໑໐. ອຣກສຸຕ຺ຕວຓ຺ຓນາ

໗໔. ທສເມ ປຣິຕ຺ຕນ຺ຕິ ອິຕ຺ຕຣໍ. ເຕນາຫ ‘‘ອປ຺ປໍ ໂຖກ’’ນ຺ຕິ. ປພນ຺ຘານຸປຈ຺ເຉທສ຺ສ ປຈ຺ຈຍຠາໂວ ອິຘ ຊີວິຕສ຺ສ ຣໂສ ກິຈ຺ຈນ຺ຕິ ອຘິປ຺ເປຕນ຺ຕິ ອາຫ ‘‘ສຣສປຣິຕ຺ຕຕາຍປີ’’ຕິ. ຕທຘີນວຸຕ຺ຕິຕາຍປິ ຫິ ‘‘ໂຍ, ຠິກ຺ຂເວ, ຈິຣໍ ຊີວຕິ, ໂສ ວສ຺ສສຕໍ ອປ຺ປໍ ວາ ຠິຍ຺ໂຍ’’ຕິ ວຈນໂຕ ປຣິຕ຺ຕໍ ຂຓປຣິຕ຺ຕຕາຍປິ. ປຣມຕ຺ຖໂຕ ຫິ ອຕິປຣິຕ຺ໂຕ ສຕ຺ຕານໍ ຊີວິຕກ຺ຂໂຓ ເອກຈິຕ຺ຕກ຺ຂຓປ຺ປວຕ຺ຕິມຕ຺ໂຕເຍວ. ຍຖາ ນາມ ຣຖຈກ຺ກໍ ປວຕ຺ຕມານມ຺ປິ ເອເກເນວ ເນມິປ຺ປເທເສນ ປວຕ຺ຕຕິ, ຕິຏ຺ຐມານມ຺ປິ ເອເກເນວ ຕິຏ຺ຐຕິ, ເອວເມວໍ ເອກຈິຕ຺ຕກ຺ຂຓິກໍ ສຕ຺ຕານໍ ຊີວິຕໍ ຕສ຺ມິໍ ຈິຕ຺ເຕ ນິຣຸທ຺ຘມຕ຺ເຕ ສຕ຺ໂຕ ນິຣຸທ຺ໂຘຕິ ວຸຈ຺ຈຕິ. ຍຖາຫ ‘‘ອຕີເຕ ຈິຕ຺ຕກ຺ຂເຓ ຊີວິຕ຺ຖ ນ ຊີວຕິ ນ ຊີວິສ຺ສຕິ. ອນາຄເຕ ຈິຕ຺ຕກ຺ຂເຓ ນ ຊີວິຕ຺ຖ ນ ຊີວຕິ ຊີວິສ຺ສຕິ. ປຈ຺ຈຸປ຺ປນ຺ເນ ຈິຕ຺ຕກ຺ຂເຓ ນ ຊີວິຕ຺ຖ ຊີວຕິ ນ ຊີວິສ຺ສຕິ.

‘‘ຊີວິຕໍ ອຕ຺ຕຠາໂວ ຈ, ສຸຂທຸກ຺ຂາ ຈ ເກວລາ;

ເອກຈິຕ຺ຕສມາຍຸຕ຺ຕາ, ລຫຸໂສ ວຕ຺ຕເຕ ຂໂຓ.

‘‘ເຍ ນິຣຸທ຺ຘາ ມຣນ຺ຕສ຺ສ, ຕິຏ຺ຐມານສ຺ສ ວາ ອິຘ;

ສພ຺ເພປິ ສທິສາ ຂນ຺ຘາ, ຄຕາ ອປ຺ປຏິສນ຺ຘິກາ.

‘‘ອນິພ຺ພຕ຺ເຕນ ນ ຊາໂຕ, ປຈ຺ຈຸປ຺ປນ຺ເນນ ຊີວຕິ;

ຈິຕ຺ຕຠງ຺ຄາ ມໂຕ ໂລໂກ, ປຎ຺ຎຕ຺ຕິ ປຣມຕ຺ຖິຍາ’’ຕິ. (ມຫານິ. ໑໐);

