໑໐. ຍຸຄນທ຺ຘສຸຕ຺ຕວຓ຺ຓນາ

໑໗໐. ທສເມ ສມຖປຸພ຺ພງ຺ຄມໍ ວິປສ຺ສນໍ ຠາເວຕີຕິ ອິທໍ ສມຖຍານິກສ຺ສ ວເສນ ວຸຕ຺ຕໍ. ໂສ ຫິ ປຐມໍ ອຸປຈາຣສມາຘິໍ ວາ ອປ຺ປນາສມາຘິໍ ວາ ອຸປ຺ປາເທຕິ, ອຍໍ ສມໂຖ. ໂສ ຕຎ຺ຈ ຕໍສມ຺ປຍຸຕ຺ເຕ ຈ ຘມ຺ເມ ອນິຈ຺ຈາທີຫິ ວິປສ຺ສຕິ, ອຍໍ ວິປສ຺ສນາ, ອິຕິ ປຐມໍ ສມໂຖ, ປຈ຺ຉາ ວິປສ຺ສນາ. ເຕນ ວຸຈ຺ຈຕິ ‘‘ສມຖປຸພ຺ພງ຺ຄມໍ ວິປສ຺ສນໍ ຠາເວຕີ’’ຕິ. ວິປສ຺ສນາປຸພ຺ພງ຺ຄມໍ ສມຖໍ ຠາເວຕີຕິ ອິທໍ ປນ ວິປສ຺ສນາຍານິກສ຺ສ ວເສນ ວຸຕ຺ຕໍ. ໂສ ຕໍ ວຸຕ຺ຕປ຺ປກາຣໍ ສມຖໍ ອສມ຺ປາເທຕ຺ວາ ປຎ຺ຈຸປາທານກ຺ຂນ຺ເຘ ອນິຈ຺ຈາທີຫິ ວິປສ຺ສຕິ. ປຐໂມ ໂລກຸຕ຺ຕຣມຄ຺ໂຄ ນິພ຺ພຕ຺ຕຕີຕິ ໂສຕາປຕ຺ຕິມຄ຺ຄໍ ສນ຺ຘາຍ ວທຕິ, ໂລກິຍມຄ຺ຄວເສເນວ ວາ ອິມິສ຺ສາ ປາຬິຍາ ອຕ຺ໂຖ ເວທິຕພ຺ໂພ. ກຖໍ? ມຄ຺ໂຄ ສຎ຺ຊາຍຕິ, ປຸພ຺ພຠາຄິໂຍ ໂລກິຍມຄ຺ໂຄ ອຸປ຺ປຊ຺ຊຕິ. ອາເສວຕິ ນິພ຺ພິທານຸປສ຺ສນາວເສນ. ຠາເວຕິ ມຸຈ຺ຈິຕຸກມ຺ຍຕາວເສນ. ພຫຸລີກໂຣຕິ ປຏິສງ຺ຂານຸປສ຺ສນາວເສນ. ອາເສວຕິ ວາ ຠຍຕຸປຏ຺ຐານາທິຎາຓວເສນ. ຠາເວຕິ ມຸຈ຺ຈິຕຸກມ຺ຍຕາທິຎາຓວເສນ. ພຫຸລີກໂຣຕິ ວຸຏ຺ຐານຄາມິນິວິປສ຺ສນາວເສນ. ສໍໂຍຊນານິ ປຫີຍນ຺ຕິ. ອນຸສຍາ ພ຺ຍນ຺ຕີ ໂຫນ຺ຕີຕິ ມຄ຺ຄປ຺ປຏິປາຏິຍາ ປຫີຍນ຺ຕິ ພ຺ຍນ຺ຕີ ໂຫນ຺ຕິ.

ຘມ຺ມຸທ຺ຘຈ຺ຈວິຄ຺ຄຫິຕມານສນ຺ຕິ ໂອຠາສາທີສຸ ອຣິຍຘມ຺ໂມຕິ ປວຕ຺ຕໍ ອຸທ຺ຘຈ຺ຈໍ ວິກ຺ເຂໂປ ຘມ຺ມຸທ຺ຘຈ຺ຈໍ, ເຕນ ຘມ຺ມຸທ຺ຘຈ຺ເຈນ ວິປສ຺ສນາວີຖິໂຕ ອຸຄ຺ຄມເນນ ວິຣູປໍ ຄຫິຕໍ ປວຕ຺ຕິຍມານໍ ຘມ຺ມຸທ຺ຘຈ຺ຈວິຄ຺ຄຫິຕມານສໍ. ວຸຕ຺ຕຎ຺ເຫຕໍ –

‘‘ຘມ຺ມຸທ຺ຘຈ຺ຈວິຄ຺ຄຫິຕມານສໍ ໂຫຕິ, ອນິຈ຺ຈໂຕ ມນສິ ກໂຣຕິ, ໂອຠາໂສ ອຸປ຺ປຊ຺ຊຕິ, ໂອຠາໂສ ຘມ຺ໂມຕິ ໂອຠາສໍ ອາວຊ຺ຊຕິ, ຕໂຕ ວິກ຺ເຂໂປ ອຸທ຺ຘຈ຺ຈໍ, ເຕນ ອຸທ຺ຘຈ຺ເຈນ ວິຄ຺ຄຫິຕມານໂສ ອນິຈ຺ຈໂຕ ອຸປຏ຺ຐານໍ ຍຖາຠູຕໍ ນປ຺ປຊານາຕິ. ທຸກ຺ຂໂຕ…ເປ… ອນຕ຺ຕໂຕ ອຸປຏ຺ຐານໍ ຍຖາຠູຕໍ ນປ຺ປຊານາຕິ. ຕຖາ ອນິຈ຺ຈໂຕ ມນສິກໂຣໂຕ ຎາຓໍ ອຸປ຺ປຊ຺ຊຕິ…ເປ… ປີຕິ ປສ຺ສທ຺ຘິ ສຸຂໍ ອຘິໂມກ຺ໂຂ ປຄ຺ຄໂຫ ອຸປຏ຺ຐານໍ ອຸເປກ຺ຂາ ນິກນ຺ຕິ ອຸປ຺ປຊ຺ຊຕິ, ນິກນ຺ຕິ ຘມ຺ໂມຕິ ນິກນ຺ຕິໍ ອາວຊ຺ຊຕິ, ຕໂຕ ວິກ຺ເຂໂປ ອຸທ຺ຘຈ຺ຈໍ, ເຕນ ອຸທ຺ຘຈ຺ເຈນ ວິຄ຺ຄຫິຕມານໂສ ອນິຈ຺ຈໂຕ ອຸປຏ຺ຐານໍ ຍຖາຠູຕໍ ນປ຺ປຊານາຕິ. ທຸກ຺ຂໂຕ…ເປ… ອນຕ຺ຕໂຕ ອຸປຏ຺ຐານໍ ຍຖາຠູຕໍ ນປ຺ປຊານາຕີ’’ຕິ (ປຏິ. ມ. ໒.໖). ເສສເມຕ຺ຖ ອຸຕ຺ຕານເມວ.

ຍຸຄນທ຺ຘສຸຕ຺ຕວຓ຺ຓນາ ນິຏ຺ຐິຕາ.

ປຏິປທາວຄ຺ຄວຓ຺ຓນາ ນິຏ຺ຐິຕາ.