໑. ໂສຕານຸຄຕສຸຕ຺ຕວຓ຺ຓນາ

໑໙໑. ປຎ຺ຈມສ຺ສ ປຐເມ ໂສຕານຸຄຕານນ຺ຕິ ປສາທໂສຕໍ ອນຸຄນ຺ຕ຺ວາ ຄຕານໍ, ປຄຸຓານໍ ວາຈຸຄ຺ຄຕານນ຺ຕິ ອຕ຺ໂຖ. ເອວໍຠູຕາ ຈ ປສາທໂສຕໍ ໂອທຫິຕ຺ວາ ຎາຓໂສເຕນ ສຸຏ຺ຐຸ ວວຕ຺ຖປິຕາ ນາມ ໂຫນ຺ຕີຕິ ອາຫ ‘‘ປສາທໂສຕ’’ນ຺ຕິອາທິ. ເອກຈ຺ຈສ຺ສ ຫິ ອຸຄ຺ຄຫິຕປຸພ຺ພວຈນໍ ຕໍ ຕໍ ປຄຸຓໍ ນິຈ຺ຉຣິຕໍ ສຸຏ຺ຐຸ ວວຕ຺ຖປິຕໍ ນ ໂຫຕິ. ‘‘ອສຸກໍ ສຸຕ຺ຕໍ ວາ ຊາຕກໍ ວາ ກເຖຫີ’’ຕິ ວຸຕ຺ເຕ ‘‘ສຊ຺ຌາຍິຕ຺ວາ ສໍສນ຺ທິຕ຺ວາ ສມນຸຄ຺ຄາຫິຕ຺ວາ ຊານິສ຺ສາມີ’’ຕິ ວທນ຺ຕິ. ເອກຈ຺ຈສ຺ສ ຕໍ ຕໍ ປຄຸຓໍ ຠວງ຺ຄໂສຕສທິສໍ ໂຫຕິ ‘‘ອສຸກໍ ສຸຕ຺ຕໍ ວາ ຊາຕກໍ ວາ ກເຖຫີ’’ຕິ ວຸຕ຺ເຕ ອຸທ຺ຘຣິຕ຺ວາ ຕເມວ ກເຖຕິ. ຕໍ ສນ຺ຘາເຍຕໍ ວຸຕ຺ຕໍ ‘‘ຎາຓໂສເຕນ ວວຕ຺ຖປິຕານ’’ນ຺ຕິ. ອິຕ຺ຖິລິງ຺ຄາທີນິ ຕີຓິ ລິງ຺ຄານິ. ນາມາທີນິ ຈຕ຺ຕາຣິ ປທານິ. ປຐມາທໂຍ ສຕ຺ຕ ວິຠຕ຺ຕິໂຍ.

ວຬຎ຺ເຊຕີຕິ ປາຬິໍ ອນຸສນ຺ຘິໍ ປຸພ຺ພາປຣວເສນ ວາຈຸຄ຺ຄຕໍ ກໂຣນ຺ໂຕ ຘາເຣຕິ. ວຈສາ ປຣິຈິຕາຕິ ສຸຕ຺ຕທສກວຄ຺ຄທສກປຓ຺ຓາສທສກວເສນ ວາຈາຍ ສຊ຺ຌາຍິຕາ, ‘‘ທສສຸຕ຺ຕານິ ຄຕານິ, ທສວຄ຺ຄານິ ຄຕານີ’’ຕິອາທິນາ ສລ຺ລກ຺ເຂຕ຺ວາ ວາຈາຍ ສຊ຺ຌາຍິຕາຕິ ອຕ຺ໂຖ. ວຄ຺ຄາທິວເສນ ຫິ ອິຘ ວຈສາ ປຣິຈໂຍ ອຘິປ຺ເປໂຕ, ນ ປນ ສຸຕ຺ເຕກເທສສ຺ສ ສຸຕ຺ຕມຕ຺ຕສ຺ສ ວຈສາ ປຣິຈໂຍ. ມນສາ ອນຸ ອນຸ ເປກ຺ຂິຕາ ຠາຄໂສ ນິຊ຺ຌາຍິຕາ ວິທິຕາ ມນຸສານຸເປກ຺ຂິຕາ. ຍສ຺ສ ວາຈາຍ ສຊ຺ຌາຍິຕໍ ພຸທ຺ຘວຈນໍ ມນສາ ຈິນ຺ເຕນ຺ຕສ຺ສ ຕຕ຺ຖ ຕຕ຺ຖ ປາກຏໍ ໂຫຕິ, ມຫາທີປໍ ຊາເລຕ຺ວາ ຐິຕສ຺ສ ຣູປຄຕໍ ວິຍ ວິຠູຕໍ ຫຸຕ຺ວາ ປຎ຺ຎາຍຕິ. ຕໍ ສນ຺ຘາເຍຕໍ ວຸຕ຺ຕໍ. ສຸປ຺ປຏິວິທ຺ຘາຕິ ນິຊ຺ຊຏໍ ນິຄ຺ຄຸມ຺ພໍ ກຕ຺ວາ ສຸຏ຺ຐຸ ຍາຖາວໂຕ ປຏິວິທ຺ຘາ. ເສສເມຕ຺ຖ ສຸວິຎ຺ເຎຍ຺ຍເມວ.

ໂສຕານຸຄຕສຸຕ຺ຕວຓ຺ຓນາ ນິຏ຺ຐິຕາ.