໖. ທຸຕິຍໂຍຘາຊີວສຸຕ຺ຕວຓ຺ຓນາ

໗໖. ຉຏ຺ເຐ ຈມ຺ມນ຺ຕິ ອິມິນາ ຈມ຺ມມຍໍ ຈມ຺ມມິຕິ ສິພ຺ພິຕໍ, ອຎ຺ຎໍ ວາ ເກຏກຜລກາທິໍ ສງ຺ຄຓ຺ຫາຕິ. ຘນຸກລາປໍ ສນ຺ນຍ຺ຫິຕ຺ວາຕິ ຘນຸຎ຺ເຈວ ຕູຓິຣຎ຺ຈ ສນ຺ນຍ຺ຫິຕ຺ວາ ສຊ຺ເຊຕ຺ວາ. ຘນຸທຓ຺ຑສ຺ສ ຊິຍາຍຕ຺ຕຠາວກຣຓາທິປິ ຫິ ຘນຸໂນ ສນ຺ນຍ຺ຫນໍ. ເຕເນວາຫ ‘‘ຘນຸຎ຺ຈ ສຣກລາປຎ຺ຈ ສນ຺ນຍ຺ຫິຕ຺ວາ’’ຕິ. ຍຸທ຺ຘສນ຺ນິເວເສນ ຐິຕນ຺ຕິ ທ຺ວິນ຺ນໍ ເສນານໍ ພ຺ຍູຫນສໍວິຘານນເຍນ ກໂຕ ໂຍ ສນ຺ນິເວໂສ, ຕສ຺ສ ວເສນ ຐິຕໍ, ເສນາພ຺ຍູຫສໍວິຘານວເສນ ສນ຺ນິວິຏ຺ຐນ຺ຕິ ວຸຕ຺ຕໍ ໂຫຕິ. ອຸສ຺ສາຫຎ຺ຈ ວາຍາມຎ຺ຈ ກໂຣຕີຕິ ຍຸຊ຺ຌນວເສນ ອຸສ຺ສາຫໍ ວາຍາມຎ຺ຈ ກໂຣຕິ. ປຣິຍາປາເທນ຺ຕີຕິ ມຣຓປຣິຍນ຺ຕິກໍ ອປຣໍ ປາເປນ຺ຕິ. ເຕນາຫ ‘‘ປຣິຍາປາທຍນ຺ຕີ’’ຕິ, ຊີວິຕໍ ປຣິຍາປາທຍນ຺ຕິ ມຣຓໍ ປຏິປຊ຺ຊາເປນ຺ຕີຕິ ວຸຕ຺ຕໍ ໂຫຕິ.

ອຣກ຺ຂິເຕເນວ ກາເຍນາຕິອາທີສຸ ຫຕ຺ຖປາເທ ກີຬາເປນ຺ໂຕ ຄີວໍ ວິປຣິວຕ຺ເຕນ຺ໂຕ ກາຍໍ ນ ຣກ຺ຂຕິ ນາມ. ນານປ຺ປກາຣໍ ທຸຏ຺ຐຸລ຺ລໍ ກໂຣນ຺ໂຕ ວາຈໍ ນ ຣກ຺ຂຕິ ນາມ. ກາມວິຕກ຺ກາທໂຍ ວິຕກ຺ເກນ຺ໂຕ ຈິຕ຺ຕໍ ນ ຣກ຺ຂຕິ ນາມ. ອນຸປຏ຺ຐິຕາຍ ສຕິຍາຕິ ກາຍຄຕາຍ ສຕິຍາ ອນຸປຏ຺ຐິຕາຍ. ຣາເຄນ ອນຸຄໂຕຕິ ຣາເຄນ ອນຸປຫໂຕ. ຣາຄປເຣໂຕຕິ ວາ ຣາເຄນ ຜຸຏ຺ໂຐ ຜຸຏ຺ຐວິເສນ ວິຍ ສປ຺ເປນ.

ອນຸທຫນຏ຺ເຐນາຕິ ອນຸປາຍປ຺ປຏິປຕ຺ຕິຍາ. ສມ຺ປຕິ ອາຍຕິຎ຺ຈ ມຫາຠິຕາປຏ຺ເຐນ. ອນວຕ຺ຖິຕສຠາວຕາຍ ອິຕ຺ຕຣປຈ຺ຈຸປຏ຺ຐານຏ຺ເຐນ. ມຸຫຸຕ຺ຕຣມຓີຍຕາຍ ຕາວກາລິກຏ຺ເຐນ. ພ຺ຍຕ຺ເຕຫິ ອຠິຠວນີຍຕາຍ ສພ຺ພງ຺ຄປຈ຺ຈງ຺ຄປລິຠຎ຺ຊນຏ຺ເຐນ. ເຉທນເຠທນາທິອຘິກຣຓຠາເວນ ອຸຄ຺ຆຏ຺ຏນສທິສຕາຍ ອຘິກຸຏ຺ຏນຏ຺ເຐນ. ອວເຓ ວຓໍ ອຸປ຺ປາເທຕ຺ວາ ອນ຺ໂຕ ອນຸປວິສນສຠາວຕາຍ ວິນິວິຊ຺ຌນຏ຺ເຐນ. ທິຏ຺ຐຘມ຺ມິກສມ຺ປຣາຍິກ ອນຕ຺ຖນິມິຕ຺ຕຕາຍ ສາສງ຺ກສປ຺ປຏິຠຍຏ຺ເຐນ.

ທຸຕິຍໂຍຘາຊີວສຸຕ຺ຕວຓ຺ຓນາ ນິຏ຺ຐິຕາ.