໑໐. ເວລາມສຸຕ຺ຕວຓ຺ຓນາ

໒໐. ທສເມ ສກຸຓ຺ຑກຠຕ຺ຕນ຺ຕິ ສກຸຓ຺ຑກໍ ອຸຕ຺ຕຓ຺ຑຸລຠຕ຺ຕໍ. ປຣິຕ຺ເຕຫິ ສກຸຓ຺ເຑຫິ ຕຓ຺ຑຸເລຫິປິ ສທ຺ຘິໍ ວິປກ຺ກຠຕ຺ຕໍ ອຸຕ຺ຕຓ຺ຑຸລເມວ ໂຫຕິ. ພິຬງ຺ຄໍ ວຸຈ຺ຈຕິ ອາຣນາຬໍ, ພິຬງ຺ຄໂຕ ນິພ຺ພຕ຺ຕນໂຕ ຕເທວ ກຎ຺ຊິຍໂຕ ຊາຕນ຺ຕິ ກຎ຺ຊິຍໍ, ຕໍ ທຸຕິຍໍ ເອຕສ຺ສາຕິ ພິຬງ຺ຄທຸຕິຍໍ, ຕໍ ກຎ຺ຊິຍທຸຕິຍນ຺ຕິ ວຸຕ຺ຕໍ. ອສກ຺ກຣິຕ຺ວາຕິ ເທຍ຺ຍຘມ຺ມມ຺ປິ ປຸຄ຺ຄລມ຺ປິ ອສກ຺ກຣິຕ຺ວາ. ເທຍ຺ຍຘມ຺ມສ຺ສ ອສກ຺ກຣຓໍ ອສມ຺ປນ຺ນກາໂຣ, ປຸຄ຺ຄລສ຺ສ ອສກ຺ກຣຓໍ ອຄຣຸກຣຓໍ. ເທຍ຺ຍຘມ຺ມໍ ອສກ຺ກໂຣນ຺ໂຕ ຫິ ອຸຕ຺ຕຓ຺ຑຸລາທິໂທສສມນ຺ນາຄຕໍ ອາຫາຣໍ ເທຕິ, ນ ສມ຺ປນ຺ນໍ ກໂຣຕິ. ປຸຄ຺ຄລໍ ອສກ຺ກໂຣນ຺ໂຕ ນິສີທນຏ຺ຐານໍ ອສມ຺ມຊ຺ຊິຕ຺ວາ ຍຕ຺ຖ ຕຕ຺ຖ ວາ ນິສີທາເປຕ຺ວາ ຍໍ ວາ ຕໍ ວາ ທາຣກໍ ເປເສຕ຺ວາ ເທຕິ. ອຈິຕ຺ຕີກຕ຺ວາຕິ ນ ຈິຕ຺ຕິໍ ກຕ຺ວາ, ນ ປູເຊຕ຺ວາຕິ ອຕ຺ໂຖ. ປູເຊນ຺ໂຕ ຫິ ປູເຊຕພ຺ພວຕ຺ຖຸໍ ຈິຕ຺ເຕ ຐເປຕິ, ນ ຕໂຕ ພຫິ ກໂຣຕິ. ຈິຕ຺ຕໍ ວາ ອຈ຺ຉຣິຍໍ ກຕ຺ວາ ປຏິປຕ຺ຕິ ຈິຕ຺ຕີກຣຓໍ ສມ຺ຠາວນກິຣິຍາ, ຕປ຺ປຏິກ຺ເຂປໂຕ ອຈິຕ຺ຕີກຣຓໍ ອສມ຺ຠາວນກິຣິຍາ. ອປວິທ຺ຘນ຺ຕິ ອຸຈ຺ຉິຏ຺ຐາທິຉຑ຺ຑນີຍຘມ຺ມໍ ວິຍ ອວຂິຕ຺ຕກໍ. ໂຍ ຫິ ຉຑ຺ເຑຕຸກາໂມ ຫຸຕ຺ວາ ໂຣຄິໂນ ສຣີເຣ ໂອທນາທີນິ ມຊ຺ຊິຕ຺ວາ ວມ຺ມິເກ ໂຣຄໍ ປກ຺ຂິປນ຺ໂຕ ວິຍ ເທຕິ, ອຍໍ ອປວິທ຺ຘໍ ເທຕິ ນາມ. ອນາຄມນທິຏ຺ຐິໂກຕິ ‘‘ອທ຺ຘາ ອິມສ຺ສ ທານສ຺ສ ຜລໍ ມມ ອາຄຈ຺ຉຕີ’’ຕິ ເອວໍ ຍສ຺ສ ກມ຺ມສ຺ສກຕທິຏ຺ຐິ ອຕ຺ຖິ, ໂສ ອາຄມນທິຏ຺ຐິໂກ. ອຍໍ ປນ ນ ຕາທິໂສຕິ ອນາຄມນທິຏ຺ຐິໂກ, ຜລໍ ປາຏິກງ຺ຂໍ ຫຸຕ຺ວາ ນ ເທຕີຕິ ອຕ຺ໂຖ. ເຕນາຫ ‘‘ນ ກມ຺ມຎ຺ຈ ຜລຎ຺ຈ ສທ຺ທຫິຕ຺ວາ ເທຕີ’’ຕິ.

