໘-໙. ອຄ຺ຄິກ຺ຂນ຺ໂຘປມສຸຕ຺ຕາທິວຓ຺ຓນາ

໗໒-໗໓. ອຏ຺ຐເມ ປສ຺ສຖ ນູຕິ ອປິ ປສ຺ສຖ. ມຫນ຺ຕນ຺ຕິ ວິປຸລໍ. ອຄ຺ຄິກ຺ຂນ຺ຘນ຺ຕິ ອຄ຺ຄິສມູຫໍ. ອາທິຕ຺ຕນ຺ຕິ ປທິຕ຺ຕໍ. ສມ຺ປຊ຺ຊລິຕນ຺ຕິ ສມນ຺ຕໂຕ ປຊ຺ຊລິຕໍ ອຈ຺ຈິວິປ຺ຜຸລິງ຺ຄານິ ມຸຎ຺ຈນ຺ຕໍ. ສໂຊຕິຠູຕນ຺ຕິ ສມນ຺ຕໂຕ ອຸຏ຺ຐິຕາຫິ ຊາລາຫິ ເອກປ຺ປຠາສມຸທຍຠູຕໍ. ຕໍ ກິໍ ມຎ຺ຎຖາຕິ ຕໍ ອິທານິ ມຍາ ວຸຈ຺ຈມານຕ຺ຖໍ ກິໍ ມຎ຺ຎຖາຕິ ອນຸມຕິຄ຺ຄຫຓຕ຺ຖໍ ປຸຈ຺ຉຕິ. ຍເທຕ຺ຖ ສຕ຺ຖາ ອຄ຺ຄິກ຺ຂນ຺ຘາລິງ຺ຄນໍ ກຎ຺ຎາລິງ຺ຄນຎ຺ຈ ອາເນສິ, ຕມຕ຺ຖໍ ວິຠາເວຕຸໍ ‘‘ອາໂຣຈຍາມີ’’ຕິອາທິມາຫ.

ທຸສ຺ສີລສ຺ສາຕິ ນິສ຺ສີລສ຺ສ ສີລວິຣຫິຕສ຺ສ. ປາປຘມ຺ມສ຺ສາຕິ ທຸສ຺ສີລຕ຺ຕາ ເອວ ຫີນຊ຺ຌາສຍຕາຍ ລາມກສຠາວສ຺ສ. ອສຸຈິສງ຺ກສ຺ສຣສມາຈາຣສ຺ສາຕິ ອປຣິສຸທ຺ຘຕາຍ ອສຸຈິ ຫຸຕ຺ວາ ສງ຺ກາຍ ສຣິຕພ຺ພສມາຈາຣສ຺ສ. ທຸສ຺ສີໂລ ຫິ ກິຎ຺ຈິເທວ ອສາຣຸປ຺ປໍ ທິສ຺ວາ ‘‘ອິທໍ ອສຸເກນ ກຕໍ ຠວິສ຺ສຕີ’’ຕິ ປເຣສໍ ອາສງ຺ກາ ໂຫຕິ. ເກນຈິເທວ ກຣຓີເຍນ ມນ຺ຕຍນ຺ເຕ ຠິກ຺ຂູ ທິສ຺ວາ ‘‘ກຈ຺ຈິ ນຸ ໂຂ ອິເມ ມຍາ ກຕກມ຺ມໍ ຊານິຕ຺ວາ ມນ຺ເຕນ຺ຕີ’’ຕິ ອຕ຺ຕໂນເຍວ ສງ຺ກາຍ ສຣິຕພ຺ພສມາຈາໂຣ. ປຏິຈ຺ຉນ຺ນກມ຺ມນ຺ຕສ຺ສາຕິ ລຊ຺ຊິຕພ຺ພຕາຍ ປຏິຈ຺ຉາເທຕພ຺ພກມ຺ມນ຺ຕສ຺ສ. ອສ຺ສມຓສ຺ສາຕິ ນ ສມຓສ຺ສ. ສລາກຄ຺ຄຫຓາທີສຸ ‘‘ອຫມ຺ປິ ສມໂຓ’’ຕິ ມິຈ຺ຉາປຏິຎ຺ຎາຍ ສມຓປຏິຎ຺ຎສ຺ສ. ອເສຏ຺ຐຈາຣິຕາຍ ອພ຺ຣຫ຺ມຈາຣິສ຺ສ. ອຸໂປສຖາທີສຸ ‘‘ອຫມ຺ປິ ພ຺ຣຫ຺ມຈາຣີ’’ຕິ ມິຈ຺ຉາປຏິຎ຺ຎາຍ ພ຺ຣຫ຺ມຈາຣິປຏິຎ຺ຎສ຺ສ. ປູຕິນາ ກມ຺ເມນ ສີລວິປຕ຺ຕິຍາ ອນ຺ໂຕ ອນຸປວິຏ຺ຐຕ຺ຕາ ອນ຺ໂຕປູຕິກສ຺ສ. ຉທ຺ວາເຣຫິ ຣາຄາທິກິເລສານຸສ຺ສວເນນ ຕິນ຺ຕຕ຺ຕາ ອວສ຺ສຸຕສ຺ສ. ສຎ຺ຊາຕຣາຄາທິກຈວຣຕ຺ຕາ ສີລວນ຺ເຕຫິ ຉຑ຺ເຑຕພ຺ພຕ຺ຕາ ຈ ກສມ຺ພຸຊາຕສ຺ສ.

ວາລຣຊ຺ຊຸຍາຕິ ວາເລຫິ ກຕຣຊ຺ຊຸຍາ. ສາ ຫິ ຂຣຕຣາ ໂຫຕິ. ຆໍເສຍ຺ຍາຕິ ມຖນວເສນ ຆໍເສຍ຺ຍ. ເຕລໂຘຕາຍາຕິ ເຕເລນ ນິສິຕາຍ. ປຈ຺ໂຈຣສ຺ມິນ຺ຕິ ປຕິອຸຣສ຺ມິໍ, ອຠິມຸເຂ ອຸຣມຊ຺ເຌຕິ ອຘິປ຺ປາໂຍ. ອໂຍສງ຺ກຸນາຕິ ສຓ຺ຑາເສນ. ເຜຓຸທ຺ເທຫກນ຺ຕິ ເຜຓໍ ອຸທ຺ເທເຫຕ຺ວາ ອຸທ຺ເທເຫຕ຺ວາ, ອເນກວາຣໍ ເຜຓໍ ອຸຏ຺ຐາເປຕ຺ວາຕິ ອຕ຺ໂຖ. ເອວເມຕ຺ຖ ສງ຺ເຂປໂຕ ປາຬິວຓ຺ຓນາ ເວທິຕພ຺ພາ. ນວມໍ ອຸຕ຺ຕານເມວ.

ອຄ຺ຄິກ຺ຂນ຺ໂຘປມສຸຕ຺ຕາທິວຓ຺ຓນາ ນິຏ຺ຐິຕາ.