໘. ຈິຕ຺ຕຍມກໍ

ອຸທ຺ເທສວາຣວຓ຺ຓນາ

໑-໖໒. ຈິຕ຺ຕຍມກວຓ຺ຓນາຍໍ ອາທິໂຕວ ຕໂຍ ສຸທ຺ຘິກມຫາວາຣາ ໂຫນ຺ຕີຕິ ອິເມ ຕໂຍ ມຫາວາຣາ ສຣາຄາທິກຸສລາທີຫິ ມິສ຺ສກາ ສຸທ຺ຘິກາ ຈ, ເຕສຸ ອາທິໂຕ ສຸທ຺ຘິກາ ໂຫນ຺ຕີຕິ ອຕ຺ໂຖ. ມິສ຺ສເກສຸ ຈ ເອເກກສ຺ມິໍ ສຣາຄາທິມິສ຺ສກຈິຕ຺ເຕ ຕໂຍ ຕໂຍ ມຫາວາຣາ, ເຕ ຕຕ຺ຖ ຕຕ຺ຖ ປນ ວຸຕ຺ເຕ ສມ຺ປິຓ຺ເຑຕ຺ວາ ‘‘ໂສຬສ ປຸຄ຺ຄລວາຣາ’’ຕິອາທິ ວຸຕ຺ຕໍ, ນ ນິຣນ຺ຕຣໍ ວຸຕ຺ເຕຕິ. ‘‘ຍສ຺ສ ຈິຕ຺ຕໍ ອຸປ຺ປຊ຺ຊຕິ ນ ນິຣຸຊ຺ຌຕິ, ຕສ຺ສ ຈິຕ຺ຕໍ ນິຣຸຊ຺ຌິສ຺ສຕິ ນຸປ຺ປຊ຺ຊິສ຺ສຕີ’’ຕິອາທິນາ ອຸປ຺ປາທນິໂຣຘານໍ ປຈ຺ຈຸປ຺ປນ຺ນານາຄຕກາລານຎ຺ຈ ສໍສຄ຺ຄວເສນ ເອເກກາຍ ປຸຈ຺ຉາຍ ປວຕ຺ຕຕ຺ຕາ ‘‘ອຸປ຺ປາທນິໂຣຘກາລສມ຺ເຠທວາໂຣ’’ຕິ ວຸຕ຺ໂຕ. ເອວໍ ເສສານມ຺ປິ ວາຣານໍ ຕໍຕໍນາມຕາ ປາຬິອນຸສາເຣນ ເວທິຕພ຺ພາ.

ອຸທ຺ເທສວາຣວຓ຺ຓນາ ນິຏ຺ຐິຕາ.

ນິທ຺ເທສວາຣວຓ຺ຓນາ

໖໓. ຕຖາຣູປສ຺ເສວ ຂີຓາສວສ຺ສ ຈິຕ຺ຕໍ ສນ຺ຘາຍາຕິ ອິທໍ ອຸປ຺ປາທກ຺ຂຓສມງ຺ຄິປຈ຺ຉິມຈິຕ຺ຕສມງ຺ຄິມ຺ຫິ ປຸຄ຺ຄເລ ອຘິປ຺ເປເຕ ຕຎ຺ຈ ຈິຕ຺ຕໍ ອຘິປ຺ເປຕເມວ ໂຫຕີຕິ ກຕ຺ວາ ວຸຕ຺ຕນ຺ຕິ ທຏ຺ຐພ຺ພໍ. ອຣຫໂຕ ປຈ຺ຉິມຈິຕ຺ຕມ຺ປີຕິ ນຸປ຺ປຊ຺ຊຕິ ນິຣຸຊ຺ຌຕີຕິ ເອວໍປກາຣໍ ຠງ຺ຄກ຺ຂຓສມງ຺ຄິເມວ ສນ຺ຘາຍ ວຸຕ຺ຕໍ.

