ສຕ຺ຕວິຎ຺ຎາຓຏ຺ຐິຕິວຓ຺ຓນາ

໑໒໗. ຄຈ຺ຉນ຺ໂຕ ຄຈ຺ຉນ຺ໂຕຕິ ສມຖປຏິປຕ຺ຕິຍໍ ສຸປ຺ປຕິຏ຺ຐິໂຕ ຫຸຕ຺ວາ ວິປສ຺ສນາຄມເນນ, ມຄ຺ຄຄມເນນ ຈ ຄຈ຺ຉນ຺ໂຕ ຄຈ຺ຉນ຺ໂຕ. ອຸໂຠຫິ ຠາເຄຫິ ມຸຈ຺ຈນໂຕ ອຸຠໂຕຠາຄວິມຸຕ຺ໂຕ ນາມ ໂຫຕິ. ໂສ ‘‘ເອວໍ ອສມນຸປສ຺ສນ຺ໂຕ’’ຕິ ວຸຕ຺ໂຕ ວິປສ຺ສນາຍານິໂກຕິ ກຕ຺ວາ ‘‘ໂຍ ຈ ນ ສມນຸປສ຺ສຕີຕິ ວຸຕ຺ໂຕ ໂສ ຍສ຺ມາ ຄຈ຺ຉນ຺ໂຕ ຄຈ຺ຉນ຺ໂຕ ປຎ຺ຎາວິມຸຕ຺ໂຕ ນາມ ໂຫຕີ’’ຕິ ວຸຕ຺ຕໍ. ເຫຏ຺ຐາ ວຸຕ຺ຕານນ຺ຕິ ‘‘ກິຕ຺ຕາວຕາ ຈ, ອານນ຺ທ, ອຕ຺ຕານໍ ນ ປຎ຺ຎເປນ຺ໂຕ ນ ປຎ຺ຎາເປຕີ’’ຕິອາທິນາ (ທີ. ນິ. ໒.໑໑໙), ‘‘ຍໂຕ ໂຂ, ອານນ຺ທ, ຠິກ຺ຂຸ ເນວ ເວທນໍ ອຕ຺ຕານໍ ສມນຸປສ຺ສຕີ’’ຕິອາທິນາ (ທີ. ນິ. ໒.໑໒໕ ອາທໂຍ) ຈ ເຫຏ຺ຐາ ປາຬິຍໍ ອາຄຕານໍ ທ຺ວິນ຺ນໍ ປຸຖຸຊ຺ຊນຠິກ຺ຂູນໍ. ນິຄມນນ຺ຕິ ນິສ຺ສຣຓໍ. ນາມນ຺ຕິ ປຎ຺ຎາວິມຸຕ຺ຕາທິນາມໍ.

ປຏິສນ຺ຘິວເສນ ວຸຕ຺ຕາຕິ ນານຕ຺ຕກາຍນານຕ຺ຕສຎ຺ຎິຕາວິເສສວິສິຏ຺ຐປຏິສນ຺ຘິວເສນ ວຸຕ຺ຕາ ສຕ຺ຕ ວິຎ຺ຎາຓຏ຺ຐິຕິໂຍ. ຕໍຕໍສຕ຺ຕນິກາຍໍ ປຕິ ນິສ຺ສຍໂຕ ຫິ ນານຕ຺ຕກາຍາທິຕາ ຕໍປຣິຍາປນ຺ນປຏິສນ຺ຘິສມຸທາຄຕາຕິ ທຏ຺ຐພ຺ພາ ຕທຠິນິພ຺ພຕ຺ຕກກມ຺ມຠວສ຺ສ ຕຖາ ອາຍູຫິຕຕ຺ຕາ. ຈຕສ຺ໂສ ອາຄມິສ຺ສນ຺ຕີຕິ ຣູປເວທນາສຎ຺ຎາສງ຺ຂາຣກ຺ຂນ຺ຘວເສນ ຈຕສ຺ໂສ ວິຎ຺ຎາຓຏ຺ຐິຕິໂຍ ອາຄມິສ຺ສນ຺ຕິ ‘‘ຣູປຸປາຍໍ ວາ ອາວຸໂສ ວິຎ຺ຎາຓໍ ຕິຏ຺ຐມານໍ ຕິຏ຺ຐຕີ’’ຕິອາທິນາ (ທີ. ນິ. ໓.