ເວລາໂມຕິ ເອຕ຺ຖ ມາ-ສທ຺ໂທ ປຏິເສຘວຈໂນ. ຊາຕິໂຄຕ຺ຕຣູປໂຠຄາທິຄຸຓານໍ ເວລາ ມຣິຍາທາ ນຕ຺ຖິ ເອຕສ຺ມິນ຺ຕິ ເວລາໂມ. ອຖ ວາ ຍຖາວຸຕ຺ຕຄຸຓານໍ ເວລາ ມຣິຍາທາ ອມຕິ ໂອສານໍ ຄຈ຺ຉຕິ ເອຕສ຺ມິນ຺ຕິ ເວລາໂມ, ເວລໍ ວາ ມຣິຍາທໍ ອມຕິ ຄຈ຺ຉຕິ ອຕິກ຺ກມຕີຕິ ເວລາໂມ. ເຕນາຫ ‘‘ຊາຕິໂຄຕ຺ຕ…ເປ… ເອວໍລທ຺ຘນາໂມ’’ຕິ. ທີຍຕີຕິ ທານໍ, ທານວຕ຺ຖຸ. ຕໍ ອຄ຺ຄີຍຕິ ນິສ຺ສຊ຺ຊີຍຕິ ເອຕ຺ຖາຕິ ທານຄ຺ຄໍ. ທານໍ ວາ ຄຓ຺ຫນ຺ຕິ ເອຕ຺ຖາຕິ ທານຄ຺ຄໍ, ເອວໍ ຠຕ຺ຕຄ຺ຄໍ, ປຣິເວສນຏ຺ຐານໍ. ທຸກູລສນ຺ທນານີຕິ ຣຊຕຠາຊນາທິນິສ຺ສິເຕ ທຸກູເລ ຂີຣສ຺ສ ສນ຺ທນໍ ເອເຕສນ຺ຕິ ທຸກູລສນ຺ທນານິ. ກໍສູປຘາຣຓານີຕິ ຣຊຕມຍໂທຫຠາຊນານິ. ເຕນາຫ ‘‘ຣຊຕມຍຂີຣປຏິຈ຺ຉການີ’’ຕິ. ຣຊຕມຍານິ ຂີຣປຏິຈ຺ຉການິ ຂີຣປຏິຄ຺ຄຫຠາຊນານິ ເອເຕສນ຺ຕິ ຣຊຕມຍຂີຣປຏິຈ຺ຉການິ. ໂສເຘຍ຺ຍາຕິ ມຫປ຺ຜລຠາວກຣເຓນ ວິໂສເຘຍ຺ຍ. ມຫປ຺ຜລຠາວປ຺ປຕ຺ຕິຍາ ຫິ ທກ຺ຂິຓາ ວິສຸຊ຺ຌຕິ ນາມ.

