໑໐. ນາຄິຕສຸຕ຺ຕວຓ຺ຓນາ

໓໐. ທສເມ ອຸຈ຺ຈາສທ຺ທມຫາສທ຺ທາຕິ ອຸທ຺ຘໍ ອຸຄ຺ຄຕຕ຺ຕາ ອຸຈ຺ໂຈ ປຕ຺ຖໂຏ ມຫນ຺ໂຕ ວິນິພ຺ຠິຊ຺ຊິຕ຺ວາ ຄເຫຕຸໍ ອສກ຺ກຸເຓຍ຺ໂຍ ສທ຺ໂທ ເອເຕສນ຺ຕິ ອຸຈ຺ຈາສທ຺ທມຫາສທ຺ທາ. ວຈີໂຆໂສປິ ຫິ ພຫູຫິ ເອກຊ຺ຌໍ ປວຕ຺ຕິໂຕ ອຕ຺ຖໂຕ ສທ຺ທໂຕ ຈ ທຸຣວໂພໂຘ ເກວລໍ ມຫານິຄ຺ໂຆໂສ ເອວ ຫຸຕ຺ວາ ໂສຕປຖມາຄຈ຺ຉຕິ. ມຈ຺ຉວິໂລເປຕິ ມຈ຺ຉານໍ ວິລຸມ຺ປິຕ຺ວາ ວິຍ ຄຫເຓ, ມຈ຺ຉານໍ ວາ ວິລຸມ຺ປເນ. ເກວຏ຺ຏານຎ຺ຫິ ມຈ຺ຉປຈ຺ຉິຐປິຕຏ຺ຐາເນ ມຫາຊໂນ ສນ຺ນິປຕິຕ຺ວາ ‘‘ອິຘ ອຎ຺ຎໍ ເອກໍ ມຈ຺ຉໍ ເທຫິ, ເອກໍ ມຈ຺ຉຜາລໍ ເທຫີ’’ຕິ, ‘‘ເອຕສ຺ສ ເຕ ມຫາ ທິນ຺ໂນ, ມຍ຺ຫໍ ຂຸທ຺ທໂກ’’ຕິ ເອວໍ ອຸຈ຺ຈາສທ຺ທໍ ມຫາສທ຺ທໍ ກໂຣນ຺ຕິ. ມຈ຺ຉຄ຺ຄຫຓຕ຺ຖໍ ຊາເລ ປກ຺ຂິຕ຺ເຕປິ ຕສ຺ມິໍ ຐາເນ ເກວຏ຺ຏາ ເຈວ ອຎ຺ເຎ ຈ ‘‘ປວິຏ຺ໂຐ ຄຫິໂຕ’’ຕິ ມຫາສທ຺ທໍ ກໂຣນ຺ຕິ. ຕໍ ສນ຺ຘາເຍຕໍ ວຸຕ຺ຕໍ. ອສຸຈິສຸຂນ຺ຕິ ກາຍາສຸຈິສນ຺ນິສ຺ສິຕຕ຺ຕາ ກິເລສາສຸຈິສນ຺ນິສ຺ສິຕຕ຺ຕາ ຈ ອສຸຈິສນ຺ນິສ຺ສິຕສຸຂໍ. ເນກ຺ຂມ຺ມສຸຂສ຺ສາຕິ ກາມໂຕ ນິກ຺ຂມນ຺ຕສ຺ສ ສຸຂສ຺ສ. ປວິເວກສຸຂສ຺ສາຕິ ຄຓສງ຺ຄຓິກໂຕ ກິເລສສງ຺ຄຓິກໂຕ ຈ ວິຄຕສ຺ສ ສຸຂສ຺ສ. ອຸປສມສຸຂສ຺ສາຕິ ຣາຄາທິວູປສມາວຫສ຺ສ ສຸຂສ຺ສ. ສມ຺ໂພຘສຸຂນ຺ຕິ ມຄ຺ຄສງ຺ຂາຕສ຺ສ ສມ຺ໂພຘສ຺ສ ນິຏ຺ຐປ຺ປຕ຺ຕຕ຺ຖາຍ ສຸຂໍ. ເສສໍ ສຸວິຎ຺ເຎຍ຺ຍເມວ.

ນາຄິຕສຸຕ຺ຕວຓ຺ຓນາ ນິຏ຺ຐິຕາ.

ປຎ຺ຈງ຺ຄິກວຄ຺ຄວຓ຺ຓນາ ນິຏ຺ຐິຕາ.