໕-໗. ປຐມອາຊານີຍສຸຕ຺ຕາທິວຓ຺ຓນາ

໙໗-໙໙. ປຎ຺ຈເມ ອນຸຈ຺ຉວິໂກຕິ ຣຎ຺ໂຎ ປຣິຠຸຎ຺ຊນໂຍຄ຺ໂຄ. ຫຕ຺ຖປາທາທິອງ຺ຄສມຕາຍາຕິ ຫຕ຺ຖປາທາທິອວຍວສມຕາຍ, ຣຎ຺ໂຎ ວາ ເສນາຍ ອງ຺ຄຠູຕຕ຺ຕາ ຣຎ຺ໂຎ ອງ຺ຄນ຺ຕິ ວຸຈ຺ຈຕິ. ອາເນຕ຺ວາ ຫຸນິຕພ຺ພນ຺ຕິ ອາຫຸນໍ, ອາຫຸຕີຕິ ອຕ຺ຖໂຕ ເອກນ຺ຕິ ອາຫ ‘‘ອາຫຸຕິສງ຺ຂາຕໍ ປິຓ຺ຑປາຕ’’ນ຺ຕິ. ທູຣໂຕປິ ອາເນຕ຺ວາ ສີລວນ຺ເຕສຸ ທາຕພ຺ພສ຺ເສຕໍ ອຘິວຈນໍ. ປິຓ຺ຑປາຕນ຺ຕິ ຈ ນິທສ຺ສນມຕ຺ຕໍ. ອາເນຕ຺ວາ ຫຸນິຕພ຺ພານຎ຺ຫິ ຈີວຣາທີນໍ ຈຕຸນ຺ນໍ ປຈ຺ຈຍານເມຕໍ ອຘິວຈນໍ ອາຫຸນນ຺ຕິ. ຕໍ ອຣຫຕີຕິ ອາຫຸເນຍ຺ໂຍ. ປຏິຄ຺ຄເຫຕຸໍ ຍຸຕ຺ໂຕຕິ ຕສ຺ສ ມຫປ຺ຜລຠາວກຣຓໂຕ ປຏິຄ຺ຄຓ຺ຫິຕຸໍ ອນຸຈ຺ຉວິໂກ.

ປາຫຸນກຠຕ຺ຕສ຺ສາຕິ ທິສວິທິສໂຕ ອາຄຕານໍ ປິຍມນາປານໍ ຎາຕິມິຕ຺ຕານໍ ອຕ຺ຖາຍ ສກ຺ກາເຣ ປຏິຍຕ຺ຕສ຺ສ ອາຄນ຺ຕຸກຠຕ຺ຕສ຺ສ. ຕຎ຺ຫິ ຐເປຕ຺ວາ ເຕ ຕຖາຣູເປ ປາຫຸນເກ ສງ຺ຆສ຺ເສວ ທາຕຸໍ ຍຸຕ຺ຕໍ, ສງ຺ໂຆວ ຕໍ ປຏິຄ຺ຄເຫຕຸໍ ຍຸຕ຺ໂຕ. ສງ຺ຆສທິໂສ ຫິ ປາຫຸນໂກ ນຕ຺ຖິ. ຕຖາ ເຫສ ເອກສ຺ມິໍ ພຸທ຺ຘນ຺ຕເຣ ວີຕິວຕ຺ເຕ ທິສ຺ສຕິ, ກທາຈິ ອສງ຺ຂ຺ເຍຍ຺ເຍປິ ກປ຺ເປ ວີຕິວຕ຺ເຕ. ອພ຺ໂພກິຓ຺ຓຎ຺ຈ ປິຍມນາປຕາທິກເຣຫິ ຘມ຺ເມຫິ ສມນ຺ນາຄໂຕ. ເອວໍ ປາຫຸນມສ຺ສ ທາຕຸໍ ຍຸຕ຺ຕໍ, ປາຫຸນຎ຺ຈ ປຏິຄ຺ຄເຫຕຸໍ ຍຸຕ຺ໂຕຕິ ປາຫຸເນຍ຺ໂຍ. ອຍຎ຺ເຫຕ຺ຖ ອຘິປ຺ປາໂຍ ‘‘ຎາຕິມິຕ຺ຕາ ວິປ຺ປວຸຏ຺ຐາ ນ ຈິຣສ຺ເສວ ສມາຄຈ຺ຉນ຺ຕິ, ອນວຏ຺ຐິຕາ ຈ ເຕສຸ ປິຍມນາປຕາ, ນ ເອວມຣິຍສງ຺ໂຆ, ຕສ຺ມາ ສງ຺ໂຆວ ປາຫຸເນຍ຺ໂຍ’’ຕິ.

