໙. ຘມ຺ມປທສຸຕ຺ຕວຓ຺ຓນາ

໒໙. ນວເມ ຌານາທິເຠໂທ ຘມ຺ໂມ ປຊ຺ຊຕິ ເອເຕນາຕິ ຘມ຺ມປທໍ, ອນຠິຊ຺ຌາວ ຘມ຺ມປທໍ ອນຠິຊ຺ຌາຘມ຺ມປທໍ, ອນຠິຊ຺ຌາປຘາໂນ ວາ ຘມ຺ມໂກຏ຺ຐາໂສ ອນຠິຊ຺ຌາຘມ຺ມປທໍ. ເອວໍ ເສເສສຸປິ. ອຕ຺ຖໂຕ ປນ ອນຠິຊ຺ຌາຘມ຺ມປທໍ ນາມ ອໂລໂຠ ວາ ອໂລຠສີເສນ ອຘິຄຕຊ຺ຌານວິປສ຺ສນາມຄ຺ຄຜລນິພ຺ພານານິ ວາ. ອພ຺ຍາປາໂທ ຘມ຺ມປທໍ ນາມ ເມຕ຺ຕາ ວາ ເມຕ຺ຕາສີເສນ ອຘິຄຕຊ຺ຌານາທີນິ ວາ. ສມ຺ມາສຕິຘມ຺ມປທໍ ນາມ ສູປຏ຺ຐິຕສ຺ສຕິ ວາ ສຕິສີເສນ ອຘິຄຕຊ຺ຌານາທີນິ ວາ. ສມ຺ມາສມາຘິຘມ຺ມປທໍ ນາມ ອຏ຺ຐສມາປຕ຺ຕິ ວາ ອຏ຺ຐສມາປຕ຺ຕິສີເສນ ອຘິຄຕຊ຺ຌານວິປສ຺ສນາມຄ຺ຄຜລນິພ຺ພານານິ ວາ. ທສອສຸຠວເສນ ວາ ອຘິຄຕຊ຺ຌານາທີນິ ອນຠິຊ຺ຊາ ຘມ຺ມປທໍ. ຈຕຸພ຺ຣຫ຺ມວິຫາຣວເສນ ອຘິຄຕານິ ອພ຺ຍາປາໂທ ຘມ຺ມປທໍ. ທສານຸສ຺ສຕິ ອາຫາເຣປຏິກູລສຎ຺ຎາວເສນ ອຘິຄຕານິ ສມ຺ມາສຕິຘມ຺ມປທໍ. ທສກສິຓອານາປານວເສນ ອຘິຄຕານິ ສມ຺ມາສມາຘິຘມ຺ມປທໍ. ອນຠິຊ຺ຌາລູຕິ ອນຠິຊ຺ຌາຍນສີໂລ. ອຠິປຸພ຺ໂພ ເຌສທ຺ໂທ ອຠິຊ຺ຌາຍນຏ຺ໂຐ. ເຕເນວາຫ ‘‘ນິຕ຺ຕຓ຺ໂຫ ຫຸຕ຺ວາ’’ຕິ. ປກຕິຠາວໍ ອວິຊຫນ຺ເຕນາຕິ ປຣິສຸທ຺ຘຠາວໍ ສຠາວສງ຺ຂາຕອນວຊ຺ຊສງ຺ຂາຕໍ ປກຕິຠາວໍ ອວິຊຫນ຺ເຕນ. ສາວຊ຺ຊຘມ຺ມສມຸປ຺ປຕ຺ຕິຍາ ຫິ ຈິຕ຺ຕສ຺ສ ອນວຊ຺ຊຠາໂວ ຊຫິໂຕ ໂຫຕີຕິ.

ຘມ຺ມປທສຸຕ຺ຕວຓ຺ຓນາ ນິຏ຺ຐິຕາ.