໑-໕. ສມຓສຸຕ຺ຕາທິວຓ຺ຓນາ

໘໒-໘໖. ຈຕຸຕ຺ຖສ຺ສ ປຐເມ ສມ຺ມາ ອາທານໍ ຄຫຓໍ ສມາທານນ຺ຕິ ອາຫ ‘‘ສມາທານໍ ວຸຈ຺ຈຕິ ຄຫຓ’’ນ຺ຕິ. ອຘິກໍ ວິສິຏ຺ຐໍ ສີລນ຺ຕິ ອຘິສີລໍ. ໂລກິຍສີລສ຺ສ ອຘິສີລຠາໂວ ປຣິຍາເຍນາຕິ ນິປ຺ປຣິຍາຍເມວ ຕໍ ທສ຺ເສຕຸໍ ‘‘ອປິຈ ສພ຺ພມ຺ປິ ໂລກິຍສີລ’’ນ຺ຕິອາທິ ວຸຕ຺ຕໍ. ສິກ຺ຂິຕພ຺ພໂຕຕິ ອາເສວິຕພ຺ພໂຕ. ປຎ຺ຈປິ ທສປິ ວາ ສີລານິ ສີລໍ ນາມ, ປາຕິໂມກ຺ຂສໍວໂຣ ອຘິສີລໍ ນາມ ອນວເສສກາຍິກເຈຕສິກສໍວຣຠາວໂຕ ມຄ຺ຄສີລສ຺ສ ປທຏ຺ຐານຠາວໂຕ ຈ. ອຏ຺ຐ ສມາປຕ຺ຕິໂຍ ຈິຕ຺ຕໍ, ວິປສ຺ສນາປາທກຊ຺ຌານໍ ອຘິຈິຕ຺ຕໍ ມຄ຺ຄສມາຘິສ຺ສ ອຘິຏ຺ຐານຠາວໂຕ. ກມ຺ມສ຺ສກຕຎາຓໍ ປຎ຺ຎາ, ວິປສ຺ສນາ ອຘິປຎ຺ຎາ ມຄ຺ຄປຎ຺ຎາຍ ອຘິຏ຺ຐານຠາວໂຕ. ອປິຈ ນິພ຺ພານໍ ປຕ຺ຖຍນ຺ເຕນ ສມາທິນ຺ນໍ ປຎ຺ຈສີລໍ ທສສີລມ຺ປິ ອຘິສີລເມວ ນິພ຺ພານາຘິຄມສ຺ສ ປຈ຺ຈຍຠາວໂຕ. ນິພ຺ພານໍ ປຕ຺ຖຍນ຺ເຕນ ສມາປນ຺ນາ ອຏ຺ຐ ສມາປຕ຺ຕິໂຍປິ ອຘິຈິຕ຺ຕເມວ.

‘‘ກລ຺ຍາຓກາຣີ ກລ຺ຍາຓໍ, ປາປກາຣີ ຈ ປາປກໍ;

ອນຸໂຠຕິ ທ຺ວຍເມຕໍ, ອນຸພນ຺ຘຎ຺ຫິ ກາຣຓ’’ນ຺ຕິ. –

ເອວໍ ອຕີເຕ ອນາຄເຕ ຈ ວຏ຺ຏມູລກທຸກ຺ຂສລ຺ລກ຺ຂຓວເສນ ສໍເວຄວຕ຺ຖຸຕາຍ ວິມຸຕ຺ຕິອາກງ຺ຂາຍ ປຈ຺ຈຍຠູຕາ ກມ຺ມສ຺ສກຕປຎ຺ຎາປິ ອຘິປຎ຺ຎາຕິ ວທນ຺ຕິ. ທຸຕິຍຕຕິຍຈຕຸຕ຺ຖປຎ຺ຈມານິ ອຸຕ຺ຕານຕ຺ຖາເນວ.

ສມຓສຸຕ຺ຕາທິວຓ຺ຓນາ ນິຏ຺ຐິຕາ.