໗. ຠາວນາສຸຕ຺ຕວຓ຺ຓນາ

໗໑. ສຕ຺ຕເມ ອຕ຺ຖສ຺ສ ອສາຘິກາ ‘‘ຠາວນໍ ອນນຸຍຸຕ຺ຕສ຺ສາ’’ຕິ ວຸຕ຺ຕຕ຺ຕາ. ສມ຺ຠາວນຕ຺ເຖຕິ ‘‘ອປິ ນາມ ເອວໍ ສິຍາ’’ຕິ ວິກປ຺ປນຕ຺ໂຖ ສມ຺ຠາວນຕ຺ໂຖ. ເອວຎ຺ຫິ ໂລເກ ສິລິຏ຺ຐວຈນໍ ໂຫຕີຕິ ເອກເມວ ສງ຺ຂໍ ອວຕ຺ວາ ອປຣາຍ ສງ຺ຂາຍ ສທ຺ຘິໍ ວຈນໍ ໂລເກ ສິລິຏ຺ຐວຈນໍ ໂຫຕິ ຍຖາ ‘‘ທ຺ເວ ວາ ຕີຓິ ວາ ອຸທກຜຸສິຕານີ’’ຕິ. ສມ຺ມາ ອຘິສຍິຕານີຕິ ປາທາທີຫິ ອຕ຺ຕນາ ເນສໍ ກິຎ຺ຈິ ອຸປຆາຕໍ ອກໂຣນ຺ຕິຍາ ພຫິວາຕາທິປຣິສ຺ສຍປຣິຫຣຓຕ຺ຖໍ ສມ຺ມເທວ ອຸປຣິ ສຍິຕານິ. ອຸປຣິອຕ຺ໂຖ ເຫຕ຺ຖ ອຘິ-ສທ຺ໂທ. ອຸຕຸໍ ຄຓ຺ຫາເປນ຺ຕິຍາຕິ ເຕສໍ ອລ຺ລສິເນຫປຣິຍາທານຕ຺ຖໍ ອຕ຺ຕໂນ ກາຍຸສ຺ມາວເສນ ອຸຕຸໍ ຄຓ຺ຫາເປນ຺ຕິຍາ. ເຕນາຫ ‘‘ອຸສ຺ມີກຕານີ’’ຕິ. ສມ຺ມາ ປຣິຠາວິຕານີຕິ ສມ຺ມເທວ ສພ຺ພໂສ ກຸກ຺ກຸຏວາສນາຍ ວາສິຕານິ. ເຕນາຫ ‘‘ກຸກ຺ກຸຏຄນ຺ຘໍ ຄາຫາປິຕານີ’’ຕິ. ເອຕ຺ຖ ຈ ສມ຺ມາປຣິເສທນໍ ກຸກ຺ກຸຏຄນ຺ຘປຣິຠາວນຎ຺ຈ ສມ຺ມາອຘິສຍນສມ຺ມາປຣິເສທນນິປ຺ຜຕ຺ຕິຍາ ອານຸຠາວນິປ຺ຜາທິຕນ຺ຕິ ທຏ຺ຐພ຺ພໍ. ສມ຺ມາອຘິສຍເນເນວ ຫິ ອິຕຣທ຺ວຍໍ ອິຊ຺ຌຕິ. ນ ຫິ ສມ຺ມາອຘິສຍນໂຕ ວິສຸໍ ສມ຺ມາປຣິເສທນສ຺ສ ສມ຺ມາປຣິຠາວນສ຺ສ ຈ ກາຣຓໍ ອຕ຺ຖິ. ເຕນ ປນ ສທ຺ຘິໍເຍວ ອິຕເຣສໍ ທ຺ວິນ຺ນມ຺ປິ ອິຊ຺ຌນໂຕ ວຸຕ຺ຕໍ.