໓໑໑). ວິຎ຺ຎາຓປຕິຏ຺ຐານສ຺ສາຕິ ປຏິສນ຺ຘິວິຎ຺ຎາຓສ຺ສ ເອຕຣຫິ ປຕິຏ຺ຐານກາຣຓສ຺ສ. ອຕ຺ຖໂຕ ວຸຕ຺ຕວິເສສວິສິຏ຺ຐາ ປຎ຺ຈໂວກາເຣ ຣູປເວທນາສຎ຺ຎາສງ຺ຂາຣກ຺ຂນ຺ຘາ, ຈຕຸໂວກາເຣ ເວທນາທໂຍ ຕໂຍ ຂນ຺ຘາ ເວທິຕພ຺ພາ. ສຕ຺ຕາວາສຠາວໍ ອຸປາທາຍ ‘‘ທ຺ເວ ຈ ອາຍຕນານີຕິ ທ຺ເວ ນິວາສຏ຺ຐານານີ’’ຕິ ວຸຕ຺ຕໍ. ນິວາສຏ຺ຐານປຣິຍາໂຍປິ ອາຍຕນສທ຺ໂທ ໂຫຕິ ຍຖາ ‘‘ເທວາຍຕນທ຺ວຍ’’ນ຺ຕິ. ສພ຺ພນ຺ຕິ ວິຎ຺ຎາຓຏ຺ຐິຕິ ອາຍຕນທ຺ວຍນ຺ຕິ ສກລໍ. ຕສ຺ມາ ຄຫິຕໍ ຕຕ຺ຖ ເອກເມວ ອຄ຺ຄເຫຕ຺ວາຕິ ອຘິປ຺ປາໂຍ. ປຣິຍາທານໍ ອນວເສສຄ຺ຄຫຓໍ ນ ຄຈ຺ຉຕິ ວຏ຺ຏໍ ວິຎ຺ຎາຓຏ຺ຐິຕິອາຍຕນທ຺ວຍານໍ ອຎ຺ຎມຎ຺ຎອນ຺ໂຕຄຘຕ຺ຕາ.

ນິທສ຺ສນຕ຺ເຖ ນິປາໂຕ, ຕສ຺ມາ ເສຍ຺ຍຖາປິ ມນຸສ຺ສາຕິ ຍຖາ ມນຸສ຺ສາຕິ ວຸຕ຺ຕໍ ໂຫຕິ. ວິເສໂສ ໂຫຕິເຍວ ສຕິປິ ພາຫິຣສ຺ສ ກາຣກສ຺ສ ອເຠເທ ອຊ຺ຌຕ຺ຕິກສ຺ສ ຠິນ຺ນຕ຺ຕາ. ນານຕ຺ຕໍ ກາເຍ ເອເຕສໍ, ນານຕ຺ໂຕ ວາ ກາໂຍ ເອເຕສນ຺ຕິ ນານຕ຺ຕກາຍາ, ອິມິນາ ນເຍນ ເສສປເທສຸປິ ອຕ຺ໂຖ ເວທິຕພ຺ໂພ. ເນສນ຺ຕິ ມນຸສ຺ສານໍ. ນານຕ຺ຕາ ສຎ຺ຎາ ເອເຕສໍ ອຕ຺ຖີຕິ ນານຕ຺ຕສຎ຺ຎິໂນ. ສຸຂສມຸສ຺ສຍໂຕ ວິນິປາໂຕ ເອເຕສໍ ອຕ຺ຖີຕິ ວິນິປາຕິກາ ສຕິປິ ເທວຠາເວ ທິພ຺ພສມ຺ປຕ຺ຕິຍາ ອຠາວໂຕ, ອປາເຍສຸ ວາ ຄໂຕ ນຕ຺ຖິ ນິປາໂຕ ເອເຕສນ຺ຕິ ວິນິປາຕິກາ. ເຕນາຫ ‘‘ຈຕຸອປາຍວິນິມຸຕ຺ຕາ’’ຕິ. ຘມ຺ມປທນ຺ຕິ ສຕິປຏ຺ຐານາທິຘມ຺ມໂກຏ຺ຐາສໍ. ວິຊານິຍາຕິ ສຸຕມເຍນ ຕາວ ຎາເຓນ ວິຊານິຕ຺ວາ. ຕທນຸສາເຣນ ໂຍນິໂສມນສິກາຣໍ ປຣິພ຺ຣູຫນ຺ໂຕ ສີລວິສຸທ຺ຘິອາທິກໍ ສມ຺ມາປຏິປຕ຺ຕິໍ ອປິ ປຏິປຊ຺ເຊມ. ສາ ຈ ປຏິປຕ຺ຕິ ຫິຕາຍ ທິຏ຺ຐຘມ຺ມິກາທິສກລຫິຕາຍ ອມ຺ຫາກໍ ສິຍາ. ອິທານິ ຕຕ຺ຖ ສີລປຏິປຕ຺ຕິໍ ຕາວ ວິຠາເຄນ ທສ຺ເສນ຺ໂຕ ‘‘ປາເຓສຸ ຈາ’’ຕິ ຄາຖມາຫ.

ພ຺ຣຫ຺ມກາເຍ ປຐມຊ຺ຌານນິພ຺ພຕ຺ເຕ ພ຺ຣຫ຺ມສມູເຫ, ພ຺ຣຫ຺ມນິກາເຍ ວາ ຠວາຕິ ພ຺ຣຫ຺ມກາຍິກາ. ມຫາພ຺ຣຫ຺ມຸໂນ ປຣິສາຍ ຠວາຕິ ພ຺ຣຫ຺ມປາຣິສຊ຺ຊາ ຕສ຺ສ ປຣິຈາຣກຏ຺ຐາເນ ຐິຕຕ຺ຕາ. ມຫາພ຺ຣຫ຺ມຸໂນ ປຸໂຣຫິຕຏ຺ຐາເນ ຐິຕາຕິ ພ຺ຣຫ຺ມປຸໂຣຫິຕາ. ອາຍຸວຓ຺ຓາທີຫິ ມຫນ຺ໂຕ ພ຺ຣຫ຺ມາໂນຕິ ມຫາພ຺ຣຫ຺ມຸໂນ. ສຕິປິ ເຕສໍ ຕິວິຘານມ຺ປິ ປຐເມນ ຌາເນນ ອຠິນິພ຺ພຕ຺ຕຠາເວ ຌານສ຺ສ ປນ ປວຕ຺ຕິເຠເທນ ອຍໍ ວິເສໂສຕິ ທສ຺ເສຕຸໍ ‘‘ພ຺ຣຫ຺ມປາຣິສຊ຺ຊາ ປນາ’’ຕິອາທິ ວຸຕ຺ຕໍ. ປຣິຕ຺ເຕນາຕິ ຫີເນນ, ສາ ຈສ຺ສ ຫີນຕາ ຉນ຺ທາທີນໍ ຫີນຕາຍ ເວທິຕພ຺ພາ, ປຏິລທ຺ຘມຕ຺ຕໍ ວາ ຫີນໍ. ກປ຺ປສ຺ສາຕິ ອສງ຺ຂ຺ເຍຍ຺ຍກປ຺ປສ຺ສ. ຫີນປຓີຕານໍ ມຊ຺ເຌ ຠວຕ຺ຕາ ມຊ຺ຌິເມນ, ສາ ຈສ຺ສ ມຊ຺ຌິມຕາ ຉນ຺ທາທີນໍ ມຊ຺ຌິມຕາຍ ເວທິຕພ຺ພາ, ປຏິລຠິຕ຺ວາ ນາຕິສຸຠາວິຕໍ ວາ ມຊ຺ຌິມໍ. ອຸປຑ຺ຒກປ຺ໂປຕິ ອສງ຺ຂ຺ເຍຍ຺ຍກປ຺ປສ຺ສ ອຸປຑ຺ຒກປ຺ໂປ. ວິປ຺ຜາຣິກຕໂຣຕິ ພ຺ຣຫ຺ມປາຣິສຊ຺ເຊຫິ ປມາຓໂຕ ວິປຸລຕໂຣ, ສຠາວໂຕ ອຸຬາຣຕໂຣ ຈ ໂຫຕິ. ສຠາເວນປິ ຫິ ອຸຬາຣຕໂຣວ, ຕໍ ປເນຕ຺ຖ ອປ຺ປມາຓໍ. ຕຖາ ຫິ ປຣິຕ຺ຕາຠາທີນໍ, ປຣິຕ຺ຕສຸຠາທີນຎ຺ຈ ກາເຍ ສຕິປິ ສຠາວເວມຕ຺ເຕ ເອກຕ຺ຕວເສເນວ ວວຕ຺ຖາປີຍຕີຕິ ‘‘ເອກຕ຺ຕກາຍາ’’ ຕ຺ເວວ ວຸຈ຺ຈນ຺ຕິ. ປຓີເຕນາຕິ ອຸກ຺ກຏ຺ເຐນ, ສາ ຈສ຺ສ ອຸກ຺ກຏ຺ຐຕາ ຉນ຺ທາທີນໍ ອຸກ຺ກຏ຺ຐຕາຍ ເວທິຕພ຺ພາ, ສຸຠາວິຕໍ ວາ ສມ຺ມເທວ ວສິຠາວໍ ປາປິຕໍ ປຓີຕໍ ປຘານຠາວໍ ນີຕນ຺ຕິ ກຕ຺ວາ, ອິຘາປິ ກປ຺ໂປ ອສງ຺ຂ຺ເຍຍ຺ຍກປ຺ປວເສເນວ ເວທິຕພ຺ໂພ ປຣິປຸຓ຺ຓສ຺ສ ມຫາກປ຺ປສ຺ສ ອສມ຺ຠວໂຕ. ອິຕີຕິ ເອວໍ ວຸຕ຺ຕປ຺ປກາເຣນ. ເຕຕິ ‘‘ພ຺ຣຫ຺ມກາຍິກາ’’ຕິ ວຸຕ຺ຕາ ຕິວິຘາປິ ພ຺ຣຫ຺ມາໂນ. ສຎ຺ຎາຍ ເອກຕ຺ຕາຕິ ຕິເຫຕຸກຠາເວນ ສຎ຺ຎາຍ ເອກຕ຺ຕສຠາວຕ຺ຕາ. ນ ຫິ ຕສ຺ສາ ສມ຺ປຍຸຕ຺ຕຘມ຺ມວເສນ ອຎ຺ໂຎປິ ໂກຈິ ເຠໂທ ອຕ຺ຖິ.

ເອວນ຺ຕິ ອິມິນາ ນານຕ຺ຕກາຍເອກຕ຺ຕສຎ຺ຎິໂນຕິ ທສ຺ເສຕິ.

ທຓ຺ຑອຸກ຺ກາຍາຕິ ທຓ຺ຑທີປິກາຍ. ສຣຕີຕິ ຘາວຕິ ວິຍ. ວິສ຺ສຣຕີຕິ ວິປ຺ປກິຓ຺ຓາ ວິຍ ຘາວຕິ. ທ຺ເວ ກປ຺ປາຕິ ທ຺ເວ ມຫາກປ຺ປາ. ອິໂຕ ປເຣສຸປິ ເອເສວ ນໂຍ. ອິຘາຕິ ອິມສ຺ມິໍ ສຸຕ຺ເຕ. ອຸກ຺ກຏ຺ຐປຣິຈ຺ເຉທວເສນ ອາຠສ຺ສຣຄ຺ຄຫເຓເນວ ສພ຺ເພປິ ເຕ ປຣິຕ຺ຕາຠາ, ອປ຺ປມາຓາຠາປິ ຄຫິຕາ.

