໖. ວິຕກ຺ກຕ຺ຕິກວຓ຺ຓນາ

໒໒. ວິຕກ຺ກຕ຺ຕິເກ ປຏິຈ຺ຈວາຣານຸໂລເມ ອຘິປຕິຍາ ເຕວີສາຕິ ສຕ຺ຕສຸ ມູລເກສຸ ຍຖາກ຺ກມໍ ສຕ຺ຕ ປຎ຺ຈ ຕີຓິ ເອກໍ ຕີຓິ ຕີຓິ ເອກນ຺ຕິ ເອວໍ ເຕວີສ, ອຎ຺ຎມຎ຺ເຎ ອຏ຺ຐວີສ ສຕ຺ຕ ປຎ຺ຈ ປຎ຺ຈ ຕີຓິ ຈຕ຺ຕາຣິ ຕີຓິ ເອກນ຺ຕິ ເອວໍ, ປຸເຣຊາເຕ ເອກາທສ ຕີຓິ ຈຕ຺ຕາຣິ ທ຺ເວ ທຸຕິຍຕຕິຍທຸມູລເກສຸ ເອກໍ ເອກນ຺ຕິ ເອວໍ, ຕຖາ ອາເສວເນ. ອຎ຺ຎານິ ຄຓນານິ ເຫຕຸອາຣມ຺ມຓສທິສານິ.

໓໑. ປຈ຺ຈນີເຍ ນາຘິປຕິປຈ຺ຈເຍ ປຐມປຎ຺ເຫ ‘‘ອວິຕກ຺ກວິຈາຣມຕ຺ເຕ ຂນ຺ເຘ ປຏິຈ຺ຈ ອວິຕກ຺ກວິຈາຣມຕ຺ຕາ ອຘິປຕີ’’ຕິ ວຕ຺ວາ ປຸນ ‘‘ວິປາກໍ ອວິຕກ຺ກວິຈາຣມຕ຺ຕໍ ເອກໍ ຂນ຺ຘໍ ປຏິຈ຺ຈາ’’ຕິອາທິນາ ວິສ຺ສຊ຺ຊນໍ ກຕໍ, ນ ປນ ອວິເສເສນ. ກສ຺ມາ? ວິປາກວຊ຺ຊານໍ ອວິຕກ຺ກວິຈາຣມຕ຺ຕກ຺ຂນ຺ຘານໍ ເອກນ຺ເຕນ ສາຘິປຕິຠາວໂຕ. ວິປາການໍ ປນ ໂລກຸຕ຺ຕຣານເມວ ສາຘິປຕິຠາໂວ, ນ ອິຕເຣສນ຺ຕິ ເຕ ວິສຸໍ ນິທ຺ຘາເຣຕ຺ວາ ວຸຕ຺ຕາ. ໂລກຸຕ຺ຕຣວິປາກາຘິປຕິສ຺ສ ເຈຕ຺ຖ ປຸຣິມໂກຏ຺ຐາເສເຍວ ສງ຺ຄໂຫ ເວທິຕພ຺ໂພ.

໓໘. ນາເສວນມູລເກ ອວິຕກ຺ກວິຈາຣມຕ຺ຕໍ ວິປາເກນ ສຫ ຄຈ຺ຉນ຺ເຕນາຕິ ເອຕໍ ມູລໍ ອວິຕກ຺ກວິຈາຣມຕ຺ຕອວິຕກ຺ກວິຈາຣປເທຫິ ອວິຕກ຺ເກຫິ ສຫ ໂຍເຊນ຺ເຕນ ນປຸເຣຊາຕສທິສໍ ປາຬິຄມນໍ ກາຕພ຺ພນ຺ຕິ ວຸຕ຺ຕໍ ໂຫຕິ. ສທິສຕາ ເຈຕ຺ຖ ເຍຠຸຍ຺ເຍນ ວິສທິສຕາ ຈ ທຏ຺ຐພ຺ພາ. ຕຕ຺ຖ ຫິ ອາຣຸປ຺ເປ ອວິຕກ຺ກວິຈາຣມຕ຺ຕໍ ອິຘ ວິປາກໍ ອວິຕກ຺ກວິຈາຣມຕ຺ຕນ຺ຕິອາທິ ໂຍເຊຕພ຺ພນ຺ຕິ ອຍເມຕ຺ຖ ວິເສໂສ. ອິທຎ຺ຈ ນາເສວນວິຠງ຺ຄານນ຺ຕຣໍ ລິຂິຕພ຺ພໍ, ນ ຌານານນ຺ຕຣໍ, ເກສຸຈິ ໂປຕ຺ຖເກສຸ ລິຂິຕໍ.