ຕິວິຘກິຣິຍາກຣເຓນາຕິ ສມ຺ມາອຘິສຍນາທິຕິວິຘກິຣິຍາກຣເຓນາຕິ ອຕ຺ໂຖ. ກິຎ຺ຈາປິ ‘‘ເອວໍ ອໂຫ ວຕ ເມ’’ຕິອາທິນາ ນ ອິຈ຺ຉາ ອຸປ຺ປຊ຺ເຊຍ຺ຍ ກາຣຓສ຺ສ ປນ ສມ຺ປາທິຕຕ຺ຕາ, ອຖ ໂຂ ຠພ຺ພາວ ເຕ ອຠິນິພ຺ຠິຊ຺ຊິຕຸນ຺ຕິ ໂຍຊນາ. ກສ຺ມາ ຠພ຺ພາຕິ ອາຫ ‘‘ເຕ ຫິ ຍສ຺ມາ ຕາຍາ’’ຕິອາທິ. ສຍມ຺ປີຕິ ອຓ຺ຑານິ. ປຣິຓາມນ຺ຕິ ປຣິປາກໍ ພຫິນິກ຺ຂມນໂຍຄ຺ຍຕໍ. ຍຖາ ກປາລສ຺ສ ຕນຸຕາ ອາໂລກສ຺ສ ອນ຺ໂຕ ປຎ຺ຎາຍມານສ຺ສ ກາຣຓໍ, ຕຖາ ກປາລສ຺ສ ຕນຸຕາຍ ນຂສິຂາມຸຂຕຸຓ຺ຑການໍ ຂຣຕາຍ ຈ ອລ຺ລສິເນຫປຣິຍາທານໍ ກາຣຓວຈນນ຺ຕິ ທຏ຺ຐພ຺ພໍ. ຕສ຺ມາຕິ ອາໂລກສ຺ສ ອນ຺ໂຕ ປຎ຺ຎາຍມານໂຕ ສຍຎ຺ຈ ປຣິປາກຄຕຕ຺ຕາ.

ໂອປມ຺ມສມ຺ປຏິປາທນນ຺ຕິ ໂອປມ຺ມຕ຺ຖສ຺ສ ອຸປເມຍ຺ເຍນ ສມ຺ມເທວ ປຏິປາທນໍ. ຕນ຺ຕິ ໂອປມ຺ມສມ຺ປຏິປາທນໍ. ເອວນ຺ຕິ ອິທານິ ວຸຈ຺ຈມານາກາເຣນ. ອຕ຺ເຖນາຕິ ອຸປເມຍ຺ຍຕ຺ເຖນ ສໍສນ຺ເທຕ຺ວາ ສຫ ໂຍເຊຕ຺ວາ. ສມ຺ປາທເນນ ສມ຺ປຍຸຕ຺ຕຘມ຺ມວເສນ ຎາຓສ຺ສ ຕິກ຺ຂຠາໂວ ເວທິຕພ຺ໂພ. ຎາຓສ຺ສ ຫິ ສຠາວໂຕ ສຕິເນປກ຺ກໂຕ ຈ ຕິກ຺ຂຠາໂວ, ສມາຘິວເສນ ຂຣຠາໂວ, ສທ຺ຘາວເສນ ວິປ຺ປສນ຺ນຠາໂວ. ປຣິຓາມກາໂລຕິ ພລວວິປສ຺ສນາກາໂລ. ວຑ຺ຒິກາໂລຕິ ວຸຏ຺ຐານຄາມິນິວິປສ຺ສນາກາໂລ. ອນຸໂລມຏ຺ຐານິຍາ ຫິ ວິປສ຺ສນາ ຄຫິຕຄພ຺ຠາ ນາມ ຕທາ ມຄ຺ຄຄພ຺ຠສ຺ສ ຄຫິຕຕ຺ຕາ. ຕຊ຺ຊາຕິກນ຺ຕິ ຕສ຺ສ ວິປສ຺ສນານຸໂຍຄສ຺ສ ອນຸຣູປໍ. ສຕ຺ຖາປິ ອວິຊ຺ຊຓ຺ຑໂກສໍ ປຫຣຕິ, ເທສນາປິ ວິເນຍ຺ຍສນ຺ຕານຄຕໍ ອວິຊ຺ຊຓ຺ຑໂກສໍ ປຫຣຕິ, ຍຖາຐາເນ ຐາຕຸໍ ນ ເທຕິ.