ໂສຠນາ ປຠາ ສຸຠາ, ສຸຠາຍ ກິຓ຺ຓາ ສຸຠາກິຓ຺ຓາຕິ ວຕ຺ຕພ຺ເພ ອາ-ກາຣສ຺ສ ຣສ຺ສຕ຺ຕໍ, ອນ຺ຕິມ-ຓ-ກາຣສ຺ສ ຫ-ກາຣຎ຺ຈ ກຕ຺ວາ ‘‘ສຸຠກິຓ຺ຫາ’’ຕິ ວຸຕ຺ຕາ, ອຏ຺ຐກຖາຍໍປນ ນິຈ຺ຈລາຍ ເອກຄ຺ຆນາຍ ປຠາຍ ສຸໂຠຕິ ປຣິຍາຍວຈນນ຺ຕິ ‘‘ສຸເຠນ ໂອກິຓ຺ຓາ ວິກິຓ຺ຓາ’’ຕິ ອຕ຺ໂຖ ວຸຕ຺ໂຕ, ເອຕ຺ຖາປິ ອນ຺ຕິມ-ຓ-ກາຣສ຺ສ ຫ-ກາຣກຣຓໍ ອິຈ຺ຉິຕພ຺ພເມວ. ນ ຉິຊ຺ຊິຕ຺ວາ ຉິຊ຺ຊິຕ຺ວາ ປຠາ ຄຈ຺ຉຕິ ເອກຄ຺ຆນຕ຺ຕາ. ຈຕຸຕ຺ຖວິຎ຺ຎາຓຏ຺ຐິຕິເມວ ຠຊນ຺ຕິ ກາຍສ຺ສ, ສຎ຺ຎາຍ ຈ ເອກຣູປຕ຺ຕາ. ວິປຸລສນ຺ຕສຸຂາຍຸວຓ຺ຓາທິຜລຕ຺ຕາ ເວຫປ຺ຜລາ. ເອຕ຺ຖາຕິ ວິຎ຺ຎາຓຏ຺ຐິຕິຍໍ.

ວິວຏ຺ຏປກ຺ເຂ ຐິຕາ ນປຸນຣາວຕ຺ຕນໂຕ. ‘‘ນ ສພ຺ພກາລິກາ’’ຕິ ວຕ຺ວາ ຕເມວ ອສພ຺ພກາລິກຕ຺ຕໍ ວິຠາເວຕຸໍ ‘‘ກປ຺ປສຕສຫສ຺ສມ຺ປີ’’ຕິອາທິ ວຸຕ຺ຕໍ. ໂສຬສກປ຺ປສຫສ຺ສຈ຺ຈເຍນ ອຸປ຺ປນ຺ນານໍ ສຸທ຺ຘາວາສພ຺ຣຫ຺ມານໍ ປຣິນິພ຺ພາຍນໂຕ, ອຎ຺ເຎສຎ຺ຈ ຕຕ຺ຖ ອນຸປ຺ປຊ຺ຊນໂຕ ພຸທ຺ຘສຸຎ຺ເຎໂລເກ ສຸຎ຺ຎໍ ຕໍ ຐານໍ ໂຫຕິ, ຕສ຺ມາ ສຸທ຺ຘາວາສາ ນ ສພ຺ພກາລິກາ, ຂນ຺ຘາວາຣຏ຺ຐານສທິສາ ໂຫນ຺ຕິ ສຸທ຺ຘາວາສຠູມິໂຍ. ອິມິນາ ສຸຕ຺ເຕນ ສຸທ຺ຘາວາສານໍ ສຕ຺ຕາວາສຠາວທີປເນເນວ ວິຎ຺ຎາຓຏ຺ຐິຕິຠາໂວ ທີປິໂຕ, ຕສ຺ມາ ສຸທ຺ຘາວາສາປິ ສຕ຺ຕສຸ ວິຎ຺ຎາຓຏ຺ຐິຕີສຸ ຈຕຸຕ຺ຖວິຎ຺ຎາຓຏ຺ຐິຕິໍ ນວສຸ ສຕ຺ຕາວາເສສຸ ຈຕຸຕ຺ຖສຕ຺ຕາວາສໍເຍວ ຠຊນ຺ຕິ.

ສຸຂຸມຕ຺ຕາຕິ ສງ຺ຂາຣາວເສສສຸຂຸມຠາວປ຺ປຕ຺ຕຕ຺ຕາ. ປຣິພ຺ຍຕ຺ຕວິຎ຺ຎາຓກິຈ຺ຈາຠາວໂຕ ເນວ ວິຎ຺ຎາຓໍ, ສພ຺ພໂສ ອວິຎ຺ຎາຓໍ ນ ໂຫຕີຕິ ນາວິຎ຺ຎາຓໍ, ຕສ຺ມາ ປຣິປ຺ຜຸຏວິຎ຺ຎາຓກິຈ຺ຈວນ຺ຕີສຸ ວິຎ຺ຎາຓຏ຺ຐິຕີສຸ ອວຕ຺ວາ.

