຸປ຺ປຊ຺ຊນ຺ຕິ, ໂລຠໂທສອິສ຺ສາມຈ຺ເຉຣາທໂຍ ວິທູຣີ ຠວນ຺ຕິ. ອິທານິ ທານໍ ອນຸກູລຘມ຺ມປຣິພ຺ຣູຫເນນ, ປຈ຺ຈນີກຘມ຺ມວິທູຣີຠາວກຣເຓນ ຈ ຠາວນາຈິຕ຺ຕສ຺ສ ອຸປໂສຠນາຍ ຈ ປຣິກ຺ຂາຣາຍ ຈ ໂຫຕີຕິ ‘‘ອລງ຺ກາຣຕ຺ຖໍ, ປຣິວາຣຕ຺ຖຎ຺ຈ ເທຕີ’’ຕິ ວຸຕ຺ຕໍ. ເຕນາຫ ‘‘ທານຎ຺ຫິ ຈິຕ຺ຕໍ ມຸທຸກໍ ກໂຣຕີ’’ຕິອາທິ. ມຸທຸຈິຕ຺ໂຕ ໂຫຕິ ລທ຺ຘາ ທາຍເກ ‘‘ອິມິນາ ມຍ຺ຫໍ ສງ຺ຄໂຫ ກໂຕ’’ຕິ, ທາຕາປິ ລທ຺ຘຣິ. ເຕນ ວຸຕ຺ຕໍ ‘‘ອຸຠິນ຺ນມ຺ປິ ຈິຕ຺ຕໍ ມຸທຸກໍ ກໂຣຕີ’’ຕິ.

ອທນ຺ຕທມນນ຺ຕິ ອທນ຺ຕາ ອນສ຺ສວາປິສ຺ສ ທາເນນ ທນ຺ຕາ ອສ຺ສວາ ໂຫນ຺ຕິ ວເສ ວຕ຺ຕນ຺ຕິ. ອທານໍ ທນ຺ຕທູສກນ຺ຕິ ອທານໍ ປນ ປຸພ຺ເພ ທນ຺ຕານໍ ອສ຺ສວານມ຺ປິ ວິຆາຕຸປ຺ປາທເນນ ຈິຕ຺ຕໍ ທູເສຕິ. ອຸນ຺ນມນ຺ຕິ ທາຍກາ, ປິຍໍວທາ ຈ ປເຣສໍ ຄຣຸຈິຕ຺ຕີກາຣຏ຺ຐານຕາຍ. ນມນ຺ຕິ ປຏິຄ຺ຄາຫກາ ທາເນນ, ປິຍວາຈາຍ ລທ຺ຘສງ຺ຄຫາ ສງ຺ຄາຫການໍ.

ຈິຕ຺ຕາລງ຺ກາຣທານເມວ ອຸຕ຺ຕມໍ ອນຸປກ຺ກິລິຏ຺ຐຕາຍ, ສຸປຣິສຸທ຺ຘຕາຍ, ຄຸຓວິເສສປຈ຺ຈຍຕາຍ ຈ.

໓໓໗. ທານປຈ຺ຈຍາຕິ ທານກາຣຓາ, ທານມຍປຸຎ຺ຎສ຺ສ ກຕຕ຺ຕາ ອຸປຈິຕຕ຺ຕາຕິ ອຕ຺ໂຖ. ອຸປປຕ຺ຕິໂຍຕິ ມນຸສ຺ເສສຸ, ເທເວສຸ ຈ ນິພ຺ພຕ຺ຕິໂຍ. ຐເປຕີຕິ ເອກວາຣເມວ ອນຸປ຺ປຊ຺ຊິຕ຺ວາ ຍຖາ ອຸປຣູປຣິ ເຕເນວາກາເຣນ ປວຕ຺ຕຕິ, ເອວໍ ຐເປຕິ. ຕເທວ ຈສ ອຘິຏ຺ຐານນ຺ຕິ ອາຫ ‘‘ຕສ຺ເສວ ເວວຈນ’’ນ຺ຕິ. ວຑ຺ເຒຕີຕິ ພ຺ຣູເຫຕິ, ນ ຫາເປຕິ. ວິມຸຕ຺ຕນ຺ຕິ ອຘິມຸຕ຺ຕໍ, ນິນ຺ນໍ ໂປຓໍ ປພ຺ຠາຣນ຺ຕິ ອຕ຺ໂຖ. ວິມຸຕ຺ຕນ຺ຕິ ວາ ວິສິຏ຺ຐໍ. ນິປ຺ປຣິຍາຍໂຕ ອຸຕ຺ຕຣິ ນາມ ປຓີຕໍ ມຊ຺ເຌປິ ຫີນມຊ຺ຌິມວິຠາຄສ຺ສ ລພ຺ຠນໂຕຕິ ວຸຕ຺ຕໍ ‘‘ອຸຕ຺ຕຣິ ອຠາວິຕນ຺ຕິ ຕໂຕ ອຸປຣິ ມຄ຺ຄຜລຕ຺ຖາຍ ອຠາວິຕ’’ນ຺ຕິ. ສໍວຕ຺ຕຕິ ຕຖາ ປຓິຫິຕໍ ທານມຍຈິຕ຺ຕໍ. ຍໍ ປນ ປາຬິຍໍ ‘‘ຕຎ຺ຈ ໂຂ’’ຕິອາທິ ວຸຕ຺ຕໍ, ຕໍ ຕຕ຺ຣູປປຕ຺ຕິຍາ ວິພນ຺ຘກາຣທຸສ຺ສີລ຺ຍາຠາວທສ຺ສນປຣໍ ທຏ຺ຐພ຺ພໍ, ນ ທານມຍສ຺ສ ປຸຎ຺ຎສ຺ສ ເກວລສ຺ສ ຕໍສໍວຕ຺ຕນຕາທສ຺ສນປຣນ຺ຕິ ທຏ຺ຐພ຺ພໍ.