ໂອລມ຺ພກສງ຺ຂາຕນ຺ຕິ ໂອລມ຺ພກສຸຕ຺ຕສງ຺ຂາຕໍ. ‘‘ປລ’’ນ຺ຕິ ຫິ ຕສ຺ສ ສຸຕ຺ຕສ຺ສ ນາມໍ. ຈາເຣຕ຺ວາ ທາຣຸໂນ ເຫຏ຺ຐາ ໂທສຊານນຕ຺ຖໍ ອຸສ຺ສາເປຕ຺ວາ. ຄຓ຺ຑໍ ຫຣຕີຕິ ປລຄຓ຺ໂຑຕິ ເອເຕນ ‘‘ປເລນ ຄຓ຺ຑຫາໂຣ ປລຄຓ຺ໂຑຕິ ປຈ຺ຉິມປເທ ອຸຕ຺ຕຣປທໂລເປນ ນິທ຺ເທໂສ’’ຕິ ທສ຺ເສຕິ. ຄຫຓຏ຺ຐາເນຕິ ຫຕ຺ເຖນ ຄເຫຕພ຺ພຏ຺ຐາເນ. ສມ຺ມເທວ ຂິປີຍນ຺ຕິ ເອເຕນ ກາຍທຸຈ຺ຈຣິຕາທີນີຕິ ສງ຺ເຂໂປ, ປພ຺ພຊ຺ຊາວ ສງ຺ເຂໂປ ປພ຺ພຊ຺ຊາສງ຺ເຂໂປ. ເຕນ ວິປສ຺ສນໍ ອນຸຍຸຎ຺ຊນ຺ຕສ຺ສ ປຸຄ຺ຄລສ຺ສ ອຊານນ຺ຕສ຺ເສວ ອາສວານໍ ປຣິກ຺ຂໂຍ ອິຘ ວິປສ຺ສນານິສໍໂສຕິ ອຘິປ຺ເປໂຕ.

ເຫມນ຺ຕິເກນ ກາຣຓຠູເຕນ, ຠຸມ຺ມຕ຺ເຖ ວາ ເອຕໍ ກຣຓວຈນໍ, ເຫມນ຺ຕິເກຕິ ອຕ຺ໂຖ. ປຏິປ຺ປສ຺ສມ຺ຠນ຺ຕີຕິ ປຏິປ຺ປສ຺ສທ຺ຘຜລານິ ໂຫນ຺ຕິ. ເຕນາຫ ‘‘ປູຕິການິ ຠວນ຺ຕີ’’ຕິ. ມຫາສມຸທ຺ໂທ ວິຍ ສາສນໍ ອຄາຘຄມ຺ຠີຣຠາວໂຕ. ນາວາ ວິຍ ໂຍຄາວຈໂຣ ມໂຫຆຸຕ຺ຕຣໂຕ. ປຣິຍາຍນໍ ວິຍາຕິ ປຣິໂຕ ອປຣາປຣໍ ຍາຍນໍ ວິຍ. ຂຊ຺ຊມານານນ຺ຕິ ຂາທນ຺ເຕນ ວິຍ ອຸທເກນ ເຂປິຍມານພນ຺ຘນານໍ. ຕນຸຠາໂວຕິ ປຣິຍຸຏ຺ຐານປວຕ຺ຕິຍາ ອສມຕ຺ຖຕາຍ ທຸພ຺ພລຠາໂວ. ວິປສ຺ສນາຎາຓປີຕິປາໂມຊ຺ເຊຫີຕິ ວິປສ຺ສນາຎາຓສມຸຏ຺ຐິເຕຫິ ປີຕິປາໂມຊ຺ເຊຫິ. ໂອກ຺ຂາຍມາເນຕິ ວິປສ຺ສນາກມ຺ມຏ຺ຐາເນ ວີຖິປ຺ປຏິປາຏິຍາ ໂອກ຺ຂາຍມາເນ, ປຏິສງ຺ຂານຸປສ຺ສນາຍ ວາ ໂອກ຺ຂາຍມາເນ. ສງ຺ຂາຣຸເປກ຺ຂາຍ ປກ຺ຂາຍມາເນ. ທຸພ຺ພລຕາ ທີປິຕາ ‘‘ອປ຺ປກສິເຣເນວ ສໍໂຍຊນານິ ປຏິປ຺ປສ຺ສມ຺ຠນ຺ຕິ, ປູຕິການິ ຠວນ຺ຕີ’’ຕິ ວຸຕ຺ຕຕ຺ຕາ.

ຠາວນາສຸຕ຺ຕວຓ຺ຓນາ ນິຏ຺ຐິຕາ.