໑໒໘. ຕຎ຺ຈ ວິຎ຺ຎາຓຏ຺ຐິຕິນ຺ຕິ ປຐມໍ ວິຎ຺ຎາຓຏ຺ຐິຕິໍ. ເຫຏ຺ຐາ ວຸຕ຺ຕນເຍນ ສຣູປໂຕ, ມນຸສ຺ສາທິວິຠາຄໂຕ, ສງ຺ເຂປໂຕ, ‘‘ນາມຎ຺ຈ ຣູປຎ຺ຈາ’’ຕິ ເຠທໂຕ ຈ ປຊານາຕິ. ຕສ຺ສາ ສມຸທຍຎ຺ຈາຕິ ຕສ຺ສາ ປຐມາຍ ວິຎ຺ຎາຓຏ຺ຐິຕິຍາ ປຎ຺ຈວີສຕິວິຘໍ ສມຸທຍຎ຺ຈ ປຊານາຕິ. ອຕ຺ຖງ຺ຄເມປິ ເອເສວ ນໂຍ. ອສ຺ສາເທຕພ຺ພໂຕ, ອສ຺ສາທໂຕ ຈ ອສ຺ສາທໍ. ອຍໍ ອນິຈ຺ຈາທິຠາໂວ ອາທີນໂວ. ຉນ຺ທຣາໂຄ ວິນີຍຕິ ເອເຕນ, ເອຕ຺ຖ ວາຕິ ຉນ຺ທຣາຄວິນໂຍ, ສຫ ມຄ຺ເຄນ ນິພ຺ພານໍ. ຉນ຺ທຣາຄປ຺ປຫານນ຺ຕິ ເອຕ຺ຖາປິ ເອເສວ ນໂຍ. ມານທິຏ຺ຐີນໍ ວເສນາຫນ຺ຕິ ວາ, ຕຓ຺ຫາວເສນ ມມນ຺ຕິ ວາ ອຠິນນ຺ທນາປິ ມານສ຺ສ ປຣິຕສ຺ສນາ ວິຍ ທຏ຺ຐພ຺ພາ. ສພ຺ພຕ຺ຖາຕິ ສພ຺ເພສຸ ເສເສສຸ ອຏ຺ຐສຸປິ ວາເຣສຸ. ຕຕ຺ຖາຕິ ອຸປຣິ ຕີສຸ ວິຎ຺ຎາຓຏ຺ຐິຕີສຸ ທຸຕິຍາຍຕເນສຸ. ຕຕ຺ຖ ຫິ ຣູປໍ ນຕ຺ຖິ. ປຸນ ຕຕ຺ຖາຕິ ປຐມາຍຕເນ. ຕຕ຺ຖ ຫິ ເອໂກ ຣູປກ຺ຂນ຺ໂຘວ. ເອຕ຺ຖາຕິ ຈ ຕເມວ ສນ຺ຘາຍ ວຸຕ຺ຕໍ. ຕຕ຺ຖ ຫິ ຣູປສ຺ສ ກມ຺ມສມຸຏ຺ຐານຕ຺ຕາ ອາຫາຣວເສນ ໂຍຊນາ ນ ສມ຺ຠວຕິ.

