໒. ເຫຕຸຈຕຸກ຺ກວຓ຺ຓນາ

໒໔໔. ອຠາວໂຕຕິ ຠາວາຠາວໂຕ. ຍຎ຺ຫິ ຊາຕິກ຺ຂຓມຕ຺ເຕເຍວ ຠວຕິ, ນ ຕໂຕ ປຣໍ, ຕໍ ຊາຕິຍາ ອວິຄຕປຈ຺ຈໂຍ ສິຍາ ອວິຄຕປຈ຺ຈຍນິຍມສພ຺ຠາວໂຕ. ຠໂວ ປນ ຍສ຺ມາ ຊາຕິກ຺ຂຓໂຕ ປຣມ຺ປິ ຠວຕິ, ຕສ຺ມາ ນ ໂສ ຕສ຺ສາ ອວິຄຕປຈ຺ຈໂຍ ໂຫຕິ. ເຕນ ວຸຕ຺ຕໍ ‘‘ຕໂຕ ອຸທ຺ຘໍ ຠາວໂຕຕິ ອຕ຺ໂຖ’’ຕິ. ຠເວຕິ ຠວປເທ, ຠເວ ວາ ນິປ຺ຜາເທຕພ຺ເພ. ເອສ ນໂຍ ຊາຕິອາທີສູຕິ ເອຕ຺ຖາປິ. ‘‘ຍຖາ ປນາ’’ຕິອາທິນາ ‘‘ອວິຄຕປຈ຺ຈຍສ຺ສ ອຠາວໂຕ, ນິຍມາຠາວໂຕ ຈາ’’ຕິ ວຸຕ຺ຕານໍ ເຫຕູນໍ ວຸຕ຺ຕນເຍນ ອພ຺ຍາປິຠາວວິຠາວເນນ ອກາຣຓຕໍ ທສ຺ເສຕິ ອຍາວຠາວິໂນ ປຈ຺ຈຍຸປ຺ປນ຺ນສ຺ສ, ປຈ຺ຈຍຘມ຺ມສ຺ສ ຈ ອວິຄຕປຈ຺ຈຍຠາວທສ຺ສນໂຕ. ສງ຺ຂາຣກ຺ຂນ຺ເຘຕິອາທິ ມຄ຺ຄໂສຘນວເສນ ວຸຕ຺ຕໍ. ຕສ຺ສ ປຣິຫາຣໍ ສຍເມວ ວທຕິ. ໂສ ຂໂຓ ເອຕສ຺ສ ອຕ຺ຖີຕິ ຕງ຺ຂຓິໂກ, ນ ຕງ຺ຂຓິໂກ ອຕງ຺ຂຓິໂກ, ຕສ຺ສ ສພ຺ຠາວາ, ອຍາວຠາວິກສພ຺ຠາວາຕິ ອຕ຺ໂຖ. ຍຖາ ປນ ເຫຕູ ໂຫນ຺ຕິ, ຕໍ ທສ຺ເສຕຸໍ ‘‘ສງ຺ຂຕລກ຺ຂຓານໍ ປນາ’’ຕິອາທິມາຫ.

ເອວນ຺ຕິ ເອວໍ ຍຖາວຸຕ຺ຕນເຍ ສຕິ, ເອວໍ ສນ຺ເຕຕິ ອຕ຺ໂຖ. ‘‘ນ ຫິ…ເປ… ອຕ຺ຖີ’’ຕິ ອິມິນາ ຊາຕິອາທີນໍ ອວິຄຕປຈ຺ຈຍວເສນ ປຈ຺ຈຍຸປ຺ປນ຺ນຠາໂວ ວິຍ ປຈ຺ຈຍຠາໂວປິ ນຕ຺ຖີຕິ ທສ຺ເສຕິ. ຕຕ຺ຖ ກາຣຓມາຫ ‘‘ອສຠາວຘມ຺ມຕ຺ຕາ’’ຕິ.

ກຖໍ ປນ ອສຠາວຘມ຺ມານໍ ຊາຕິອາທີນໍ ປຈ຺ຈຍຸປ຺ປນ຺ນຕາ, ປຈ຺ຈຍຕາ ຈາຕິ ອາຫ ‘‘ຊາຍມານານໍ ປນາ’’ຕິອາທິ. ຕສ຺ສາຕິ ຊາຕິຊຣາມຣຓສ຺ສ. ວຕ຺ຕພ຺ພປເທໂສຕິ ‘‘ຐເປຕ຺ວາ’’ຕິ ວຕ຺ຕພ຺ພປເທໂສ. ໂກ ປນ ໂສຕິ? ຍຖາວຸຕ຺ຕໍ ນາມໍ, ນາມຣູປຎ຺ຈ ສງ຺ຂາຣກ຺ຂນ຺ເຘນ ຣູປກ຺ຂນ຺ເຘນ ຈ ຊຣາມຣຓານໍ ສງ຺ຄຫິຕຕ຺ຕາ. ‘‘ໂຍ ຠໂວ ຊາຕິຍາ ປຈ຺ຈໂຍ’’ຕິ ເອເຕນ ຠວສງ຺ຄຫິຕານິປິ ຊາຕິອາທີນິ ຊາຕິຍາ ອປ຺ປຈ຺ຈຍຕ຺ຕາ ເອວ ‘‘ຐເປຕ຺ວາ’’ຕິ ນ ວຸຕ຺ຕານີຕິ ທສ຺ເສຕິ, ປຈ຺ຈຍຠາວາສງ຺ກາ ເອວ ເນສໍ ຕສ຺ສາ ນຕ຺ຖີຕິ ອຘິປ຺ປາໂຍ. ເຕເນວ ຐເປຕພ຺ພຄເຫຕພ຺ພວິເສເສ ສຕີຕິ ສາສງ຺ກໍ ວທຕິ.

ເຫຕຸຈຕຸກ຺ກວຓ຺ຓນາ ນິຏ຺ຐິຕາ.