ທກ຺ຂນ຺ຕິ ເອຕາຍ ສຕ຺ຕາ ຍຖາຘິປ຺ເປຕາຫິ ສມ຺ປຕ຺ຕີຫິ ວຑ຺ຒນ຺ຕີຕິ ທກ຺ຂິຓາ, ປຣໂລກໍ ສທ຺ທຫິຕ຺ວາ ທານໍ. ຕໍ ທກ຺ຂິຓໍ ອຣຫຕິ, ທກ຺ຂິຓາຍ ວາ ຫິໂຕ ຍສ຺ມາ ມຫປ຺ຜລກຣຓຕາຍ ວິໂສເຘຕີຕິ ທກ຺ຂິເຓຍ຺ໂຍ.

ປຸຎ຺ຎຕ຺ຖິເກຫິ ອຎ຺ຊລິ ກຣຓີໂຍ ເອຕ຺ຖາຕິ ອຎ຺ຊລິກຣຓີໂຍ. ອຸໂຠ ເຫຕ຺ຖ ສິຣສິ ປຕິຏ຺ຐາເປຕ຺ວາ ສພ຺ພໂລເກນ ກຍິຣມານໍ ອຎ຺ຊລິກມ຺ມໍ ອຣຫຕີຕິ ວາ ອຎ຺ຊລິກຣຓີໂຍ. ເຕນາຫ ‘‘ອຎ຺ຊລິປຄ຺ຄຫຓສ຺ສ ອນຸຈ຺ຉວິໂກ’’ຕິ.

ຍທິປິ ປາຬິຍໍ ‘‘ອນຸຕ຺ຕຣ’’ນ຺ຕິ ວຸຕ຺ຕໍ, ນຕ຺ຖິ ອິໂຕ ອຸຕ຺ຕຣໍ ວິສິຏ຺ຐນ຺ຕິ ຫິ ອນຸຕ຺ຕຣໍ, ສມມ຺ປິສ຺ສ ປນ ນຕ຺ຖີຕິ ທສ຺ເສນ຺ໂຕ ‘‘ອສທິສ’’ນ຺ຕິ ອາຫ. ຂິຕ຺ຕໍ ວຸຕ຺ຕໍ ພີຊໍ ມຫປ຺ຜລຠາວກຣເຓນ ຕາຍຕິ ຣກ຺ຂຕິ, ຂິປນ຺ຕິ ວປນ຺ຕິ ເອຕ຺ຖ ພີຊານີຕິ ວາ ເຂຕ຺ຕໍ, ເກທາຣາທິ, ເຂຕ຺ຕໍ ວິຍ ເຂຕ຺ຕໍ, ປຸຎ຺ຎານໍ ເຂຕ຺ຕໍ ປຸຎ຺ຎກ຺ເຂຕ຺ຕໍ. ຍຖາ ຫິ ຣຎ຺ໂຎ ວາ ອມຈ຺ຈສ຺ສ ວາ ສາລີນໍ ວາ ຍວານໍ ວາ ວິຣຸຫນຏ຺ຐານໍ ‘‘ຣຎ຺ໂຎ ສາລິກ຺ເຂຕໍ ຍວກ຺ເຂຕ’’ນ຺ຕິ ວຸຈ຺ຈຕິ, ເອວໍ ສງ຺ໂຆ ສພ຺ພໂລກສ຺ສ ປຸຎ຺ຎານໍ ວິຣຸຫນຏ຺ຐານໍ. ສງ຺ຆໍ ນິສ຺ສາຍ ຫິ ໂລກສ຺ສ ນານປ຺ປກາຣຫິຕສຸຂສໍວຕ຺ຕນິການິ ປຸຎ຺ຎານິ ວິຣຸຫນ຺ຕິ, ຕສ຺ມາ ສງ຺ໂຆ ອນຸຕ຺ຕຣໍ ປຸຎ຺ຎກ຺ເຂຕ຺ຕໍ ໂລກສ຺ສ. ເສສໍ ສຸວິຎ຺ເຎຍ຺ຍເມວ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

ປຐມອາຊານີຍສຸຕ຺ຕາທິວຓ຺ຓນາ ນິຏ຺ຐິຕາ.