໑. ຈກ຺ກສຸຕ຺ຕວຓ຺ຓນາ

໓໑. ຈຕຸຕ຺ຖສ຺ສ ປຐເມ ຈຕ຺ຕາຣິ ຈກ຺ການີຕິ ເອຕ຺ຖ ຈກ຺ກໍ ນາມ ທາຣຸຈກ຺ກໍ, ຣຕນຈກ຺ກໍ, ຘມ຺ມຈກ຺ກໍ, ອິຣິຍາປຖຈກ຺ກໍ, ສມ຺ປຕ຺ຕິຈກ຺ກນ຺ຕິ ປຎ຺ຈວິຘໍ. ຕຕ຺ຖ ‘‘ຍໍ ປນິທໍ, ສມ຺ມ, ຣຖກາຣຈກ຺ກໍ ຉຫິ ມາເສຫິ ນິຏ຺ຐິຕໍ ຉາຣຕ຺ຕູເນຫີ’’ຕິ (ອ. ນິ. ໓.໑໕) ອິທໍ ທາຣຸຈກ຺ກໍ. ‘‘ປິຕຣາ ປວຕ຺ຕິຕໍ ຈກ຺ກໍ ອນຸວຕ຺ເຕຕີ’’ຕິ (ສໍ. ນິ. ໑.໒໑໕) ອິທໍ ຣຕນຈກ຺ກໍ. ‘‘ມຍາ ປວຕ຺ຕິຕໍ ຈກ຺ກ’’ນ຺ຕິ (ສຸ. ນິ. ໕໖໒; ພຸ. ວໍ. ໒໗.໑໗; ຊາ. ໑.໑.໑໐໔; ໑.໕.໑໐໐, ໑໐໓) ອິທໍ ຘມ຺ມຈກ຺ກໍ. ‘‘ຈຕຸຈກ຺ກໍ ນວທ຺ວາຣ’’ນ຺ຕິ (ສໍ. ນິ. ໑.໒໙, ໑໐໙) ອິທໍ ອິຣິຍາປຖຈກ຺ກໍ. ‘‘ຈຕ຺ຕາຣິມານິ, ຠິກ຺ຂເວ, ຈກ຺ການິ ເຍຫິ ສມນ຺ນາຄຕານໍ ເທວມນຸສ຺ສານໍ ຈຕຸຈກ຺ກໍ ປວຕ຺ຕຕີ’’ຕິ (ອ. ນິ. ໔.໓໑) ອິທໍ ສມ຺ປຕ຺ຕິຈກ຺ກໍ. ອິຘາປິ ເອຕເທວ ອຘິປ຺ເປຕນ຺ຕິ ອາຫ ‘‘ຈຕ຺ຕາຣິ ສມ຺ປຕ຺ຕິຈກ຺ການິ ວຕ຺ຕນ຺ຕີ’’ຕິ. ອນຸຈ຺ຉວິເກ ເທເສຕິ ປຸຎ຺ຎກິຣິຍາຍ ສມ຺ມາປຏິປຕ຺ຕິຍາ ອນຸຣູປເທເສ. ເສວນໍ ກາເລນ ກາລໍ ອຸປສງ຺ກມນໍ. ຠຊນໍ ຠຕ຺ຕິວເສນ ປຍິຣຸປາສນໍ. ອຕ຺ຕໂນ ສມ຺ມາ ຐປນນ຺ຕິ ອຕ຺ຕໂນ ຈິຕ຺ຕສນ຺ຕານສ຺ສ ໂຍນິໂສ ຐປນໍ. ສທ຺ຘາທີສຸ ນິເວສນນ຺ຕິ ອາຫ ‘‘ສເຈ’’ຕິອາທິ. ອິທເມວ ເຈຕ຺ຖ ປມາຓນ຺ຕິ ອິທເມວ ປຸພ຺ເພກຕປຸຎ຺ຎຕາສງ຺ຂາຕໍ ສມ຺ປຕ຺ຕິຈກ຺ກໍ ເອວ ເອເຕສຸ ສມ຺ປຕ຺ຕິຈກ຺ເກສຸ ປມາຓຠູຕໍ ອິຕເຣສໍ ກາຣຓຠາວໂຕ. ເຕນາຫ ‘‘ເຍນ ຫີ’’ຕິອາທິ. ໂສ ເອວ ຈ ກຕປຸຎ຺ໂຎ ປຸຄ຺ຄໂລ ອຕ຺ຕານໍ ສມ຺ມາ ຐເປຕິ ອກຕປຸຎ຺ຎສ຺ສ ຕທຠາວໂຕ.

ຈກ຺ກສຸຕ຺ຕວຓ຺ຓນາ ນິຏ຺ຐິຕາ.