ຍໂຕ ໂຂຕິ ເອຕ຺ຖ ໂຕ-ສທ຺ໂທ ທາ-ສທ຺ໂທ ວິຍ ກາລວຈໂນ ‘‘ຍໂຕ ໂຂ, ສາຣິປຸຕ຺ຕ, ຠິກ຺ຂຸສງ຺ໂຆ’’ຕິອາທີສຸ (ປາຣາ. ໒໑) ວິຍາຕິ ວຸຕ຺ຕໍ ‘‘ຍທາ ໂຂ’’ຕິ. ອຄ຺ຄເຫຕ຺ວາຕິ ກຎ຺ຈິປິ ສງ຺ຂາຣໍ ‘‘ເອຕໍ ມມາ’’ຕິອາທິນາ ອຄ຺ຄເຫຕ຺ວາ. ປຎ຺ຎາວິມຸຕ຺ໂຕຕິ ອຏ຺ຐນ຺ນໍ ວິໂມກ຺ຂານໍ ອນຘິຄຕຕ຺ຕາ ສາຕິສຍສ຺ສ ສມາຘິພລສ຺ສ ອຠາວໂຕ ປຎ຺ຎາພເລເນວ ວິມຸຕ຺ໂຕ. ເຕນາຫ ‘‘ອຏ຺ຐ ວິໂມກ຺ເຂ ອສຈ຺ຉິກຕ຺ວາ ປຎ຺ຎາພເລເນວາ’’ຕິອາທິ. ອປ຺ປວຕ຺ຕິນ຺ຕິ ອາຍຕິໍ ອປ຺ປວຕ຺ຕິໍ ກຕ຺ວາ. ປຊານນ຺ໂຕ ວິມຸຕ຺ໂຕຕິ ວາ ປຎ຺ຎາວິມຸຕ຺ໂຕ, ປຐມຊ຺ຌານຜສ຺ເສນ ວິນາ ປຣິຊານນາທິປ຺ປກາເຣຫິ ຈຕ຺ຕາຣິ ສຈ຺ຈານິ ຊານນ຺ໂຕ ປຏິວິຊ຺ຌນ຺ໂຕ ເຕສໍ ກິຈ຺ຈານໍ ມຕ຺ຖກປ຺ປຕ຺ຕິຍາ ນິຏ຺ຐິຕກິຈ຺ຈຕາຍ ວິເສເສນ ມຸຕ຺ໂຕຕິ ວິມຸຕ຺ໂຕ. ໂສ ປຎ຺ຎາວິມຸຕ຺ໂຕ. ສຸກ຺ຂວິປສ຺ສໂກຕິ ສມຖຠາວນາສິເນຫາຠາເວນ ສຸກ຺ຂາ ລູຂາ, ອສິນິທ຺ຘາ ວາ ວິປສ຺ສນາ ເອຕສ຺ສາຕິ ສຸກ຺ຂວິປສ຺ສໂກ. ຐຕ຺ວາຕິ ປາທກກຣຓວເສນ ຐຕ຺ວາ. ອຎ຺ຎຕຣສ຺ມິນ຺ຕິ ຈ ອຎ຺ຎຕຣອຎ຺ຎຕຣສ຺ມິໍ, ເອເກກສ຺ມິນ຺ຕິ ອຕ຺ໂຖ. ເອວຎ຺ຫິສ຺ສ ປຎ຺ຈວິຘຕາ ສິຍາ. ‘‘ນ ເຫວ ໂຂ ອຏ຺ຐ ວິໂມກ຺ເຂ ກາເຍນ ຜຸສິຕ຺ວາ ວິຫຣຕີ’’ຕິ ອິມິນາ ສາຕິສຍສ຺ສ ສມາຘິພລສ຺ສ ອຠາໂວ ທີປິໂຕ. ‘‘ປຎ຺ຎາຍ ຈສ຺ສ ທິສ຺ວາ’’ຕິອາທິນາ ສາຕິສຍສ຺ສ ປຎ຺ຎາພລສ຺ສ ຠາໂວ. ປຎ຺ຎາຍ ຈສ຺ສ ທິສ຺ວາ ອາສວາ ປຣິກ຺ຂີຓາ ໂຫນ຺ຕີຕິ ນ ອາສວາ ປຎ຺ຎາຍ ປສ຺ສນ຺ຕິ, ທສ຺ສນກາຣຓາ ປນ ປຣິກ຺ຂີຓາ ‘‘ທິສ຺ວາ ປຣິກ຺ຂີຓາ’’ຕິ ວຸຕ຺ຕາ. ທສ຺ສນາຍຕ຺ຕປຣິກ຺ຂຍຕ຺ຕາ ເອວ ຫິ ທສ຺ສນໍ ອາສວານໍ ຂຍສ຺ສ ປຸຣິມກິຣິຍາ ໂຫຕິ.