ລຫຸສນ຺ຕິ ລຫຸກໍ. ເຕນາຫ ‘‘ລຫຸໍ ອຸປ຺ປຊ຺ຊິຕ຺ວາ ນິຣຸຊ຺ຌນໂຕ ລຫຸສ’’ນ຺ຕິ. ປຣິຕ຺ຕໍ ລຫຸສນ຺ຕິ ອຸຠຍໍ ປເນຕໍ ອປ຺ປກສ຺ສ ເວວຈນໍ. ຍຎ຺ຫິ ອປ຺ປກໍ, ຕໍ ປຣິຕ຺ຕຎ຺ເຈວ ລຫຸກຎ຺ຈ ໂຫຕິ. ອິຘ ປນ ອາຍຸໂນ ອຘິປ຺ເປຕຕ຺ຕາ ຣສ຺ສນ຺ຕິ ວຸຕ຺ຕໍ ໂຫຕິ. ມນ຺ຕາຍນ຺ຕິ ກຣຓຕ຺ເຖ ເອຕໍ ຠຸມ຺ມວຈນນ຺ຕິ ອາຫ ‘‘ມນ຺ຕາຍ ໂພທ຺ຘພ຺ພໍ, ປຎ຺ຎາຍ ຊານິຕພ຺ພນ຺ຕິ ອຕ຺ໂຖ’’ຕິ. ມນ຺ຕາຍນ຺ຕິ ວາ ມນ຺ເຕຍ຺ຍນ຺ຕິ ວຸຕ຺ຕໍ ໂຫຕິ, ມນ຺ເຕຕພ຺ພໍ ມນ຺ຕາຍ ອຸປປຣິກ຺ຂິຕພ຺ພນ຺ຕິ ອຕ຺ໂຖ. ປຎ຺ຎາຍ ຊານິຕພ຺ພນ຺ຕິ ຊານິຕພ຺ພໍ ຊີວິຕສ຺ສ ປຣິຕ຺ຕຠາໂວ ພຫຸທຸກ຺ຂາທິຠາໂວ. ຊານິຕ຺ວາ ຈ ປນ ສພ຺ພປລິໂພເຘ ຉິນ຺ທິຕ຺ວາ ກຕ຺ຕພ຺ພໍ ກຸສລໍ, ຈຣິຕພ຺ພໍ ພ຺ຣຫ຺ມຈຣິຍໍ. ຍສ຺ມາ ອິຕ຺ຖິ ຊາຕສ຺ສ ອມຣຓໍ, ອປ຺ປໍ ວາ ຠິຍ຺ໂຍ ວສ຺ສສຕໂຕ ອຸປຣິ ອປ຺ປໍ ອຎ຺ຎໍ ວສ຺ສສຕໍ ອປ຺ປຕ຺ວາ ວີສໍ ວາ ຕິໍສໍ ວາ ຈຕ຺ຕາລີສໍ ວາ ປຓ຺ຓາສໍ ວາ ສຏ຺ຐິ ວາ ວສ຺ສານິ ຊີວຕິ, ເອວໍທີຆາຍຸໂກ ປນ ອຕິທຸລ຺ລໂຠ. ‘‘ອສຸໂກ ຫິ ເອວໍ ຈິຣໍ ຊີວຕີ’’ຕິ ຕຕ຺ຖ ຕຕ຺ຖ ຄນ຺ຕ຺ວາ ທຏ຺ຐພ຺ໂພ ໂຫຕິ. ຕຕ຺ຖ ວິສາຂາ ອຸປາສິກາ ວີສສຕໍ ຊີວຕິ, ຕຖາ ໂປກ຺ຂຣສາຕິພ຺ຣາຫ຺ມໂຓ, ພ຺ຣຫ຺ມາຍຸພ຺ຣາຫ຺ມໂຓ, ພາວຣິຍພ຺ຣາຫ຺ມໂຓ, ອານນ຺ທຕ຺ເຖໂຣ, ມຫາກສ຺ສປຕ຺ເຖໂຣຕິ. ອນຸຣຸທ຺ຘຕ຺ເຖໂຣ ປນ ວສ຺ສສຕຎ຺ເຈວ ປຓ຺ຓາສຎ຺ຈ ວສ຺ສານິ. ພາກຸລຕ຺ເຖໂຣ ວສ຺ສສຕຎ຺ເຈວ ສຏ຺ຐິ ຈ ວສ຺ສານິ, ອຍໍ ສພ຺ພທີຆາຍຸໂກ, ໂສປິ ທ຺ເວ ວສ຺ສສຕານິ ນ ຊີວິ.

ອຣກສຸຕ຺ຕວຓ຺ຓນາ ນິຏ຺ຐິຕາ.

ມຫາວຄ຺ຄວຓ຺ຓນາ ນິຏ຺ຐິຕາ.