໗-໘. ປຐມອນາຄຕຠຍສຸຕ຺ຕາທິວຓ຺ຓນາ

໗໗-໗໘. ສຕ຺ຕເມ ວິເສສສ຺ສ ປຕ຺ຕິຍາ ວິເສສສ຺ສ ປາປຸຓນຕ຺ຖໍ. ວີຣິຍນ຺ຕິ ປຘານວີຣິຍໍ. ຕໍ ປນ ຈງ຺ກມນວເສນ ກຣເຓ ‘‘ກາຍິກ’’ນ຺ຕິປິ ວຕ຺ຕພ຺ພຕໍ ລຠຕີຕິ ອາຫ – ‘‘ທຸວິຘມ຺ປີ’’ຕິ. ສຕ຺ຖກວາຕາຕິ ສນ຺ຘິພນ຺ຘນານິ ກຕ຺ຕຣິຍາ ຉິນ຺ທນ຺ຕາ ວິຍ ປວຕ຺ຕວາຕາ. ເຕນາຫ – ‘‘ສຕ຺ຖໍ ວິຍາ’’ຕິອາທິ. ກຕກມ຺ເມຫີຕິ ກຕໂຈຣກມ຺ເມຫິ. ເຕ ກິຣ ກຕກມ຺ມາ ຍໍ ເນສໍ ເທວຕໍ ອາຍາຈິຕ຺ວາ ກມ຺ມໍ ນິປ຺ຜນ຺ນໍ, ຕສ຺ສ ອຸປກາຣຕ຺ຖາຍ ມນຸສ຺ເສ ມາເຣຕ຺ວາ ຄລໂລຫິຕານິ ຄຓ຺ຫນ຺ຕິ. ເຕ ‘‘ອຎ຺ເຎສຸ ມນຸສ຺ເສສຸ ມາຣິຍມາເນສຸ ໂກລາຫລໍ ອຸປ຺ປຊ຺ຊິສ຺ສຕິ, ປພ຺ພຊິຕໍ ປຣິເຍສນ຺ໂຕ ນາມ ນຕ຺ຖີ’’ຕິ ມຎ຺ຎມານາ ຠິກ຺ຂູ ຄເຫຕ຺ວາ ມາເຣນ຺ຕິ. ຕໍ ສນ຺ຘາເຍຕໍ ວຸຕ຺ຕໍ. ອກຕກມ຺ເມຫີຕິ ອຏວິໂຕ ຄາມໍ ອາຄມນກາເລ ກມ຺ມນິປ຺ຜຕ຺ຕຕ຺ຖໍ ປຸເຣຕຣໍ ພລິກມ຺ມໍ ກາຕຸກາເມຫິ. ເຕເນວາຫ – ‘‘ໂຈຣິກໍ ກຕ຺ວາ ນິກ຺ຂນ຺ຕາ ກຕກມ຺ມາ ນາມາ’’ຕິອາທິ. ອຏ຺ຐເມ ນຕ຺ຖິ ວຕ຺ຕພ຺ພໍ.

ປຐມອນາຄຕຠຍສຸຕ຺ຕາທິວຓ຺ຓນາ ນິຏ຺ຐິຕາ.