໔. ອຸປາທິນ຺ນຕ຺ຕິກວຓ຺ຓນາ

໑໕. ອຸປາທິນ຺ນຕ຺ຕິເກ ອນຸປາທິນ຺ນອນຸປາທານິຍໍ ຘມ຺ມໍ ປຏິຈ຺ຈ ອນຸປາທິນ຺ນອນຸປາທານິໂຍ ຘມ຺ໂມ ອຸປ຺ປຊ຺ຊຕິ ນາຘິປຕິປຈ຺ຈຍາຕິ ເອເຕນ ສຍໍ ອຘິປຕິຠູຕຕ຺ຕາ ອວິຣຫິຕາຣມ຺ມຓາຘິປຕີສຸປິ ອຘິປຕິ ທຸວິເຘນປິ ອຘິປຕິປຈ຺ຈເຍນ ອຸປ຺ປຊ຺ຊຕີຕິ ນ ວຕ຺ຕພ຺ໂພ, ອຍເມຕສ຺ສ ສຠາໂວຕິ ທສ຺ເສຕິ.

໗໒. ອຸປາທິນ຺ນຸປາທານິໂຍ ກພຬີກາຣາຫາໂຣ ອຸປາທິນ຺ນຸປາທານິຍສ຺ສ ກາຍສ຺ສ ອາຫາຣປຈ຺ຈເຍນ ປຈ຺ຈໂຍຕິ ເອຕ຺ຖ ກມ຺ມຊານໍ ຣູປານໍ ອພ຺ຠນ຺ຕຣຄຕາ ໂອຊາ ຕສ຺ເສວ ກມ຺ມຊກາຍສ຺ສ ຣູປຊີວິຕິນ຺ທ຺ຣິຍໍ ວິຍ ກຏຕ຺ຕາຣູປານໍ ອນຸປາລນຸປຕ຺ຖມ຺ຠນວເສນ ປຈ຺ຈໂຍ, ນ ຊນກວເສນາຕິ ອຍມຕ຺ໂຖ ອຏ຺ຐກຖາຍໍ ວຸຕ຺ໂຕ. ເອຕສ຺ມິໍ ປນ ອຕ຺ເຖ ສຕິ ອຸປາທິນ຺ນຸປາທານິໂຍ ຈ ອນຸປາທິນ຺ນອນຸປາທານິໂຍ ຈ ຘມ຺ມາ ອຸປາທິນ຺ນຸປາທານິຍສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ ປຈ຺ຉາຊາຕິນ຺ທ຺ຣິຍນ຺ຕິ ເອຕ຺ຖ ‘‘ອາຫາຣ’’ນ຺ຕິປິ ວຕ຺ຕພ຺ພໍ, ຍທິ ຈ ກມ຺ມຊາ ໂອຊາ ສກລາປຣູປານເມວ ອາຫາຣປຈ຺ຈໂຍ ໂຫຕິ, ເອວໍ ສຕິ ‘‘ອຸປາທິນ຺ນຸປາທານິໂຍ ກພຬີກາຣາຫາໂຣ ອນຸປາທິນ຺ນຸປາທານິຍສ຺ສ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ’’ຕິ ນ ວຕ຺ຕພ຺ພໍ ສິຍາ, ວຸຕ຺ຕຎ຺ຈິທໍ, ຕມ຺ປິ ອນຊ຺ໂຌຫຏາຍ ສສນ຺ຕານຄຕາຍ ອຸປາທິນ຺ໂນຊາຍ ອນຸປາທິນ຺ນຸປາທານິຍສ຺ສ ກາຍສ຺ສ ອາຫາຣປຈ຺ຈຍໍ ສນ຺ຘາຍ ວຸຕ຺ຕໍ. ເອວຎ຺ຈ ສຕິ ‘‘ອຸປາທິນ຺ນຸປາທານິໂຍ ຈ ອນຸປາທິນ຺ນອນຸປາທານິໂຍ ຈ ຘມ຺ມາ ອນຸປາທິນ຺ນຸປາທານິຍສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໑.໔.໘໕) ອຍມ຺ປິ ປຎ຺ໂຫ ປຈ຺ຉາຊາຕາຫາຣວເສນ ອຸທ຺ຘຣິຕພ຺ໂພ ສິຍາ, ຕສ຺ມາ ອຊ຺ໂຌຫຏສ຺ສ ອຸປາທິນ຺ນາຫາຣສ຺ສ ໂລກຸຕ຺ຕຣກ຺ຂເຓ ອຠາວໂຕ ທຸມູລເກສຸ ປຐມປຎ຺ເຫ ‘‘ອາຫາຣ’’ນ຺ຕິ ນ ວຸຕ຺ຕໍ. ທຸຕິຍປຎ຺ໂຫ ຈ ນ ອຸທ຺ຘໂຏ, ນ ອິຕຣສ຺ສ ອຸປາທິນ຺ນາຫາຣສ຺ສ ກາມຠເວ ອສມ຺ຠວາຠາວໂຕຕິ ອຊ຺ໂຌຫຏເມວ ມຓ຺ຑູກາທິສຣີຣຄຕໍ ອຸປາທິນ຺ນາຫາຣໍ ສນ຺ຘາຍ ‘‘ອຸປາທິນ຺ນຸປາທານິໂຍ ກພຬີກາຣາຫາໂຣ ອຸປາທິນ຺ນຸປາທານິຍສ຺ສ ຈ ອນຸປາທິນ຺ນຸປາທານິຍສ຺ສ ຈ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໑.໔.໗໔) ວທນ຺ຕານໍ ວາໂທ ພລວຕໂຣ. ນ ຫິ ອຊ຺ໂຌຫຏມຕ຺ຕາວ ມຓ຺ຑູກາທໂຍ ກຸຈ຺ຉິວິຕ຺ຖຕໍ ນ ກໂຣນ຺ຕິ, ນ ຈ ພລໍ ນ ອຸປຊາຍນ຺ຕິ, ນ ຈ ຣູປວິເສໂສ ນ ວິຎ຺ຎາຍຕີຕິ.

‘‘ອນຸປາທິນ຺ນອນຸປາທານິໂຍ ຘມ຺ໂມ ອຸປາທິນ຺ນຸປາທານິຍສ຺ສ ຈ ອນຸປາທິນ຺ນອນຸປາທານິຍສ຺ສ ຈ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ ສຫຊາຕໍ ປຈ຺ຉາຊາຕ’’ນ຺ຕິ (ປຏ຺ຐາ. ໑.໔.໘໓) ເອວມາທີຫິ ອິຘ ວຸຕ຺ເຕຫິ ເອກມູລກທຸກຕິກາວສານປຎ຺ຫວິສ຺ສຊ຺ຊເນຫິ ‘‘ກຸສໂລ ຘມ຺ໂມ ກຸສລສ຺ສ ຈ ອພ຺ຍາກຕສ຺ສ ຈ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ ສຫຊາຕ’’ນ຺ຕິອາທິນາ ອິຘ ທຸຕິຍທຸກາວສາເນ ວິຍ ວິສ຺ສຊ຺ຊນໍ ລພ຺ຠຕີຕິ ວິຎ຺ຎາຍຕິ. ສຸຂາວໂພຘນຕ຺ຖໍ ປນ ຕຕ຺ຖ ສຫຊາຕວເສເນວ ວິສ຺ສຊ຺ຊນໍ ກຕໍ. ປຈ຺ຈນີເຍ ປນ ສຫຊາຕສ຺ເສວ ອປຏິກ຺ເຂເປ ລາຠໂຕ, ປຏິກ຺ເຂເປ ຈ ອລາຠໂຕ ສຫຊາຕປຈ຺ຈຍວເສເນວ ເອກມູລກທຸກາວສານາ ຕຕ຺ຖ ອຸທ຺ຘຏາ, ອິຘ ປເນເຕຫິ ວິສ຺ສຊ຺ຊເນຫິ ເອໂກ ຘມ຺ໂມ ສຫຊາຕາທີສຸ ອຕ຺ຖິປຈ຺ຈຍວິເສເສສຸ ອເນເກຫິປິ ອເນເກສໍ ຘມ຺ມານໍ ເອໂກ ອຕ຺ຖິປຈ຺ຈໂຍ ໂຫຕີຕິ ທສ຺ສິຕໍ ໂຫຕິ. ເອໂກ ຫິ ຘມ຺ໂມ ເອກສ຺ສ ຘມ຺ມສ຺ສ ເອເກເນວ ອຕ຺ຖິປຈ຺ຈຍວິເສເສນ ອຕ຺ຖິປຈ຺ຈໂຍ ໂຫຕິ, ເອໂກ ອເນເກສໍ ເອເກນປິ ອເນເກຫິປິ, ຕຖາ ອເນໂກ ເອກສ຺ສ, ອເນໂກ ອເນເກສໍ ສມານຕ຺ເຕ ປຈ຺ຈຍຸປ຺ປນ຺ນຘມ຺ມານໍ, ອຕ຺ຖິປຈ຺ຈຍວິເສເສສຸ ປນ ປຎ຺ຈສຸ ສຫຊາຕໍ ປຸເຣຊາເຕເນວ ສຫ ອຕ຺ຖິປຈ຺ຈໂຍ ໂຫຕິ, ອນຎ຺ຎຘມ຺ມຕ຺ເຕ ປຈ຺ຉາຊາເຕນ ຈ, ນ ນານາຘມ຺ມຕ຺ເຕ.