໖໕-໘໒. ອຸປ຺ປາທວາຣສ຺ສ ທຸຕິຍປຸຈ຺ຉາວິສ຺ສຊ຺ຊເນ ຈິຕ຺ຕສ຺ສ ຠງ຺ຄກ຺ຂເຓ, ນິໂຣຘສມາປນ຺ນານໍ, ອສຎ຺ຎສຕ຺ຕານໍ ເຕສໍ ຈິຕ຺ຕໍ ອຸປ຺ປຊ຺ຊິຕ຺ຖ, ໂນ ຈ ເຕສໍ ຈິຕ຺ຕໍ ອຸປ຺ປຊ຺ຊຕີຕິ ເອຕ຺ຖ ‘‘ຈິຕ຺ຕສ຺ສ ຠງ຺ຄກ຺ຂເຓ ເຕສໍ ຈິຕ຺ຕໍ ອຸປ຺ປຊ຺ຊິຕ຺ຖາ’’ຕິ ເອຕສ຺ສ ‘‘ສພ຺ເພສໍ ຈິຕ຺ຕໍ ຂຓປຈ຺ຈຸປ຺ປນ຺ນເມວ ຫຸຕ຺ວາ ອຸປ຺ປາທກ຺ຂຓໍ ອຕີຕຕ຺ຕາ ອຸປ຺ປຊ຺ຊິຕ຺ຖ ນາມາ’’ຕິ ອຕ຺ໂຖ ວຸຕ຺ໂຕ. ຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ຈິຕ຺ຕໍ ອຸປ຺ປຊ຺ຊິຕ຺ຖ ເຈວ ອຸປ຺ປຊ຺ຊຕິ ຈາຕິ ເອຕສ຺ສປິ ອຸປ຺ປາທໍ ປຕ຺ຕຕ຺ຕາ ອຸປ຺ປຊ຺ຊິຕ຺ຖ, ອນຕີຕຕ຺ຕາ ອຸປ຺ປຊ຺ຊຕິ ນາມາຕິ ທ຺ວຍເມຕໍ ເອວໍ ນ ສກ຺ກາ ວຕ຺ຕຸໍ. ນ ຫິ ຂຓປຈ຺ຈຸປ຺ປນ຺ເນ ‘‘ອຸປ຺ປຊ຺ຊິຕ຺ຖາ’’ຕິ ອຕີຕໂວຫາໂຣ ອຕ຺ຖິ. ຍທິ ສິຍາ, ຍໍ ວາ ປນ ຈິຕ຺ຕໍ ອຸປ຺ປຊ຺ຊິຕ຺ຖ, ຕໍ ຈິຕ຺ຕໍ ອຸປ຺ປຊ຺ຊຕີຕິ ເອຕ຺ຖ ‘‘ໂນ’’ຕິ ອວຕ຺ວາ ວິຠຊິຕພ຺ພໍ ສິຍາ. ຕຖາ ‘‘ຍໍ ຈິຕ຺ຕໍ ອຸປ຺ປຊ຺ຊຕິ, ຕໍ ຈິຕ຺ຕໍ ອຸປ຺ປຊ຺ຊິຕ຺ຖາ’’ຕິ ເອຕ຺ຖ ຈ ‘‘ໂນ’’ຕິ ອວຕ຺ວາ ‘‘ອາມນ຺ຕາ’’ຕິ ວຕ຺ຕພ຺ພໍ ສິຍາ. ‘‘ຈິຕ຺ຕສ຺ສ ຠງ຺ຄກ຺ຂເຓ’’ຕິ ປນ ຠິຊ຺ຊມານຈິຕ຺ຕສມງ຺ຄີ ປຸຄ຺ຄໂລ ວຸຕ຺ໂຕ, ຕສ຺ສ ອຕີຕໍ ຈິຕ຺ຕໍ ອຸປ຺ປຊ຺ຊິຕ຺ຖ, ນ ຈ ກິຎ຺ຈິ ຈິຕ຺ຕໍ ອຸປ຺ປຊ຺ຊຕິ. ຈິຕ຺ຕສ຺ສ ອຸປ຺ປາທກ຺ຂເຓຕິ ຈ ອຸປ຺ປຊ຺ຊມານຈິຕ຺ຕສມງ຺ຄີ ປຸຄ຺ຄໂລ ວຸຕ຺ໂຕ, ຕສ຺ສປິ ອຕີຕໍ ຈິຕ຺ຕໍ ອຸປ຺ປຊ຺ຊິຕ຺ຖ, ຕໍ ປນ ຈິຕ຺ຕໍ ອຸປ຺ປຊ຺ຊຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ຈິຕ຺ຕນ຺ຕິ ຫິ ສາມຎ຺ຎວຈນໍ ເອກສ຺ມິໍ ອເນກສ຺ມິຎ຺ຈ ຍຖາຄຫິຕວິເສເສ ຕິຏ຺ຐຕີຕິ. ‘‘ຍສ຺ສ ວາ ປນ ຈິຕ຺ຕໍ ອຸປ຺ປຊ຺ຊິສ຺ສຕິ, ຕສ຺ສ ຈິຕ຺ຕໍ ອຸປ຺ປຊ຺ຊຕີຕິ? ຈິຕ຺ຕສ຺ສ ຠງ຺ຄກ຺ຂເຓ’’ຕິ ເອຕ຺ຖ ຍສ຺ສ ວາ ປນ ຈິຕ຺ຕໍ ອຸປ຺ປຊ຺ຊິສ຺ສຕີຕິ ເອເຕນ ສນ຺ນິຏ຺ຐາເນນ ຄຫິຕປຸຄ຺ຄລສ຺ເສວ ຈິຕ຺ຕສ຺ສ ຠງ຺ຄກ຺ຂເຓຕິ ເອວໍ ສພ຺ພຕ຺ຖ ສນ຺ນິຏ຺ຐານວເສນ ນິຍໂມ ເວທິຕພ຺ໂພ. ອຸປ຺ປນ຺ນຸປ຺ປຊ຺ຊມານວາໂຣ ນິຣຸທ຺ຘນິຣຸຊ຺ຌມານວາໂຣ ຈ ປຸຄ຺ຄລວາຣາທີສຸ ຕີສຸປິ ນິນ຺ນານາກຣຓາ ອຸທ຺ທິຏ຺ຐາ ນິທ຺ທິຏ຺ຐາ ຈ. ຕຕ຺ຖ ປຸຄ຺ຄລວາເຣ ອວິເສເສນ ຍໍ ກຎ຺ຈິ ຕາທິສໍ ປຸຄ຺ຄລໍ ສນ຺ຘາຍ ‘‘ອຸປ຺ປນ຺ນໍ ອຸປ຺ປຊ຺ຊມານ’’ນ຺ຕິອາທິ ວຸຕ຺ຕໍ, ຘມ຺ມວາເຣ ຈິຕ຺ຕເມວ, ປຸຄ຺ຄລຘມ຺ມວາເຣ ປຸຄ຺ຄລໍ ຈິຕ຺ຕຎ຺ຈາຕິ ອຍເມຕ຺ຖ ວິເສໂສ ທຏ຺ຐພ຺ໂພ.

