໒. ອູມິຠຍສຸຕ຺ຕວຓ຺ຓນາ

໑໒໒. ທຸຕິເຍ ໂກຘູປາຍາສສ຺ເສຕໍ ອຘິວຈນນ຺ຕິ ເອຕ຺ຖ ກຸຊ຺ຌນຏ຺ເຐນ ໂກໂຘ, ສ຺ເວວ ຈິຕ຺ຕສ຺ສ ກາຍສ຺ສ ຈ ອຕິປ຺ປມທ຺ທນມຖນຸປ຺ປາທເນຫິ ທຬ຺ຫອາຍາສຏ຺ເຐນ ອຸປາຍາໂສ. ອເນກວາຣໍ ປວຕ຺ຕິຕ຺ວາ ອຕ຺ຕນາ ສມເວຕໍ ສຕ຺ຕໍ ອຊ຺ໂຌຕ຺ຖຣິຕ຺ວາ ສີສໍ ອຸກ຺ຂິປິຕຸໍ ອທຕ຺ວາ ອູມິສທິສຕາ ທຏ຺ຐພ຺ພາ. ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ອູມີສຸ ໂອສີທິຕ຺ວາ ມຣຕິ, ເອວໍ ອິມສ຺ມິໍ ສາສເນ ໂກຘູປາຍາເສ ໂອສີທິຕ຺ວາ ວິພ຺ຠມຕິ, ຕສ຺ມາ ໂກຘູປາຍາໂສ ‘‘ອູມິຠຍ’’ນ຺ຕິ ວຸຕ຺ໂຕ. ໂອທຣິກຕ຺ຕສ຺ເສຕໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ກຸມ຺ຠີເລນ ຂາທິໂຕ ມຣຕິ, ເອວໍ ອິມສ຺ມິໍ ສາສເນ ໂອທຣິກຕ຺ເຕນ ໂອທຣິກຠາເວນ ອາມິສເຄເຘນ ມິຈ຺ຉາຊີເວນ ຊີວິກກປ຺ປເນນ ນາສິຕສີລາທິຄຸຓຕາຍ ຂາທິຕຘມ຺ມສຣີໂຣ ວິພ຺ຠມຕິ, ຕສ຺ມາ ໂອທຣິກຕ຺ຕໍ ‘‘ກຸມ຺ຠີລຠຍ’’ນ຺ຕິ ວຸຕ຺ຕໍ.

ອນຸປຏ຺ຐິຕາຍ ສຕິຍາຕິ ກາຍຄຕໍ ສຕິໍ ອນຸຏ຺ຐາເປຕ຺ວາ. ອສໍວຸເຕຫີຕິ ອປິຫິເຕຫິ. ປຎ຺ຈນ຺ເນຕໍ ກາມຄຸຓານໍ ອຘິວຈນນ຺ຕິ ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ອາວຏ຺ເຏ ນິມຸຊ຺ຊິຕ຺ວາ ມຣຕິ, ເອວໍ ອິມສ຺ມິໍ ສາສເນ ປພ຺ພຊິໂຕ ປຎ຺ຈກາມຄຸຓາວຏ຺ເຏ ນິມຸຊ຺ຊິຕ຺ວາ ວິພ຺ຠມຕິ. ກາມຣາຄາຠິຠູໂຕ ຫິ ສຕ຺ໂຕ ອິໂຕ ຈ ເອຕ຺ໂຕ, ເອຕ຺ໂຕ ຈ ອິໂຕຕິ ເອວໍ ມນາປິຍຣູປາທິວິສຍສງ຺ຂາເຕ ອາວຏ຺ເຏ ອຕ຺ຕານໍ ສໍສາເຣຕ຺ວາ ຍຖາ ຕໂຕ ພຫິຠູເຕ ເນກ຺ຂມ຺ເມ ຈິຕ຺ຕມ຺ປິ ນ ອຸປ຺ປາເທຕິ, ເອວໍ ອາວຏ຺ເຏຕ຺ວາ ພ຺ຍສນາປາທເນນ ກາມຄຸຓານໍ ອາວຏ຺ຏສທິສຕາ ທຏ຺ຐພ຺ພາ.

