໔. ປຣິສາສຸຕ຺ຕວຓ຺ຓນາ

໙໖. ຈຕຸຕ຺ເຖ ປຈ຺ຈຍພາຫຸລ຺ລິກາຕິ ຈີວຣາທິພາຫຸລ຺ລາຍ ປຏິປນ຺ນາ. ອວີຕຕຓ຺ຫຕາຍ ຫິ ຕໍ ຕໍ ປຣິກ຺ຂາຣຊາຕໍ ພຫຸໍ ລນ຺ຕິ ອາທິຍນ຺ຕີຕິ ພຫຸລາ, ເຕ ເອວ ພາຫຸລິກາ ຍຖາ ‘‘ເວນຍິໂກ’’ຕິ (ມ. ນິ. ໑.໒໔໖; ອ. ນິ. ໘.໑໑; ປາຣາ. ໘). ເຕ ປຈ຺ຈຍພາຫຸລ຺ລາຍ ຍຸຕ຺ຕປ຺ປຍຸຕ຺ຕາ ໂຫນ຺ຕີຕິ ຈີວຣາທິພາຫຸລ຺ລາຍ ປຏິປນ຺ນາ ນາມ ໂຫນ຺ຕິ. ສິກ຺ຂາຍ ອຄາຣວຠາວໂຕ ສິຖິລໍ ອຄາຬ຺ຫໍ ຄຓ຺ຫນ຺ຕີຕິ ສາຖລິກາ. ສິຖິລນ຺ຕິ ຈ ຠາວນປຸໍສກນິທ຺ເທໂສ. ສິຖິລສທ຺ເທນ ສມານຕ຺ຖສ຺ສ ສຖລສທ຺ທສ຺ສ ວເສນ ສາຖລິກາຕິ ປທສິທ຺ຘິ ເວທິຕພ຺ພາ. ອວຄມນຏ຺ເຐນາຕິ ອໂຘຄມນຏ຺ເຐນ, ໂອຣມ຺ຠາຄິຍຠາເວນາຕິ ອຕ຺ໂຖ. ນິກ຺ຂິຕ຺ຕຘຸຣາຕິ ໂອໂຣປິຕຘຸຣາ ອຸຊ຺ຊິຕຸສ຺ສາຫາ. ອຸປຘິວິເວໂກ ນິພ຺ພານໍ. ທຸວິຘມ຺ປິ ວີຣິຍນ຺ຕິ ກາຍິກໍ ເຈຕສິກຎ຺ຈ ວີຣິຍໍ.

ຠຓ຺ຑນໍ ຊາຕໍ ເອເຕສນ຺ຕິ ຠຓ຺ຑນຊາຕາ. ວິເສສນສ຺ສ ປຣນິປາຕວເສນ ເຈຕໍ ວຸຕ຺ຕໍ. ອຏ຺ຐກຖາຍໍ ປນ ວິເສສນສ຺ສ ປຸພ຺ພນິປາຕວເສເນວ ອຕ຺ຖໍ ທສ຺ເສນ຺ໂຕ ‘‘ຊາຕຠຓ຺ຑນາ’’ຕິ ອາຫ. ກລໂຫ ຊາໂຕ ເອເຕສນ຺ຕິ ກລຫຊາຕາຕິ ເອຕ຺ຖາປິ ເອເສວ ນໂຍ. ກລຫສ຺ສ ປຸພ຺ພຠາໂຄຕິ ກລຫສ຺ສ ເຫຕຸຠູຕາ ປຏິຠາຄາ ຕໍສທິສີ ຈ ອນິຏ຺ຐກິຣິຍາ. ຫຕ຺ຖປຣາມາສາທິວເສນາຕິ ກຸຊ຺ຌິຕ຺ວາ ອຎ຺ຎມຎ຺ຎສ຺ສ ຫຕ຺ເຖ ຄເຫຕ຺ວາ ປລປນອຈ຺ຉິນ຺ທນາທິວເສນ. ‘‘ອຍໍ ຘມ຺ໂມ, ນາຍໍ ຘມ຺ໂມ’’ຕິອາທິນາ ວິຣຸທ຺ຘວາທຠູຕໍ ວິວາທໍ ອາປນ຺ນາຕິ ວິວາທປນ຺ນາ. ເຕນາຫ ‘‘ວິຣຸທ຺ຘວາທໍ ອາປນ຺ນາ’’ຕິ. ມຸຂສນ຺ນິສ຺ສິຕຕາຍ ວາຈາ ອິຘ ‘‘ມຸຂ’’ນ຺ຕິ ອຘິປ຺ເປຕາຕິ ອາຫ ‘‘ຜຣຸສາ ວາຈາ ມຸຂສຕ຺ຕິໂຍ’’ຕິ.

