໙. ຕຕິຍອນາຄຕຠຍສຸຕ຺ຕວຓ຺ຓນາ

໗໙. ນວເມ ປາຬິຄມ຺ຠີຣາຕິ (ສໍ. ນິ. ຏີ. ໒.໒.໒໒໙) ປາຬິວເສນ ຄມ຺ຠີຣາ ອຄາຘາ ທຸກ຺ໂຂຄາຫາ ສລ຺ລສຸຕ຺ຕສທິສາ. ສລ຺ລສຸຕ຺ຕຎ຺ຫິ (ສຸ. ນິ. ໕໗໙) ‘‘ອນິມິຕ຺ຕມນຎ຺ຎາຕ’’ນ຺ຕິອາທິນາ ປາຬິວເສນ ຄມ຺ຠີຣໍ, ນ ອຕ຺ຖຄມ຺ຠີຣໍ. ຕຖາ ຫິ ຕຕ຺ຖ ຕາ ຕາ ຄາຖາ ທຸວິຎ຺ເຎຍ຺ຍຣູປາ ຕິຏ຺ຐນ຺ຕິ. ທຸວິຎ຺ເຎຍ຺ຍຎ຺ຫິ ຎາເຓນ ທຸກ຺ໂຂຄາຫນ຺ຕິ ກຕ຺ວາ ‘‘ຄມ຺ຠີຣ’’ນ຺ຕິ ວຸຈ຺ຈຕິ. ປຸພ຺ພາປຣໍເປຕ຺ຖ ກາສຎ຺ຈິ ຄາຖານໍ ທຸວິຎ຺ເຎຍ຺ຍຕາຍ ທຸກ຺ໂຂຄາຫເມວ, ຕສ຺ມາ ປາຬິວເສນ ຄມ຺ຠີຣໍ. ອຕ຺ຖຄມ຺ຠີຣາຕິ ອຕ຺ຖວເສນ ຄມ຺ຠີຣາ ມຫາເວທລ຺ລສຸຕ຺ຕສທິສາ, ມຫາເວທລ຺ລສຸຕ຺ຕສ຺ສ (ມ. ນິ. ໑.໔໔໙ ອາທໂຍ) ອຕ຺ຖວເສນ ຄມ຺ຠີຣຕາ ປາກຏາເຍວ. ໂລກໍ ອຸຕ຺ຕຣຕີຕິ ໂລກຸຕ຺ຕໂຣ, ໂສ ອຕ຺ຖຠູໂຕ ເອເຕສໍ ອຕ຺ຖີຕິ ໂລກຸຕ຺ຕຣາ. ເຕນາຫ – ‘‘ໂລກຸຕ຺ຕຣຘມ຺ມທີປກາ’’ຕິ. ສຸຎ຺ຎຕາປຏິສໍຍຸຕ຺ຕາຕິ ສຕ຺ຕສຸຎ຺ຎຘມ຺ມປ຺ປກາສກາ. ເຕນາຫ ‘‘ຂນ຺ຘຘາຕຸອາຍຕນປຈ຺ຈຍາກາຣປ຺ປຏິສໍຍຸຕ຺ຕາ’’ຕິ. ອຸຄ຺ຄເຫຕພ຺ພໍ ປຣິຍາປຸຓິຕພ຺ພນ຺ຕິ ຈ ລິງ຺ຄວຈນວິປລ຺ລາເສນ ວຸຕ຺ຕນ຺ຕິ ອາຫ ‘‘ອຸຄ຺ຄເຫຕພ຺ເພ ເຈວ ວຬຎ຺ເຊຕພ຺ເພ ຈາ’’ຕິ. ກວິໂນ ກມ຺ມໍ ກວິຕາ. ຍສ຺ສ ປນ ຍໍ ກມ຺ມໍ, ຕໍ ເຕນ ກຕນ຺ຕິ ວຸຈ຺ຈຕີຕິ ອາຫ ‘‘ກວິຕາຕິ ກວີຫິ ກຕາ’’ຕິ. ກາເວຍ຺ຍນ຺ຕິ ກພ຺ຍໍ, ກພ຺ຍນ຺ຕິ ຈ ກວິນາ ວຸຕ຺ຕນ຺ຕິ ອຕ຺ໂຖ. ເຕນາຫ ‘‘ຕສ຺ເສວ ເວວຈນ’’ນ຺ຕິ. ຈິຕ຺ຕກ຺ຂຣາຕິ ຈິຕ຺ຣາກາຣອກ຺ຂຣາ. ອິຕຣໍ ຕສ຺ເສວ ເວວຈນໍ. ສາສນໂຕ ພຫິທ຺ຘາ ຐິຕາຕິ ນ ສາສນາວຈຣາ. ພາຫິຣກສາວເກຫີຕິ ‘‘ພຸທ຺ຘາ’’ຕິ ອປ຺ປຎ຺ຎາຕານໍ ເຍສໍ ເກສຎ຺ຈິ ສາວເກຫິ. ສຸສ຺ສູສິສ຺ສນ຺ຕີຕິ ອກ຺ຂຣຈິຕ຺ຕຕາຍ ເຈວ ສຣສມ຺ປຕ຺ຕິຍາ ຈ ອຕ຺ຕມນາ ຫຸຕ຺ວາ ສາມເຓຣທຫຣຠິກ຺ຂຸມາຕຸຄາມມຫາຄຫປຕິກາທໂຍ ‘‘ເອສ ຘມ຺ມກຖິໂກ’’ຕິ ສນ຺ນິປຕິຕ຺ວາ ໂສຕຸກາມາ ຠວິສ຺ສນ຺ຕິ.

ຕຕິຍອນາຄຕຠຍສຸຕ຺ຕວຓ຺ຓນາ ນິຏ຺ຐິຕາ.