໒. ສງ຺ຄຫສຸຕ຺ຕວຓ຺ຓນາ

໓໒. ທຸຕິເຍ ຕສ຺ສ ທານເມວ ທາຕພ຺ພນ຺ຕິ ປພ຺ພຊິຕສ຺ສ ປພ຺ພຊິຕປຣິກ຺ຂາຣໍ ປຕ຺ຕຈີວຣາທິ, ຄິຫິໂນ ຄິຫິປຣິກ຺ຂາຣໍ ວຕ຺ຖາວຸຘຍານສຍນາທິ ທາຕພ຺ພໍ. ສພ຺ພນ຺ຕິ ສພ຺ພໍ ອຸປກາຣໍ. ມກ຺ເຂຕ຺ວາ ນາເສຕິ ມກ຺ຂິຠາເວ ຐຕ຺ວາ. ເຕເລນ ວິຍ ມກ຺ເຂຕີຕິ ສຕໂຘຕເຕເລນ ມກ຺ເຂຕິ ວິຍ. ອຕ຺ຖວຑ຺ຒນກຖາຕິ ຫິຕາວຫກຖາ. ກຖາຄຫຓຎ຺ເຈຕ຺ຖ ນິທສ຺ສນມຕ຺ຕໍ, ປເຣສໍ ຫິຕາວໂຫ ກາຍປ຺ປໂຍໂຄປິ ອຕ຺ຖຈຣິຍາ. ອຏ຺ຐກຖາຍໍ ປນ ວຈິປ຺ປໂຍຄວເສເນວ ອຕ຺ຖຈຣິຍາ ວຸຕ຺ຕາ. ສມານຕ຺ຕຕາຕິ ສທິສຠາໂວ, ສມານຏ຺ຐາເນ ຐປນໍ, ຕໍ ປນສ຺ສ ສມານຏ຺ຐປນໍ ອຕ຺ຕສທິສຕາກຣຓມຸເຂນ ເອກສມ຺ໂຠຄຕາ. ອຕ຺ຕໂນ ສຸຂຸປ຺ປຕ຺ຕິຍໍ ຕສ຺ສ ຈ ທຸກ຺ຂຸປ຺ປຕ຺ຕິຍໍ ເຕນ ທຸກ຺ເຂນ ອຕ຺ຕນາ ເອກສມ຺ໂຠຄຕາຕິ ອາຫ ‘‘ສມານສຸຂທຸກ຺ຂຠາໂວ’’ຕິ. ສາ ຈ ສມານສຸຂທຸກ຺ຂຕາ ເອກໂຕ ນິສຊ຺ຊາທິນາ ປາກຏາ ໂຫຕີຕິ ທສ຺ເສນ຺ໂຕ ‘‘ເອກາສເນ’’ຕິອາທິມາຫ.

ຕຕ຺ຖ ຊາຕິຍາ ຫີໂນ ໂຠເຄນ ອຘິໂກ ທຸສ຺ສງ຺ຄໂຫ ໂຫຕິ. ນ ຫິ ສກ຺ກາ ເຕນ ສທ຺ຘິໍ ເອກປຣິໂຠໂຄ ກາຕຸໍ ຊາຕິຍາ ຫີນຕ຺ຕາ. ຕສ຺ສ ຕຖາ ອກຣິຍມາເນ ຈ ໂສ ກຸຊ຺ຌຕິ ໂຠເຄນ ອຘິກຕ຺ຕາ, ຕສ຺ມາ ໂສ ທຸສ຺ສງ຺ຄໂຫ. ໂຠເຄນ ຫີໂນ ຊາຕິຍາ ອຘິໂກປິ ທຸສ຺ສງ຺ຄໂຫ ໂຫຕິ. ໂສ ຫິ ‘‘ອຫໍ ຊາຕິມາ’’ຕິ ໂຠຄສມ຺ປນ຺ເນນ ສທ຺ຘິ ເອກປຣິໂຠຄໍ ອິຈ຺ຉຕິ, ຕສ຺ມິໍ ອກຣິຍມາເນ ກຸຊ຺ຌຕິ. ອຸໂຠຫິປິ ຫີໂນ ສຸສງ຺ຄໂຫ ໂຫຕິ. ນ ຫິ ໂສ ອິຕເຣນ ສທ຺ຘິໍ ເອກປຣິໂຠຄໍ ອິຈ຺ຉຕິ ຊາຕິຍາ ຫີນຠາວໂຕ, ນ ອກຣິຍມາໂນ ກຸຊ຺ຌຕິ ໂຠເຄນ ຫີນຠາວໂຕ. ອຸໂຠຫິ ສທິໂສປິ ສຸສງ຺ຄໂຫເຍວ. ສທິສຠາເວເນວ ອິຕເຣນ ສຫ ເອກປຣິໂຠຄສ຺ສ ປຈ຺ຈາສີສາຍ, ອກຣເຓ ຈ ຕສ຺ສ ກຸຊ຺ຌນສ຺ສ ອຠາວໂຕ. ຠິກ຺ຂຸ ທຸສ຺ສີໂລ ທຸສ຺ສງ຺ຄໂຫ ໂຫຕິ. ນ ຫິ ສກ຺ກາ ເຕນ ສທ຺ຘິໍ ເອກປຣິໂຠຄໍ ກາຕຸໍ, ອກຣິຍມາເນ ຈ ກຸຊ຺ຌຕິ. ສີລວາ ປນ ສຸສງ຺ຄໂຫ ໂຫຕິ. ສີລວາ ຫິ ອທີຍມາເນປິ ກິສ຺ມິຎ຺ຈິ ອາມິເສ ອກຣິຍມາເນປິ ສງ຺ຄເຫ ນ ກຸຊ຺ຌຕິ, ອຎ຺ຎໍ ອຕ຺ຕນາ ສທ຺ຘິໍ ປຣິໂຠຄໍ ອກໂຣນ຺ຕມ຺ປິ ນ ປາປເກນ ຈິຕ຺ເຕນ ປສ຺ສຕິ ເປສລຠາວໂຕ. ຕໂຕ ເອວ ປຣິໂຠໂຄປິ ອເນນ ສທ຺ຘິໍ ສຸກໂຣ ໂຫຕິ, ຕສ຺ມາ ຄິຫິ ເຈ, ອຸໂຠຫິ ສທິໂສ. ປພ຺ພຊິໂຕ ເຈ, ສີລວາ ປຸຄ຺ຄໂລ. ເອວໍ ສມານຕ຺ຕຕາຍ ສງ຺ຄເຫຕພ຺ໂພ. ເຕເນວາຫ ‘‘ໂສ ສເຈ ຄຫຏ຺ຐສ຺ສ ຊາຕິຍາ ປພ຺ພຊິຕສ຺ສ ສີເລນ ສທິໂສ ໂຫຕິ, ຕສ຺ສາຍໍ ສມານຕ຺ຕຕາ ກາຕພ຺ພາ’’ຕິ. ເສສໍ ສຸວິຎ຺ເຎຍ຺ຍເມວ.

ສງ຺ຄຫສຸຕ຺ຕວຓ຺ຓນາ ນິຏ຺ຐິຕາ.