໘໓. ອຕິກ຺ກນ຺ຕກາລວາເຣ ອິມສ຺ສ ປຸຄ຺ຄລວາຣຕ຺ຕາ ປຸຄ຺ຄໂລ ປຸຈ຺ຉິໂຕຕິ ປຸຄ຺ຄລສ຺ເສວ ວິສ຺ສຊ຺ຊເນນ ຠວິຕພ຺ພໍ. ຍຖາ ຍສ຺ສ ຈິຕ຺ຕໍ ອຸປ຺ປຊ຺ຊິຕ຺ຖາຕິ ເອເຕນ ນ ໂກຈິ ປຸຄ຺ຄໂລ ນ ຄຫິໂຕ, ເອວໍ ຍສ຺ສ ຈິຕ຺ຕໍ ອຸປ຺ປຊ຺ຊມານໍ ຂຓໍ ຂຓໍ ວີຕິກ຺ກນ຺ຕໍ ອຕິກ຺ກນ຺ຕກາລນ຺ຕິ ເອເຕນ ສນ຺ນິຏ຺ຐາເນນ ນ ໂກຈິ ນ ຄຫິໂຕ. ນ ຫິ ໂສ ປຸຄ຺ຄໂລ ອຕ຺ຖິ, ຍສ຺ສ ຈິຕ຺ຕໍ ອຸປ຺ປາທກ຺ຂຓໍ ອຕີຕໍ ນຕ຺ຖິ, ເຕ ຈ ປນ ນິຣຸຊ຺ຌມານກ຺ຂຓາຕີຕຈິຕ຺ຕາ ນ ນ ໂຫນ຺ຕີຕິ ປຐໂມ ປຎ຺ໂຫ ‘‘ອາມນ຺ຕາ’’ຕິ ວິສ຺ສຊ຺ຊິຕພ຺ໂພ ສິຍາ, ຕຖາ ທຸຕິຍຕຕິຍາ. ຈຕຸຕ຺ໂຖ ປນ ‘‘ປຈ຺ຉິມຈິຕ຺ຕສ຺ສ ຠງ຺ຄກ຺ຂເຓ ເຕສໍ ຈິຕ຺ຕໍ ຠງ຺ຄກ຺ຂຓໍ ອວີຕິກ຺ກນ຺ຕໍ, ໂນ ຈ ເຕສໍ ຈິຕ຺ຕໍ ອຸປ຺ປາທກ຺ຂຓໍ ອວີຕິກ຺ກນ຺ຕໍ, ອິຕເຣສໍ ຈິຕ຺ຕໍ ຠງ຺ຄກ຺ຂຓຎ຺ຈ ອວີຕິກ຺ກນ຺ຕໍ ອຸປ຺ປາທກ຺ຂຓຎ຺ຈ ອວີຕິກ຺ກນ຺ຕ’’ນ຺ຕິ ວິສ຺ສຊ຺ຊິຕພ຺ໂພ ຠເວຍ຺ຍ, ຕຖາ ອວິສ຺ສຊ຺ເຊຕ຺ວາ ກສ຺ມາ ສພ຺ພຕ຺ຖ ຈິຕ຺ຕເມວ ວິຠຕ຺ຕນ຺ຕິ? ຈິຕ຺ຕວເສນ ປຸຄ຺ຄລວວຕ຺ຖານໂຕ. ຂຓສ຺ສ ຫິ ວີຕິກ຺ກນ຺ຕຕາຍ ອຕິກ຺ກນ຺ຕກາລຕາວຈເນນ ວຕ຺ຕມານສ຺ສ ຈ ຈິຕ຺ຕສ຺ສ ວເສນ ປຸຄ຺ຄໂລ ອຸປ຺ປາທກ຺ຂຓາຕີຕຈິຕ຺ໂຕ ວຸຕ຺ໂຕ ອຕີຕສ຺ສ ຈ, ຕຕ຺ຖ ປຸຣິມສ຺ສ ຈິຕ຺ຕໍ ນ ຠງ຺ຄກ຺ຂຓໍ ວີຕິກ຺ກນ຺ຕໍ ປຈ຺ຉິມສ຺ສ ວີຕິກ຺ກນ຺ຕນ຺ຕິ ເອວມາທິໂກ ປຸຄ຺ຄລວິຠາໂຄ ຍສ຺ສ ຈິຕ຺ຕສ຺ສ ວເສນ ປຸຄ຺ຄລວວຕ຺ຖານໍ ໂຫຕິ, ຕສ຺ສ ຈິຕ຺ຕສ຺ສ ຕໍຕໍຂຓວີຕິກ຺ກມາວີຕິກ຺ກມທສ຺ສນວເສນ ທສ຺ສິໂຕ ໂຫຕີຕິ ສພ຺ພວິສ຺ສຊ຺ຊເນສຸ ຈິຕ຺ຕເມວ ວິຠຕ຺ຕໍ. ອຖ ວາ ນຍິຘ ຘມ຺ມມຕ຺ຕວິສິຏ຺ໂຐ ປຸຄ຺ຄໂລ ປຸຈ຺ຉິໂຕ, ອຖ ໂຂ ປຸຄ຺ຄລວິສິຏ຺ຐໍ ຈິຕ຺ຕໍ, ຕສ຺ມາ ຈິຕ຺ຕເມວ ວິສ຺ສຊ຺ຊິຕນ຺ຕິ ເວທິຕພ຺ພໍ. ຍທິປິ ປຸຄ຺ຄລປ຺ປຘານາ ປຸຈ຺ຉາ, ອຖາປິ ຈິຕ຺ຕປ຺ປຘານາ, ອຸຠຍຖາປິ ທຸຕິຍປຸຈ຺ຉາຍ ‘‘ອາມນ຺ຕາ’’ຕິ ວຕ຺ຕພ຺ພໍ ສິຍາ, ຕຖາ ປນ ອວຕ຺ວາ ນິໂຣຘກ຺ຂຓວີຕິກ຺ກເມນ ອຕິກ຺ກນ຺ຕກາລຕາ ນ ອຸປ຺ປາທກ຺ຂຓວີຕິກ຺ກເມນ ອຕິກ຺ກນ຺ຕກາລຕາ ວິຍ ວຕ຺ຕມານສ຺ສ ອຕ຺ຖີຕິ ທສ຺ສນຕ຺ຖໍ ‘‘ອຕີຕໍ ຈິຕ຺ຕ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ຍສ຺ສ ຈິຕ຺ຕໍ ນ ອຸປ຺ປຊ຺ຊມານນ຺ຕິ ເອຕ຺ຖ ອຸປ຺ປຊ຺ຊມານໍ ຂຓໍ ຂຓໍ ວີຕິກ຺ກນ຺ຕໍ ອຕິກ຺ກນ຺ຕກາລໍ ຍສ຺ສ ຈິຕ຺ຕໍ ນ ໂຫຕີຕິ ອຕ຺ໂຖ. ເອສ ນໂຍ ‘‘ນ ນິຣຸຊ຺ຌມານ’’ນ຺ຕິ ເອຕ຺ຖາປິ.