ມຄ຺ເຄນາຄຕໍ ອນິວຕ຺ຕນສຣຓນ຺ຕິ ອິມິນາ ໂລກຸຕ຺ຕຣສຣຓຄມນໍ ທີເປຕິ. ອປເຣຕິອາທິນາ ໂລກິຍສຣຓຄມນໍ ວຸຕ຺ຕໍ. ສຣຓໍ ນາມ ຕິຓ຺ຓໍ ຣຕນານໍ ຊີວິຕປຣິຈ຺ຈາຄມຍໍ ປຸຎ຺ຎໍ ສພ຺ພສມ຺ປຕ຺ຕິໍ ເທຕິ, ຕສ຺ມາ ມຫປ຺ຜລຕຣນ຺ຕິ ອຘິປ຺ປາໂຍ. ອິທຎ຺ຈ – ‘‘ສເຈ ຕ຺ວໍ ຍຖາ ຄຫິຕໍ ສຣຓໍ ນ ຠິນ຺ທິສ຺ສສິ, ເອວາຫໍ ຕໍ ມາເຣມີ’’ຕິ ຍທິປິ ໂກຈິ ຕິຓ຺ເຫນ ສຕ຺ເຖນ ຊີວິຕາ ໂວໂຣເປຍ຺ຍ, ຕຖາປິ ‘‘ເນວາຫໍ ພຸທ຺ຘໍ ນ ພຸທ຺ໂຘຕິ, ຘມ຺ມໍ ນ ຘມ຺ໂມຕິ, ສງ຺ຆໍ ນ ສງ຺ໂຆຕິ ວທາມີ’’ຕິ ທຬ຺ຫຕຣໍ ກຕ຺ວາ ຄຫິຕສ຺ສ ວເສນ ວຸຕ຺ຕໍ. ມຄ຺ເຄນາຄຕນ຺ຕິ ໂລກຸຕ຺ຕຣສີລໍ ສນ຺ຘາຍ ວທຕິ. ອປເຣຕິອາທິນາ ປນ ໂລກິຍສີລໍ ວຸຕ຺ຕໍ. ສພ຺ເພສໍ ສຕ຺ຕານໍ ຊີວິຕທານາທິນິຫິຕທຓ຺ຑຕາຍ ສກລໂລກິຍໂລກຸຕ຺ຕຣຄຸຓາຘິຏ຺ຐານໂຕ ຈສ຺ສ ມຫປ຺ຜລມຫານິສໍສຕາ ເວທິຕພ຺ພາ.

ອຸປສິງ຺ຆນມຕ຺ຕນ຺ຕິ ຆາຍນມຕ຺ຕໍ. ຄທ຺ໂທຫນມຕ຺ຕນ຺ຕິ ປາຐນ຺ຕເຣ ໂຄໂທຫນມຕ຺ຕໍ ກາລນ຺ຕິ ອຕ຺ໂຖ. ໂສ ຈ ນ ສກໂລ ໂຄໂທຫນກ຺ຂໂຓ ອຘິປ຺ເປໂຕຕິ ທສ຺ເສຕຸໍ ‘‘ຄາວິຍາ ເອກວາຣໍ ຖນອຎ຺ຉນມຕ຺ຕ’’ນ຺ຕິ ອຕ຺ໂຖ ວຸຕ຺ໂຕ. ອຎ຺ຉນມຕ຺ຕນ຺ຕິ ອາກຑ຺ຒນມຕ຺ຕໍ. ຄາວິຍາ ຖນໍ ຄເຫຕ຺ວາ ເອກຂີຣພິນ຺ທຸທຸຫນກາລມຕ຺ຕມ຺ປິ ຄທ຺ທຸຫນມຕ຺ຕນ຺ຕິ ວທນ຺ຕິ. ເອຕ຺ຕກມ຺ປິ ຫິ ກາລໍ ໂຍ ວສນຄພ຺ຠປຣິເວຓວິຫາຣູປຈາຣປຣິຈ຺ເຉເທນ ວາ ອປຣິມາຓາສຸ ໂລກຘາຕູສຸ ສພ຺ພສຕ຺ເຕ ຫິຕຜຣຓໍ ເມຕ຺ຕຈິຕ຺ຕໍ ຠາເວຕຸໍ ສກ຺ໂກຕິ. ອິທໍ ຕໂຕ ຍຖາວຸຕ຺ຕທານາທິໂຕ ມຫປ຺ຜລຕຣໍ.

ເວລາມສຸຕ຺ຕວຓ຺ຓນາ ນິຏ຺ຐິຕາ.

ສີຫນາທວຄ຺ຄວຓ຺ຓນາ ນິຏ຺ຐິຕາ.