ອນຸທ຺ຘໍເສຕີຕິ ກິລເມຕິ ວິໂລລຕິ. ຣາຄານຸທ຺ຘໍສິເຕນາຕິ ຣາເຄນ ອນຸທ຺ຘໍສິເຕນ. ມາຕຸຄາມສ຺ເສຕໍ ອຘິວຈນນ຺ຕິ. ຍຖາ ຫິ ພາຫິຣໍ ອຸທກໍ ໂອຕິຓ຺ໂຓ ຈຓ຺ຑມຈ຺ຉໍ ອາຄມ຺ມ ລທ຺ຘປ຺ປຫາໂຣ ມຣຕິ, ເອວໍ ອິມສ຺ມິໍ ສາສເນ ມາຕຸຄາມໍ ອາຣພ຺ຠ ອຸປ຺ປນ຺ນກາມຣາໂຄ ວິພ຺ຠມຕິ, ຕສ຺ມາ ມາຕຸຄາໂມ ‘‘ສຸສຸກາຠຍ’’ນ຺ຕິ ວຸຕ຺ໂຕ. ມາຕຸຄາໂມ ຫິ ໂຍນິໂສມນສິກາຣຣຫິຕໍ ອຘີຣປຸຣິສໍ ອິຕ຺ຖິກຸຕ຺ຕຠູເຕຫິ ອຕ຺ຕໂນ ຫາສຠາວວິລາເສຫິ ອຠິຠຸຍ຺ຍ ຄເຫຕ຺ວາ ຘີຣຊາຕິກມ຺ປິ ອຕ຺ຕໂນ ຣູປາທີຫິ ສມ຺ປໂລຠນວເສນ ອນວເສສໍ ອຕ຺ຕໂນ ອຸປກາຣຘມ຺ເມ ສີລາທິເກ ສມ຺ປາເທຕຸໍ ອສມຕ຺ຖໍ ກໂຣນ຺ໂຕ ອນຍພ຺ຍສນໍ ປາເປຕິ.

ອິມານິ ປນ ຈຕ຺ຕາຣິ ຠຍານິ ຠາຍິຕ຺ວາ ຍຖາ ອຸທກໍ ອໂນໂຣຫນ຺ຕສ຺ສ ອຸທກໍ ນິສ຺ສາຍ ອຸທກປິປາສາວິນຍນໍ ສຣີຣສຸທ຺ຘິປຣິຬາຫູປສໂມ ກາຍອຸຕຸຄ຺ຄາຫາປນນ຺ຕິ, ເອວມາທິ ອານິສໍໂສ ນຕ຺ຖິ, ເອວເມວໍ ອິມານິ ຈຕ຺ຕາຣິ ຠຍານິ ຠາຍິຕ຺ວາ ສາສເນ ອປພ຺ພຊນ຺ຕສ຺ສປິ ອິມໍ ສາສນໍ ນິສ຺ສາຍ ສງ຺ເຂປໂຕ ວຏ຺ຏທຸກ຺ຂູປສໂມ, ວິຕ຺ຖາຣໂຕ ປນ ສີລານິສໍສາທິວເສນ ອເນກວິໂຘ ອານິສໍໂສ ນຕ຺ຖິ. ຍຖາ ປນ ອິມານິ ຈຕ຺ຕາຣິ ຠຍານິ ອຠາຍິຕ຺ວາ ອຸທກໍ ໂອໂຣຫນ຺ຕສ຺ສ ວຸຕ຺ຕປ຺ປກາໂຣ ອານິສໍໂສ ໂຫຕິ, ເອວໍ ອິມານິ ອຠາຍິຕ຺ວາ ສາສເນ ປພ຺ພຊນ຺ຕສ຺ສປິ ວຸຕ຺ຕປ຺ປກາໂຣ ອານິສໍໂສ ໂຫຕິ. ມຫາຘມ຺ມຣກ຺ຂິຕຕ຺ເຖໂຣ ປນາຫ ‘‘ຈຕ຺ຕາຣິ ຠຍານິ ຠາຍິຕ຺ວາ ອຸທກໍ ອໂນຕຣນ຺ໂຕ ໂສຕໍ ຉິນ຺ທິຕ຺ວາ ປຣຕີຣໍ ປາປຸຓິຕຸໍ ນ ສກ຺ໂກຕິ, ອຠາຍິຕ຺ວາ ໂອຕຣນ຺ໂຕ ສກ຺ໂກຕິ, ເອວເມວໍ ຠາຍິຕ຺ວາ ສາສເນ ອປພ຺ພຊນ຺ໂຕປິ ຕຓ຺ຫາໂສຕໍ ຉິນ຺ທິຕ຺ວາ ນິພ຺ພານປາຣໍ ທຏ຺ຐຸໍ ນ ສກ຺ໂກຕິ, ອຠາຍິຕ຺ວາ ປພ຺ພຊນ຺ໂຕ ສກ຺ໂກຕີ’’ຕິ.

ອູມິຠຍສຸຕ຺ຕວຓ຺ຓນາ ນິຏ຺ຐິຕາ.