໑-໒. ກຸສິນາຣສຸຕ຺ຕາທິວຓ຺ຓນາ

໑໒໔-໑໒໕. ຕຕິຍສ຺ສ ປຐເມ ຕຓ຺ຫາເຄເຘນ ຄຖິໂຕຕິ ຕຓ຺ຫາພນ຺ຘເນນ ພທ຺ໂຘ. ຕຓ຺ຫາມຸຈ຺ຉນາຍາຕິ ຕຓ຺ຫາຍ ວເສນ ມຸຈ຺ຉາປຕ຺ຕິຍາ. ມຸຈ຺ຉິໂຕຕິ ມຸຈ຺ຉໍ ໂມຫໍ ປມາທໍ ອາປນ຺ໂນ. ອຊ຺ໂຌປນ຺ໂນຕິ ອຘິໂອປນ຺ໂນ. ຕຓ຺ຫາຍ ອຘິຠວິຕ຺ວາ ອຊ຺ໂຌຕ຺ຖໂຏ ຄິລິຕ຺ວາ ປຣິນິຏ຺ຐເປຕ຺ວາ ວິຍ ຐິໂຕ. ເຕນາຫ ‘‘ອຊ຺ໂຌປນ຺ໂນຕິ ຕຓ຺ຫາຍ ຄິລິຕ຺ວາ ປຣິນິຏ຺ຐເປຕ຺ວາ ປວຕ຺ໂຕ’’ຕິ. ອນາທີນວທສ຺ສາວີຕິ ຄຖິຕາທິຠາເວນ ປຣິໂຠເຄ ອາທີນວມຕ຺ຕມ຺ປິ ນ ປສ຺ສຕິ. ນິສ຺ສຣຓປຎ຺ໂຎຕິ ອຍມຕ຺ໂຖ ອາຫາຣປຣິໂຠເຄຕິ ຕຕ຺ຖ ປໂຍຊນປຣິຈ຺ເຉທິກາ ‘‘ຍາວເທວ ອິມສ຺ສ ກາຍສ຺ສ ຐິຕິຍາ’’ຕິອາທິນາ (ມ. ນິ. ໑.໒໓; ໒.໒໔; ໓.໗໕; ສໍ. ນິ. ໔.໑໒໐; ອ. ນິ. ໖.໕໘; ໘.໙) ປວຕ຺ຕາ ອາຫາຣປຏິພທ຺ຘຉນ຺ທຣາຄນິສ຺ສຣຓຠູຕາ ປຎ຺ຎາ ອສ຺ສ ອຕ຺ຖີຕິ ນິສ຺ສຣຓປຎ຺ໂຎ. ເສສເມຕ຺ຖ ອຸຕ຺ຕານເມວ. ທຸຕິເຍ ນຕ຺ຖິ ວຕ຺ຕພ຺ພໍ.

ກຸສິນາຣສຸຕ຺ຕາທິວຓ຺ຓນາ ນິຏ຺ຐິຕາ.