ຍທິ ສິຍາ, ‘‘ອຸປາທິນ຺ນຸປາທານິໂຍ ຈ ອນຸປາທິນ຺ນອນຸປາທານິໂຍ ຈ ຘມ຺ມາ ອຸປາທິນ຺ນຸປາທານິຍສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ ປຈ຺ຉາຊາຕໍ ອິນ຺ທ຺ຣິຍ’’ນ຺ຕິ ເອຕ຺ຖ ‘‘ສຫຊາຕ’’ນ຺ຕິປິ ວຕ຺ຕພ຺ພໍ ສິຍາ. ກມ຺ມຊານຎ຺ຫິ ຠູຕານໍ ສຫຊາຕານໍ ປຈ຺ຉາຊາຕານຎ຺ຈ ໂລກຸຕ຺ຕຣານໍ ເອກກ຺ຂເຓ ລພ຺ຠມານານມ຺ປິ ເອໂກ ອຕ຺ຖິປຈ຺ຈຍຠາໂວ ນຕ຺ຖິ ສຫຊາຕປຈ຺ຉາຊາຕານໍ ນານາຘມ຺ມານໍ ວິຣຸທ຺ຘສຠາວຕ຺ຕາຕິ ຕໍ ນ ວຸຕ຺ຕນ຺ຕິ ເວທິຕພ຺ພໍ. ເອວຎ຺ຈ ກຕ຺ວາ ປຈ຺ຈນີເຍ ຈ ‘‘ນອິນ຺ທ຺ຣິເຍ ພາວີສາ’’ຕິ ວຸຕ຺ຕໍ. ອຎ຺ຎຖາ ຫິ ອິນ຺ທ຺ຣິຍປຏິກ຺ເຂເປປິ ສຫຊາຕປຈ຺ຉາຊາຕວເສນ ຕສ຺ສ ປຎ຺ຫສ຺ສ ລາຠໂຕ ‘‘ເຕວີສາ’’ຕິ ວຕ຺ຕພ຺ພໍ ສິຍາຕິ. ປຸເຣຊາຕໍ ສຫຊາເຕເນວ ສຫ ອຕ຺ຖິປຈ຺ຈໂຍ ໂຫຕິ, ນ ອິຕເຣຫິ, ຕມ຺ປິ ວຕ຺ຖຸ ຕໍສຫິຕປຸເຣຊາຕເມວ, ນ ອິຕຣໍ. ກຸສລຕ຺ຕິເກ ຫິ ປຎ຺ຫາວາເຣ ‘‘ນວິປ຺ປຍຸຕ຺ຕປຈ຺ຈຍາ ອຕ຺ຖິຍາ ປຎ຺ຈາ’’ຕິ (ປຏ຺ຐາ. ໑.໑.໖໔໙) ວຸຕ຺ຕໍ, ສນິທສ຺ສນຕ຺ຕິເກ ປນ ‘‘ວິປ຺ປຍຸຕ຺ເຕ ພາວີສາ’’ຕິ. ຍໍ ປນ ຕຕ຺ຖ ອຕ຺ຖິວິຠງ຺ເຄ ປຈ຺ຈຍຸທ຺ຘາເຣ ຈ ຕິມູລເກກາວສານໍ ອຸທ຺ຘຏໍ, ຕໍ ວຕ຺ຖຸສຫິຕສ຺ສ ອາຣມ຺ມຓປຸເຣຊາຕສ຺ສ ສຫຊາເຕນ, ສຫ ປຈ຺ຈຍຠາວໂຕຕິ ປຈ຺ຉາຊາຕໍ ອາຫາຣິນ຺ທ຺ຣິເຍເຫວ, ອນຎ຺ຎຘມ຺ມຕ຺ເຕ ຈ ສຫຊາເຕນ ຈ, ອາຫາໂຣ ປຈ຺ຉາຊາຕິນ຺ທ຺ຣິເຍເຫວ, ອິນ຺ທ຺ຣິຍໍ ປຈ຺ຉາຊາຕາຫາເຣນາຕິ ເອວເມຕໍ ອຕ຺ຖິປຈ຺ຈຍວິຠາຄໍ ສລ຺ລກ຺ເຂຕ຺ວາ ອນຸໂລເມ ປຈ຺ຈນີຍາທີສຸ ຈ ລພ຺ຠມານາ ປຎ຺ຫາ ອຸທ຺ຘຣິຕພ຺ພາ.

ອຸປາທິນ຺ນຕ຺ຕິກວຓ຺ຓນາ ນິຏ຺ຐິຕາ.