ສມຸຈ຺ຉິນ຺ນຣາຄສ຺ສາຕິ ສມຸຈ຺ຉິນ຺ນກາມຣາຄສ຺ສ. ຕສ຺ສ ຫິ ສິຍາ ພ຺ຣຫ຺ມໂລເກ ອຸປປຕ຺ຕິ, ນ ສມຸຈ຺ຉິນ຺ນຠວຣາຄສ຺ສ. ວີຕຣາຄຄ຺ຄຫເຓນ ເຈຕ຺ຖ ກາເມສຸ ວີຕຣາຄຕາ ອຘິປ຺ເປຕາ, ຍາຍ ພ຺ຣຫ຺ມໂລກູປປຕ຺ຕິ ສິຍາ. ເຕນາຫ ‘‘ທານມຕ຺ເຕເນວາ’’ຕິອາທິ. ຍທິ ເອວໍ ທານໍ ຕຕ຺ຖ ກິໍ ອຕ຺ຖິຍນ຺ຕິ ອາຫ ‘‘ທານໍ ປນາ’’ຕິອາທິ. ທາເນນ ມຸທຸຈິຕ຺ໂຕຕິ ພທ຺ຘາຆາເຕ ເວຣີປຸຄ຺ຄເລປິ ອຕ຺ຕໂນ ທານສມ຺ປຏິຈ຺ຉເນນ ມຸທຸຠູຕຈິຕ຺ໂຕ.

ປຣິສີທຕິ ປຣິໂຕ ອິໂຕ ຈິໂຕ ຈ ສມາຄຈ຺ຉຕີຕິ ປຣິສາ, ສມູໂຫ.

ໂລກສ຺ສ ຘມ຺ມາຕິ ສຕ຺ຕໂລກສ຺ສ ອວສ຺ສມ຺ຠາວີ ຘມ຺ມາ. ເຕນາຫ ‘‘ເອເຕຫິ ມຸຕ຺ໂຕ ນາມ ນຕ຺ຖີ’’ຕິອາທິ. ຍສ຺ມາ ເຕ ໂລກຘມ຺ມາ ອປຣາປຣໍ ກທາຈິ ໂລກໍ ອນຸປຕນ຺ຕິ, ກທາຈິ ເຕ ໂລໂກ, ຕສ຺ມາ ຕຎ຺ເຈຕ຺ຖ ອຕ຺ຖໍ ທສ຺ເສນ຺ໂຕ ‘‘ອຏ຺ຐິເມ’’ຕິ ສຸຕ຺ຕປທໍ (ອ. ນິ. ໘.໖) ອາຫຣິ. ຆາສຈ຺ຉາທນາທີນໍ ລທ຺ຘິ ລາໂຠ, ຕານິ ເອວ ວາ ລທ຺ຘພ຺ພໂຕ ລາໂຠ. ຕທຠາໂວ ອລາໂຠ. ລາຠຄ຺ຄຫເຓນ ເຈຕ຺ຖ ຕພ຺ພິສໂຍ ອນຸໂຣໂຘ ຄຫິໂຕ, ອລາຠຄ຺ຄຫເຓນ ວິໂຣໂຘ. ຍສ຺ມາ ໂລຫິເຕ ສຕິ ຕທຸປຆາຕວເສນ ປຸພ຺ໂພ ວິຍ ອນຸໂຣເຘ ສຕິ ວິໂຣໂຘ ລທ຺ຘາວສໂຣ ເອວ ໂຫຕິ, ຕສ຺ມາ ວຸຕ຺ຕໍ ‘‘ລາເຠ ອາຄເຕ ອລາໂຠ ອາຄໂຕ ເອວາ’’ຕິ. ເອສ ນໂຍ ຍສາທີສຸປິ.

ອຏ຺ຐກວຓ຺ຓນາ ນິຏ຺ຐິຕາ.