ອນຸຕ຺ຕຣິຍາທິຉກ຺ກວຓ຺ຓນາ

໓໒໗. ນຕ຺ຖິ ເອເຕສໍ ອຸຕ຺ຕຣານິ ວິສິຏ຺ຐານີຕິ ອນຸຕ຺ຕຣານິ, ອນຸຕ຺ຕຣານິ ເອວ ອນຸຕ຺ຕຣິຍານິ ຍຖາ ອນນ຺ຕເມວ ອານນ຺ຕຣິຍນ຺ຕິ ອາຫ ‘‘ອນຸຕ຺ຕຣິຍານີຕິ ອນຸຕ຺ຕຣານີ’’ຕິ. ທສ຺ສນານຸຕ຺ຕຣິຍໍ ນາມ ອນຸຕ຺ຕຣຜລວິເສສາວຫຕ຺ຕາ. ເອສ ນໂຍ ເສເສສຸປິ. ສຕ຺ຕວິຘອຣິຍຘນລາໂຠຕິ ສຕ຺ຕວິຘສທ຺ຘາທິໂລກຸຕ຺ຕຣຘນລາໂຠ. ສິກ຺ຂຕ຺ຕຍປູຣຓນ຺ຕິ ອຘິສີລສິກ຺ຂາທີນໍ ຕິສ຺ສນ຺ນໍ ສິກ຺ຂານໍ ປຣິປູຣຓໍ. ຕຕ຺ຖ ປຣິປູຣຓໍ ນິປ຺ປຣິຍາຍໂຕ ອເສກ຺ຂານໍ ວເສນ ເວທິຕພ຺ພໍ. ກລ຺ຍາຓປຸຖຸຊ຺ຊນໂຕ ປຏ຺ຐາຍ ຫິ ສຕ຺ຕ ເສກ຺ຂາ ຕິສ຺ໂສ ສິກ຺ຂາ ປູເຣນ຺ຕິ ນາມ, ອຣຫາ ປນ ປຣິປຸຓ຺ຓສິກ຺ໂຂຕິ. ອິຕິ ອິມານິ ອນຸຕ຺ຕຣິຍານິ ໂລກິຍໂລກຸຕ຺ຕຣານິ ກຖິຕານິ.

ອນຸສ຺ສຕິໂຍ ເອວ ທິຏ຺ຐຘມ຺ມິກສມ຺ປຣາຍິກາທິຫິຕສຸຂານໍ ກາຣຓຠາວໂຕ ຐານານີຕິ ອນຸສ຺ສຕິຏ຺ຐານານິ. ເອວໍ ອນຸສ຺ສຣໂຕຕິ ຍຖາ ພຸທ຺ຘານຸສ຺ສຕິ ວິເສສາຘິຄມສ຺ສ ຐານໍ ໂຫຕິ, ເອວໍ ‘‘ອິຕິປິ ໂສ ຠຄວາ’’ຕິອາທິນາ (ທີ. ນິ. ໑.໑໕໗, ໒໕໕) ພຸທ຺ຘຄຸເຓ ອນຸສ຺ສຣນ຺ຕສ຺ສ. ອຸປຈາຣກມ຺ມຏ຺ຐານນ຺ຕິ ປຈ຺ຈກ຺ຂໂຕ ອຸປຈາຣຊ຺ຌານາວຫໍ ກມ຺ມຏ຺ຐານໍ, ປຣມ຺ປຣາຍ ປນ ຍາວ ອຣຫຕ຺ຕາ ໂລກິຍໂລກຸຕ຺ຕຣວິເສສາວຫໍ.