ອຘິກຣຓສມຖສຕ຺ຕກວຓ຺ຓນາ

ອຘິກຣີຍນ຺ຕິ ເອຕ຺ຖາຕິ ອຘິກຣຓານິ. ເກ ອຘິກຣີຍນ຺ຕິ? ສມຖາ. ກຖໍ ອຘິກຣີຍນ຺ຕີຕິ? ສມນວເສນ, ຕສ຺ມາ ເຕ ເຕສໍ ສມນວເສນ ປວຕ຺ຕນ຺ຕີຕິ ອາຫ ‘‘ອຘິກຣຓານິ ສເມນ຺ຕີ’’ຕິອາທິ. ອຸປ຺ປນ຺ນານໍ ອຸປ຺ປນ຺ນານນ຺ຕິ ອຸຏ຺ຐິຕານໍ ອຸຏ຺ຐິຕານໍ. ສມຖຕ຺ຖນ຺ຕິ ສມນຕ຺ຖໍ.

‘‘ອຏ຺ຐາຣສຫິ ວຕ຺ຖູຫີ’’ຕິ ລກ຺ຂຓວຈນເມຕໍ ຍຖາ ‘‘ຍທິ ເມ ພ຺ຍາຘີ ທາເຫຍ຺ຍຸໍ ທາຕພ຺ພມິທໂມສຘ’’ນ຺ຕິ, ຕສ຺ມາ ເຕສຸ ອຎ຺ຎຕຣຎ຺ຎຕເຣນ ວິວທນ຺ຕາ ‘‘ອຏ຺ຐາຣສຫິ ວຕ຺ຖູຫິ ວິວທນ຺ຕີ’’ຕິ ວຸຈ຺ຈນ຺ຕິ. ອຸປວທນາຕິ ອກ຺ໂກໂສ. ໂຈທນາຕິ ອນຸໂຍໂຄ.

ອຘິກຣຓສ຺ສ ສມ຺ມຸຂາວ ວິນຍນໂຕ ສມ຺ມຸຂາວິນໂຍ. ສນ຺ນິປຕິຕປຣິສາຍ ຘມ຺ມວາທີນໍ ເຍຠຸຍ຺ຍຕາຍ ເຍຠຸຍ຺ຍສິກກມ຺ມສ຺ສ ກຣຓໍ ເຍຠຸຍ຺ຍສິກາ. ອຍນ຺ຕິ ອຍໍ ຍຖາວຸຕ຺ຕາ ຈຕຸພ຺ພິຘາ ສມ຺ມຸຂຕາ ສມ຺ມຸຂາວິນໂຍ ນາມ.

ສງ຺ຆສາມຄ຺ຄິວເສນ ສມ຺ມຸຂີຠາໂວ, ນ ຍຖາ ຕຖາ ກາຣກປຸຄ຺ຄລານໍ ສມ຺ມຸຂາຕາ. ຠູຕຕາຕິ ຕຈ຺ຉຕາ. ສຈ຺ຈປຣິຍາໂຍ ຫິ ອິຘ ຘມ຺ມ-ສທ຺ໂທ ‘‘ຘມ຺ມວາທີ’’ຕິອາທີສຸ (ທີ. ນິ. ໑.໙, ໑໙໔) ວິຍ. ວິເນຕິ ເອເຕນາຕິ ວິນໂຍ, ຕສ຺ສ ຕສ຺ສ ອຘິກຣຓສ຺ສ ວູປສມນາຍ ຠຄວຕາ ວຸຕ຺ຕວິຘິ, ຕສ຺ສ ວິນຍສ຺ສ ສມ຺ມຸຂຕາ ວິນຍສມ຺ມຸຂຕາ. ເຕນາຫ ‘‘ຍຖາ ຕໍ…ເປ… ສມ຺ມຸຂຕາ’’ຕິ. ເຍນາຕິ ເຍນ ປຸຄ຺ຄເລນ. ວິວາທວຕ຺ຖຸສງ຺ຂາເຕ ອຕ຺ເຖ ປຈ຺ຈຕ຺ຖິກາ ອຕ຺ຖປຈ຺ຈຕ຺ຖິກາ. ສງ຺ຆສມ຺ມຸຂຕາ ປຣິຫາຍຕິ ສມ຺ມຕປຸຄ຺ຄເລເຫວ ວູປສມນໂຕ.