ປຈ຺ຈຍວາເຣ ປຐມຆຏເນ ປວຕ຺ຕິປຏິສນ຺ຘິໂຍຕິ ທຸມູລເກສຸ ປຐເມ ສຕ຺ຕສຸປິ ປຎ຺ເຫສຸ ປວຕ຺ຕິຎ຺ຈ ປຏິສນ຺ຘິຎ຺ຈ ໂຍເຊຕ຺ວາຕິ ວຸຕ຺ຕໍ ໂຫຕິ.

໔໙. ປຈ຺ຈນີເຍ ສຕ຺ຕສຸ ຐາເນສຸ ສຕ຺ຕ ໂມຫາ ອຸທ຺ຘຣິຕພ຺ພາ ມູລປເທສຸ ເອວາຕິ ສວິຕກ຺ກສວິຈາຣາທິປເທສຸ ມູລປທເມວ ອວສານຠາເວນ ເຍສຸ ປຎ຺ເຫສຸ ໂຍຊິຕໍ, ເຕສຸ ສຕ຺ຕສຸ ປຎ຺ເຫສຸ ສຕ຺ຕ ໂມຫາ ອຸທ຺ຘຣິຕພ຺ພາຕິ ອຕ຺ໂຖ.

ປຎ຺ຫາວາຣປຈ຺ຈນີເຍ ‘‘ອວິຕກ຺ກວິຈາຣມຕ຺ໂຕ ຘມ຺ໂມ ອວິຕກ຺ກວິຈາຣມຕ຺ຕສ຺ສ ຘມ຺ມສ຺ສ ອາຣມ຺ມຓສຫຊາຕອຸປນິສ຺ສຍກມ຺ມປຈ຺ຈເຍນ ປຈ຺ຈໂຍ’’ຕິ ເກສຸຈິ ໂປຕ຺ຖເກສຸ ປາໂຐ ທິສ຺ສຕິ, ອຸປນິສ຺ສເຍນ ປນ ສງ຺ຄຫິຕຕ຺ຕາ ‘‘ກມ຺ມປຈ຺ຈເຍນ ປຈ຺ຈໂຍ’’ຕິ ນ ສກ຺ກາ ວຕ຺ຕຸໍ. ອຸປາທິນ຺ນຕ຺ຕິກປຎ຺ຫາວາຣປຈ຺ຈນີເຍ ຫິ ‘‘ອນຸປາທິນ຺ນອນຸປາທານິໂຍ ຘມ຺ໂມ ອນຸປາທິນ຺ນອນຸປາທານິຍສ຺ສ ຘມ຺ມສ຺ສ ສຫຊາຕອຸປນິສ຺ສຍປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໑.໔.໕໘, ໖໒) ເອຕ຺ຕກເມວ ວຸຕ຺ຕໍ. ປຣິຕ຺ຕຕ຺ຕິກປຎ຺ຫາວາຣປຈ຺ຈນີເຍ ຈ ‘‘ມຫຄ຺ຄໂຕ ຘມ຺ໂມ ມຫຄ຺ຄຕສ຺ສ ຘມ຺ມສ຺ສ ອາຣມ຺ມຓສຫຊາຕອຸປນິສ຺ສຍປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໒.໑໒.໕໗, ໖໕, ໗໓) ເອຕ຺ຕກເມວ ວຸຕ຺ຕນ຺ຕິ. ເອຕ຺ຕກເມວ ຈ ອວິຕກ຺ກວິຈາຣມຕ຺ຕໍ ກມ຺ມໍ ອປ຺ປມາຓໍ ມຫຄ຺ຄຕຎ຺ຈ, ຕຎ຺ຈ ທຸພ຺ພລໍ ນ ໂຫຕີຕິ ເອເຕຫິເຍວ ວຈເນຫິ ວິຎ຺ຎາຍຕີຕິ.

ວິຕກ຺ກຕ຺ຕິກວຓ຺ຓນາ ນິຏ຺ຐິຕາ.