ສຕິປິ ອຸຠເຍສໍ ກລາປານໍ ປຣມຕ຺ຖໂຕ ເຠເທ ປຈຸຣຊເນຫິ ປນ ທຸວິຎ຺ເຎຍ຺ຍນານຕ຺ຕໍ ຂີໂຣທກສມ຺ໂມທິຕໍ ອຈ຺ຈນ຺ຕເມຕໍ ສໍສຏ຺ຐໍ ວິຍ ຫຸຕ຺ວາ ຕິຏ຺ຐຕີຕິ ອາຫ ‘‘ຂີໂຣທກໍ ວິຍ ຠູຕາ’’ຕິ. ຍຖາ ຂີຣຎ຺ຈ ອຸທກຎ຺ຈ ອຎ຺ຎມຎ຺ຎໍ ສໍສນ຺ທຕິ, ວິສຸໍ ນ ໂຫຕິ, ເອກຕ຺ຕໍ ວິຍ ອຸເປຕິ, ເອວໍ ສາມຄ຺ຄິວເສນ ເອກຕ຺ຕູປຄຕຈິຕ຺ຕຸປ຺ປາທາຕິ ອຕ຺ໂຖ. ເມຕ຺ຕຈິຕ຺ຕໍ ປຈ຺ຈຸປຏ຺ຐາເປຕ຺ວາ ໂອໂລກນໍ ຈກ຺ຂູນິ ວິຍ ຈກ຺ຂູນິ ນາມາຕິ ອາຫ ‘‘ອຸປສນ຺ເຕຫິ ເມຕ຺ຕຈກ຺ຂູຫີ’’ຕິ. ປິຍຠາວທີປການິ ຫິ ຈກ຺ຂູນິ ປິຍຈກ຺ຂູນິ. ປມຸທິຕສ຺ສ ປີຕິ ຊາຍຕີຕິ ປໂມທປຈ຺ຈຍພລວປີຕິມາຫ. ປຎ຺ຈວຓ຺ຓາ ປີຕິ ອຸປ຺ປຊ຺ຊຕີຕິ ຂຸທ຺ທິກາທິເຠເທນ ປຎ຺ຈປ຺ປກາຣາ ປີຕິ ອຸປ຺ປຊ຺ຊຕິ. ປີຕິມນສ຺ສາຕິ ຕາຍ ປີຕິຍາ ປີຓິຕມນສ຺ສ, ປສ຺ສທ຺ຘິອາວເຫຫິ ອຸຬາເຣຫິ ປີຕິເວເຄຫິ ຕິນ຺ຕຈິຕ຺ຕສ຺ສາຕິ ອຕ຺ໂຖ. ວິຄຕທຣໂຖຕິ ກິເລສປຣິຬາຫານໍ ທູຣີຠາເວນ ວູປສນ຺ຕທຣໂຖ.

ເກນ ອຸທເກນ ທາຣິໂຕ ປພ຺ພຕປ຺ປເທໂສຕິ ກຕ຺ວາ ອາຫ ‘‘ກນ຺ທໂຣ ນາມາ’’ຕິອາທິ. ອຸທກສ຺ສ ຍຖານິນ຺ນໍ ປວຕ຺ຕິຍາ ນທິນິພ຺ພຕ຺ຕນຠາເວນ ‘‘ນທິກຸຎ຺ໂຊ’’ຕິປິ ວຸຈ຺ຈຕິ. ສາວຏ຺ຏາ ນທິໂຍ ປທຣາ. ອຏ຺ຐ ມາເສຕິ ເຫມນ຺ຕຄິມ຺ຫອຸຕຸວເສນ ອຏ຺ຐ ມາເສ. ຂຸທ຺ທກາ ອຸທກວາຫິນິໂຍ ສາຂາ ວິຍາຕິ ສາຂາ. ຂຸທ຺ທກໂສພ຺ຠາ ກຸສຸພ຺ຠາ ໂອກາຣສ຺ສ ອຸກາຣໍ ກຕ຺ວາ. ຍຕ຺ຖ ອຸປຣິ ອຸນ຺ນຕປ຺ປເທສໂຕ ອຸທກໍ ອາຄນ຺ຕ຺ວາ ຕິຏ຺ຐຕິ ເຈວ ສນ຺ທຕິ ຈ, ເຕ ກຸສຸພ຺ຠາ ຂຸທ຺ທກອາວາຏາ. ຂຸທ຺ທກນທິໂຍຕິ ປພ຺ພຕປາທາທິໂຕ ນິກ຺ຂນ຺ຕາ ຂຸທ຺ທກາ ນທິໂຍ.

ປຣິສາສຸຕ຺ຕວຓ຺ຓນາ ນິຏ຺ຐິຕາ.