ນນ຺ທາເຖຣີວຕ຺ຖຸ

໒໔໐. ຉຏ຺ເຐ ອຎ຺ຎໍ ມຄ຺ຄໍ ອປສ຺ສນ຺ຕີຕິ ອຎ຺ຎໍ ອຸປາຍໍ ອປສ຺ສນ຺ຕີ. ວິສ຺ສຕ຺ຖາຕິ ນິຣາສງ຺ກາ. ອິຕ຺ຖິນິມິຕ຺ຕນ຺ຕິ ອິຕ຺ຖິຍາ ສຸຠນິມິຕ຺ຕໍ, ສຸຠາກາຣນ຺ຕິ ວຸຕ຺ຕໍ ໂຫຕິ. ຘມ຺ມປເທ ຄາຖໍ ວຕ຺ວາຕິ –

‘‘ອຏ຺ຐີນໍ ນຄຣໍ ກຕໍ, ມໍສໂລຫິຕເລປນໍ;

ຍຕ຺ຖ ຊຣາ ຈ ມຈ຺ຈຸ ຈ, ມາໂນ ມກ຺ໂຂ ຈ ໂອຫິໂຕ’’ຕິ. (ຘ. ປ. ໑໕໐) –

ອິມໍ ຄາຖໍ ວຕ຺ວາ. ຕຕ຺ຣາຍມຘິປ຺ປາໂຍ – ຍເຖວ ຫິ ປຸພ຺ພຓ຺ຓາປຣຓ຺ຓາທີນໍ ໂອທຫນຕ຺ຖາຍ ກຏ຺ຐານິ ອຸສ຺ສາເປຕ຺ວາ ວລ຺ລີຫິ ພນ຺ຘິຕ຺ວາ ມຕ຺ຕິກາຍ ວິລິມ຺ປິຕ຺ວາ ນຄຣສງ຺ຂາຕໍ ພຫິທ຺ຘາ ເຄຫໍ ກໂຣນ຺ຕິ, ເອວມິທໍ ອຊ຺ຌຕ຺ຕິກມ຺ປິ ຕີຓິ ອຏ຺ຐິສຕານິ ອຸສ຺ສາເປຕ຺ວາ ນ຺ຫາຣຸວິນທ຺ຘໍ ມໍສໂລຫິຕເລປນໍ ຕຈປຏິຈ຺ຉນ຺ນໍ ຊີຣຓລກ຺ຂຓາຍ ຊຣາຍ ມຣຓລກ຺ຂຓສ຺ສ ມຈ຺ຈຸໂນ ອາໂຣຄ຺ຍສມ຺ປທາທີນິ ປຏິຈ຺ຈ ອຸປ຺ປຊ຺ຊນລກ຺ຂຓສ຺ສ ມານສ຺ສ ສຸກຕກາຣຓວິນາສນລກ຺ຂຓສ຺ສ ມກ຺ຂສ຺ສ ຈ ໂອທຫນຕ຺ຖາຍ ນຄຣໍ ກຕໍ. ເອວຣູໂປ ເອວ ຫິ ເອຕ຺ຖ ກາຍິກເຈຕສິໂກ ອາພາໂຘ ໂອຫິໂຕ, ອິໂຕ ອຸທ຺ຘໍ ກິຎ຺ຈິ ຄຍ຺ຫູປຄໍ ນຕ຺ຖີຕິ.

ສຸຕ຺ຕໍ ອຠາສີຕິ –

‘‘ຈຣໍ ວາ ຍທິ ວາ ຕິຏ຺ຐໍ, ນິສິນ຺ໂນ ອຸທ ວາ ສຍໍ;

ສມິຎ຺ເຊຕິ ປສາເຣຕິ, ເອສາ ກາຍສ຺ສ ອິຎ຺ຊນາ.

‘‘ອຏ຺ຐິນຫາຣຸສໍຍຸຕ຺ໂຕ, ຕຈມໍສາວເລປໂນ;

ຉວິຍາ ກາໂຍ ປຏິຈ຺ຉນ຺ໂນ, ຍຖາຠູຕໍ ນ ທິສ຺ສຕີ’’ຕິ. (ສຸ. ນິ. ໑໙໕-໑໙໖) –

ອາທິນາ ສຸຕ຺ຕມຠາສິ.