ນິສ຺ສຣຓິຍຉກ຺ກວຓ຺ຓນາ

໓໒໖. ຫາເປຕ຺ວາຕິ ກຸສລຈິຕ຺ຕໍ ປຣິຫາເປຕ຺ວາ ປວຕ຺ຕິຕຸເມວ ອປ຺ປທານວເສນ. ອຠູຕໍ ພ຺ຍາກຣຓໍ ພ຺ຍາກໂຣຕິ ‘‘ເມຕ຺ຕາ ຫິ ໂຂ ເມ ເຈໂຕວິມຸຕ຺ຕິ ຠາວິຕາ’’ຕິອາທິນາ (ອ. ນິ. ໖.໑໓) ອຕ຺ຕນິ ອວິຊ຺ຊມານໍ ຄຸຓພ຺ຍາຫາຣໍ ພ຺ຍາຫຣຕິ. ເຈໂຕວິມຸຕ຺ຕິ-ສທ຺ທໍ ອເປກ຺ຂິຕ຺ວາ ‘‘ນິສ຺ສຏາ’’ຕິ ວຸຕ຺ຕໍ. ປຸນ ພ຺ຍາປາໂທ ນຕ຺ຖີຕິ ອິທານິ ມມ ພ຺ຍາປາໂທ ນາມ ນຕ຺ຖິ ສພ຺ພໂສ ນຕ຺ຖີຕິ ຎຕ຺ວາ.

‘‘ອນິມິຕ຺ຕາ’’ຕິ ວຕ຺ວາ ເຍສໍ ນິມິຕ຺ຕານໍ ອຠາເວນ ອຣຫຕ຺ຕຜລສມາປຕ຺ຕິຍາ ອນິມິຕ຺ຕຕາ, ຕໍ ທສ຺ເສຕຸໍ ‘‘ສາ ຫີ’’ຕິອາທິ ວຸຕ຺ຕໍ. ຕຕ຺ຖ ຣາຄສ຺ສ ນິມິຕ຺ຕໍ, ຣາໂຄ ເອວ ວາ ນິມິຕ຺ຕນ຺ຕິ ຣາຄນິມິຕ຺ຕໍ. ອາທິ-ສທ຺ເທນ ໂທສນິມິຕ຺ຕາທີນໍ ສງ຺ຄໂຫ ທຏ຺ຐພ຺ໂພ. ຣູປເວທນາທິສງ຺ຂາຣນິມິຕ຺ຕໍ ຣູປນິມິຕ຺ຕາທິ. ເຕສຎ຺ເຎວ ນິຈ຺ຈາທິວເສນ ອຸປຏ຺ຐານໍ ນິຈ຺ຈນິມິຕ຺ຕາທິ. ຕຍິທໍ ນິມິຕ຺ຕໍ ຍສ຺ມາ ສພ຺ເພນ ສພ຺ພໍ ອຣຫຕ຺ຕຜເລ ນຕ຺ຖິ, ຕສ຺ມາ ວຸຕ຺ຕໍ ‘‘ສາ ຫິ…ເປ… ອນິມິຕ຺ຕາຕິ ວຸຕ຺ຕາ’’ຕິ. ນິມິຕ຺ຕໍ ອນຸສຣຕີຕິ ຕໍ ນິມິຕ຺ຕໍ ອນຸຄຈ຺ຉຕິ ອາຣພ຺ຠ ປວຕ຺ຕຕິ.

ອສ຺ມິມາໂນຕິ ‘‘ອສ຺ມີ’’ຕິ ປວຕ຺ໂຕ ອຕ຺ຕວິສໂຍ ມາໂນ. ອຍໍ ນາມ ອຫໍ ອສ຺ມີຕິ ຣູປລກ຺ຂໂຓ, ເວທນາທີສຸ ວາ ອຎ຺ຎຕຣລກ຺ຂໂຓ ອຍໍ ນາມ ອຕ຺ຕາ ອຫໍ ອສ຺ມິ. ‘‘ອສ຺ມີ’’ຕິ ມາໂນ ສມຸຄ຺ຆາຏີຍຕິ ເອເຕນາຕິ ອສ຺ມິມານສມຸຄ຺ຆາໂຕ, ອຣຫຕ຺ຕມຄ຺ໂຄ. ປຸນ ອສ຺ມິມາໂນ ນຕ຺ຖີຕິ ຕສ຺ສ ອນຸປ຺ປຕ຺ຕິຘມ຺ມຕາປາທນໍ ກິຕ຺ເຕນ຺ໂຕ ສມຸຄ຺ຆາຕຕ຺ຕເມວ ວິຠາເວຕິ.