໑໑. ສງ຺ກວາສຸຕ຺ຕວຓ຺ຓນາ

໙໒. ເອກາທສເມ ວິຫາຣປຏິພທ຺ຘນວກມ຺ມາທິຠາຣໍ ຫຣຕິ ປວຕ຺ເຕຕີຕິ ຠາຣຫາໂຣ. ເຕເນວາຫ ‘‘ນເວ ອາວາເສ ສມຸຏ຺ຐາເປຕິ, ປຸຣາເຓ ປຏິຊຄ຺ຄຕີ’’ຕິ. ສິກ຺ຂິຕພ຺ພໂຕ ສິກ຺ຂາ, ປຊ຺ຊິຕພ຺ພໂຕ, ປຊ຺ຊນ຺ຕິ ເອເຕຫີຕິ ວາ ປທານິ, ສິກ຺ຂາເຍວ ປທານິ ສິກ຺ຂາປທານີຕິ ອາຫ ‘‘ສິກ຺ຂາສງ຺ຂາເຕຫິ ປເທຫີ’’ຕິ. ທສ຺ເສຕີຕິ ປຈ຺ຈກ຺ຂໂຕ ທສ຺ເສຕິ, ຫຕ຺ຖາມລກໍ ວິຍ ປາກເຏ ວິຠູເຕ ກຕ຺ວາ ວິຠາເວຕິ. ຄຓ຺ຫາເປຕີຕິ ເຕ ຘມ຺ເມ ມນສາ ອນຸປກ຺ຂິເຕ ທິຏ຺ຐິຍາ ສຸປ຺ປຏິວິທ຺ເຘ ກາເຣນ຺ໂຕ ອຸຄ຺ຄຓ຺ຫາເປຕິ. ສມຸສ຺ສາເຫຕີຕິ ສມາຘິມ຺ຫິ ອຸສ຺ສາຫໍ ຊເນຕິ. ປຏິລທ຺ຘຄຸເຓຫີຕິ ຕາຍ ເທສນາຍ ຕນ຺ນິສ຺ສຍປຈ຺ຈຕ຺ຕປຸຣິສກາເຣນ ຈ ເຕສໍ ປຏິວິທ຺ຘຄຸເຓຫິ. ໂວທາເປຕີຕິ ເຕສໍ ຈິຕ຺ຕສນ຺ຕານໍ ອສ຺ສທ຺ຘິຍາທິກິເລສມລາປຄມເນນ ປຠສ຺ສຣໍ ກໂຣຕິ. ສຓ຺ຫໍ ສຓ຺ຫໍ ກເຖຕີຕິ ອຕິວິຍ ສຸຂຸມໍ ກຕ຺ວາ ກເຖຕິ.

ອຈ຺ຈຍນໍ ສາຘຸມຣິຍາທໍ ມທ຺ທິຕ຺ວາ ວີຕິກ຺ກມນໍ ອຈ຺ຈໂຍຕິ ອາຫ ‘‘ອປຣາໂຘ’’ຕິ. ອຈ຺ເຈຕິ ອຕິກ຺ກມຕິ ເອເຕນາຕິ ວາ ອຈ຺ຈໂຍ, ວີຕິກ຺ກມສ຺ສ ປວຕ຺ຕນໂກ ອກຸສລຘມ຺ໂມ. ໂສ ເອວ ອປຣຊ຺ຌຕິ ເອເຕນາຕິ ອປຣາໂຘ. ໂສ ຫິ ອປຣຊ຺ຌນ຺ຕໍ ປຸຣິສໍ ອຘິຠວິຕ຺ວາ ປວຕ຺ຕຕິ. ເຕນາຫ ‘‘ອຕິກ຺ກມ຺ມ ອຘິຠວິຕ຺ວາ ປວຕ຺ໂຕ’’ຕິ. ປຏິຄ຺ຄຓ຺ຫາຕູຕິ ອຘິວາສນວເສນ ສມ຺ປຏິຈ຺ຉຕູຕິ ອຕ຺ໂຖຕິ ອາຫ ‘‘ຂມຕູ’’ຕິ. ສເທວເກນ ໂລເກນ ນິສ຺ສຣຓນ຺ຕິ ອຣຓີຍໂຕ ອຣິໂຍ, ຕຖາຄໂຕຕິ ອາຫ ‘‘ອຣິຍສ຺ສ ວິນເຍຕິ ພຸທ຺ຘສ຺ສ ຠຄວໂຕ ສາສເນ’’ຕິ. ປຸຄ຺ຄລາຘິຏ຺ຐານໍ ກໂຣນ຺ໂຕຕິ ກາມໍ ‘‘ວຸທ຺ຘິ ເຫສາ’’ຕິ ຘມ຺ມາຘິຏ຺ຐານວເສນ ວາກ຺ຍໍ ອາຣທ຺ຘໍ, ຕຖາປິ ເທສນໍ ປນ ປຸຄ຺ຄລາຘິຏ຺ຐານໍ ກໂຣນ຺ໂຕ ‘‘ສໍວຣໍ ອາປຊ຺ຊຕີ’’ຕິ ອາຫາຕິ ໂຍຊນາ.

ສງ຺ກວາສຸຕ຺ຕວຓ຺ຓນາ ນິຏ຺ຐິຕາ.

ສມຓວຄ຺ຄວຓ຺ຓນາ ນິຏ຺ຐິຕາ.