໑໑໔-໑໑໖. ມິສ຺ສກວາເຣສຸ ຍສ຺ສ ສຣາຄໍ ຈິຕ຺ຕໍ ອຸປ຺ປຊ຺ຊຕິ ນ ນິຣຸຊ຺ຌຕິ, ຕສ຺ສ ຈິຕ຺ຕໍ ນິຣຸຊ຺ຌິສ຺ສຕິ ນຸປ຺ປຊ຺ຊິສ຺ສຕີຕິ ປຸຈ຺ຉາ, ໂນຕິ ວິສ຺ສຊ຺ຊນຎ຺ຈ ອຏ຺ຐກຖາຍໍ ທສ຺ສິຕໍ. ປາຬິຍໍ ປນ ‘‘ຍສ຺ສ ສຣາຄໍ ຈິຕ຺ຕໍ ອຸປ຺ປຊ຺ຊຕິ ນ ນິຣຸຊ຺ຌຕິ, ຕສ຺ສ ສຣາຄໍ ຈິຕ຺ຕໍ ນິຣຸຊ຺ຌິສ຺ສຕິ ນຸປ຺ປຊ຺ຊິສ຺ສຕີ’’ຕິ ມາຕິກາຐປນາຍໍ ວຸຕ຺ຕຕ຺ຕາ ວິສ຺ສຊ຺ຊເນປິ ຕເຖວ ສນ຺ນິຏ຺ຐານສໍສຍຕ຺ເຖສຸ ສຣາຄາທິມິສ຺ສກຈິຕ຺ຕວເສເນວ ປຸຈ຺ຉາ ອຸທ຺ຘຣິຕ຺ວາ ‘‘ສຣາຄປຈ຺ຉິມຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ສຣາຄໍ ຈິຕ຺ຕໍ ອຸປ຺ປຊ຺ຊຕິ ນ ນິຣຸຊ຺ຌຕິ ນິຣຸຊ຺ຌິສ຺ສຕິ ນຸປ຺ປຊ຺ຊິສ຺ສຕິ, ອິຕເຣສໍ ສຣາຄຈິຕ຺ຕສ຺ສ ອຸປ຺ປາທກ຺ຂເຓ ເຕສໍ ສຣາຄໍ ຈິຕ຺ຕໍ ອຸປ຺ປຊ຺ຊຕິ ນ ນິຣຸຊ຺ຌຕິ ນິຣຸຊ຺ຌິສ຺ສຕິ ເຈວ ອຸປ຺ປຊ຺ຊິສ຺ສຕິ ຈາ’’ຕິ ເອວມາທິນາ ນເຍນ ເຍຠຸຍ຺ເຍນ ສຸທ຺ຘິກວາຣສທິສເມວ ວິສ຺ສຊ຺ຊນໍ ກາຕພ຺ພນ຺ຕິ ກຕ຺ວາ ສໍຂິຕ຺ຕນ຺ຕິ ວິຎ຺ຎາຍຕິ.

ນິທ຺ເທສວາຣວຓ຺ຓນາ ນິຏ຺ຐິຕາ.

ຈິຕ຺ຕຍມກວຓ຺ຓນາ ນິຏ຺ຐິຕາ.