ນນ຺ຕິ ວິວາທາຘິກຣຓໍ. ‘‘ນ ຉນ຺ທາຄຕິໍ ຄຈ຺ຉຕີ’’ຕິອາທິນາ ວຸຕ຺ຕໍ ປຎ຺ຈງ຺ຄສມນ຺ນາຄຕໍ. ຄຸຬ຺ຫກາທີສຸ ອລຊ຺ຊຸສ຺ສນ຺ນາຍ ປຣິສາຍ ຄຸຬ຺ຫໂກ ສລາກຄ຺ຄາໂຫ ກາຕພ຺ໂພ ລຊ຺ຊຸສ຺ສນ຺ນາຍ ວິວຏໂກ, ພາລຸສ຺ສນ຺ນາຍ ສກຓ຺ຓຊປ຺ປໂກ. ຍສ຺ສາ ກິຣິຍາຍ ຘມ຺ມວາທິໂນ ພຫຸຕຣາ, ສາ ເຍຠຸຍ຺ຍສິກາຕິ ອາຫ ‘‘ຘມ຺ມວາທີນໍ ເຍຠຸຍ຺ຍຕາຍາ’’ຕິອາທິ.

‘‘ຈຕູຫິ ສມເຖຫິ ສມ຺ມຕີ’’ຕິ ອິທໍ ສພ຺ພສງ຺ຄາຫິກວເສນ ວຸຕ຺ຕໍ. ຕຕ຺ຖ ປນ ທ຺ວີຫິ ທ຺ວີຫິ ເອວ ວູປສມນໍ ທຏ຺ຐພ຺ພໍ. ເອວໍ ວິນິຈ຺ຉິຕນ຺ຕິ ສເຈ ອາປຕ຺ຕິ ນຕ຺ຖິ, ອຸໂຠ ຂມາເປຕ຺ວາ, ອຖ ອຕ຺ຖິ, ອາປຕ຺ຕິໍ ທສ຺ເສຕ຺ວາ ໂຣປນວເສນ ວິນິຈ຺ຉິຕໍ. ປຏິກມ຺ມໍ ປນ ອາປຕ຺ຕາຘິກຣຓສມເຖ ປຣໂຕ ອາຄມິສ຺ສຕິ.

ນ ສມຓສາຣຸປ຺ປໍ ອສ຺ສາມຓກໍ, ສມເຓຫິ ອກຕ຺ຕພ຺ພໍ, ຕສ຺ມິໍ. ອຊ຺ຌາຈາເຣ ວີຕິກ຺ກເມ ສຕິ.

ປຏິຈຣໂຕຕິ ປຏິຈ຺ຉາເທນ຺ຕສ຺ສ. ປາປຸສ຺ສນ຺ນຕາຍ ປາປິໂຍ, ປຸຄ຺ຄໂລ, ຕສ຺ສ ກຕ຺ຕພ຺ພກມ຺ມໍ ຕສ຺ສ ປາປິຍສິກໍ. ສມ຺ມຸຂາວິນເຍເນວ ວູປສໂມ ນຕ຺ຖິ ປຏິຎ຺ຎາຍ ຕຖາຣູປາຍ, ຂນ຺ຕິຍາ ວາ ວິນາ ອວູປສມນໂຕ.

ເອຕ຺ຖາຕິ ອາປຕ຺ຕິເທສນາຍ. ປຏິຎ຺ຎາເຕ ອາປນ຺ນຠາວາທິເກ ກຣຓໍ ກິຣິຍາ ‘‘ອາຍຕິໍ ສໍວເຣຍ຺ຍາສີ’’ຕິ, ປຣິວາສທານາທິວເສນ ຈ ປວຕ຺ຕໍ ວຈີກມ຺ມໍ ປຏິຎ຺ຎາຕກຣຓໍ.

ຍຖານຸຣູປນ຺ຕິ ‘‘ທ຺ວີຫິ ສມເຖຫິ ຈຕູຫິ ຕີຫິ ເອເກນາ’’ຕິ ເອວໍ ວຸຕ຺ຕນເຍນ ຍຖານຸຣູປໍ. ເອຕ຺ຖາຕິ ອິມສ຺ມິໍ ສຸຕ຺ເຕ, ອິມສ຺ມິໍ ວາ ສມຖວິຈາເຣ. ວິນິຈ຺ຉຍນໂຍຕິ ວິນິຈ຺ຉເຍ ນຍມຕ຺ຕໍ. ເຕນາຫ ‘‘ວິຕ຺ຖາໂຣ ປນາ’’ຕິອາທິ. ສມນ຺ຕປາສາທິກາຍໍ ວິນຍຏ຺ຐກຖາຍ (ຈູຬວ. ອຏ຺ຐ. ໑໘໔-໑໘໗) ວຸຕ຺ໂຕ, ຕສ຺ມາ ວຸຕ຺ຕນເຍເນວ ເວທິຕພ຺ໂພຕິ ອຘິປ຺ປາໂຍ.

ສຕ຺ຕກວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ທຸຕິຍຠາຓວາຣວຓ຺ຓນາ.